1, 2. Fahuwusa Yonata ba Dawido no sambua duma-duma si sökhi sanandrösa ba walöfaröi. Hadia mbörö?

TATU mano ahöli-höli dödö Yonata ba wa’abarani Dawido, si bohou ebua. Me no aefa ibunu Goliato Dawido, i’ohe ”högö ndrawa Wilisiti” khö Razo Saulo, ama Yonata. (I Zam. 17:57) Faduhu dödö Yonata, wa fao-fao Lowalangi khö Dawido, ba i’otarai da’ö fahuwu ira. Fawu’u li ira wa lö faröi ira khö nawöra zamösana. ( I Zam. 18:1-3) Lö faröi Yonata khö Dawido irugi wa’amatenia.

² Hewa’ae Dawido nifili Yehowa tobali razo ndraono Gizara’eli, lö faröi Yonata khö Dawido. Me itandraigö ibunu Dawido Saulo, abu dödö Yonata zi fahuwu khönia. I’ila wa ba danö si mate Horesi so Dawido, andrö möi Yonata ba wangabe’e’ö ya’ia ena’ö i’odaligö Yehowa. Imane khö Dawido, ”Böi ata’ufi, lö’ö sa möi’ö ba danga namada Saulo; razo ndraono Gizara’eli dania  ndra’ugö, ba tambalinamö dania ndra’odo.”​—1 Zam. 23:16, 17.

3. Hadia zabölö moguna khö Yonata, ba hezo ta’ila da’ö? (Faigi gambara ba wamobörö wamaha’ö.)

³ Si to’ölönia tahöni-höni sibai niha si lö faröi, simane Yonata. Hiza’i, tenga ha falöfaröinia khö Dawido nihöni-hönida, börö me da’ö zabölö moguna khö Yonata ya’ia da’ö lö faröi ia khö Yehowa. Andrö wa lö faröi ia khö Dawido ba lö afökhö dödönia na tobali Dawido razo. Itolo Dawido ena’ö i’odaligö Yehowa. Ya’ira si darua andre lö faröi khö Yehowa hegöi khö nawöra zamösana. Lafalua zi no lafabu’u, ”Ba lö aefa si so ba mbörö Yehowa, he khöda ba he ba nga’ötöda dania, götö-götö wa’ara.”​—I Zam. 20:42.

4. (a) Hewisa ena’ö tola tasöndra wa’ohahau dödö hegöi fa’ahono dödö? (b) Hadia nifatunöda ba duho da’a?

⁴ Moguna lö faröi ita ba nösi nomoda, ba nawöda hegöi khö ndra talifusöda ba mbanua niha Keriso (I Tes. 2:10, 11) Hiza’i, sabölö moguna ya’ia da’ö böi faröi ita khö Yehowa, Umbu wa’aurida! (Fam. 4:11) Na tafalua da’ö, tasöndra wa’ohahau dödö ba fa’ahono dödö. Böi faröi ita khö Lowalangi hewa’ae gofu hadia ia zalua. Ba duho da’a, tafatunö hewisa duma-duma Yonata möi fanoloda ena’ö lö faröi khö Yehowa ba zi öfa ngawalö salua andre: (1) na so samösa zamatörö, ba wamaigida lö sinangea tafosumange ia, (2) ba ginötö tatatugöi ha’ökhö lö faröi ita, (3) na so samösa zohalöwö ba gangowuloa samöbögö si lö duhu khöda mazui ebua zambuana dödöra khöda, ba (4) na abua khöda wamalua si no tazazi.

5. Hana wa’abua ba ndraono Gizara’eli wangoroma’ö falöfaröira khö Lowalangi me mamatörö Zaulo?

⁵ So zabu dödö Yonata hegöi ndraono Gizara’eli. Razo Saulo, ama Yonata, lö i’o’ö li Yehowa. Andrö wa itimbagö ia Yehowa. (I Zam. 15:17-23) Hewa’ae simanö, itehegö Lowalangi khö Zaulo mamatörö ia ba zi hauga fakhe. Abua ba ndraono Gizara’eli wangoroma’ö falöfaröira khö Lowalangi, börö me si lö sökhi nifalua razo, si no dumadao ba ”dadaoma zalawa andrö khö Yehowa”.​—I Nga. 29:23.

6. Hadia dandra wa lö faröi Yonata khö Yehowa?

⁶ Hewa’ae faröi Zaulo khö Lowalangi, lö faröi Yonata khö Yehowa. (I Zam. 13:13, 14) Samuza inötö, so 30.000 gureta wanuwö ndra saradadu ndrawa Wilisiti, möi lasuwö ndraono Gizara’eli. Ha 600 zaradadu si fao khö Zaulo, ba ha ya’ia faoma Yonata zolohe wöda wanuwö. Hewa’ae simanö, lö ata’u Yonata. Itörö tödönia wehede Zamueli me iwa’ö, ”Lö’ö sa itibo’ö mbanuania Yehowa, börö döinia andrö, si no ebua.” (I Zam. 12:22) Imane Yonata khö ndra saradadu si fao khönia, ”Lö’ö sa fa’atebai khö Yehowa, na itolo ita, he ato niha ba he lö ato!” Möi Yonata hegöi ndra saradadu andrö ba wanuwö ndrawa Wilisiti ba labunu 20 niha wa’ato. Mamati Yonata khö Yehowa ba tefahowu’ö ia. I’asogö ndruru danö Lowalangi irege ata’u ndrawa Wilisiti ba faoma labunu nawöra. Ba gafuriatania, möna ndraono Gizara’eli.​—I Zam. 13:5, 15, 22; 14:1, 2, 6, 14, 15, 20.

