1, 2. (a) Hezo ta’ila wa tola fahuwu niha gulidanö khö Lowalangi? (b) Hadia nifatunöda ba duho da’a?

I’OTARAI me tumbu ita irugi mate, moguna khöda nifotöi fa’omasi. Moguna ba niha gulidanö fahuwusa saro si fao fa’omasi, tenga ha fa’omasi ba gotalua zi fasita. Hiza’i, sabölö moguna ya’ia da’ö fa’omasi moroi khö Yehowa. Ato niha si lö faduhu tödö wa tola fahuwu niha gulidanö khö Lowalangi Fondrege zabölö börö me tebai ta’ila höröda. Hiza’i, sindruhunia tola fahuwu ita khönia!

² Tola ta’ila moroi ba Zura Ni’amoni’ö wa so niha si fahuwu khö Lowalangi. Moguna tafaha’ö ita moroi khöra. Hadia mbörö? Börö me fahuwusa khö Lowalangi andrö, no ohitö dödö sabölö moguna ba wa’aurida. Datafaigi duma-duma moroi khö Gaberahamo. (Baso Yakobo 2:23.) Hana wa tobali ia si fahuwu khö Lowolangi? Te’odane-dane wahuwusa Gaberahamo khö Lowalangi börö wamati, ba tobali ia ”tua zamati”. (Rom. 4:11) Na tafaha’ö ita ba duma-dumania,  sofu khöu samösa, ’Hewisa ena’ö tola u’o’ö wamati Gaberahamo hegöi ba wanga’aro’ö fahuwusagu khö Yehowa?’

3, 4. (a) Tutunö hadia wanandraigö sebua ba wamati Gaberahamo. (b) Hana wa itehegö Aberahamo tobali sumange Giza’aki?

³ Khalaigö atö me 125 fakhe ndröfi Gaberahamo, ida’i-da’i wofanö numalö ba hili. ^[1] Igo’ö-go’ö moroi furi ononia Iza’aki si 25 fakhe. I’ohe geu galitö Iza’aki ba Aberahamo zolohe rosö hegöi soguna tanö bö’önia ba wangewua’ö alitö. Da’a wondrege zafökhö si no irai itörö Aberahamo ba wa’aurinia, tenga börö me atua ia. Abölö ia nasa. Hiza’i, börö me ibe’e nononia tobali sumange khö Yehowa!​—I Moz. 22:1-8.

⁴ Da’a wanandraigö sebua ba wamati Gaberahamo. So niha sanguma’ö wa lö sökhi Lowalangi andrö börö me i’andrö khö Gaberahamo wame’e ononia tobali sumange. So göi danö bö’ö zanguma’ö wa lö i’omasi’ö nononia Aberahamo, andrö wa ifalua da’ö. Lawa’ö da’ö börö me lö khöra famati ba lö la’ila hadia zindruhunia nifotöi famati. (I Kor. 2:14-16) Hiza’i, ifalua da’ö Aberahamo tenga börö me nifaso ia, mazui tenga zi lö i’angeraigö wamalua ya’ia. Ifalua da’ö börö me so khönia wamati sindruhu. Aboto ba dödönia wa lö irai i’andrö khönia Yehowa wamalua hadia ia zi möi fangabu dödönia sagötö fa’ara. Aboto ba dödö Gaberahamo na so khönia wolo’ö, hasambalö ifahowu’ö ia Yehowa hegöi ono ni’omasi’önia. Hewisa ena’ö tola aro wamati Gaberahamo? Moguna so khönia wa’aboto ba dödö hegöi si no irai itörö.

5. Hewisa wa tola tefaha’ö Gaberahamo sanandrösa khö Yehowa ba hadia lua-lua me so khönia wa’aboto ba dödö andrö?

⁵ Fa’aboto ba dödö. Ba mbanua Guri tumbu Gaberahamo. Hiza’i, niha ba da’ö lafosumange lowalangi sofaya, simanö göi namania. (Yos. 24:2) Tobali, hewisa wa tola tefaha’ö Gaberahamo sanandrösa khö Yehowa? Ifatunö khöda Sura Ni’amoni’ö wa Aberahamo andrö nga’ötö Semi, ono Noakhi. Lö si mate Semi me 150 fakhe ndröfi Gaberahamo. I’okhögö Semi wamati saro ba idunö-dunö khö zi tenga bö’önia sanandrösa khö Yehowa. Lö aboto sibai ba dödöda, hiza’i tola manö ba da’ö tefaha’ö Gaberahamo sanandrösa khö Yehowa. Börö me so khönia wa’aboto ba dödö, andrö wa i’omasi’ö Yehowa ba so khönia wamati.

