Moroi ba mbuku andre, no öfaha’ö ndra’ugö wa oya goi-goi ba Zura Ni’amoni’ö soguna khöu ba ba nösi nomou. Omasi sibai Yehowa na ohahau dödömi. No ifabu’u wa na mi’ofönai’ö wamosumange ya’ia, ”tebe’e nönö-nönö dania khömi da’ö fefu”. (Matai’o 6:33) Omasi sibai ia na tobali ami si fahuwu khönia. Oguna’ö ginötö ba wanga’aro’ö fahuwusami khö Lowalangi, me da’ö zabölö sökhi tafalua.—Matai’o 22:37, 38.

HADIA NIWA’Ö ZURA NI’AMONI’Ö: ”’Amami ndra’o, ba onogu matua ami ba onogu alawe,’ iwa’ö Yehowa andrö.” (II Korindro 6:18) Omasi sibai Lowalangi na tobali ndra’ugö si fahuwu khönia. Lalania, angandrö. Ikaoni ndra’ugö Yehowa ena’ö ’böi aetu-aetu mi’angandrö khönia’. (I Tesalonika 5:17) I’osinangegö hadia ni’era-erau awö gabula dödöu. (Filifi 4:6) Na fao ami si sambua omo ba wangandrö, aboto ba dödöra hewisa wa’ahatöu khö Lowalangi.

Baero na mangandrö ndra’ugö, moguna göi öfondro-ndrongo li Lowalangi, ya’ia da’ö, na öbaso ba na öfaha’ö ndra’ugö ba Zura Ni’amoni’ö. (Zinunö 1:1, 2) Fatou-tou tödöu hadia zi no öfaha’ö ya’ugö. (Zinunö 77:12, 13) Lala tanö bö’ö ya’ia da’ö, owölö-ölö we’amöi ba gangowuloa.—Zinunö 122:1-4.

Ena’ö aro wahuwusau khö Yehowa, asese’ö fatunö ia ba niha.—Matai’o 28:19, 20.

SI TOLA ÖFALUA:

• Be’e ginötöu ero ma’ökhö ba wombaso Sura Ni’amoni’ö ba ba wangandrö

• Mi’ofönai’ö wamalua halöwö so’amakhaita ba wamati ya’ami si sambua omo moroi ba wanörö-nörö

HADIA NIWA’Ö ZURA NI’AMONI’Ö: ”Mi’ondrasi Lowalangi, ba i’ondrasi ami.” (Yakobo 4:8) Moguna ötatugöi ginötö wamaha’ö ba nomo, ba böi zi lö öfalua. (I Moze 18:19) Hiza’i, lö ibönö na ha da’ö manö. Moguna öfaogö Lowalangi ba wa’auriu ero ma’ökhö. A’aro’ö wahuwusami khö Lowalangi ya’ami si sambua omo, ya’ia da’ö na mifadunö-dunö ia ”na yomo so’ö, he na ba wekoli, na möi’ö mörö, ba na maoso’ö”. (V Moze 6:6, 7) Mi’o’ö simane niwa’ö Yosua, ”Ba ya’odo ba soroi yomogu fefu, ba Yehowa mafosumange.”—Yosua 24:15.

SI TOLA ÖFALUA:

• Böi tebulö fatunö hadia zinangea moguna ba salua ba nösi nomou ero mifalua wamaha’ö ba nomo