Lowalangi Yehowa * zanga’asogö fongambatö si föföna. Imane ba Zura Ni’amoni’ö, ifazökhi ndra alawe Yehowa ba ”ifasao ba niha”. Omuso sibai dödö Gadamo, andrö imane, ”Töla föfö dölagu da’ö ba nagole föfö nagolegu.” (I Moze 2:22, 23) Omasi Yehowa na ohahau dödö zi no mongambatö ba ginötö andre.

Na mangowalu ndra’ugö, te ökhalaigö wa ohahau manö dödömi ba wongambatö. Si ndruhunia hewa’ae faoma la’omasi’ö nawöra si no mongambatö, göna ira fangabu dödö. (I Korindro 7:28) Ba mbuku andre, so goi-goi moroi ba Zura Ni’amoni’ö, na öfalua ia, ohahau dödöu ba wongambatöu.—Zinunö 19:9-12.

HADIA NIWA’Ö ZURA NI’AMONI’Ö: Fo’omo ira matua zi tobali högö ba nomo.—Efeso 5:23.

Na fo’omo ira matua ndra’ugö, i’andrö khöu Yehowa ena’ö öhaogö-haogö khö ngambatöu. (I Fetero 3:7) Ibe’e wo’omo ira alawe si faböbö khöu, ba omasi Lowalangi na ö’omasi’ö ba öfosumange wo’omou. (I Moze 2:18) Ö’omasi’ö sibai wo’omou, irege ö’ofönai’ö zomasi ia moroi ba zomasi ndra’ugö.—Efeso 5:25-29.

Na fo’omo ira alawe ndra’ugö, i’andrö khöu Yehowa ena’ö öfosumange ngambatöu, ba ötolo ia ba wamalua halöwönia ba wondrönia’ö ba nomo. (I Korindro 11:3; Efeso 5:33) Tuhini gangetula nihalönia, ba falulu fohalöwö khönia soroi ba dödö. (Kolose 3:18) Na öfalua da’ö, sökhi ndra’ugö ba wamaigi wo’omou hegöi ba wamaigi Yehowa.—I Fetero 3:1-6.

SI TOLA ÖFALUA:

• Sofu khö ngambatöu hewisa ena’ö tobali fo’omo ira matua mazui fo’omo ira alawe si sökhi ndra’ugö. Haogö fondro-ndrongo ba odödögö wamalalini amuatau

• Mibase’ö. Ara ginötö ni’oguna’ö ba wangalui lala hewisa ena’ö faoma mi’ohahau’ö dödö nawömi

HADIA NIWA’Ö ZURA NI’AMONI’Ö: Moguna mi’ame’egö tödö zoguna khö ngambatömi. (Filifi 2:3, 4) Böi afökhöi’ö dödönia börö me niha sabölö ö’omasi’ö ia. Törö tödöu wa omasi Yehowa na fefu zolo’ö khönia ’lahaogö lira ba niha fefu’. (II Timoteo 2:24) ”So ösa zi falela-lela manö, ba hulö nikhu gari; ba lela zatua-tua, ba no dalu-dalu”. Andrö, angenanöi na muhede’ö. (Gamaedola 12:18) Itolo ndra’ugö eheha Yehowa ena’ö sökhi wehedeu ba so khöu wa’omasi.—Galatia 5:22, 23; Kolose 4:6.

SI TOLA ÖFALUA:

• Angandrö ena’ö so khöu dödö sohau-hau ba teboka wangera-ngerau fatua lö öfatunö zi so ba dödöu khö ngambatöu

• Angeraigö ua fatua lö öwa’ö niwa’öu

HADIA NIWA’Ö ZURA NI’AMONI’Ö: Me no mangowalu ndra’ugö, ”ha sambua boto” ami wo’omou. (Matai’o 19:5) Hiza’i, lö fagölö manö ni’era-erami. Andrö, mifamaha ami ena’ö so khömi wahasara dödö. (Filifi 2:2) Moguna sibai da’a na so gangetula nihalömi. Imane Sura Ni’amoni’ö, ’Mowua na so wamagölö.’ (Gamaedola 20:18) Ya tobali fanuturu lala khöu goi-goi Zura Ni’amoni’ö ba ginötö mihalö gangetula.—Gamaedola 8:32, 33.

SI TOLA ÖFALUA:

• Baero wa faoma mifatunö hadia zalua khömi, mifatunö göi hadia zi so ba dödömi

• Fatua lö öhalö gangetula, fatunö ua khö ngambatöu