6, 7. Ba zi no alua khö Gaberahamo, hana wa tola aro wamatinia?

⁶ Si no irai itörö. Hadia zi no irai itörö Aberahamo si möi fanga’aro’ö wamatinia khö Yehowa? So zanguma’ö, hadia zi so ba wangera-ngera da’ö zi numalö ba dödö, moroi ba dödö oroma ba mbua-bua. Tefarou dödö Gaberahamo wamalua hadia zi no ifaha’ö ia sanandrösa khö Lowalangi, andrö wa ifosumange ”Yehowa, Lowalangi Fondrege Zalawa Samazökhi banua si yawa awö danö”. (I Moz. 14:22) Famosumange andrö mufotöi ia ba Zura Ni’amoni’ö ’fangata’ufi soroi ba dödö’. (Heb. 5:7) Moguna so khöda wangata’ufi soroi ba dödö ena’ö aro wahuwusada khö Lowalangi. (Zin. 25:14) Da’a zamarou dödö Gaberahamo ba wolo’ö li Yehowa.

⁷ Imane Lowalangi khö Gaberahamo hegöi Sara ena’ö laröi danö Guri ba lafawu’a ira ba mbanua bö’ö. No atua ira sa’ae ba toröi ba nose-ose sandrohu  fa’aurira. Hewa’ae i’ila Aberahamo wa oya de’ala ba wa’aurira dania, lö tebulö i’o’ö li Yehowa. Börö me so khönia wolo’ö, ifahowu’ö ba ilumö’ö ia Lowalangi. Duma-dumania me lara’u wo’omonia si baga-baga sotöi Sara, ba me arakhagö labunu Gaberahamo, ifalua dandra sahöli-höli dödö Yehowa ba wolumö’ö ya’ira. Tenga ha sakali alua da’a. (I Moz. 12:10-20; 20:2-7, 10-12, 17, 18) Aro wamati Gaberahamo börö zi no alua andre.

8. Ena’ö aro wahuwusada khö Yehowa, hadia zinangea tafalua ba wanöndra fa’aboto ba dödö hegöi si no irai alua?

⁸ Hadia tola fahuwu ita khö Yehowa? Tatu manö tola! Moguna tafaha’ö ita sanandrösa khö Yehowa, simane nifalua Gaberahamo. Ba ginötö andre, moguna khöda wa’aboto ba dödö hegöi si no irai alua, si so ba Zura Ni’amoni’ö. Abölö oya nasa ni’okhögöda iada’a moroi ba ni’okhögö Gaberahamo. (Dan. 12:4; Rom. 11:33) Oya wa’aboto ba dödö si so ba Zura Ni’amoni’ö sanandrösa khö ’Zamazökhi banua si yawa, awö danö’. Moroi ba zi no tafaha’ö ya’ita, tumbu wa’omasida khö Yehowa ba tafosumange ia. Da’a zamarou tödöda wolo’ö linia. Na tafalua da’a, tola ta’ila hewisa wolumö’ö hegöi famahowu’önia ya’ita irege aro wamatida. Na soroi ba dödö tafalua halöwö Yehowa, so khöda wa’ahono dödö, fa’ohahau dödö, ba fa’omuso dödö. (Zin. 34:9; Gamd. 10:22) Itugu oya wa’aboto ba dödö hegöi si no tatörö, itugu aro wahuwusada khönia.

9, 10. Hewisa ena’ö aro wahuwusada? (b) Hadia zangoroma’ö wa irorogö ba i’aro’ö wahuwusania Gaberahamo khö Yehowa?

⁹ Fahuwusa saro no sambua harato sebua. (Baso Gamaedola 17:17.) Tenga simane naha mbunga sebua böli, ni’oguna’ö ha ena’ö moadu nomoda. Sindruhunia sa hulö simane mbunga si baga-baga, moguna idanö hegöi fondrorogö ya’ia ena’ö itugu tedou. Simanö göi Gaberahamo, i’omasi’ö ba irorogö wahuwusania khö Yehowa. Hewisa wa tola ifalua da’ö?

