Ebua ndraʼo ba Puerto Limón, kota pelabuhan ba zinga nasi tanö ba gatumbukha Kosta Rika. Dawalu ndraʼaga zi fatalifusö ba yaʼo numero fitu. Mate bapagu me walu fakhe ndröfigu. Iʼotarai daʼö, hatö saʼe mamagu zangebuaʼö yaʼaga.

Tebai aefa bisbol * moroi ba waʼaurigu. Omasido sibai olahraga daʼö iʼotarai me ide-idedo. Me bohou ebua ndraʼo, faodo ba liga amatir. Ba me töra 20 fakhe ndröfigu me faodo ba liga amatir, so zangalui bakat samarou yaʼo wefao ba tim si no ogonekhe ba Nikaragua. Hizaʼi, börö me mofökhö-fökhö manö mamagu ba yaʼo göi zondrorogö yaʼia, lö omasido toröi ba Nikaragua. Andrö wa lö utema wamarou daʼö. Lö ara aefa daʼö, so zangalui bakat tanö böʼö sangandrö khögu enaʼö fao ba tim nasional bisbol Kosta Rika, ba si farahu ba daʼö nifili moroi ba ngawalö liga amatir. Iadaʼa saʼe omasido fao. Farahu ndraʼo ba tim nasional iʼotarai ndröfi 1949 irugi 1952, ba faodo ba watandrisa ba Kuba, Meksiko, hegöi ba Nikaragua. Tobali ndraʼo baseman ba onekhedo ba wamalua yaʼia, ba no göi irai lö aetu-aetu fatandri ndraʼo irugi 17 kali ba lö irai ufalua zala. Omasido sibai na lahöni-höni döigu ira sanoto!

Hizaʼi, lö sökhi lala waʼaurigu. Asese umaikö ndra alawe hewaʼae na no so kawagu. Omasido göi mabu-mabu. Samuza inötö, abölö-bölö sibai waʼamabugu irege me maoso ndraʼo mahemolunia, lö uʼila hewisa lala wa tola ofeta ndraʼo ba nomo! Famai kartu domino ndraʼo hegöi famai lotere.

Barö daʼö, tobali Samaduhuʼö Yehowa mamagu. Iforege enaʼö adöni dödögu ba wamatinia, hizaʼi ba wamobörö ua lö aʼozu börö me ahori ginötögu faʼolahraga. Ba ginötö ufomaha-mahado, lö itörö tödögu waʼolofo hewaʼae na no inötö wemanga! Ba wangera-ngeragu ha ba watandrisa manö. Uʼomasiʼö bisbol moroi ba danö böʼö!

Hizaʼi, me 29 fakhe ndröfigu göna ndraʼo sikho sabölö-bölö me utandraigö uraʼu bola ba watandrisa. Me no döhödo, ubato saʼe halöwögu daʼa. Hizaʼi, lö aetu ndraʼo ba wefao ba bisbol, ba  wamomaha zi farahu ba tim liga amatir sahatö ba nomogu.

Me döfi 1957, utema undranga ba weʼamöi ba kebaktian ndra Samaduhuʼö Yehowa nifalua ba stadion ba nahia me famaido bisbol. Me modadao ndraʼo ba gotalua ndra sangondrasi, uʼila gamaehuta si faehu sibai, ira Samaduhuʼö faoma lafosumange nawöra. Ba gotalua niha samaigi famaisa bisbol, yaʼira kaliru sibai. Daʼa zamarou tödögu ba wamahaʼö yaʼo ba Zura Niʼamoniʼö khö ndra Samaduhuʼö Yehowa, ba uʼo-ndrasi nahia gangowuloa ba mbanua niha Keriso.

Oya wamahaʼö nifahaʼö Zura Niʼamoniʼö zi tofakha ba dödögu. Duma-dumania, iwaʼö Yesu wa ba götö safuria, laturiaigö ira nifahaʼönia duria somuso dödö andrö sanandrösa ba Mbanua Lowalangi ba zi sagörö ulidanö. (Mataiʼo 24:14) Ufahaʼö göi ndraʼo wa niha Keriso tebai lahalö halöwö khö Lowalangi ha börö-börö gefe. Imane Yesu, ”Lö nibeʼemi böli, ba böi göi mihalö mböli.”​—Mataiʼo 10:8.

