Na sindruhu simane da’ö, moguna ta’angeraigö hadia lua-luania ba wa’aurida. Duma-dumania, so samösa ndraono samunu ya’ia samösa. Afatö sibai dödö namania. Manofu-nofu dödönia, hadia no i’ila Yehowa wa hasambalö alua da’a, ba no itatugöi wa tola mataögö gabula dödö sebua andre fo’omogu? Ba gulidanö si so ita andre, ato moroi ba gotaluada zanaögö abula dödö. Andrö, hadia faduhu dödöda wa no itatugöi Yehowa fefu hadia ia zalua ba wa’aurida?

Na tahaogö tafareso I Korindro 10:13, tola ta’ila wa lö irai fao dödö Zura Ni’amoni’ö ba wehede sanguma’ö wa no i’ila Yehowa hadia zi tola tataögö ba awena itatugöi hadia wanandraigö nitaögöda. Hana wa tola tawa’ö da’ö? Datatutunö öfa ngawalö si tobali daninia.

Si oföna, ibe’e Yehowa mbuala ba wangai angetula samösa ba niha. Omasi ia na tahalö samösa gangetula. (V Moze 30:19, 20; Yosua 24:15) Na tahalö gangetula sangomusoi’ö dödö Yehowa, tola faduhu dödöda wa ibe’e khöda wanuturu lala. (Gamaedola 16:9) Hiza’i, ba ginötö tahalö gangetula si lö sökhi, tataögö hadia lua-luania. (Galatia 6:7) Andrö, na no itatugöi Yehowa hadia wanandraigö salua khöda, hadia da’ö geluahania wa tola tahalö samösa gangetula?

Si dua, lö ilumö’ö ita Yehowa moroi ba zalua si lö mudöna-döna. (Zangombakha 9:12) Te so niha si göna de’ala börö me so ia ba nahia ba ba ginötö si sala. Itutunö Yesu sanandrösa ba zi 18 niha si mate nilangö malige. Ifatunö wa sindruhu-ndruhu tenga Lowalangi mbörö wa’amatera. (Luka 13:1-5) Andrö wa lö atulö na so ba wangera-ngerada wa no oföna itatugöi Lowalangi haniha zi mate ba sauri, fatua lö alua da’ö.

Si tölu, fefu niha zamösana moguna laforoma’ö wa’alöfaröira khö Yehowa. Imane Satana wa lafosumange Yehowa ira niha samosumange ya’ia börö me ifahowu’ö ira. Iwa’ö Satana wa na göna ita abula dödö, hasambalö faröi ita khö Yehowa. (Yobi 1:9-11; 2:4; Fama’ele’ö 12:10) Na iheta wanandraigö da’ö fatua lö tataögö ia, hulö na atulö hadia niwa’ö Zatana.

Si öfa, ihalö gangetula Yehowa wa lö omasi ia i’ila fefu hadia zalua khöda ba zi so miföna. Sindruhunia, na omasi Yehowa i’ila hadia zalua ba zi so miföna, tatu tola ifalua da’ö. (Yesaya 46:10) Hiza’i, iforoma’ö Sura Ni’amoni’ö wa lö asese i’oguna’ö wa’abölönia da’ö Yehowa. (I Moze 18:20, 21; 22:12) Yehowa no safönu fa’omasi ba fa’atulö, andrö wa i’ame’egö tödö gofu hadia ia gengetula nihalöda.—V Moze 32:4; II Korindro 3:17.

Na simanö, hadia geluaha wehede Waulo me iwa’ö wa ”lö ibe’e tetandraigö ami [Yehowa], si tebai mitaha”? Ba ayati da’ö, nitutunö Waulo ya’ia da’ö hadia nifalua Yehowa ba ginötö göna ita fanandraigö, tenga fatua lö alua da’ö. Na tafaduhusi tödö Yehowa, tola itolo ita ba wanaögö gofu hadia ia wanandraigö salua ba wa’aurida. (Zinunö 55:23) Iada’a, datafaigi dombua dani irege iwa’ö wehede da’ö Faulo.

Dani siföföna ya’ia da’ö fanandraigö nitaögöda ”ha fanandraigö ba niha”. Sagötö auri ita ba gulidanö nifatörö Zatana andre, hasambalö oya wanandraigö sabua salua khöda. Hiza’i, na ta’odaligö Yehowa, tola tataögö fefu hadia ngawalö wanandraigö ba tola lö faröi ita. (I Fetero 5:8, 9) Ba mböröta faza 10 ba zura I Korindro, isura Faulo ngawalö wanandraigö nitaögö ndraono Gizara’eli me so ira ba danö si mate.  (I Korindro 10:6-11) Niha sangodaligö Yehowa tola lataögö fefu wanandraigö salua. Hiza’i, so göi ösa ndraono Gizara’eli si lö molo’ö niwa’ö Yehowa. Faröi ira khö Yehowa börö me lö la’odaligö ia.

Dani si dua ya’ia da’ö ”lö faröi Lowalangi”. Hadia geluahania? Na ta’ila hewisa wondrorogö Yehowa nono mbanuania i’otarai me föna irugi iada’a, tola ta’ila wa lö faröi ia ba wanolo niha ”sangomasi’ö ya’ia ba solo’ö oroisania”. (V Moze 7:9) Ta’ila göi wa lö aetu ifalua hadia zi no ifabu’u. (Yosua 23:14) Tola faduhu dödöda wa (1) lö itehegö Yehowa itugu abua wanandraigö salua khöda irege lö sagu sa’ae khöda ba wanaögö ya’ia, ba (2) ”ifaigi göi wa’awai” gabula dödö andrö.

Hewisa ’wamaigi Yehowa lala wa’awai’ gabula dödö andrö ba niha sangodaligö ya’ia? Tola iheta wanandraigö Yehowa. Hiza’i, moguna tatörö tödöda niwa’ö Wa’ulo wa ”ifaigi göi wa’awai [Yehowa], ena’ö tola mitaha”. I’aro’ö ita Yehowa ena’ö lö faröi ita. Da’a lala sasese ifalua ba wanolo ya’ita. Datadunö-dunö lala wamaluania da’a.

• Yehowa no ”sondrara tödöma, ba wa’afökhö andrö fefu”. (II Korindro 1:3, 4) Tola i’oguna’ö Zura Ni’amoni’ö, ehehania, sawuyu si lö faröi ba wame’e khöda fa’ohahau dödö, fa’ohahau wangera-ngera, hegöi hadia ia nirasoida.—Matai’o 24:45; Yohane 14:16; Roma 15:4.

• I’oguna’ö gehehania ni’amoni’ö Yehowa ba wame’e khöda fanuturu lala. (Yohane 14:26) Eheha ni’amoni’ö zanolo ya’ita ena’ö itörö tödöda waö-waö hegöi goi-goi Zura Ni’amoni’ö irege tola tahalö gangetula si sökhi.

• Tola i’oguna’ö mala’ikania Yehowa ba wanolo ya’ita.—Heberai’o 1:14.

• Tola i’oguna’ö ndra talifusöda ba wanolo ya’ita. Tola la’aro’ö ita ba wehede mazui ba nifaluara.—Kolose 4:11.

Börö da’ö, hadia wamaha’ö si tola tahalö moroi ba wehede Waulo si so ba I Korindro 10:13? Lö ifili Yehowa hadia wanandraigö salua khöda. Hiza’i, tola faduhu dödöda wa na ta’odaligö Yehowa, tola tataögö fefu ngawalö gabula dödö salua. Aboto ba dödöda wa hasambalö ibe’e khöda lala Yehowa irege lö faröi ita khönia.