¹⁰ Lö aetu-aetu Gaberahamo ba wangaro’ö fangata’ufinia soroi ba dödö hegöi ba wolo’ö. Duma-dumania, me möi ia ba mbanua Gana’ana fao nösi nomonia hegöi sohalöwö khönia. I’o’ö fefu wanuturu lala nibe’e Yehowa khönia ba wanga’i angetula sebua hegöi side-ide. Döfi tö fatua lö tumbu Giza’aki, me 99 fakhe ndröfi Gaberahamo, i’o’ou ia Yehowa ba woboto fefu ndra matua si so ba nösi nomonia. Hadia aombö dödö Gaberahamo khö Yehowa mazui i’alu-alui lala ena’ö lö  ifalua ni’andrö Yehowa? Lö’ö, faduhu dödönia khö Yehowa ba i’o’ö ”meluo da’ö”.​—I Moz. 17:10-14, 23.

11. Hana wa abu dödö Gaberahamo sanandrösa ba mbanua Zodoma hegöi Gomora, ba hewisa wanolo Yehowa ya’ia?

¹¹ Börö me lö tebulö i’o’ö li Yehowa Gaberahamo irugi ba wondrege zide-ide, itugu aro wahuwusara. Tola fahuhuo ia khö Yehowa gofu hadia ia, duma-dumania i’andrö wanolo khö Yehowa na so wanofu-nofu dödönia. Me iwa’ö khönia Yehowa wa ifakiko mbanua Zodoma hegöi Gomora, abu sibai dödö Gaberahamo. Ata’u ia na fao niha si sökhi ba wa’amate niha si lö sökhi. So so dödönia khö nono mbene’önia sotöi Loti hegöi soroi yomonia, si toröi ba mbanua Zodoma. Faduhu dödönia khö Yehowa, ”Sanguhuku ulidanö ma’asagörö”. Börö da’ö ifatunö khö Yehowa gabula dödönia andrö si fao fangide-ngide’ö. Lö mofönu Yehowa khönia ba ifatunö wa so khönia wa’ahakhö dödö. Ifatunö Yehowa wa i’alui niha si sökhi amuata ba i’orifi ira fatua lö ifalua wanguhuku.​—I Moz. 18:22-33.

12, 13. (a) Hadia gunania khö Gaberahamo me so khönia wa’aboto ba dödö hegöi si no irai alua? (b) Hadia zangoroma’ö wa faduhu dödö Gaberahamo khö Yehowa?

¹² Fefu wa’aboto ba dödö hegöi si no irai alua khö Gaberahamo, da’ö zanolo ya’ia ba wanga’aro’ö fahuwusania khö Yehowa. Aefa da’ö, me iwa’ö khönia Yehowa ba wame’e ononia tobali sumange, i’ila Aberahamo wa so khö Yehowa wa’ebolo dödö, fa’ahakhö dödö, tola lafaduhusi tödö, ba ilumö’ö ira. Faduhu dödö Gaberahamo wa lö i’ozumaigö tobali Lowalangi si lö sökhi Yehowa! Hana wa tola tawa’ö da’ö?

¹³ Fatua lö iröi zohalöwö khönia, imane Aberahamo, ”Mi’iagö da’e, awö galide, möiga misa mangandrö, daruaga ono, ba na noa da’ö, ba mafuliga khömi.” (I Moz. 22:5) Hadia geluaha wehede Gaberahamo andrö? Hadia falimo ia me iwa’ö wa mangawuli ia hegöi Giza’aki, hewa’ae sindruhunia möi ia ba wame’e ononia tobali sumange? Lö’ö. Imane Sura Ni’amoni’ö, aboto ba dödö Gaberahamo wa tola isusugi Giza’aki Yehowa moroi ba wa’amate. (Baso Heberai’o 11:9.) No i’ila samösa Aberahamo wa tola ibe’e khöra ndraono Yehowa hewa’ae no atua ira. (Heb. 11:11, 12, 18) I’ila wa lö si tebai khö Yehowa. Lö aboto ba dödö Gaberahamo hadia zalua me luo da’ö. Hiza’i, mamati ia wa tola isusugi nononia Yehowa, ba alua zi no ifabu’u Lowalangi. Andrö wa lafotöi Gaberahamo ”tua zamati”.