7. Hewisa lagu Yonata khö namania?

 ⁷ Hewa’ae lö i’o’ö li Yehowa Saulo, lö aetu i’o’ö li namania Yonata ndrege zi tola ifalua. Duma-dumania, möi ira fasuwö ba wolumö’ö nono mbanua Yehowa.​—I Zam. 31:1, 2.

8, 9. Na tafosumange niha si no ifataro Lowalangi, da’ö dandra walöfaröi ita khönia. Hadia geluahania?

⁸ Simane Yonata, böi faröi ita khö Yehowa, ta’o’ö goi-goi ndra samatörö ndrege zi tola tafalua. Itehegö Yehowa khö ndra ’salawa’ ba wamatörö niha gulidanö ba omasi ia na tafosumange ira. (Baso Roma 13:1, 2.) Da’a mbörö wa tafosumange ndra samatörö hewa’ae falimo ira ba hulö tenga sinangea lafosumange ira ba wamaigida. Moguna tafosumange niha si no ifataro Yehowa, he yomo ba nomo hegöi ba mbanua niha Keriso.​—I Kor. 11:3; Heb. 13:17.

⁹ So samösa dalifusöda sotöi Olga moroi ba Amerika Selatan. Iforoma’ö wa lö faröi ia khö Yehowa, ifosumange wo’omonia ira matua hewa’ae lö sökhi lagu wo’omonia khönia.[Pron: ȯlʹgə] ^[1][2] Itaria lö ifahedesi ia fo’omonia ba ibe’e wehede si tola mangafökhöi’ö tödönia börö me no tobali ia Samaduhu’ö Yehowa. Ifeta’u Olga wa iröi ia dania ba i’ohe ndraonora. Hewa’ae simanö, ’lö isulöni zi lö sökhi Olga awönia si lö sökhi’. I’odödögö ena’ö tobali ia fo’omo si sökhi. Ilau mondrino, isasai nukha wo’omonia ba ibe’e dödönia nösi nomo wo’omonia. (Rom. 12:17) Fao Olga khö wo’omonia we’amöi ba wangondrasi ndra talifusöra hegöi ndra awö-awönia. Duma-dumania, me möi wo’omonia ba wogo’o amania ba mbanua bö’ö, ihenaigö Olga fefu zoguna khöra ba lala. Aefa da’ö, sagötö alua waö-wa’ö halöwö ba wogo’o amania, baero ba gosali ibaloi Olga. Hauga fakhe aefa da’ö, ibörögö sökhi gamuata wo’omonia börö me so khö Olga wa’ebolo dödö hegöi ba wamosumange fo’omonia. Iada’a, ibe’e wamarou dödö khö Olga ba möi ifasao ba gangowuloa. Itaria göi möi ia ba gangowuloa.​—I Fet. 3:1.

10. Hana wa ifili Yonata wa lö faröi ia khö Dawido, tenga khö Zaulo?

¹⁰ Me edöna ibunu Dawido Saulo, abu dödö Yonata ba wotatugöi hadia khö namania fao ia mazui khö zi fahuwu khönia. Aboto ba dödö Yonata wa fao Lowalangi khö Dawido, tenga khö Zaulo. Börö da’ö, lö faröi ia khö Dawido. Ifarou Dawido ena’ö ibini’ö ia ba ihalö dödö Zaulo faböi ibunu Dawido.​—Baso I Zamueli 19:1-6.

11, 12. Na ta’omasi’ö Lowalangi, lö faröi ita khönia. Tutunö hadia geluahania.

¹¹ Samösa dalifusöda ira alawe moroi ba Australia sotöi Alice, ihalö gangetula ha’ökhö lö faröi ia. Me ibörögö ifaha’ö ia ba Zura Ni’amoni’ö, itutunö ba nösi nomonia hadia zi no ifaha’ö ya’ia. Ifatunö wa lö fao ia khöra ba wo’owasaini fanunu fandru ba itutunö hadia mbörö. Afatö dödö nösi nomonia ba mofönu sibai ira. Lamane tödöra wa lö ba dödö Alice ira sa’ae. Aefa da’ö, imane inania wa lö omasi ia falukha khö Alice sa’ae. Imane Alice, ”Lö utötöna wa simane da’a zalua, abu sibai dödögu börö me sindruhunia u’omasi’ö sibai ira. Hewa’ae simanö, uhalö gangetula ba wangomasi’ö Yehowa hegöi Ononia. Ubayagö ndra’o idanö me so gangowuloa sebua.”​—Mat. 10:37.

