Si öfa zi fakudo andrö hulö abua sibai wamoʼeluahada ba si möi fangataʼu, hizaʼi sindruhunia tenga simane daʼö. Hadia mbörö? Börö me moroi ba Zura Niʼamoniʼö hegöi ba ngawalö zalua iadaʼa, wa tola taʼila hadia niʼamaedolagö dozi si fakudo andrö. Ba faʼasora eluahania abula dödö ba guli-danö, hizaʼi tola göi tobali turia somuso dödö khöu hegöi ba nösi nomou. Hana wa tola? Siföföna sibai, dataʼalui haniha ndra si fakudo andrö.

Mubörögö gangilata andrö ba ngawua wehede, ”Ba uʼila, ba hiza kudo safusi, ba khö zi fakudo yawa, ba so wana sinali, ba tebeʼe khönia dakula, ba mofanö ia, simane si möna, ba enaʼö möna ia.”​—Famaʼeleʼö 6:2.

Haniha zi fakudo yawa ba kudo safusi? Ibeʼe khöda wanuturu lala buku Zura Niʼamoniʼö, Famaʼeleʼö, wa si fakudo moroi ba zorugo andrö mufotöi ia ”Taromali Lowalangi”. (Famaʼeleʼö 19:11-13) Taromali andrö, manandrösa khö Yesu Keriso, börö me yaʼia zamaʼema fehede Lowalangi. (Yohane 1:1, 14) Lafotöi göi ia ”Razo yawa razo ba Soʼaya yawa zoʼaya” ba si ”Lö Faröi ba Sindruhu”. (Famaʼeleʼö 19:11, 16, Terjemahan Dunia Baru [NW]) Tobali, so khönia kuaso ba wamalua hadia ia börö me yaʼia razo si fasuwö, ba iʼogunaʼö kuasonia ba zi tefaudu ba lö ifalua ba zomasi dödönia manö. Hizaʼi, so ösa zi tobali fanofu.

Haniha zameʼe kuaso khö Yesu ba wokalaisi nudu? (Famaʼeleʼö 6:2) Iʼila samaʼeleʼö Danieli sambua gangilata sanandrösa khö Mesia, nifoʼamaedolagö ”zi hulö niha”, ba tebeʼe khönia ”waʼabölö ba faʼebua döi ba faʼasalawa” nibeʼe ”Zatua No Mege” yaʼia daʼö Lowalangi Yehowa. * (Danieli 7:13, 14) Tobali, Lowalangi Fondrege Zabölö zameʼe khö Yesu kuaso ba faʼasinangea ba wamatörö hegöi ba wamalua fanguhuku. Tefaudu muʼogunaʼö kudo safusi ba woʼamaedolagö wasuwöta satulö nidöniaʼö Nono Lowalangi, börö me asese muʼogunaʼö laʼa-laʼa safusi ba Daromali Lowalangi ba woʼamaedolagö faʼatulö sindruhu.​—Famaʼeleʼö 3:4; 7:9, 13, 14.

Hamega labörötaigö ira si fakudo ba wamofanö kudora? Nehegö zi fakudo siföföna, Yesu, ibörötaigö ifofanö kudonia me no aefa itema dakula. (Famaʼeleʼö 6:2) Hamega tobali Yesu Razo ba zorugo? Tenga me no aefa tesusugi ba mangawuli ia ba zorugo. Moloʼö Sura Niʼamoniʼö moguna so khönia nasa wombaloi. (Heberaiʼo 10:12, 13) Ibeʼe Yesu khö ndra nifahaʼönia zi tobali tandra hawaʼara awai ginötö wombaloi andrö ba hawaʼara ibörötaigö mamatörö ia ba zorugo. Imane wangumaʼö wa itugu lö sökhi zalua ba gulidanö na inötö tebörögö wamatörönia. So wasuwöta, lofo, ba fökhö. (Mataiʼo 24:3, 7; Luka 21:10, 11) Lö ara me no aefa Fasuwöta Gulidanö I me döfi 1914, oya wangabu dödö zalua ba niha gulidanö, nifotöi ”götö safuria” bakha ba Zura Niʼamoniʼö.​—II Timoteo 3:1-5.

