Sekola wamaha’ö ba Zura Ni’amoni’ö no ara tobali tandra Zamaduhu’ö Yehowa. So zekola nihenaigö khö ndra talifusö safönu inötö ba wangombakha Banua Lowalangi. Ba zekola andre tefahaʼö ira ʼba wamoʼahonoa wamalua halöwö fanuriaigö’.—II Timoteo 4:5.

Sekola khö ndra Perintis. Na no irugi döfi ndra perintis biasa, tesura döira tobali ono zekola wamaha’ö Zura Ni’amoni’ö önö ngaluo wa’ara. Sekola andre tola tefalua ia ba nahia Gorahua Mbanua Lowalangi. Wa lafalua da’ö ena’ö tetolo ndra perintis andrö wangahatö’ö ya’ira khö Yehowa, ena’ö so mbua wohalöwöra ba wanuriaigö, ba ena’ö anau gölöra wangai halöwö khö Lowalangi.

Sekola khö ndra Sangombakha Banua Lowalangi. Sekola si dua waŵa wa’ara andre lafalua ba wa mamaha ira perintis si no to’ölö ba somasi mondröi banuara ba we’amöi manuriaigö ba mbanua tanö bö’ö. Hulö nalamane wanguma’ö ”Ya’e ndra’o! Fatenge ndra’o”, simane duma-duma nibe’e Yesu Keriso, Sanuriaigö sebua si no irai möi ba gulidanö. (Yesaya 6:8; Yohane 7:29) Börö me fandröndröu mbanuara, moguna lafagölösi ira ba niha ba bambanua nirugira. Si to’ölö ba mbanua andrö (hada), teu mazui lökhö ba ngawalö gö tola manö fabö’ö moroi ba mbanuara mege. Tola göi la famaha ira ba li niha nirugira. Sekola andre zanolo ira talifusö si lö sangowalu he göi si no mangowalu, i’otarai 23 irugi 65 fakhe, ena’ö so khöra gamuata si sökhi ba mbanua nifatenge ya’ira ba wanuriaigö. Tetolo göi ira ena’ö la’okhögö wa’atua-tua irege tola i’oguna’ö ira Yehowa ba gangowuloania.

Sekola Zura Ni’amoni’ö Gileadi Menara Pengawal. Ba li Heberai’o, fehede ”Gileadi” eluhania ”Ngafu Sitobali Samaduhu’ö”. I’otarai me tefasindro zekola andre me döfi 1943, töra 8.000 niha zi no aefa sekola andre tefatenge ira ba wanuriaigö ”ba zi sagörö ulidanö”, ba oya howu-howu si no latema. (Halöwö Zinenge 13:47) So ba gotalua ndra talifusö si no aefa sekola Gileadi si föföna andre me larugi mbanua Peru, lö hadöi Samaduhu’ö Yehowa ba da’ö. Iada’a, töra 1.000 angowuloa zi so ba da’ö. Me’ibörögö manuriaigö ba Jepang, lö irugi dafulu Zamaduhu’ö Yehowa ba da’ö. Iada’a, töra 200.000 Zamaduhu’ö Yehowa ba mbanua andrö. Famaha’ö si lima waŵa wa’ara ba sekola Gileadi andrö lahaogö sibai wamaha’ö ya’ira ba Daromali Lowalangi. Nikaoni ba zekola andre ya’ia da’ö perintis istimewa mazui nifatenge ba wangombakha ba mbanua misa, sohalöwö ba gödo si so ba soi bö’ö, mazui sohawölö ba wamasui. Sekola andre zame’e khöra fa’atua-tua ba wondrou’ö ena’ö sökhi halöwö fangombakha Taromali Lowalangi ba zi sagörö ulidanö.

• Hadia guna Sekola Perintis?

• Sekola khö ndra Sangombakha Banua Lowalangi ha’ökhö wa la’a’asogö ia?