1, 2. (a) Hadia nitutunö Yehowa khöda? (b) Hadia mbu’usa li si so ba Yesaya 46:10, 11 hegöi 55:11?

NGAWUA wehede si oföna ba Zura Ni’amoni’ö no öna-öna, hiza’i ebua sibai geluahania. Imane, ”Ba mböröta ifazökhi Lowalangi mbanua si yaŵa, awö danö.” (I Moze 1:1) Lö oya zi no ta’ila moroi ba ngawalö hadia ia zi no ifazökhi Lowalangi ba gulidanö, ba ha ma’ifu zi no aboto ba dödöda sanandrösa ba dalu mbanua, haga, hegöi gravitasi. (Zangombakha 3:11) Hiza’i, itutunö khöda Yehowa hadia gohitö dödönia ba gulidanö hegöi ba niha. Ifazökhi niha si fakhili-khili khönia ba omasi ia na ohahau dödöra ba wa’auri ba gulidanö. (I Moze 1:26) Tola tobali ira iraononia, ba tobali ia Amara.

² Moroi ba faza tölu mbuku I Moze, ba da’ö aboto ba dödöda wa no tetandrawaisi gohitö dödö Yehowa. (I Moze 3:1-7) Hiza’i, lö hadöi abula dödö si tebai i’asiwai Yehowa. Lö hadöi si tola manaha hadia ia nifalua Yehowa. (Yesaya 46:10, 11; 55:11) Tola faduhu dödöda wa hasambalö alua  gohitö dödö Yehowa ba mböröta. Ba alua ia ba ginötö si tefaudu!

3. (a) Hadia wamaha’ö sabölö moguna sanolo ya’ita ena’ö aboto ba dödöda duria moroi ba Zura Ni’amoni’ö? (b) Hana wa moguna tafaha’ö ita ba wamaha’ö da’a? (c) Hadia manö wanofu-nofu nitutunöda?

³ Aboto ba dödöda hadia gohitö dödö Lowalangi ba gulidanö hegöi ba niha, ba ta’ila göi hadia nifalua Yesu ena’ö alua gohitö dödö andrö. Da’a zindruhu sabölö moguna moroi ba Zura Ni’amoni’ö. Da’a göi zindruhu si oföna tafaha’ö ita ba Daromali Lowalangi. Iada’a, omasi ita tatolo niha bö’ö ena’ö lafaha’ö ira ba wamaha’ö sabölö moguna andre. Tola tafalua ia ba ndröfi da’a, na takaoni niha bö’ö ba wangondrasi Fanörö Tödö wa’amate Yesu. (Luka 22:19, 20) Na la’ondrasi, oya wamaha’ö si tola lahalö sanandrösa ba gohitö dödö Lowalangi sahöli-höli dödö. Andrö, sökhi na tahenaigö ta’angeraigö wanofu-nofu ni’oguna’öda ba wamarou tödöra ena’ö tola la’ondrasi. Ba wamaha’ö da’a, so tölu wanofu-nofu nitutunöda: Hadia gohitö dödö Lowalangi ba gulidanö hegöi ba niha? Hana wa lö alua da’ö nasa? Hana wa höli nibe’e Yesu tobali ono kusi ba wamokai mbawandruhö irege tola alua gohitö dödö Lowalangi?

4. Hewisa wa tola oroma ”lakhömi Lowalangi” ba niwöwöi andrö?

⁴ Yehowa no Somböi safönu fa’ahöli-höli dödö. Fefu hadia ia nifazökhinia oi sökhi. (I Moze 1:31; Yeremia 10:12) Hadia wamaha’ö si tola tahalö moroi ba ngawalö niwöwöinia si sökhi hegöi si toföfö? Tafaha’ö ita wa fefu hadia ia niwöwöi Yehowa, side-ide irugi zebua, oi moguna da’ö fefu. Na ö’angeraigö sel-sel si so ba mboto niha si lö ikhamö fangera-ngera, iraono sawena tumbu, mazui na öfaigi hawa’asökhi haga luo, hadia nirasoimö? Ahöli-höli sibai dödöda ba wamaigi da’ö fefu börö me ifazökhi ita Yehowa si fao fa’atua-tua ena’ö ta’ila hadia zi sökhi.—Baso Zinunö 19:2; 104:24.

