Ba wangodödögö fangombakha ”turia somuso dödö” ba ”ngawalö soi, ba ngawalö li, ba bangawalö mado”, mafazökhi mbuku ba zi töra 750 ngawalö li. (Fama’ele’ö 14:6) Hewisa wamalua halöwö sabua andre? Börö wanolo moroi khö ndra talifusö si no to’ölö ba wanura ba zi sagörö ulidanö hegöi si sambua orahua si tobali samo’eluaha—fefu ira Samaduhu’ö Yehowa.

Si oföna la sura ba li Inggris. Satua Sangai Halöwö lafaigi-faigi halöwö Zanura ba gödo sebua ba zi sagörö ulidanö. Ya’ira andre la bagi-bagi halöwö ndra talifusö sanura si so ba gödo sebua hegöi gödo si so ba soi bö’ö. Börö me ato ndra talifusö moroi ba ngawalö soi zanura andre, tola mafatunö ngawalö zi to’ölö ba zi sambua-sambua banua irege buku nifazökhima ato zomasi mombaso.

Si no lasura ba li inggris no mege, lafa’ohe’ö khö ndra samo’eluaha. Me no aefa latehegö ba lafa’anö, awena lafa’ohe’ö khö ndra talifusö samo’eluaha ba zi sagörö ulidanö, ba samo’eluaha göi lafareso wehede ba ngawalö li si tefaudu. La’odödögö wangalui ”wehede omasiö” ena’ö tola lafo’eluaha nösinia moroi ba li inggris ba li ni’ilara.—Zangombakha 12:10.

Börö Komputer da’ö wa’alio. Komputer tebai isalahini zanura ba samo’eluaha. Hewa’ae simanö tola alio halöwöra börö me la’oguna’ö buku si so eluaha (kamus), si no tefa’anö, ba ngawalö lala wangalui si so ba komputer. Ira Samaduhu’ö Yehowa lafazökhi Sistem Penerbitan Elektronik Multibahasa (MEPS), sambua nifa’anö si tola mangorodugö ngaotu ngawalö li hegöi gambara si so, ba samöfögö naha si tefaudu irege tola mufazökhi.

Hana wa ma’odödögö wamalua da’a, wamo’eluaha ngawalö li hewa’ae lö atoto zangoguna’ö ya’ia? Börö me’omasi Yehowa ”na’ahori te’orifi fefu niha na dozi lasöndra wa’aboto ba dödö zi duhu”.—I Timoteo 2:3, 4.

• Hewisa lala ba wanura bukuma?

• Hana wa mafo’eluaha ba ngawalö li mbuku nifazökhima?