Ba gangowuloama, lö fandrita sinangea mugazi. Hiza’i, simane angowuloa niha Keriso si föföna, ira talifusö sinangea mangai halöwö tefataro ira ”ba wokubaloi banua zo’aya”. (Halöwö Zinenge 20:28) Ira satua sokubaloi andre ya’ia da’ö ira matua saro ba wamati si so halöwö ba gangowuloa ba wokubaloi rorogöfö Lowalangi ”tenga ni’o’ou ira ena’ö saohagölö [föna Lowalangi]; tenga ba wangalui luo saila ita, ena’ö na moroi ba wa’omasi”. (I Fetero 5:1-3) Hadia nifaluara khöma?

Larorogö ndra’aga. Ira satua sokubaloi labe’e wanuturu lala ba nono mbanua Lowalangi ba lalumö’ö ba wamati. Börö me’aboto ba dödöra wa moroi khö Lowalangi halöwö andre, ira satua sokubaloi lö lafatörö nono mbanua Lowalangi; tobali, la’odödögö ena’ö omuso dödöma ba wamati. (II Korindro 1:24) Simane kubalo sangodödögö ba wondrorogö biri-birinia, simanö göi ndra satua sokubaloi la’odödögö wamaigi-maigi ono mbanua Lowalangi.—Gamaedola 27:23.

Lafaha’ö ndra’aga ba wamalua somasi Lowalangi. Ero migu, lafaha’ö ndra’aga ira satua sokubaloi ba gangowuloa ena’ö aro wamatima. (Halöwö Zinenge 15:32) Talifusöma ira matua si lö faröi andre, ladönia’ö ndra’aga ba wanuriaigö, falulu fohalöwö ira khöma ba lafaha’ö ndra’aga ba ngawalö halöwö wanuriaigö.

Lafarou dödöma zamösana. Ba wamönökhi soguna ba wamatima zamösana, ira satua sokubaloi itaria la’ondrasi ndra’aga ba nomo mazui ba Nahia Gorahua Mbanua Lowalangi ba wame’e khöma fanolo ba fondrara dödö ba Zura Ni’amoni’ö.—Yakobo 5:14, 15.

Baero halöwöra bakha ba gangowuloa niha Keriso, ato ndra satua sokubaloi sangoguna’ö inötö ba la’ame’egö tödö göi wohalöwö ba wangalui soguna ba nösi nomora. Ira talifusö si no erege tödö andre sinangea mufosumange ira.—I Tesalonika 5:12, 13.

• Hadia halöwö ndra satua sokubaloi ba mbanua niha Keriso?

• Hewisa wangoroma’ö ndra satua sokubaloi wa la’onorogö tödö ndra’aga?