Ba ginötö ufahaʼö ndraʼo ba Zura Niʼamoniʼö, ufatimbaisi bakha ba dödögu zi no ufahaʼö yaʼo faoma hadia niʼilagu ba gotalua ndra Samaduhuʼö Yehowa. Ahöli-höli dödögu ba wangodödögö nifaluara ba wanuriaigö turia somuso dödö Mbanua Lowalangi andrö ba zi sagörö ulidanö. Uʼila wa so khöra waʼaterou dödö ba wameʼe simane nifarou Yesu khö niha Keriso. Börö daʼö, ba ginötö ubaso Mareko 10:21 ba uʼila wogaoni nibeʼe Yesu ”ba tabu, oʼö ndraʼo”, omasi ndraʼo tobali Samaduhuʼö.

Hizaʼi, lö iʼanemaiʼö alua niʼera-era dödögu. Duma-dumania, mato hauga fakhe lö aetu-aetu ufasa ero migu numero ”salöfö” khögu ba lotere nasional. Hizaʼi, ufahaʼö ndraʼo moroi ba Zura Niʼamoniʼö wa lö omasi Lowalangi ba wamosumange lowalangi Salöfö, me daʼö niha gamaʼuʼu. (Yesaya 65:11; Kolose 3:5) Tobali uhalö gangetula ba wombato famaisa. Luo Migu siföföna iʼotarai me ubato famai lotere, numero ”salöfö” khögu zimöna! Laʼoʼayado niha börö me lö famai ndraʼo ba migu daʼö, ba lafaso ndraʼo enaʼö ufuli famai, hizaʼi lö omasido. Lö irai famaido saʼe.

Aefa daʼö tetandraigö ”niha si bohou” andrö khögu tefaudu me luo tebayagödo idanö ba kebaktian khö ndra Samaduhuʼö Yehowa. (Efeso 4:24) Ba zi tanö owi daʼö, me mangawulido ba hotel nahia zi toröido, no ibaloi-baloido ira alawe si no irai tobali kawagu ba zilalö föna mbawa ndruhö mbateʼegu. Idönisido, imane ”Aine Sammy, dataʼomusoi-musoiʼö dödöda!” Hizaʼi uʼanemaiʼö umane, ”Löʼö!” Uwaʼö khönia wa iadaʼa uʼoʼö goi-goi Zura Niʼamoniʼö sanandrösa ba gamuata. (I Korindro 6:18) ”Hadia?” iburaʼö hörönia ba wangumaʼö. Aefa daʼö, iʼosiwawöi niwaʼö Zura Niʼamoniʼö sanandrösa ba gamuata fohorö ba ifaso enaʼö matohugö wakawasama. Hizaʼi, uʼanemaiʼö uröi ia ba möido ba mbateʼegu ba ukusi mbawa ndruhö. Iadaʼa, uwaʼö si fao faʼomuso dödö wa iʼotarai me tobali ndraʼo Samaduhuʼö me 1958, lö faröi ndraʼo ba wondrorogö bua-bua si no ubulöʼö ba waʼaurigu.

Urasoi tödögu, tola usura zi sambua buku sana-ndrösa ba howu-howu nitemagu börö me uʼoʼö wanuturu lala nibeʼe Zura Niʼamoniʼö! So ösa ba gotaluania yaʼia daʼö, oya uʼokhögö zi fahuwu sindruhu iadaʼa, uʼokhögö gohitö dödö ba waʼauri, ba sindruhu-ndruhu owua-wua dödögu.

Famai bisbol nasa ndraʼo, hizaʼi tenga daʼö zabölö uʼofönaiʼö. Lahöni-hönido niha ba oya gefegu me famai bisbol ndraʼo, hizaʼi daʼa tola taya. Hizaʼi, amakhaitagu khö Lowalangi hegöi khö ndra talifusö ba wamati, lö mamalö-malö sagötö faʼara. Imane Sura Niʼamoniʼö, ”Ba si taya nösi gulidanö, awö waʼomasinia andrö, ba soloʼö somasi Lowalangi, ba lö tebulö, irugi zi lö aetu.” (I Yohane 2:17) Iadaʼa, abölö uʼomasiʼö Lowalangi Yehowa hegöi ono mbanuania moroi ba danö böʼö!