Na asese öfadunö-dunö wamahaʼö moroi ba Zura Niʼamoniʼö, tatu manö wa itugu tedou waʼomasiu khö Yehowa. Moguna nasa ödouʼö waʼomasi simanö. (I Fetero 2:2) Na öʼodödögö wamahaʼö yaʼugö ba Zura Niʼamoniʼö enaʼö tobali si fahuwu khö Lowalangi, ba tola ösöndra waʼauri si lö aetu.​—Baso Yohane 17:3; Yuda 21.

Na lö öböhöli wangalui faʼaboto ba dödö sanandrösa khö Lowalangi, monönö waʼaro wamatiu. Na so khöu wamati, omuso dödö Lowalangi. (Heberaiʼo 11:1, 6) Famati andrö zangoʼou yaʼugö enaʼö so khöu wamalalini era-era ba öfalua zi sökhi ba waʼauriu.​—Baso Halöwö Zinenge 3:19.

Tatu manö waʼomasiʼö öfatunö ba niha böʼö zi no aboto ba dödöu. Fefu ita omasi tadunö-dunö duria somuso dödö. Na ötohugö wamahaʼö yaʼugö ba Zura Niʼamoniʼö, aboto ba dödöu hewisa wangogunaʼö Sura Niʼamoniʼö na öfatunö ba niha zi no öʼila sanandrösa khö Yehowa, ba turia somuso dödö andrö khönia.​—Baso Roma 10:13-15.

Ato niha sanutunö turia somuso dödö khö ndra si fahuwu khöra. Onekhesi wamalua yaʼia. Böi waʼö sala agamami andrö. Dunö-dunö manö hadia zi no ifabuʼu Lowalangi khöra. Törö tödöu, wa abölö latöngöni gamuata si sökhi moroi ba wehede.​—Baso II Timoteo 2:24, 25.

Na ötohugö wamahaʼö yaʼugö ba Daromali Lowalangi, tola tedou ndraʼugö ba wamati. Ba gafuriatania, aro wahuwusau khö Yehowa. Tobali ndraʼugö okhötania ba ono Lowalangi.​—Baso II Korindro 6:18.

Tola tedou ndraʼugö ba wamati na lö öbato wamahaö yaugö ba Daromali Lowalangi. (Heberaiʼo 5:13, 14) Waʼö fazamösa ndra Samaduhuʼö Yehowa ba wamahaö yaugö moroi ba mbuku Apa yang Sebenarnya Alkitab Ajarkan? (Lö hadöi ba bahasa Nias) Na itugu oya öfahaʼö ndraʼugö ba Daromali Lowalangi, itugu monönö wa ohahau dödöu.​—Baso Zinunö 1:1-3; 73:27, 28.

Moroi khö Yehowa duria somuso dödö, Lowalangi wa ohahau dödö. Tola tobali ndraʼugö si fahuwu khönia na fariawö ndraʼugö ba nono mbanuania. (Heberaiʼo 10:24, 25) Na öʼodödögö wangomusoiʼö tödö Yehowa, tola ökhamö waʼauri si ndruhu yaʼia daʼö, faʼauri si lö aetu. Lö hadöi ohitö dödö sabölö sökhi baero wahuwusada khö Lowalangi.​—Baso I Timoteo 1:11; 6:19.