Omuso dödö zi no mongambatö na tumbu khöra ndraono, ba monönö göi wa’oya halöwöra. Na awena tobali ami satua, te lö midöna-döna wa oya ginötö, fa’abölö sahori ba wondrorogö ono sawuyu. Börö na ambö femörö, itaria alio mofönu, irege lö fahede ami khö nawömi. Ya’ami si darua zamaigi hadia zinangea mifalua ba wondrorogö ono sawuyu ba ba wondrorogö fongambatömi. Hewisa goi-goi Zura Ni’amoni’ö wanolo ya’ami?

HADIA NIWA’Ö ZURA NI’AMONI’Ö: ”Fa’omasi andrö ba no sebolo tödö, no sebua tödö.” Aefa da’ö, fa’omasi andrö ”lö i’alui dana khönia, lö mofönu ia.” (I Korindro 13:4, 5) Na awena tumbu ndraono, sinangea na fo’omo ira alawe abölö i’osinangegö nononia sawena tumbu. Ibörögö tumbu ba dödö wo’omo ira matua wa i’osiwawöi ia fo’omonia ira alawe. Böi olifu ndra’ugö wa sinangea ö’osinangegö göi wo’omou ira matua. Alui lala ena’ö i’ila wa ö’osinangegö ia, faogö ia ba wondrorogö iraonomi sawena tumbu.

”Simanö göi ndra matua . . . mihaogö wa’orudu ba ndra alawemi, me no öna-öna wa’abölöra.” (I Fetero 3:7) Moguna aboto ba dödöu wa’erege dödö wo’omo ira alawe ba wondrorogö onomi sawena tumbu. Monönö wa’oya halöwönia irege alangu dödönia, marase ia, ba itaria i’ofökhöi wa’erege dödönia. Tola manö itaria abao dödönia khöu. Tobali, böi busi dödöu, börö me ”yawa zabölö zebolo tödö”. (Gamaedola 16:32) Oroma’ö wa’ahakhö dödö ba ötolo ia.—Gamaedola 14:29.

SI TOLA ÖFALUA:

• Ama: Tolo wo’omou ira alawe ba wondrorogö onomi sawena tumbu, he na ba zi bongi. Alösi ginötöu ba halöwöu tanö bö’ö ena’ö oya ginötö sitola öbe’e khö wo’omou ba khö nonomi

• Ina: Böi timbagö na itolo ndra’ugö fo’omou ira matua ba wondrorogö onomi sawena tumbu. Na lö fao ba dödöu nifaluania, böi fatahi-tahi, haogö wanguma’ö khönia hezo zi sökhi

HADIA NIWA’Ö ZURA NI’AMONI’Ö: ”Ha sambua boto ira.” (I Moze 2:24) Hewa’ae no so nonomi, törö tödöu wa ”ha sambua boto” ami ngambatöu. Odödögö wanga’aro’ö fahuwusami.

Fo’omo ira alawe, andrö saohagölö me no itolo ndra’ugö ngambatöu. Na öfosumange ia, da’ö zi tobali ”dalu-dalu”, eluahania si tola manga’aro’ö fahuwusami ba zalua andre. (Gamaedola 12:18) Fo’omo ira matua, fatunö khö ngambatöu wa ö’omasi’ö ba öfosumange ia. Suno halöwö si no ifalua yomo ba nomo.—Gamaedola 31:10, 28.

”Böi ya mu’alui zoguna khönia zamösana, soguna khö nawönia ya mu’alui.” (I Korindro 10:24) Böi bato wamalua si sökhi khö ngambatöu. Mibe’e ginötömi ba zi ha darua ami ba wahuhuosa, ba wosuno si no mifalua zamösana, ba faoma mifondro-ndrongo wehede nawömi. Ba wa’orudu, böi ha somasi ndra’ugö öfalua. Angeraigö hadia zomasi ngambatöu göi. Imane Sura Ni’amoni’ö, ”böi mifabali ami khö nawömi, hatö na lö ara na ha sara limi.” (I Korindro 7:3-5) Mifatunösi da’a ba zi ha darua ami, si lö fawini tödö. Fa’aboto ba dödö ba fa’ebolo dödö zanga’aro’ö fahuwusami.

SI TOLA ÖFALUA:

• Böi olifu ndra’ugö wame’e inötö ba zi ha darua ami

• Be’e mbuala side-ide khö ngambatöu si tobali tandra wa ö’omasi’ö ia, fa’ohe’ö khönia mbunga mazui boneka

HADIA NIWA’Ö ZURA NI’AMONI’Ö: ”Awö wa no ö’ila Zura Ni’amoni’ö andrö, i’otarai iraono ndra’ugö, sangila mangatua-tua’ö ya’ugö ba wangalui fangorifi.” (II Timoteo 3:15) Henaigö mi’angeraigö hewisa wamaha’ö iraonomi. Tola itema wamaha’ö iraono si so ba dalu, tola irongo limi ba tola irasoi hadia zalua khömi. Baso-baso mbuku ba ndraono sawena tumbu. Hewa’ae lö i’ila geluaha nasa, tola omasi ia wombaso-mbaso dania na no ebua ia.

Böi öwa’ö tödöu lö i’ila geluaha nasa iraono sawuyu na ufatunö khönia sanandrösa khö Lowalangi. Faogö ia na mangandrö ndra’ugö khö Yehowa. (V Moze 11:19) Ba ginötö famai-mai ndra’ugö khönia, fatunö nifazökhi Lowalangi. (Zinunö 78:3, 4) Itugu tedou wa’ebuania, i’ila hewisa wa’omasimi khö Yehowa, ba ifomaha ia wangomasi’ö Yehowa göi.

SI TOLA ÖFALUA:

• Andrö wanuturu lala khö Lowalangi ba wamaha’ö onou

• Asese’ö wanötöi tuho nifaha’ömö ya’ia ena’ö tola tefamaha ia i’otarai wa’ide-idenia