Tatu manö no ö’odödögö wangalui lala ena’ö so wa’ohahau dödö ba nösi nomou hegöi ba wongambatöu. Hiza’i, tola manö alua gabula dödö si lö mudöna-döna sanaisi fa’ohahau dödömi ba nomo. (Zangombakha 9:11, NW) Ibe’e wanolo Lowalangi ena’ö tola tataögö. Na ö’o’ö goi-goi Zura Ni’amoni’ö andre, tola mitaögö gofu hadia gabula dödö salua.

HADIA NIWA’Ö ZURA NI’AMONI’Ö: ”Mibe’e balazi ia na so zabu dödömi, gofu hadia ia, so so sa dödönia ami.” (I Fetero 5:7) Törö tödöu wa tenga moroi khö Lowalangi gabula dödö salua khöu. (Yakobo 1:13) Na fahuwu ndra’ugö khönia, ifolala dödöu. (Yesaya 41:10) ”Mibokai dödömi khönia.”—Zinunö 62:9.

Tola ohahau dödöu na öbaso Zura Ni’amoni’ö ero ma’ökhö. Lua-luania, ösöndra wondrara dödö moroi khö Yehowa ba gabula dödö salua khöu. (II Korindro 1:3, 4; Roma 15:4) No ifabu’u wa ibe’e khöu ’wa’ohahau dödö, sabölö moroi ba gera-era niha fefu’.—Filifi 4:6, 7, 13.

SI TOLA ÖFALUA:

• Andrö wanolo moroi khö Yehowa ena’ö so khöu wa’ahono dödö ba fa’ohau-hau wangera-ngera

• Fatimbaisi fefu wamobawa lala nibe’e khöu, ba fili zabölö sökhi

HADIA NIWA’Ö ZURA NI’AMONI’Ö: ”Tödö zi so tödö, ba isöndra wa’atua-tua, ba tögi dalinga zatua-tua ba i’alui wa’aboto ba dödö.” (Gamaedola 18:15) Ame’egö tödö ba alui hadia zoguna ba nösi nomou. Fondro-ndrongo nösi dödöra.—Gamaedola 20:5.

Hewisa na mate niha ni’omasi’öu? Böi aila ndra’ugö we’e ba wangoroma’ö fa’afökhö dödöu. Törö tödöu wa no irai ”me’e Yesu”. (Yohane 11:35; Zangombakha 3:4) Sökhi na ö’ila mörö. (Zangombakha 4:6) Ena’ö aoha khömi ba wanaögö abula dödö salua.

SI TOLA ÖFALUA:

• Asese’ö fatunö nösi dödöu ba zi fahatö khöu, ena’ö lö alawö ira wahuhuosa khöu na so gabula dödöu

• Fahuo-huo ba niha si no irai manaögö abula dödö simane da’ö

HADIA NIWA’Ö ZURA NI’AMONI’Ö: ”Si ndruhu zi fahuwu, ba no fadoro i’omasi’ö nawönia; ba ba wamakao ba tumbu ia si fatalifusö.” (Gamaedola 17:17) Omasi latolo ndra’ugö si fahuwu khöu, hiza’i lö la’ila hadia zinangea lafalua. Böi alawö ndra’ugö wangombakha khöra hadia zinangea latolo. (Gamaedola 12:25) Ba sofu ba niha si so fa’aboto ba dödö Taromali hadia zanolo ya’ugö ba wamati. Tola labe’e khöu wanuturu lala moroi ba Zura Ni’amoni’ö.—Yakobo 5:14.

Tola aro wamatiu na fariawö ndra’ugö ba niha saro famati ba si faduhu tödö ba zi no ifabu’u Lowalangi. Terara göi dödöu na örara dödö niha si göna abula dödö. Tutunö khöra wamatiu ba hadia nifabu’u Yehowa. Be’e ginötöu ba wanolo niha sabu tödö, ba böi oniagö ndra’ugö ba niha sangomasi’ö ba sangosinangegö ya’ugö.—Gamaedola 18:1; I Korindro 15:58.

SI TOLA ÖFALUA:

• Fahuhuo ba niha si fahuwu khöu, ba tema wanolo nibe’era

• Böi alawösi wanguma’ö hadia zinangea mutolo ndra’ugö