14. Hadia zi tobali daha-tahau ba wanga’i halöwö khö Yehowa, ba hewisa wa tola tetolo ndra’ugö moroi ba duma-duma Gaberahamo?

¹⁴ Ba ginötö andre, lö i’andrö khöda  Yehowa ba wame’e onoda tobali sumange. I’andrö khöda ena’ö ta’o’ö goroisania. Itaria lö aboto ba dödöda hana wa ibe’e goroisa andrö mazui abua khöda ba wolo’ö ya’ia. Hadia simane da’ö nirasoimö? So zanguma’ö wa abua halöwö fanuriaigö. Tola manö aila ira ma abua khöra wahuhuosa ba niha si lö irai falukha khöra. Tanö bö’önia, aila ira na fabö’ö moroi ba nawöra wohalöwö mazui ba nawöra sekola. (II Moz. 23:2; I Tes. 2:2) Na la’andrö khöu wamalua halöwö sabua, törö tödöu duma-duma wamati hegöi falö’ata’u Gaberahamo. Na ta’angerönusi duma-duma ndra matua hegöi ira alawe si lö faröi, tola terou dödöda ba wolo’ö amuatara hegöi ba wangahatö’ö ya’ita khö zi Fahuwu khöda, Yehowa.​—Heb. 12:1, 2.

15. Hana wa faduhu dödöda wa lö maniasa Gaberahamo me i’o’ö li Yehowa?

¹⁵ Hadia maniasa Gaberahamo me i’o’ö goroisa Yehowa? Imane Sura Ni’amoni’ö wa ’mate [Gaberahamo] ba wa’atua omasiö, no atua ia ba ahono dödönia’. (I Moz. 25:8, NW) Hewa’ae 175 fakhe ndröfinia, ahono dödönia ba zi no ifalua ba wa’aurinia. Hadia mbörö? Börö me abölö moguna khönia wahuwusa khö Yehowa moroi ba danö bö’ö. Na tabaso wa ’no atua ia ba ahono dödönia’, tenga da’ö geluahania wa lö omasi ia auri ba zi so föna.

16. Hadia manö zomuso dödö Gaberahamo ba Waradaiso?

¹⁶ Imane Sura Ni’amoni’ö wa ”ibaze-baze’ö sa mbanua andrö [Aberahamo], saro dane-dane, ba zi no möi tuka ba sotomo Lowalangi”. (Heb. 11:10) Faduhu dödö Gaberahamo wa samuza inötö dania hasambalö i’ila mbanua andrö, na mamatörö Mbanua Lowalangi ba gulidanö! Khalaigö atö hawa’omuso dödö Gaberahamo na auri ia ba gulidanö Faradaiso ba itohugö wanga’aro’ö fahuwusania khö Lowalangi. Omuso dödönia na i’ila wa famatinia andrö no tobali wangaro’ö ono mbanua Lowalangi ba zi ngahönö fakhe fa’ara! Ba Waradaiso, awena i’ila dania Aberahamo wa so geluaha zumange nibe’enia ba Hili Moria. (Heb. 11:19) Aboto ba dödönia dania wa fa’afökhö nirasoinia me ibe’e Giza’aki tobali sumange, no tobali fanolo ba niha si hauga zuta fa’ato ba wangila hewisa wa’afökhö dödö Yehowa me ibe’e Nononia Yesu Keriso tobali höli ba niha gulidanö. (Yoh. 3:16) Duma-duma Gaberahamo zanolo ya’ita ena’ö ta’ame’egö tödö ba wangandrö saohagölö höli si no mube’e, börö me no da’ö wa’omasi sebua!

17. Hadia gangetula nihalöda, ba hadia nifatunöda ba duho aefa da’a?

¹⁷ Böi tebulö ta’o’ö wamati Gaberahamo. Simane ya’ia, moguna so khöda wa’aboto ba dödö hegöi si no irai alua. Na lö aetu tafaha’ö ita sanandrösa khö Yehowa ba ta’o’ö niwa’önia, tarasoi howu-howu hegöi folumö’ö nibe’enia khöda. (Baso Heberai’o 6:10-12.) Yatobali si Fahuwu khöda Yehowa irugi zi lö aetu! Ba duho aefa da’a, so tölu duma-duma nifatunöda sanandrösa ba niha samati si no tobali si fahuwu khö Lowalangi.