Hizaʼi, hadia mbörö wa tenga itugu sökhi zalua iʼotarai me itema dakulania Yesu me döfi 1914? Börö me ba ginötö daʼö, mamatörö Yesu ba zorugo, tenga ba gulidanö. Alua wasuwöta ba zorugo, ba Razo sawena mufataro andre, Yesu, nifotöi Mikhaʼeli, ifofanö Zatana hegöi malaʼika si lö sökhi si fao khönia ba gulidanö. (Famaʼeleʼö 12:7-9, 12) Iʼotarai daʼö, hatö ba gulidanö nahia Zatana. Andrö wa ebua sibai wönunia, börö me iʼila hatö maʼifutö ginötönia. Lö aratö ifalua gohitö  dödönia Lowalangi ba wangeheta Satana moroi ba gulidanö. (Mataiʼo 6:10) Iadaʼa, datafaigi hewisa wangoromaʼö zi datölu zi fakudo tanö böʼö, wa sindruhu-ndruhu no auri ita ba ”götö safuria” safönu famakao andre. Tenga simane si fakudo yawa ba kudo siföföna, sanutunö haniha zi fakudonia, si datölu samofanö kudo si so moroi furinia muʼamaedolagö ngawalö zalua ba zi sagörö ulidanö so lua-lua ba niha.

”Ba so zi möi baero kudo böʼö, soyo, ba khö zi fakudo yawa, ba tetehe wangeheta faʼatulö ba guli-danö, ba enaʼö faoma labubunu nawöra, ba tebeʼe khönia wöda sebua.”​—Famaʼeleʼö 6:4.

Si fakudo yawania muʼamedolagö wasuwöta. Nehegö wa tetehe khönia wangaʼi faʼatulö, tenga ha ba zi haʼuga soi, hizaʼi ba zi sagörö ulidanö. Awena alua sagötö sejarah, me döfi 1914, alua wasuwöta ba zi sagörö ulidanö. Lö ara aefa daʼö, alua fasuwöta gulidanö si mendrua, ba abölö oya iʼasogö waʼatekiko. Na muʼera-erai, töra 100 zuta niha si mate börö wasuwöta ba faʼudusa sangogunaʼö fakake wamunu iʼotarai ndröfi 1914! Ba ato sibai göi niha si cacat börö wasuwöta.

Hawaʼebolo wasuwöta ba götöda andre? Awena alua sagötö sejarah, hulö so waʼabölö ba niha ba wangohori fefu niha. Mendrua manö, organisasi sondrorogö faʼatulö manö, simane Perserikatan Bangsa-Bangsa, tebai ibatogö zi fakudo yawa ba kudo soyo andre.

”Ba uʼila, ba hiza! kudo saitö, ba khö zi fakudo yawa, ba so waliʼera, ba dangania. Ba urongo zi hulö li niha moroi ba gotalua zaliwa-liwa ba danö andrö si öfa ngaʼeu, imane: ’Saliter gandru mbölinia sambua dinar, ba tölu liter barli mbölinia sa-mbua dinar, ba böi fakiko fanikha zaitun ba agu andrö.’”​—Famaʼeleʼö 6:5, 6, NW.

Si fakudo yawania muʼamaedolagö lofo. Iʼa-maedolagö ayati andrö hewisa waʼabua wanöndra gö irege saliter gandru mbölinia sambua dinar, yaʼia daʼö fagölö ira gazi niha sohalöwö ba zi sahari me abad siföföna! (Mataiʼo 20:2, NW) Sambua dinar ha abönö wowöli tölu liter barli si lö baga moroi na ba gandru. Tatu manö lö abönö daʼö ba zato yomo ba nomo. Lafangelama niha ba woʼönaigö wangogunaʼö gö si ero maʼökhö, niʼamaedolagö wanikha zaitun ba agu yaʼia daʼö soguna ba gö ba Timur Tengah me götö daʼö.