5. Hadia zi no ifalua Yehowa ena’ö falulu fohalöwö fefu niwöwöinia?

⁵ No ihaogö sibai Yehowa wame’e nola-ola ba niwöwöinia. Ihaogö goi-goi sanandrösa ba mbanua awö danö, ba ihaogö göi goi-goi so’amakhaita ba mbua-bua. Ifalua da’a ena’ö fefu zi so ba mbanua si yawa awö danö tola falulu fohalöwö ira. (Zinunö 19:8-10) Fefu hadia zi so ba gulidanö oi so nahiania hegöi gunania. Duma-dumania, tola molowu nasi, ba tola ahatö atmosfer ba gulidanö börö me so gravitasi. Lö tola auri niha ba gulidanö na lö hadöi gravitasi. Nola-ola si no ihenaigö Yehowa zi tola manga’asogö ulidanö si sökhi sibai. Da’a zangoroma’ö wa so gohitö dödö Lowalangi ba gulidanö hegöi ba niha. Ba wanuriaigö, tola tatolo niha bö’ö ena’ö la’ila haniha Zomböi ulidanö awö nösinia ma’afefu sahöli-höli dödö andre.—Fama’ele’ö 4:11.

6, 7. Hadia manö mbuala nibe’e Yehowa khö Gadamo hegöi Khawa?

⁶ Ohitö dödö Yehowa ya’ia da’ö ena’ö fefu niha lasöndra wa’auri si lö aetu ba  gulidanö. (I Moze 1:28; Zinunö 37:29) Oböwö sibai ia, ba ibe’e khö Gadamo ba Khawa mbuala si sökhi sibai. (Baso Yakobo 1:17.) Ibe’e khöra mbuala Yehowa ba wangai angetula samösa. Ibe’e göi wa’abölö ba wangera-ngera, ba wangomasi’ö, hegöi ena’ö tola omuso dödöra ba wariawösa. Fahuhuo Zomböi khö Gadamo ba ibe’e wanuturu lala ba wamalua hadia zi sökhi. Ifaha’ö ia Adamo ba wondrorogö mbotonia samösa, urifö hegöi ulidanö. (I Moze 2:15-17, 19, 20) Ibe’e Yehowa khö Gadamo ba Khawa wa’abölö ba worasoi, wombabaya, wamaigi, wamondro-ndrongo, hegöi ba wangago hadia ia zi sökhi si no tehenaigö khöra. Moroi ba da’ö fefu tola lasöndra wa’ohahau dödö ba nomora si sökhi. Oya halöwö si sökhi si tola lafalua. Tola lafaha’ö ira ba lasöndra ngawalö zi bohou sagötö fa’ara.

⁷ Hadia nasa gohitö dödö Lowalangi tanö bö’ö? Ibe’e wa’abölö Yehowa khö Gadamo hegöi Khawa ba wangokhögö iraono so’ahonoa. Ba mo’ono ndraonora andrö, irege lafönui gulidanö. Omasi Yehowa na la’omasi’ö ndraonora ira satua, simane fa’omasinia khö Gadamo ba Khawa, niha siföföna so’ahonoa. Ibe’e khöra gulidanö Yehowa hegöi fefu ngawalö zi sökhi. Tobali omora da’ö, ba lö irai lateha khöra.—Zinunö 115:16.

8. Hana wa ibe’e Yehowa khö Gadamo hegöi Khawa huku si so ba I Moze 2:16, 17?

⁸ Lö i’anemai’ö alua fefu da’a simane ba zomasi Yehowa. Hana? No ibe’e Yehowa khö Gadamo hegöi Khawa sambua huku si öna-öna sanolo ya’ira irege aboto ba dödöra nola-ola ba mbuala nibe’enia khöra. Imane, ”Ö’a sa’ae mbua geu ba kabu fefu, ba bua geu famotokhi ba dödö si sökhi ba si lö sökhi, ba lö tola ö’a; ö’a si’aikö da’ö, ba mate ndra’ugö!” (I Moze 2:16, 17) Huku nibe’enia andre no salio aboto ba dödö, ba lö abua ba wolo’ö ya’ia börö me oya nasa mbua geu si sökhi tanö bö’ö si so ba kabu andrö.

9, 10. (a) Hadia niböbögö Zatana khö Yehowa? (b) Hadia gangetula nihalö Gadamo hegöi Khawa? (Faigi gambara ba wamobörö wamaha’ö.)

⁹ I’oguna’ö gulö Afökha Zatana ba wolimo Khawa ena’ö lalawa Yehowa si no tobali Amara. (Baso I Moze 3:1-5; Fama’ele’ö 12:9) Ibe’e wa’aombö-aombö dödö ba isofu hadia lö itehe Lowalangi ba niha ba wemanga ”mbua geu ba kabu fefu”. Te imane wanguma’ö, ’Hadia da’ö geluahania wa tebai öfalua hadia zomasi’ö?’ Aefa da’ö imane, ”Ma’ifu sa lö mate ami.” No falimosa fefu da’ö. Aefa da’ö idönisi dödö Khawa ba wolawa hadia niwa’ö Lowalangi. Imane Satana, ”I’ila sibai sa Lowalangi: mi’a si’aikö ia, ba teboka hörömi.” Imane khöra Satana wa lö omasi Yehowa na la’a mbua geu andrö börö me tola dania la’okhögö wa’atua-tua si tohude. Ba gafuriata, ifabu’u waya khöra imane, ”Tobali simane Lowalangi ami, saboto ba dödö si sökhi ba si lö sökhi.”

