Moguna khöda gefe ba wombönökhi soguna ba nösi nomoda. (Gamaedola 30:8) Gofu hadia zalua, ”ba’a-ba’a zino göi gana’a”. (Zangombakha 7:12) Te abua ba zi no mongambatö wamatunö kefe, hiza’i, böi kefe zanga’asogö fasosota ba wongambatömi. (Efeso 4:32) Faoma mifaduhusi tödö nawömi, ba mihalö wahasara dödö hewisa wangoguna’ö kefe.

HADIA NIWA’Ö ZURA NI’AMONI’Ö: ”Haniha sa ba khömi, zedöna mangotomosi malige si lö dumadao ua mangerai balazo, na irugi ba wamalua ya’ia?” (Luka 14:28) Moguna so khömi wahasara dödö ba wangoguna’ö kefe. (Gamosi 3:3) Mihalö gangetula hadia zinangea mi’öli, ba ha wa’oya zaetu böli khömi. (Gamaedola 31:16) Böi mi’öli gama-gama ha börö me ebua gefemi. Böi mo’ömö ami. Böi mi’öli zambö moroi ba gefe si so khömi.—Gamaedola 21:5; 22:7.

SI TOLA ÖFALUA:

• Na so zi toröi gefemi na no ahori mbaŵa, mihalö wahasara dödö hezo mi’oguna’ö gefe andrö

• Ba na ambö kefemi na no ahori mbaŵa, mihaogö wangerai kefemi ena’ö tola mi’alösi wowöli hadia ia. Duma-dumania, sökhi na mondrino samösa ami, moroi na mi’öli gömi baero

HADIA NIWA’Ö ZURA NI’AMONI’Ö: Moguna sibai ’na ta’alui zoguna khöda tenga ha ba zanehe Yehowa, ba zanehe niha göi’. (II Korindro 8:21) Fatunö khö wo’omou ha’uga gefe nisöndrau ba ha’uga göi zi no ö’oguna’ö.

Böi tebulö wa öfatunö khö ngambatöu na öhalö gangetula ba wangoguna’ö kefe. (Gamaedola 13:10) Da’a zi tola mangohahau’ö tödömi ba wongambatö. Törö tödöu wa fangaluimö tenga ha khöu samösa tobali soguna ba nösi nomou fefu.—I Timoteo 5:8.

SI TOLA ÖFALUA:

• Mihalö wahasara dödö hawa’ebua gefe si tola mi’oguna’ö samösa, he lö mifatunö khö ngambatömi

• Mi’anemai’ö mifatunö zo’amakhaita ba gefemi, böi mibaloi wa so gabula dödö