Omasi Lowalangi na fefu niha moroi ba ngawalö soi mangandrö khönia. (Zinunö 65:3) Lö fefu wangandrö itema ba ifondro-ndrongo Lowalangi. Duma-dumania, na so ndra matua sangandrö khö Lowalangi, ba na lö sökhi gamuatania khö woʼomonia ira alawe, lö tefondro-ndrongo wangandrönia. (I Fetero 3:7) Simanö göi, me lafalua zi lösökhi iraono Gizaraʼeli, Lö omasi Lowalangi ifondro-ndrongo wangandröra. Ba daʼö taʼila, wa fangandrö andre buala faʼebua dödö Lowalangi khöda. Ifondro-ndrongo wangandrö niha sebua horö Lowalangi na so khöra wamalalini era-era.​—Baso Yesaya 1:15; 55:7.

Faigi video Hadia Fefu Wangandrö Ifondrondrongo Lowalangi?

Fangandrö no sambua lala wamosumange Lowalangi. Ha khö Yehowa mangandrö ita me yaʼia zomböi yaʼita. (Mataiʼo 4:10; 6:9) Aefa daʼö, börö me yaʼita niha si lö moʼahonoa, sinangea mangandrö ita ba döi Yesu si no mangöhöli yaʼita moroi ba horö. (Yohane 14:6) Lö omasi Yehowa wangandrö nitanö ba dödö, mazui nibaso. Omasi ia na mangandrö ita soroi ba dödö.​—Baso Mataiʼo 6:7; Filifi 4:6, 7.

Fangandrö bakha ba dödö tola ifondro-ndrongo Lowalangi. (I Samueli 1:12, 13) Gofu hadia ginötö tola mangandrö ita khönia, duma-dumania sihulö wongi, tanö owi, fatua lö manga, mazui naso gabula dödö.​—Baso Zinunö 55:23; Mataiʼo 15:36.

Oya zi tobali taha-taha ba wahuwusada khö Lowalangi, börö me ba gotalua niha si lö mamati so ita, ba sangoʼaya Lowalangi lö faduhu dödöra ba zi no ifabuʼu andrö yaʼia daʼö wa iʼaʼasogö waʼatulö ba gulidanö. (II Timoteo 3:1, 4; II Fetero  3:3, 13) Andrö wa moguna owulo ita enaʼö faoma tafarou dödö nawöda.​—Baso Heberaiʼo 10:24, 25.

Na fariawö ita ba niha sangomasiʼö Lowalangi, tedou wahuwusada khö Lowalangi. Ba nahia gangowuloa ndra Samaduhuʼö Yehowa tola tefarou dödöda zamösana ba wamati.​—Baso Roma 1:11, 12.

Tola tobali ndraʼugö si fahuwu khö Lowalangi na öʼangerönusi hadia zi no öfahaʼö yaʼugö ba Daromalinia. Angeraigö sibai moroi ba dödöu nifaluania, mene-mene, ba si no ifabuʼu. Na mangandrö ita ba taʼangerönusi, itugu tedou wangomasiʼöda faʼatua-tua Lowalangi.​—Baso Yosua 1:8; Zinunö 1:1-3.

Itugu tedou wahuwusau khö Lowalangi na faduhu dödöu ba mamati ndraʼugö khönia. Tobali, famati no amaedola zinanö moguna muhawui idanö ero inötö enaʼö alio tedou. Eluahania ödouʼö wamatiu ba angerönusi zi ndruhu, si tobali dane-dane wamati.​—Baso Mataiʼo 4:4; Heberaiʼo 11:1, 6.

Ahakhö dödö Yehowa niha sangomasiʼö yaʼia. Tola ilumöʼö na so zanandraigö famatira ba fanötönara ba waʼauri si lö aetu. (Zinunö 91:1, 2, 7-10) Ifangelama enaʼö taʼaröuʼö ita ba gamuata si tola mamakiko botoda ba sotayaigö faʼohahau dödöda. Ifahaʼö ita Yehowa enaʼö sökhi lala waʼaurida.​—Baso Zinunö 73:27, 28; Yakobo 4:4, 8.