Ero sambua agama so zangataʼufi Lowalangi. Omasi Lowalangi niha simane daʼö ba soso göi dödönia. Daʼö turia si sökhi. Alimagö sibai, oya zi lö sökhi ni falua ba döi agama. (II Korindro 4:3, 4; 11:13-15) Moloʼö turia si no murongo, so ösa agama fao ira ba wolawa samatörö, labunu niha, fasuwö ira ba lafakao ndraono. Fefu ngawalö zalua andre, daʼö zameʼe abula dödö ba niha samati khö Lowalangi.​—Baso Mataiʼo 24:3-5, 11, 12.

Agama sindruhu ifolakhömi Lowalangi. Agama sofaya ibusi dödö Lowalangi. Agama sofaya ifahaʼö zi lö hadöi ba Zura Niʼamoniʼö, duma-dumania, laböbögö zi lö duhu khö Lowalangi, ba famahaʼö faya sanandrösa ba niha si no mate. Hewaʼae simanö, omasi Yehowa na aboto ba dödö niha haniha ia ba hadia zi ndruhu sanandrösa khönia.​—Baso Hezekieli 18:4; I Timoteo 2:3-5.

Taʼandrö saohagölö, agama sofaya tebai ilimo Lowalangi. Iwaʼö, uʼomasiʼö Lowalangi ba sindruhuniasa ulidanö tana khö Gafökha niʼomasiʼönia. (Yakobo 4:4) Taromali Lowalangi zangumaʼö wa fefu agama sofaya lafotöi ia ”Babilona Sebua”. Me no aefa inönöi danö idanö ba götö Noakhi, ba daʼö ibörötaigö so nifotöi agama sofaya yaʼia daʼö moroi ba mbanua Mbabeli. Ba zi lö aratö, ihori fefu agama sofaya Lowalangi, si falimo ba samakao niha gulidanö.​—Baso Famaʼeleʼö 17:1, 2, 5, 16, 17; 18:8.

So duria si sökhi tanö böʼö nasa. Lö olifu Yehowa niha sangataʼufi yaʼia soroi ba dödö si so ba zi hawaʼoya agama ba zi sagörö ulidanö. Iheta ira Lowalangi moroi ba agama sofaya ba ifahaʼö ira ba zi ndruhu.​—Baso Mikha 4:2, 5.

Ahakhö dödö Yehowa niha sangomasiʼö si sökhi ba si duhu. Ifarou ira enaʼö laröi agama sofaya. Niha sangomasiʼö Lowalangi lafalalini gera-erara ba wangomusoiʼö tödönia.​—Baso Famaʼeleʼö 18:4.

Ba götö ndra nifahaʼö Yesu, me larongo duria somuso dödö ira sangataʼufi Lowalangi nifaʼema ndra sinenge Yesu, omuso sibai dödöra. Lafahaʼö ira ba lala waʼauri si sökhi moroi khö Yehowa. Daʼa lala waʼauri sangohahauʼö tödö, sameʼe fanötöna soʼahonoa. Tobali ira duma-duma khöda iadaʼa börö me lafondro-ndrongo duria si sökhi ba laʼofönaiʼö wamalua somasi Yehowa ba waʼaurira.​—Baso I Tesalonika 1:8, 9; 2:13.

Itema Yehowa niha sondröi agama sofaya ba iʼandrö enaʼö la faogö ira ba nahia gangowuloa ndra samati khönia. Na öfondro-ndrongo li Yehowa ba wogaoni yaʼugö, tobali ndraʼugö si fahuwu khönia, samösa moroi ba gotalua ndra samosumange töinia, ba ösöndra waʼauri si lö aetu.​—Baso Mareko 10:29, 30; II Korindro 6:17, 18.

Omuso dödöda me lö aratö tehuku agama sofaya. Lö saʼae ifaelungu ba lö ifabali dödö niha gulidanö. Fefu niha teʼosambuaʼö ira ba wamosumange Lowalangi sindruhu si ha samösa.​—Baso Famaʼeleʼö 18:20, 21; 21:3, 4.