Iʼotarai ndröfi 1914, hadia so dandra wa si fakudo yawa ba kudo saitö no ifofanö kudonia? So! Ba abad si-20, so mato 70 zuta niha si mate börö lofo. So samösa zohalöwö khö famareta sangumaʼö, ”ba ndröfi 2012-2014, so mato 805 zuta niha zanaögö faʼambö gizi sabölö-bölö, eluahania samösa moroi ba zi dasiwa niha gulidanö”. Moloʼö laporan tanö böʼö, ”Ero röfi, abölö ato niha si mate börö lofo moroi ba zi mate börö wökhö AIDS, malaria, ba tuberkulosis. ”Hewaʼae oya wangodödögö nifalua enaʼö lö hadöi faʼolofo, hizaʼi lö ibato ba wamofanö kudonia si fakudo yawa ba kudo saitö.

”Ba uʼila, ba hiza kudo saʼuzö-uzö, ba töi zi fakudo yawa, ba faʼamate, ba iʼoʼö ia Banua Tou [Lewatö], ba tetehe khöra zi sambua niʼoʼöfa tanö, ba wamunu yaʼira föda ba lofo ba fökhö ba ba gutu ndruʼu andrö, ba gulidanö.”​—Famaʼeleʼö 6:8.

Si fakudo yawa ba kudo si öfa muʼamaedolagö waʼamate börö wökhö mazui tanö böʼö. Lö ara me no aefa ndröfi 1914, so ngafulu zuta niha si mate börö flu Spanyol. Te so mato 500 zuta niha si fatöfa wökhö andrö, te samösa moroi ba gotalua zi datölu zi tola auri!

Hizaʼi, flu Spanyol awena famobörönia. So ndra ahli sangumaʼö wa ngaotu zuta niha zi mate börö sowua zitaora götö abad si-20. Irugi iadaʼa, hewaʼae na laforege ba wangalui dalu-dalu ira doto, teʼadogo-dogoʼö ndröfi niha börö AIDS, tuberkulosis, ba malaria.

 Tobali, he na börö wasuwöta, lofo mazui fökhö, hasambua lua-luania yaʼia daʼö faʼamate. Lö aetu Lewatö ba wanölö önia, lö ibeʼe dötönafö.

Lö aratö welalö ginötö safönu famakao. Törö tödöu daʼa: Me döfi 1914 ’mofanö Yesu, simane si möna’ ba wofofanö Satana moroi ba gulidanö, hizaʼi lö niʼasiwai Yesu waʼamönania. (Famaʼeleʼö 6:2; 12:9, 12) Lö aratö ba Hamagedo, ihori Yesu fefu wondrönisi dödö nibeʼe Zatana ba irasa niha si fao khö Gafökha. (Famaʼeleʼö 20:1-3) Tenga ha ibatogö zi fakudo si datölu andrö Yesu, hizaʼi iʼehao göi waʼatekiko niʼasogöra. Hewisa wamaluania? Nehegö hadia nifabuʼu Zura Niʼamoniʼö.

Lö hadöi saʼe wasuwöta, ha faʼatulö zi so. Yehowa ”sanenawa fanuwö irugi wondrege danö, samatö fana, solewa totoa doho”. (Zinunö 46:10) Niha somasi faʼatulö andrö dania ”owua-wua dö-döra ba waʼafahöna wangorifi”.​—Zinunö 37:11.

Lö hadöi lofo, hizaʼi fahöna gö. ”Fahöna mbua nowi ba danö, ba hili yawa; moruru mbuania.”​—Zinunö 72:16.

Lö hadöi fökhö ba faʼamate. Lasöndra waʼauri si lö aetu. ’Ba iʼosi dania Lowalangi dawa hörö fefu, ba höröra, ba lö faʼamate saʼae, ba lö faʼabu dödö, ba lö fege-ege, ba lö faʼafökhö saʼae.’​—Famaʼeleʼö 21:4.

Me so Yesu ba gulidanö, ibeʼe wamakhala ba nifalua wamatörönia ba zi so föna. Ifahaʼö waʼatulö, ifalua dandra sahöli-höli dödö me ibeʼe gö zi ngahönö faʼato, ifadöhö zofökhö, ba isusugi niha si no mate.​—Mataiʼo 12:15; 14:19-21; 26:52; Yohane 11:43, 44.

Omasi ndra Samaduhuʼö Yehowa ba wangoromaʼö khöu moroi ba Zura Niʼamoniʼöu hewisa lala enaʼö tefaʼanöʼö ba ginötö tebato zi fakudo andrö. Hadia omasi öʼila danö böʼö nasa?