FAMAHAʼÖ 10
Hezo Lala Sofeta Khö Zomböi Yaʼita?
1. Hadia ha sara lala saekhu khö Lowalangi?
”Miʼangelamaisi zamaʼeleʼö sofaya andrö.”—MATAIʼO 7:15.
Ifahaʼö Yesu niha sangomasiʼö Lowalangi, wa hasara lala ba hasambua agama si ndruhu. Ifoʼamaedola simane lala ba wogamö faʼauri si lö aetu. Imane Yesu ’lö ato zi tola manöndra’ yaʼia. (Mataiʼo 7:14) Awai zomasi Lowalangi ha samosumange yaʼia si tefaudu moloʼö Taromalinia. Dozi niha sanörö lala si ndruhu ba wamosumange Lowalangi lafalua zomasi ia.—Baso Yohane 4:23, 24; 14:6; Efeso 4:4, 5.
Faigi video Hadia Ahori Itema Fefu Wamosumange Lowalangi?
2. Hadia niwaʼö Yesu ba niha Keriso faya?
”Lawaʼö föna zato wa noʼaboto ba dödöra Lowalangi, ba bambua-buara laʼosilöʼögö ia.”—DITO 1:16.
Ifangelama ira Yesu wa so zamaʼeleʼö sofaya sotaʼunöisi niha keriso si ndruhu. Moroi baero, ba wamaigida hulö soloʼö khö Lowalangi. Ato niha lawaʼö wa yaʼira niha Keriso si ndruhu. Hadia atulö niwaʼöra andrö? Hezo taʼila niha Keriso si ndruhu? Oroma ba gamuata ba bambua-buara si sökhi.—Baso Mataiʼo 7:13-23.
3. Hewisa wa taʼila niha Keriso si ndruhu?
So lima ngawalö dandra niʼilada:
-
Niha Keriso si ndruhu laʼoʼö niwaʼö Zura Niʼamoniʼö, börö me Sura Niʼamoniʼö andrö Taromali Lowalangi. Laʼodödögö wamalua ba waʼaurira goi-goi Daromalinia. Tobali, agama si ndruhu tenga simane agama niʼodane-dane ba wangera-ngera niha. (Mataiʼo 15:7-9) Niha keriso si ndruhu lafalua ba waʼaurira hadia nifahaʼöra ba niha.—Baso Yohane 17:17; II Timoteo 3:16, 17.
-
Niha Keriso si ndruhu lafosumange döi Lowalangi, Yehowa. Ira samaʼeleʼö meföna simane Moze ba Dawido laʼila ba laʼogunaʼö döi Lowalangi. (II Moze 3:15; Zinunö 8:2) Ifosumange göi döi Lowalangi Yesu, yaʼia me iʼombakhaʼö ba niha tanö böʼö. Itolo niha enaʼö aboto ba dödöra Lowalangi ifahaʼö ira ba wangandrö enaʼö teʼamoniʼö döi Lowalangi. (Mataiʼo 6:9) Ba zi tefasui yaʼugö, haniha zangombakha töi Lowalangi ba niha böʼö?—Baso Yohane 17:26; Roma 10:13, 14.
-
Ira nifahaʼö Yesu laturiaigö Mbanua Lowalangi. Lowalangi zamatenge Yesu ba wangombakha turia somuso dödö sanadrösa ba Mbanua Lowalangi. Ha Famatörö Lowalangi zameʼe fanötöna ba niha. Andrö wa idunö-dunö daʼö Yesu irugi waʼamatenia. (Luka 4:43; 8:1; 23:42, 43) No iwaʼö Yesu wa ira nifahaʼönia zanuriaigö turia Mbanua Lowalangi andrö. Na so niha sangondrasi yaʼugö ba itutunö khöu Mbanua Lowalangi andrö, hadia agama niha daʼö?—Basa Mataiʼo 24:14.
-
Ira nifahaʼö Yesu lö fao ira ba niha gulidanö si lö sökhi. Aoha khöu wangila yaʼira börö me lö fao ira ba gangowuloa si lö faʼawö khö Lowalangi mazui ba waʼaniha. (Yohane 17:16; 18:36) Baero daʼö lö lagoʼö gamuata ma bua-bua niha si lö sökhi ba gulidanö andre.—Baso Yakobo 4:4.
-
Ira nifahaʼö Yesu laʼomasiʼö nawöra. Ifahaʼö ira Taromali Lowalangi enaʼö lafosumange fefu niha moroi ba ngawalö soi. Agama sofaya asese fao ira ba wasuwöta. Hewaʼae simanö niha keriso si ndruhu lö lafaogö ira wamalua daʼö. (Mikha 4:1-3) Hizaʼi, ira soloʼö khö Yesu lö awöli-wöli ira ba wangogunaʼö inötö, faʼabölö, ba wanolo ba bawondrara tödö niha böʼö.—Baso Yohane 13:34, 35; I Yohane 4:20.
4. Hadia aboto ba dödöu agama si ndruhu?
Moloʼö yaʼugö, hezo agama siʼodane-dane Zura Niʼamoniʼö, samosumange töi Lowalangi, ba sanuriaigö turia Mbanua Lowalangi si tobali tötönafö ba niha gulidanö? Angowuloa haniha zangoromaʼö faʼomasi ba si lö fao ba wasuwöta?—Baso I Yohane 3:10-12.