¹⁰ Moguna lahalö gangetula hadia nifaluara ira Adamo hegöi Khawa. Hadia la’o’ö niwa’ö Lowalangi, mazui  lafondro-ndrongo niwa’ö gulö? Hiza’i, lahalö gangetula ba wolawa hadia niwa’ö Lowalangi. Latimbagö Yehowa si tobali Amara ba fao ira khö Zatana. Iada’a hatö ya’ira, lö sa’ae ilumö’ö ira Yehowa.—I Moze 3:6-13.

11. Hana wa lö i’olifugö manö Yehowa zala si no lafalua ira Adamo ba Khawa?

¹¹ Me lö la’o’ö ira Adamo ba Khawa huku nibe’e Lowalangi, taya sa’ae khöra wo’ahonoa. Tobali ira udu Lowalangi börö me lö omasi Lowalangi hadia ia zi lö sökhi. ”Ya’ugö andrö [Yehowa], si so hörö satulö, fa tebai öfaigi-faigi zi lö sökhi.” (Habakuki 1:13) Na lö ihuku ira Yehowa, tola manö lö fa’ahono dödö ba niwöwöinia tanö bö’ö. Tatu manofu-nofu dödö ndra mala’ika hegöi niha, hadia sindruhu-ndruhu tola lafaduhusi tödö wehede niwa’önia. Hiza’i, lö faröi Yehowa ba goi-goinia, ba lö irai isawö da’ö. (Zinunö 119:142) Hewa’ae tola lahalö samösa gangetula ira Adamo ba Khawa, hiza’i tebai latimbagö lua-lua moroi ba walömolo’öra khö Yehowa. Hasambalö mate ira, ba mangawuli ira ba danö.—I Moze 3:19.

12. Hadia zalua ba nga’ötö Gadamo?

¹² Me la’a mbua geu ira Adamo ba Khawa, lö itema ira sa’ae Yehowa tobali ösi nomonia. Iheta ira moroi ba kabu Edena, ba tebai sa’ae mangawuli ira ba da’ö. (I Moze 3:23, 24) Itehegö khöra Yehowa ba worasoi hadia lua-lua gangetula nihalöra. (Baso V Moze 32:4, 5.) Tebai sa’ae la’o’ö mbua-bua Yehowa so’ahonoa. Taya sa’ae wa’auri si sökhi ba zi so miföna khö Gadamo hegöi ba nga’ötönia. Iröi khöra walömo’ahonoa, horö, hegöi fa’amate. (Roma 5:12) No itayaigö Adamo wa’auri si lö aetu. Lö mo’ahonoa sa’ae ndraonora ba simanö göi ma’uwura. I’otarai me ifaelungu Adamo hegöi Khawa Satana ba wolawa Lowalangi, omasi nasa ia ba wamaelungu fefu niha gulidanö ba wamalua simane da’ö.—Yohane 8:44.

13. Hadia zomasi ifalua Yehowa ba niha?

¹³ Lö aetu i’omasi’ö niha Lowalangi. Hewa’ae no lalawa ia ira Adamo ba Khawa, lö aetu omasi ia na la’okhögö wahuwusa si sökhi niha gulidanö khönia. Ba lö omasi ia na mate ira. (II Fetero 3:9) Andrö wa ibe’e lala irege tola ifuli fahuwu niha gulidanö khönia. Hewisa wa tola ifalua da’ö ba lö ilawa goi-goinia? Datatutunö.

14. (a) Molo’ö Yohane 3:16, hadia nifalua Lowalangi ba wangefa’ö niha moroi ba horö hegöi fa’amate? (b) Hadia wanofu zi tola tadunö-dunö ba niha?

¹⁴ Baso Yohane 3:16. Ato moroi ba gotalua niha nikaonida we’amöi ba Wanörö Tödö, la’ila ayati da’a. Hiza’i,  hewisa höli nibe’e Yesu tola manga’asogö fa’auri si lö aetu? Tola tatolo niha bö’ö ena’ö aboto ba dödöra wanema li ba wanofu da’a na takaoni ira we’amöi ba Wanörö Tödö, me fao ira khöda ba wangondrasi Fanörö Tödö, hegöi me ifuli tafalukhaisi ira. Tola itugu aboto ba dödöra sanandrösa ba höli, hewisa wa’omasi Yehowa ba niha hegöi hewisa wa’atua-tuania. Hadia zi tola tafa’ema khöra sanandrösa ba höli?

