Simane töi si no tesura ba nahia Gorahua Mbanua Lowalangi, nifatunö ba da’ö ha sanandrösa ba Mbanua Lowalangi—tuho nituriaigö Yesu me so ia ba gulidanö.—Luka 8:1.

Nahia gangowuloa ba wamosumange Lowalangi ba zi sambua banua. Moroi ba nahia andre lafatunö ira Samaduhu’ö Yehowa hewisa wanuriaigö Banua Lowalangi. (Matai’o 24:14) Fabö’ö-bö’ö wa’egebua nahia Gorahua Mbanua Lowalangi andre, ba famazökhi ya’ia sito’ölö manö, ba tenga ha sambua angowuloa zi tola mangoguna’ö. Ba zafuria andre, ngafulu ribu nahia Gorahua Mbanua Lowalangi sawena mafazökhi (si lö’ö-lö’önia lima ngawua te’asiwai ero ma’ökhö) börö me tedou wa’ato niha ba gangowuloa. Hewisa wa tola mufalua da’ö?—Matai’o 19:26.

Lafazökhi ia moroi ba dolo-tolo. Tolo-tolo da’a te’owuloi ia ba gödo si so ba zi sambua soi ena’ö tola laʼogunaʼö ono mbanua Lowalangi ba ginötö lafazökhi ma ba wangehaogö Nahia Gorahua Mbanua Lowalangi.

Lafazökhi ira talifusö si fabö’ö-bö’ö banua lö lahalö gazira. Ba soi bö’ö, so nifotöi Ngenoli Wamazökhi Nahia Gorahua Mbanua Lowalangi. Ira talifusö nituyu ba wohalöwö si lö gazi findra ira ba mbanua tanö bö’ö ba zi sambua soi, ba bambanua si gide-ide, ba wamaigi ngawalö halöwö ba bawamomaha ira talifusö si so ba da’ö. Ba soi tanö bö’ö, ira talifusö sinangea, lafatenge ira ba wamaigi-maigi samazökhi ma sangehaogö Nahia Gorahua Mbanua Lowalangi ba zi sambua-sambua banua si no latatugöi. Hewa’ae ato zi so nekhe-nekhe danga ba mbanua andrö somasi mohalöwö, tobali sabölö mo’onorogö tödö wohalöwö ya’ia da’ö ira talifusö sangoguna’ö Nahia Gorahua dania. Tola tefalua da’a fefu börö geheha Yehowa ba fangodödögö moroi ba nono mbanuania.—Zinunö 127:1; Kolose 3:23.

• Hana wa lafotöi nahia wamosumange andrö orahua Mbanua Lowalangi?

• Hewisa wamazökhi Nahia Gorahua Mbanua Lowalangi ba zi sagörö ulidanö?