No ifa’ele’ö Sura Ni’amoni’ö na no aefa mate Yesu, so zamaha’ö selungu moroi ba gotalua niha keriso samakiko famaha’ö si ndruhu ba Zura Ni’amoni’ö. (Halöwö Zinenge 20:29, 30) Ba gafuriata, si ndruhu wa alua da’ö. La fasoli ira wamaha’ö Yesu ba famaha’ö agama niha baero, ba itugu tedou wa’ato niha keriso sofaya. (II Timoteo 4:3, 4) Hana wa faduhu dödöda wa no ta’okhögö wa’aboto ba dödö satulö iada’a sanandrösa hadia zi ndruhu nifaha’ö Zura Ni’amoni’ö?

No irugi inötö khö Yehowa ba wangombakha si ndruhu. No’ifa’ele’ö wa ba ’ginötö safuria, tedou wa’aboto ba dödö ba zi ndruhu’. (Danieli 12:4) Ba ndröfi 1870, so mato hadauga niha zangalui si ndruhu, aboto ba dödöra wa famaha’ö ba gosali lö tefaudu ba Zura Ni’amoni’ö. Börö da’ö, labörögö la’odödögö wangalui fa’aboto ba dödö ba Zura Ni’amoni’ö, ba ifahowu’ö ira Yehowa ibe’e khöra wa’aboto ba dödö.

Niha satulö lafaha’ö ira ba Daromali soroi ba dödö. Ono Zekola so wölö-ölö ba Daromali andrö, ya’ira zi’oföna, mamalua famaha’ö simane nifaluama irugi iada’a. Lafaha’ö ira ba Daromali Lowalangi ero sambua tuho. Na so ayati si lö la’ila eluaha, ba la’alui geluahania ba ayati tanö bö’ö. Me no lasöndra gangetula si tefaudu ba Zura Ni’amoni’ö, awena lasura. Tobali ha Sura Ni’amoni’ö ni’oguna’öra ba wangalui hadia geluaha nösi Daromali Lowalangi. Börö me lafalua da’ö, awena lasöndra zi ndruhu sanandrösa ba döi, ba Banua Lowalangi, ohitö dödönia ba niha ba bagulidanö, hewisa niha si no mate, ba fanötöna fanusugi ba niha si no mate. Awena te’efa’ö ira moroi ba wamaha’ö sofaya.—Yohane 8:31, 32.

Ba ndröfi 1879, Ono Zekola ba Daromali Lowalangi aboto ba dödöra wa no irugi inötönia ba wangombakha si ndruhu. Tobali, ba ndröfi da’ö, labörötaigö wamazökhi buku simane nifazökhi irugi iada’a, Menara Pengawal Memberitakan Kerajaan Yehuwa. Iada’a, ma’ombakha’ö zi ndruhu moroi ba Zura Ni’amoni’ö ba zi töra 240 soi ba zi töra 750 ngawalö li. Itugu tedou wa’aboto ba dödö zi ndruhu!

• Me no aefa mate Yesu, hadia zalua sanandrösa ba zi ndruhu moroi ba Zura Ni’amoni’ö?

• Hewisa watola masöndra mangawuli zi ndruhu moroi ba Daromali Lowalangi?