HADIA ginötö sabölö omuso dödöu ba wa’auriu? Hadia me mangowalu’ö mazui me awena tumbu khöu nono sia’a? Mazui ba ginötö tebayagö ndra’ugö idanö? Tola manö inötö sabölö omuso dödöu ya’ia da’ö me tebayagö ndra’ugö idanö. Khalaigö atö hawa’omuso dödö ndra talifusöda me la’ila öhalö gangetula föna niha sato wa ö’omasi’ö Lowalangi moroi si’aikö ba dödöu, nosou ma’asambua, gera-erau awö wa’abölöu!​—Mrk. 12:30.

Tatu manö omuso dödömö me öhalö halöwö khö Yehowa i’otarai me tebayagö ndra’ugö idanö. Hiza’i, ato ndra talifusöda sanuriaigö Mbanua Lowalangi si lö fa’omuso dödö simane me awena tebayagö ira idanö. Hadia mbörö? Hana wa moguna tahalö halöwö Yehowa si fao fa’omuso dödö?

So khöda wa’omuso dödö börö duria Mbanua Lowalangi. No ifabu’u Yehowa wa famatörönia dania zamakiko ulidanö si lö sökhi andre ba ibe’e gulidanö si bohou. Imane Zefania 1:14, ”No ahatö mbaŵa sebua khö Yehowa; no ahatö ia, ba alio sibai irugi.” Hiza’i, na no ara tabalo-baloi ginötö andrö, tola manö lö khöda fa’omuso dödö. Lua-luania awuwu ita ba wangai halöwö khö Lowalangi.​—Gamd. 13:12.

Na fariawö ita ba nono mbanua Lowalangi, tefarou dödöda ba wangai halöwö khö Yehowa si fao fa’omuso dödö. Tola manö adöni dödöda ba zindruhu hegöi ba wangai halowö khö Lowalangi börö gamuata si sökhi nono mbanua Yehowa. (I Fet. 2:12) Hewisa na so ba gotalua ndra talifusöda niha Keriso si göna degu-degu ba gangowuloa börö me no isawö goroisa Lowalangi? Tola manö afatö dödöra ba lö khöra fa’omuso dödö sa’ae.

Tola alö wa’omuso dödöda na tagohi gana’a soya. Ba gulidanö nifatörö Zatana andre ifarou ita ena’ö ta’öli gofu hadia ia manö hewa’ae lö moguna khöda. No irai iwa’ö Yesu, ”Tebai enoni zi darua niha, ma fa’udu ia ba zi samösa ba i’omasi’ö zi samösa, ba mazui molemba ia ba zi samösa, ba i’ositengagö zi samösa. Tebai enoni Lowalangi ami ba enoni gana’a.” (Mat. 11:28-30) Lö ta’ila ta’osamuzaigö wamosumange Yehowa si fao fa’omuso dödö ba ginötö tagohi gisö-isö dödö ba gulidanö.

Lö abua wangai halowö khö Yehowa ba niha sangomasi’ö ya’ia. (I Yoh. 5:3) Böi olifu ita wehede Yesu me iwa’ö, ”Mi’aine khögu dozi serege tödö, awö zonoro, ba ufolombase ami. Mihare’ö khömi kalo mbagi andrö khögu ba mitöngöni khögu, me no sebolo tödö ndra’o ba si lö fayawa tödö, ba falukha ami wolombase dödömi. Moguna sa kalo mbagi andrö, khögu, ba no aoha noro andrö khögu.” (Mat. 11:28-30) Na tobali ita niha Keriso tola so khöda wa’ohahau dödö hegöi fa’omuso dödö. So tölu mbörö wa tola ’owua-wua dödöda khö Lowalangi sangorifi ya’ita’. Datafaigi atö.​—Hab. 3:18.

Tafosumange Lowalangi sohahau tödö, Same’e-Fa’auri. (Hal. 17:28; I Tim. 1:11) Aboto ba dödöda wa mo’ömö fa’auri ita khö Zokhö ya’ita. Andrö, böi aetu-aetu ba wangai halöwönia si fao fa’omuso dödö, hewa’ae no ara tebayagö ita idanö.

Duma-dumania Héctor, samösa pengawas keliling sangai halöwö khö Yehowa ba zi 40 fakhe fa’ara. ’Ba wa’atuania’ lö aetu wa’omuso dödönia ba wangai halöwö khö Yehowa. (Zin. 92:13-15) Tetaha halöwönia khö Lowalangi börö me mofökhö wo’ominia. Hewa’ae simanö lö taya wa’omuso dödönia. Imane, ”Hewa’ae abu dödögu börö me itugu abölö-bölö wökhö wo’omogu ba abua wondrorogö ya’ia, lö utehe taya wa’omuso dödögu ba wangai halöwö khö Lowalangi. U’ila wa so ndra’o börö Yehowa si so ohitö dödö ba wamazökhi niha, andrö wa u’omasi’ö ia soroi ba dödö ba ufalua halöwönia. Uforege wamalua halöwö fanuriaigö, ba itörö-törö manö tödögu dötönafö moroi ba Mbanua Lowalangi ena’ö lö taya wa’omuso dödögu.”

