Hadia so ni’ilau ndra Samaduhu’ö Yehowa? Ya’aga so ösa zifalazi omo khömi, si fao ba wohalöwö, mazui si fao khöu ba zekola. Mazui, no’irai fahuhuo ita ba Zura Ni’amoni’ö. Haniha si ndruhunia ndra’aga, ba hana wa mafadunö-dunö ba niha zi no faduhu dödöma?

Ya’aga niha si to’ölö. Moroi ba mbanua si fabö’ö-bö’ö, moroi ba ngawalö soi, ba ngawalö li ba bangawalö mado. So ba gotaluama zi’otarai ba agama bö’ö meföna, ba so göi zi lö faduhu tödö khö Lowalangi mböröta. Hewa’ae simanö, fatua lö tobali ndra’aga Samaduhu’ö Yehowa, mahaogö ua wangalui ösi Zura Ni’amoni’ö. (Halöwö Zinenge 17:11) Fao dödöma ba nifaha’öma ya’aga, ba mahalö gangetula wa Yehowa ni fosumangema.

Ma’ila wa so gunania na tefaha’ö ba Zura Ni’amoni’ö. Simane niha tanö bö’ö, göna göi ndra’aga abula dödö ba fo’amböta. Tobali, börö me ma’o’ö goi-goi Zura Ni’amoni’ö, ma’ila wa awena sökhi wa’aurima. (Zinunö 128:1, 2) Da’ö mbörö wa mafadunö-dunö zi no mafaha’ö ya’aga moroi ba Zura Ni’amoni’ö.

Mafalua ba wa’aurima goi-goi Zura Ni’amoni’ö. Goi-goi Zura Ni’amoni’ö andre zanolo ya’aga ba wangosinangegö niha tanö bö’ö, ba wangodödögö wamalua amuata si sökhi simane, lö falimo, ba fa’asökhi dödö. Goi-goi Zura Ni’amoni’ö andre zanolo niha tobali ono mbanua si sökhi, ba ena’ö so wa’ohahau dödö ba zi sambua fongambatö. Börö me faduhu dödöma ”Lö ifaigi mbawa niha Lowalangi”, Te’osambua’ö ndra’aga ba wa’afatalifusöta ba zi sagörö ulidanö börö me fagölö zi faduhu dödöma, lö mangenahö dödöma khöra he na fabö’ö-bö’ö soima. He na ya’aga niha si to’ölö manö, tohude ndra’aga me so khöma wahasara dödö ba zi sara lala wamati.—Halöwö Zinenge 4:13; 10:34, 35.

• Hadia zi fagölö ndra Samaduhu’ö Yehowa ba niha tanö bö’ö?

• Hadia goi-goi nifaha’ö ndra Samaduhu’ö Yehowa ya’ira moroi ba Zura Ni’amoni’ö?