I’otarai meföna, omasi Yehowa na owulo zi sambua omo ena’ö tedou ira ba wamati ba ena’ö tedou wahuwusa ba zi sambua omo. (V Moze 6:6, 7) Da’ö mbörö wa ero sambua omo ndra Samaduhu’ö Yehowa owulo ira sakali samigu ba wamosumange Lowalangi—lafatunö daromali si faudu ba zoguna ba nösi nomora sifao fa’omuso dödö. Hewa’ae na ha ya’ugö ba nomo, tola öbe’e ginötöu ba wamahatö ya’ugö khö Lowalangi ya’ia da’ö faha’ö ndra’ugö samösa ba Zura Ni’amoni’ö.

Inötö wanga’aro’ö fahuwusa khö Yehowa. ”Mi’ondrasi Lowalangi ba i’ondrasi ami.” (Yakobo 4:8) Na tafaha’ö ita ba gamuata ba banifalua Yehowa moroi ba nga’örö Daromalinia si no tesura, awena aboto ba dödöda haniha ia. Sambua lala si sökhi na tabörögö wamosumange Lowalangi ba zi sambua omo ya’ia da’ö ta’ebua’ö li ba wombaso Sura Ni’amoni’ö. Tola la’odaligö wombaso Sura Ni’amoni’ö si no latatugöi ba zi samigu ba Gangowuloa Fa’auri ba Fanuriaigö. Ba zi sambua omo lafalali-lali ira wombaso Sura Ni’amoni’ö, ba lafatunö hadia zi tola tobali famaha’öra.

Inötö wanga’aro’ö fahuwusa ba zi sambua omo. Fo’omo ira matua ba fo’omo ira alawe, satua hegöi iraono, te’aro’ö wahuwusara ba ginötö lafaha’ö ira ba Zura Ni’amoni’ö. Da’ö ginötö sowua-wua dödö nibaloi-baloira ero samigu. La’odaligö hewisa ndröfi ndraono, satua zangila hadia zinangea lafatunö ba ndraonora, tola la’oguna’ö sambua duho ba Menara Pengawal ba Sedarlah! Mazui ba situs Web jw.org. Tola öfatunö hadia gabula dödö sigöna ndraonou ba zekola ba hewisa lala ena’ö aefa ira ba gabula dödö andrö. Tola mifaigi JW Broadcasting (tv.pr418.com) ba mifatunö aefa da’ö. Tola göi mifamaha ami ba zinunö ni’anunöisi ba gangowuloa ba tola göi mu’a gö ma’ifu na no aefa wamaha’ö ba zi sambua omo andrö.

Lala halöwö fondrege zi sökhi na fao ita ba wamosumange Yehowa ero samigu tola te tolo fefu nösi nomoda ba wangomasi’ö Taromali Lowalangi, ba ifahowu’ö fefu ngawalö nifaluada.—Zinunö 1:1-3.

• Hana wa mabe’e ginötöma ba wamosumange Lowalangi ba zi sambua omo?

• Hewisa wamalua zatua lala halöwö andre ena’ö omuso dödö nösi nomonia fefu?