Ba gamabu’ula li si bohou asese latötöi döi Mbaranaba ba Faulo. Ya’ira andre lahalö halöwö zatua simöi ba mbanua niha Keriso si föföna. Hadia mbörö? Börö me la’onorogö tödö zoguna khö ndra talifusöra ba wamati. Imane Faulo, omasi ia ”ifuli  ifaigi ndra talifusö” ena’ö i’ila hewisa ira. Itaögö wanörö lala si töra ngaotu kilo wa’aröu ba wamarou tödö ndra talifusönia. (Halöwö Zinenge 15:36) Simanö göi zatua samasui omasi ira lafalua halöwö simane da’ö.

La’ondrasi ndra’aga ba wamarou tödöma. Ero samösa zatua samasui möi ia ba zi 20 banua niha keriso, ero sambua banua niha keriso toröi ira ba da’ö samigu wa’ara dua kali ba zi döfi. Tola tefarou dödöma na ladunö-dunö hadia zi no latörö ba wofanö-fanöra misa na manuriaigö hegöi fo’omora ira alawe na si no mangowalu. La’odödögö sibai wangi’ila hewisa ero samösa nono mbanua Lowalangi he iraono he satua ba gangowuloa, la ame’egö tödö sibai wefao khöma ba wanuriaigö ba bawamaha’ö niha ba Zura Ni’amoni’ö. Ya’ira andre fao ira khö ndra ­satua sokubaloi ba wokubaloi ono mbanua Lowalangi. Ba wamarou tödöma, lafa’ema huhuo ba mamaha’ö ira ba gangowuloa side-ide hegöi ba gangowuloa sebua.—Halöwö Zinenge 15:35.

La’ame’egö tödö fefu ndra talifusö. Ira satua samasui omasi ira na tedou wamati ndra talifusö. Lafalua rafe si fao ira satua sokubaloi ba enoni ba wamaigi fa’atedou halöwö si no lafalua ba latuturu lala si sökhi ba wamalua halöwö ba gangowuloa. La tolo göi ndra ­perintis ena’ö mowua halöwöra ba wanuriaigö. Omasi ira göi fa’ila khö ndra talifusö sawena möi ba gangowuloa ba la ­fondro-ndrongo hewisa wa’atedoura ba wamati. Ira talifusö andre la’odödögö we’amöi ­”awöma wohalöwö”. (II Korindro 8:23) Famati ba folulu fa’aurira khö Lowalangi sinangea tobali duma-duma.—Heberai’o 13:7.

• Hadia gohitö dödö ndra satua samasui wa lafuli lafaigi zi sambua angowuloa?

• Hadia gunania khöu me no la’ondrasi ndra’ugö?