No ibe’e höli khöda Yehowa ena’ö tasöndra wa’ohahau dödö. ”Simanö sa wa’omasi Lowalangi nösi gulidanö, no ibe’e Nononia andrö, si ha sambua, ena’ö lö tekiko dozi samati khönia, ena’ö so khöra wa’auri si lö aetu.” (Yoh. 3:16) Tola te’efa’ö horöda ba tasöndra wa’auri si lö aetu na mamati ita ba höli nibe’e Lowalangi. Ta’andrö sibai saohagölö ba mbuala andre! Börö da’ö, omasi ita tahalö halöwö Yehowa si fao fa’owua-wua dödö.

Imane samösa dalifusöda moroi ba Meksiko sotöi Jesús, ”Me mböröta, i’osawuyu ndra’o halöwögu. Ena’ö usöndra gefe sebua, ukila wohalöwö he na lö mufarou ndra’o, mohalöwödo hewa’ae no italu’i inötö. Da’ö zasese ufalua. Aefa da’ö ufaha’ö ndra’o sanandrösa khö Yehowa hegöi me ibe’e nono ni’omasi’önia ba niha gulidanö.  Omasido sibai uhalö halöwö Yehowa. Börö da’ö ululu wa’aurigu khönia ba ubato wohalöwö hewa’ae no 28 fakhe mohalöwödö ba da’ö. Aefa da’ö uhalö halöwö safönu inötö.” I’otarai da’ö, omuso dödö Jesús wangai halöwö khö Yehowa.

Na sökhi lala wa’aurida tola tasöndra wa’omuso dödö. Hadia lö olifu’ö hewisa wa’aurimö meföna fatua lö ösöndra wa’aboto ba dödö sanandrösa khö Yehowa? Ifasugi Faulo ba dödö niha Keriso si so ba Roma wa ya’ira ”sawuyu horö”, hiza’i no tobali ira ”enoni zatulö”. No so hare ira ”ba wangohau-hau” ba fozunia ya’ia da’ö fa’auri si lö aetu. (Rom. 6:17-22) Simanö göi ita, ta’amoni’ö lala wa’aurida, irege aröu ita moroi ba wangabu dödö börö gamuata wohorö hegöi amuata si lö sökhi tanö bö’ö. Da’a zi tola mangohahau’ö tödöda.

Duma-duma tanö bö’ö ya’ia da’ö Jaime, fatezu halöwönia. Ya’ia andre niha si lö faduhu tödö wa so Lowalangi ba faduhu dödönia göi wamaha’ö evolusi. Ibörögö möi Jaime ba gangowuloa niha Keriso ba ahöli dödönia me i’ila wa’omasi niforoma’ö ndra talifusöda. Iröi fefu gamuatania si no irai ifalua ba i’andrö wanolo khö Yehowa ena’ö so khönia wa’afaduhu dödö. Imane Jaime, ”Itugu ara, itugu aboto ba dödögu wa so Nama sebua fa’omasi ba Lowalangi si so fa’ahakhö dödö. Na u’o’ö goi-goi Yehowa no sambua folumö’ö khögu da’ö. Tola manö no matedo iada’a simane ndra awögu tanö bö’ö na lö uböhöli fatezu. Awena ohahau dödögu me no ube’e ginötögu wangai halöwö khö Yehowa.”

Molo’ö ya’ugö, hewisa dödöda gasa-gasa wombaloi fa’atekiko gulidanö si lö sökhi andre? Böi olifu wa ya’ita andre ”sanaru ba geheha” ba ’tabasi dania wa’auri si lö aetu’. Börö da’ö, ”Böi atage ita, wolau si sökhi; na inötönia dania, ba mamasi ita, na lö atage ita.” (Gal. 6:8, 9) Moroi ba wanolo Yehowa, ya’anau gölöda ba taforege wangokhögö amuata si tola manolo ya’ita na tohare ”wamakao sabölö-bölö”, ba datahalö halöwö Yehowa si fao fa’omuso dödö, hewa’ae oya wamakao nitaögöda.​—Fam. 7:9, 13, 14; Yak. 1:2-4.

Na anau gölöda, faduhu dödöda wa ifahowu’ö ita Lowalangi, börö me itöngöni halöwö ba fa’omasi niforoma’öda khönia hegöi ba döinia. Na lö aetu tahalö halöwö Yehowa si fao fa’omuso dödö, tatu manö fao dödöda ba niwa’ö zinunö Dawido, ”No ube’e ba gametahögu Yehowa, si lö mamalö-malö; naso ia ba gambölögu, ba lö mangiwa ndra’o. Andrö omuso dödögu, ba ma’iki lakhömigu andrö ba ösigu göi molombase, lö hadia ia.”​—Zin. 16:8, 9.