Nifotöi ”perintis” asese lafo’eluaha ia niha simöi ba mbanua tanö bö’ö mazui samokai lala ba niha tanö bö’ö. Yesu tola lafotöi ia perintis börö me no tefatenge ia ba gulidanö ba wamalua halöwö famokai lala ba niha ena’ö lasöndra wa’auri. (Matai’o 20:28) Ba ginötö andre, fefu zolo’ö khö Yesu, la’o’ö duma-duma nibe’enia latehegö ginötöra ba wombali’ö ’nifaha’ö fefu soi’. (Matai’o 28:19, 20) Ba, so göi zame’e inötönia ba wangai halöwö nifotöi perintis.

Perintis ya’ia da’ö sangombakha safönu inötö. Fefu ndra Samaduhu’ö Yehowa oi sangombakha turia somuso dödö. Hiza’i, so ba gotaluara zame’e inötö tobali perintis biasa sangoguna’ö inötö 70 za ero bawa we’amöi manuriaigö. Ato zombagi inötöra ba wangai halöwö. So danö bö’ö nifatenge tobali perintis istimewa sangoguna’ö inötö 130 za ero bawa ba mbanua ni fatenge ya’ira ba wangombakha Banua Lowalangi. Ira perintis ahono dödöra ba zi ho so, ba faduhu dödöra ibönökhi zoguna khöra Yehowa. (Matai’o 6:31-33; I Timote’o 6:6-8) Ya’ira si tebai merintis safönu inötö tola tobali ira perintis ekstra sondrouʼö inötöra ba wanuriaigö 30 mazui 50 za ero bawa na lö si tobali taha-taha.

Fa’omasira Lowalangi ba fa’omasira nawöra da’ö zango’ou tödö ndra perintis. Simane Yesu, ato niha ni’ilama ba ginötö andre moguna khöra wanuturu lala ba wamati. (Mareko 6:34) Ba, so khöma wa’aboto ba dödö si tola manolo ya’ira iada’a ena’ö so khöra wanötöna ba zi so föna. Fa’omasira nawöra zango’ou ira perintis ba wolulu fa’abölöra ba wanolo niha bö’ö ba wamati. (Matai’o 22:39; I Tesalonika 2:8) Buania, abe’e ira ba wamati, itugu ahatö wahuwusara khö Lowalangi, ba so khöra wa’ohahau dödö.—Halöwö Zinenge 20:35.

• Tutunö hadia geluaha nifotöi perintis?

• Hadia zamarou tödö niha we’amöi perintis sa fönu inötö?