FAMAHAʼÖ 6
Hadia Wanötöna ba Niha si No Mate?
1. Hadia duria somuso dödö sanandrösa ba niha si no mate?
Me so Yesu ba gulidanö, mate zi fahuwu khönia sotöi Lazaro. No öfa bongi Lazaro ba lewatö awena so Yesu. Möi Yesu ba lewatö Lazaro fao ndra Maria ba Marata talifusö Lazaro. Lö ara aefa daʼö, tohare niha sato. Khalaigö hewisa waʼomuso dödö Maria ba Marata me isusugi dalifusöra andrö Yesu.—Baso Yohane 11:21-24, 38-44.
No aboto ba dödö Marata duria somuso dödö sanandrösa ba niha si no mate. Isusugi Yehowa niha si no mate ba ifuli auri ira ba gulidanö.—Baso Yobi 14:14, 15.
2. Hewisa niha si no mate?
Imane Lowalangi khö Gadamo, ”Tanö saʼatö ndraʼugö ba si tobali tanö zui dania.”—I MOZE 3:19.
Tewöwöi niha moroi ba dambu. (I Moze 2:7; 3:19) Tenga boto eheha nibeʼe khöra. Yaʼita boto tanö andrö wa lö hadöi noso sauri na mate ita. Tebato göi wangere-ngera, andrö wa lö itörö tödö fefu zi no numalö. Daʼö wa löhadöi nidunö-dunö Lazaro meno maoso ia moroi ba ngai zimate, börö me niha si no mate lö hadia ia laʼila.—Baso Zinunö 146:4; Zangombakha 9:5, 6, 10.
Hadia ifakao Lowalangi niha si no mate ba galitö narako? Sura Niʼamoniʼö zangombakha wa niha si no mate lö hadia ia laʼila. Börö daʼö, alitö narako famahaʼö sofaya, tenga moroi khö Lowalangi. Ogoro Yehowa wamakao niha ba galitö ba lö irai tumbu ba dödönia.—Baso Yeremia 7:31.
Faigi video Hewisa Niha si No Mate?
3. Hadia tola fahuhuo khöda niha si no mate?
Niha si no mate lö larongo hadia ia ba lö laʼila fahuhuo. (Zinunö 115:17) Hizaʼi, so ndra malaʼika si lö sökhi. Fahuo-huo ira ba niha labaliʼö ira niha si no mate. (II Fetero 2:4) Itegu ita Yehowa enaʼö böi fahuhuo ita ba niha si no mate.—Baso V Moze 18:10, 11.
4. Haniha nisusugi dania?
Ato niha si no mate ifuli auri ira ba gulidanö. Niha samalua si lö sökhi börö wa löʼaboto ba dödöra Lowalangi ifuli tesusugi ira dania.—Baso Luka 23:43; Halöwö Zinenge 24:15.
Niha si no tesusugi tebeʼe khöra ginötö ba wamahaʼö yaʼira ba zi ndruhu sanandrösa khö Lowalangi enaʼö mamati ira khö Yesu ba laʼoʼö linia. (Famaʼeleʼö 20:11-13) Niha si no tesusugi ba samalua satulö la söndra waʼauri si lö aetu ba gulidanö sagötö faʼara.—Baso Yohane 5:28, 29.
5. Hadia zi tobali famahaʼö khöda ba wanusugi nifalua Yehowa?
So wanötöna ba niha si no mate wa ifuli tesusugi ira dania, börö me no mate Yesu Keriso salahida. Tobali, börö me so wanusugi, taʼila waʼomasi Yehowa ba faʼahakhö dödönia ita. Na tesusugi niha si no mate, haniha zi oföna öfalukhaisi?—Baso Yohane 3:16; Roma 6:23.
