FAMAHAʼÖ 2
Haniha Lowalangi?
1. Hana wa sinangea tafosumange Lowalangi?
Lowalangi si ndruhu yaʼia zamazökhi fefu hadiaʼia. Si lö böröta ba amozua. (Zinunö 90:2) Khönia moroi duria si sökhi ba Zura Niʼamoniʼö. (I Timoteo 1:11) Börö me Lowalangi zameʼe khöda faʼauri, hayaʼia zinangea tafosumange.—Baso Famaʼeleʼö 4:11.
2. Hadia manö gamuata Lowalangi andrö?
Samösa lö niha sangila Lowalangi börö me yaʼia boto Eheha, eluahania faʼaurinia faböʼö moroi ba waʼauri niha gulidanö. (Yohane 1:18; 4:24) Aboto ba dödöda gamuata Lowalangi moroi ba nifazökhinia. Duma-dumania, ngawalö mbunga ba bua zinanö zangoromaʼö wa sebua faʼomasi ia ba satua-tua. Famazökhinia banua awö danö daʼö zangoromaʼö faʼabölönia.—Baso Roma 1:20.
Na tabaso Zura Niʼamoniʼö awena oya taʼila gamuata Lowalangi. Duma-dumania Sura Niʼamoniʼö zangombakha khöda hadia zomasi Lowalangi ba hadia zi fatuwu ia, hewisa lagunia ba niha ba hewisa dödönia na so zagalua.—Baso Zinunö 103:7-10.
3. Hadia so döi Lowalangi?
Heʼoya döinia ba halöwö, ba hasambua döinia si ndruhu. Iʼombakhaʼö khöda döinia, imane wangumaʼö, ”Yaʼo Yehowa daʼö döigu.” (Yesaya 42:8) No faböʼö-böʼö wanötöi töinia ba zi hawaʼoya ngawalö li. Ba li khöda töinia ”Yehowa”. So göi zanötöi ”Yahwe”.—Baso Zinunö 83:1983:18.
Töi Lowalangi no laheta ba mbuku Niʼamoniʼö ba la gati simane Soʼaya ma Lowalangi. Me tesura mbuku Niʼamoniʼö, töi Lowalangi so 7.000 waʼoya. Me ifahaʼö niha Yesu, iʼombakhaʼö ha niha döi Lowalangi.—Baso Yohane 17:26.
Faigi video Hadia So Döi Lowalangi?
4. Hadia iʼomasiʼö ita Yehowa?
Hulö simane satua sebua faʼomasi, simanö göi Lowalangi, si sökhi khöda nifaluania
Börö meʼoya ngawalö gabula dödö, hadia lö iʼomasiʼö ita Yehowa? Ato niha sangumaʼö na göna ita fanandraigö, moroi khö Lowalangi. Lö atulö daʼö.—Baso Yakobo 1:13.
Lö ifaso niha Lowalangi hadia zomasi ira lafalua. Tatu manö taʼandrö saohagölö khönia. (Yosua 24:15) Hizaʼi, ato niha zamalua si lö sökhi khö nawönia. Daʼö mbörö waʼoya sibai gabula dödö. Afökhö dödö Yehowa wamaigi si lö atulö andrö.—Baso I Moze 6:5, 6.
Yehowa Lowalangi sangomasiʼö yaʼita, omasi ia enaʼö tasöndra waʼauri. Ba zi lö aratö, iheta fefu ngawalö gabula dödö. So mbörö wa itehegö alua wamakao iadaʼa. Ba numero 8 ba daʼö iʼombakhaʼö khöda hadia wanema li.—Baso II Fetero 2:9; 3:7, 13.
5. Hewisa lala enaʼö ahatö ita khö Lowalangi?
Iʼandrö khöda Yehowa enaʼö ahatö ita khönia ba wangandrö. So so sa dödönia ita. (Zinunö 65:3; 145:18) Iʼefaʼö golalöwada. Omasi ia na tabeʼe khönia zumange hewaʼae na asese fasala ita. Tobali, hewaʼae lö moʼahonoa ita, tola tobali si fahuwu khö Lowalangi ita.—Baso Zinunö 103:12-14; Yakobo 4:8.
Börö me Yehowa zomböi faʼaurida, enaʼö ebua waʼomasida ia moroi ba waʼomasida nawöda niha. (Mareko 12:30) Oromaʼö waʼomasiu khö Lowalangi yaʼia daʼö fahaʼö ndraʼugö ba Daromalinia ba falua hadia niʼandrönia. Naʼöfalua daʼö itugu ahatö ndraʼugö khö Lowalangi.—Baso I Timoteo 2:4; I Yohane 5:3.
