FAMAHAʼÖ 4
Haniha Yesu Keriso?
1. Hewisa mböröta waʼauri Yesu?
Hadia manö gamuata Yesu wa tola ahatö khönia niha?—MATAIʼO 11:29; MAREKO 10:13-16.
Yaʼia ziaʼa nifazökhi Lowalangi. Tenga simane niha gulidanö, ba zorugo auri Yesu fatua lö möi ia ba gulidanö. (Yohane 8:23) Tenga iraʼalawe zoʼadonogö yaʼia ba zorugo. Lowalangi Yehowa zamazökhi yaʼia. Tobali, lafotöi Yesu ono Lowalangi. Lafotöi ia göi ”Taromali” börö me yaʼia ngoni-ngoni Lowalangi. (Yohane 1:14) Fao Yesu ba wamazökhi tanö böʼö.—Baso Gamaedola 8:22, 23, 30; Kolose 1:15, 16.
2. Hana wa möi Yesu ba gulidanö?
Ifatenge nononia Lowalangi ba gulidanö yaʼia me ifawuʼa waʼauri Yesu ba dalu Maria ono alawe niha Yehuda. Börö zimanö, lö hadöi ama Yesu niha gulidanö. (Luka 1:30-35) Wa möi Yesu ba gulidanö (1) ba wamahaʼö sindruhu sanandrösa khö Lowalangi, (2) ibeʼe duma-duma ba wamalua somasi Lowalangi hewaʼae afökhö, ba (3) ba wameʼe faʼaurinia tobali ”höli” zato.—Baso Mataiʼo 20:28.
3. Hana wa moguna khöda höli?
Fangöhöli andrö zamuʼa ba sangefaʼö niha moroi ba waʼamate. (II Moze 21:29, 30) Meʼiwöwöi niha Lowalangi, lö irai omasi ia na atua ba mate ira. Hadia dandra khöda? Imane Lowalangi ba niha si föföna, Adamo, na ifalua ”horö” niwaʼö Zura Niʼamoniʼö, lö fulitö mate ia. Tobali, na lö fasala Gadamo, löʼirai itörö waʼamate. (I Moze 2:16, 17; 5:5) Moloʼö Sura Niʼamoniʼö, wa ”itörö” faʼamate niha gulidanö börö Gadamo. Ngaʼötönia, latörö wanguhuku yaʼia daʼö faʼamate. Moguna khöda wangöhöli ba fangefaʼö moroi ba huku faʼamate horö ondröita Gadamo.—Baso Roma 5:12; 6:23.
Haniha zi tola mangefaʼö yaʼita moroi ba waʼamate? Na mate ita, tabuʼa horö nifaluada. Niha si lö moʼahonoa, tebai ibuʼa horö nawönia niha.—Baso Zinunö 49:8-10.
4. Hana wa itörö waʼamate Yesu?
Tenga simane yaʼita, Yesu moʼahonoa. Andrö faʼatumbunia sahöli-höli dödö. Lö irai ifalua horö. Ba hiza, mate ia tenga börö horönia samösa, börö horö niha gulidanö. Lowalangi zamatenge yaʼia börö me omasi ia niha gulidanö. Iʼoromaʼö waʼomasinia khöda Yesu me ifalua zomasi namania ba ibeʼe nosonia salahida.—Baso Yohane 3:16; Roma 5:18, 19.
Faigi video Hana Wa Itörö Waʼamate Yesu?
5. Hadia nifalua Yesu iadaʼa?
Me so ia ba gulidanö, ifadöhö zofökhö, isusugi niha si no mate, ba itolo niha si tosasa. Börö zimanö, iʼombakhaʼö hadia nifaluania ba zi so föna ba niha soloʼö khönia. (Mataiʼo 15:30, 31; Yohane 5:28) Me no aefa mate Yesu, isusugi ia Lowalangi tobali boto eheha. (I Fetero 3:18) Aefa daʼö, mudadao Yesu ba gambölö namania ibaloi ginötö nitehegö khönia ba wamatörö tobali Razo ba gulidanö. (Heberaiʼo 10:12, 13) Iadaʼa, no tobali Razo Yesu ba zorugo, ba laturiaigö duria somuso dödö ira nifahaʼönia ba zi sagörö ulidanö.—Baso Danieli 7:13, 14; Mataiʼo 24:14.
Lö aratö, iʼogunaʼö waʼabölönia Yesu ba wangeheta faʼatosasa awö niha samobörö famakao. Fefu niha samati khö Yesu lasöndra waʼauri si lö aetu ba gulidanö faradaiso na laʼoʼö zomasi ia.—Baso Zinunö 37:9-11.
