Ba ginötö si föföna, ira ”sinenge ba satua ba Yerusalema” si lö atoto lahalö halöwö zatua zangai halöwö ba wanga’i angetula föna mbanua niha keriso nibayoini. (Halöwö Zinenge 15:2) Me no so khöra wahasara dödö lahalö gangetula si te’odane-dane moroi ba Zura Ni’amoni’ö ba la’o’ö wanuturu geheha Lowalangi khöra. (Halöwö Zinenge 15:25) Duma-duma simane da’ö nifalua ba ginötö andre.

Ni’oguna’ö Lowalangi ba wamalua ohitö dödönia. Ira talifusö si no mubayoini si tobali Satua Sangai Halöwö la’odaligö Daromali Lowalangi, ba to’ölö sibai ira ba wohalöwögöigö soguna ba wamati hegöi halöwö tanö bö’ö. Lafalua rafe sakali samigu ba wamatunö hadia zoguna khö ndra talifusö ba zi sagörö ulidanö. Simane ba ginötö si föföna, fanuturu lala si te’odane-dane ba Zura Ni’amoni’ö la’oguna’ö zura ba wama’ema ya’ia mazui ira satua samarou tödö sakali önö waŵa ba tanö bö’önia. Da’a zanolo ono mbanua Lowalangi ena’ö so khöra wangera-ngera si sökhi ba hasara dödöra na so nifaluara. (Halöwö Zinenge 16:4, 5) Satua Sangai Halöwö lafaigi hewisa wanga’asogö gö wamati, ladönia’ö halöwö fanuriaigö, ba lafaigi göi hewisa wamataro ira talifusö sangai halöwö ba gangowuloa.

La’o’ö niwa’ö geheha Lowalangi. Satua Sangai Halöwö la’andrö wanuturu lala moroi khö Yehowa, Sanga’asogö Banua Siaŵa awö Danö, ba khö Yesu, si no tobali högö mbanua niha keriso. (I Korindro 11:3; Efeso 5:23) Sangai halöwönia lö labali’ö ira samatörö ono mbanua Lowalangi. Fefu niha keriso si no tebayoini ”la’o’ö nono mbiri-biri andrö [Yesu] heza möi”. (Fama’ele’ö 14:4) La’andrö sibai saohagölö ira Satua Sangai Halöwö na ma’ohe ira ba wangandrö.

• Haniha zatua sangai halöwö ba ginötö si föföna?

• Hewisa Zatua Sangai Halöwö ba ginötö andre wangandrö fanuturu lala moroi khö Lowalangi?