¹² Na lö mangelama ita, abölö ta’omasi’ö tim olaraga, sekola, mazui soi moroi ba wa’omasida Yehowa. Duma-dumania Henry, omasi sibai ia facatur ba omasi ia na tobali juara satu ba zekolania. Börö me fatandri ira ero hari Satu, lua-luania lö i’ila möi ba wanuriaigö hegöi ba gangowuloa. Ifatunö Henry wa abölö lö faröi ia ba zekolania moroi na khö Yehowa. Börö da’ö, ihalö gangetula, ibato famai catur ba zekola.​—Mat. 6:33.

13. Na lö faröi ita khö Lowalangi, tola tata’ögö gofu hadia zalua ba nomo. Tutunö hadia geluahania.

¹³ Itaria, abua khöda wo’endrongagö ba wangoroma’ö falöfaröi ba nösi nomoda. Duma-dumania, imane Ken, ”Omasido asese ufaigi mamagu si no alawa döfi ba u’andrö khönia ena’ö fasakali mörö ia ba nomoma. Hiza’i, lö fahasara dödö bo gataluara khö wo’omogu ira alawe faoma mamagu.” Imane nasa, ”Lö u’ila u’o’musoi’ö dödöra ma’adarua.” I’angerönusi Ken hadia niwa’ö ba Zura Ni’amoni’ö ba aboto ba dödönia wa moguna abölö i’omusoi’ö dödö wo’omonia ba lö faröi ia khönia. Isöndra gangetula si sökhi ba fao dödö wo’omonia ira alawe. Itutunö khö wo’omonia hadia mbörö wa moguna i’omasi’ö ninania matuania. Ifatunö göi khö ninania hadia mbörö wa moguna i’osinangegö numönönia.​—Baso I Moze 2:24; I Korindro 13:4, 5.

14. Hewisa gamuata Zaulo khö nononia Yonata?

¹⁴ Tola lö faröi ita khö Yehowa hewa’ae so dalifusöda sangai halöwö ba gangowuloa ebua zambuana dödöra khöda. Lowalangi zombayoini Saulo tobali razo, hiza’i lö sökhi ia khö nononia. Lö aboto ba dödönia hana wa i’omasi’ö Yonata andrö Dawido. Börö da’ö, me edöna Yonata itolo Dawido, mofönu sibai Zaulo ba i’ailasi nononia föna niha sato. Hewa’ae simanö, ifosumange namania Yonata ba lö faröi ia khö Yehowa hegöi khö Dawido.​—I Zam. 20:30-41.

15. Hewisa ita na lö fagölö-gölö dödö ndra talifusöda khöda?

 ¹⁵ Ba mbanua niha Keriso iada’a, lö ebua dödö zambuana ndra talifusöda sangai halöwö ba ngangowuloa. Hiza’i ya’ira andre tenga niha so’ahonoa. Tola manö fasala gangetula nihalöra mazui lö fagölö-gölö dödöra khöda. (I Zam. 1:13-17) Hewa’ae simanö, omasi ita lö faröi khö Yehowa.

16. Hezo manö taforoma’ö wa lö faröi ita khö Lowalangi ba lö ta’era-era dana khöda?

¹⁶ Omasi Zaulo na Yonata zogati ya’ia tobali razo ndraono Gizara’eli, tenga Dawido. (I Zam. 20:31) Hiza’i lö i’alui Yonata dana khönia, i’omasi’ö sibai Yehowa ba lö faröi ia. Fahuwu ia khö Dawido ba ifalua zi no ifabu’u. Niha sangomasi’ö ba si lö faröi khö Yehowa, hasambalö ifalua zi no iwa’ö hewa’ae abua khönia wamalua ya’ia. (Zin. 15:4) Lö faröi ita khö Lowalangi natafalua zi no tafabu’u. Simane na no fawu’u li ita ba niha sanandrösa ba wangalui kefe, hasambalö tafalua ia hewa’ae na fabö’ö moroi ba ni’era-erada mege. Na alua gabula dödö ba nomo, moguna ena’ö lö faröi ita ba ngambatöda börö me da’ö zangoroma’ö wa ta’omasi’ö Lowalangi.​—Baso Maleakhi 2:13-16.

17. Hadia manö zi no tafaha’ö ya’ita moroi ba duho da’a?

¹⁷ Simane Yonata, gofu hadia ia zalua böi faröi ita khö Lowalangi. Na afatö dödöda börö lagu ndra talifusöda, böi faröi ita khöra. Na tafalua da’ö no ta’omusoi’ö dödö Yehowa ba tasöndra wa’ohahau dödö. (Gamd. 27:11) Faduhu dödöda wa ifalua zabölö sökhi Yehowa ba ilumö’ö ita. Ba duho aefa da’a, tafatunö duma-duma niha si faröi hegöi si lö faröi me götö Dawido.