15. Hadia gamaehuta Yesu khö Gadamo?

¹⁵ No ihenaigö Yehowa ndra matua so’ahonoa sanehegö fa’aurinia tobali höli. Ya’ia andre niha si lö faröi khö Yehowa. Itehegö wa’aurinia salahi niha gulidanö. (Roma 5:17-19) Ifawu’a Yehowa wa’auri Yesu, niwöwöinia si oföna sibai, moroi ba zorugo möi ba gulidanö. (Yohane 1:14) Andrö wa mo’ahonoa Yesu simane sibai Adamo. Hiza’i, tenga simane Adamo, i’o’ö Yesu fefu goi-goi ni’andrö Yehowa ba niha so’ahonoa. Hewa’ae abua wanandraigö salua khönia, lö irai isawö goi-goi Lowalangi.

16. Hana wa no buala sebua böli höli andrö?

¹⁶ Börö me mo’ahonoa Yesu irugi wa’amatenia, tola i’efa’ö niha gulidanö moroi ba horö hegöi fa’amate. I’okhögö wa’auri so’ahonoa Yesu simane ni’okhögö Gadamo. Lö faröi ba molo’ö ia khö Lowalangi. (I Timoteo 2:6) Mate ia salahida, tobali ia höli ba niha fefu irege lasöndra wa’auri si lö aetu, he ira matua, ira alawe, hegöi iraono. (Matai’o 20:28) Höli andrö no tobali onokusi ba wamokai mbawandruhö irege tola alua gohitö dödö Lowalangi.—II Korindro 1:19, 20.

17. Hadia gunania khöda höli?

¹⁷ Ibe’e höli sebua böli Yehowa. (I Fetero 1:19) I’omasi’ö sibai ita irege itehegö mate Nononia si hasambua salahida. (I Yohane 4:9, 10) Eluahania, Yesu zi tobali amada, tenga Adamo. (I Korindro 15:45) Ibe’e khöda ginötö Yesu tenga ha ena’ö tasöndra wa’auri si lö aetu, hiza’i ena’ö tola ifuli tobali ita ösi nomo Lowalangi. Moroi ba höli, tola ifuli mo’ahonoa niha ba tola ifuli itema’ö ira Yehowa tobali ösi nomonia, hewa’ae lö isawö goi-goinia. Khalaigö hawa’asökhi na fefu niha si lö faröi khö Yehowa tobali mo’ahonoa! Ba gafuriata, fefu hadia zi so ba zorugo hegöi ba gulidanö tola la’okhögö wahasara dödö simane si sambua omo. Tobali ita ono Lowalangi.—Roma 8:21.

18. Hawa’ara tobali ”Lowalangi ba khöra fefu” Yehowa?

¹⁸ Hewa’ae no lalawa niwa’ö Yehowa ira satuada siföföna, hiza’i lö aetu i’omasi’ö ita, ba no ihenaigö khöda höli. Hewa’ae lö mo’ahonoa ita, tebai itenawa Satana wa’alöfaröida khö Yehowa. Moroi ba höli, itolo ita Yehowa ena’ö tola sindruhu-ndruhu atulö ita. Khalaigö hewisa niha ”zangila Ono fefu, samati khönia” tola la’okhögö wa’auri si lö aetu! (Yohane 6:40) Hasambalö alua gohitö dödö Namada safönu fa’omasi hegöi satua-tua, ba itolo niha gulidanö ena’ö tola mo’ahonoa ira. Ba da’ö dania tobali ia ”Lowalangi ba khöra fefu”.—I Korindro 15:28.

19. (a) Fangandröda saohagölö ba höli andrö möi famarou dödöda ba wamalua hadia ia? (Faigi kotak ” Böi Aetu Alui Niha si Tola Mutolo”.) (b) Hadia wamaha’ö nidunö-dunöda ba migu fönada?

¹⁹ Fangandröda saohagölö ba höli andrö, zamarou tödöda ba wanutunö ba niha bö’ö sanandrösa ba mbuala sebua böli andre. Moguna la’ila niha wa börö höli, itehegö Yehowa ba niha gulidanö ena’ö la’okhögö wa’auri si lö aetu. Hiza’i, so nasa mbua sabölö ebua ni’asogö höli. Da’a zi tobali fanema li moroi ba wehede Zatana ba kabu Edena. Tadunö-dunö da’a ba wamaha’ö migu fönada.