1. Hadia zi sökhi si tola tatema börö höli?

HÖLI nibe’e Yesu zanga’asogö howu-howu. Duma-dumania, höli andre zamokai mbawandruhö ba nga’ötö Gadamo sangomasi’ö satulö ena’ö tobali ira ösi nomo Lowalangi. Tola göi ta’okhögö wa’auri si lö aetu ba zi so miföna. Baero da’ö, fefu ngawalö gabula dödö si tohude si so ba zi sagörö ulidanö, tola te’asiwai ia börö me so höli.—Heberai’o 1:8, 9.

2. (a) Hadia ni’angandröi Yesu sabölö tohude salua ba gulidanö hegöi ba zorugo? (Faigi gambara ba wamobörö wamaha’ö.) (b) Hadia manö nidunö-dunöda ba wamaha’ö da’a?

² Dua fakhe fatua lö mate ia, ifaha’ö ndra sinengenia Yesu ba wangandrö. Imane, ”He Ama khöma si so ba zorugo! Yate’amoni’ö döiu. Yatobali banuau fefu niha. Ya’itörö zomasi ndra’ugö, hulö ba zorugo, yasimanö göi ba gulidanö.” (Matai’o 6:9, 10) Datatutunö hewisa höli andrö mo’amakhaita ia ba wangamoni’ö töi Yehowa, famatörö Mbanua Lowalangi, hegöi fa’alua gohitö dödö Lowalangi.

3. Töi Yehowa mosalahini hadia ia? Hewisa wanandrawaisi Zatana döi Lowalangi?

³ Si oföna sibai ni’angandröi Yesu ya’ia da’ö ena’ö te’amoni’ö döi Yehowa mazui ena’ö sökhi wanguna’ö töi Yehowa andrö. Töi Yehowa zosalahini fefu hadia ia zo’amakhaita khönia, da’ö zanutunö khöda haniha ia. Ya’ia wondrege zabölö hegöi satua-tua ba gulidanö ma’asagörö. Ikaoni ia Yesu, ”Ama Ni’amoni’ö”. (Yohane 17:11) Börö me no ni’amoni’ö Yehowa, fefu hadia ia nifaluania hegöi goi-goi nifazökhinia oi mo’ahonoa. Hiza’i ba Edena, sifao fa’onekhe itandrawaisi Lowalangi Satana sanandrösa ba wame’e goi-goi ba niha gulidanö. Iböbögö zi lö duhu khö Yehowa ba itandrawaisi döi Lowalangi.—I Moze 3:1-5.

4. Hewisa wangamoni’ö Yesu töi Lowalangi?

⁴ Sindruhu-ndruhu i’omasi’ö döi Yehowa Yesu, ba ifalua gofu hadia ia ba wangamoni’ö töi Yehowa. (Yohane 17:25, 26) Iforoma’ö da’ö ba mbua-buania hegöi ba ngawalö nifaha’önia. Itolo niha bö’ö Yesu ena’ö aboto ba dödöra goi-goi Yehowa satulö. Ifaha’ö göi ita wa fefu ni’andrö Yehowa oi si sökhi khöda. (Baso Zinunö 40:9-11.) Lö irai faröi Yesu hewa’ae itaögö wamakao moroi khö Zatana hegöi fa’amate safökhö sibai. Iforoma’ö wa niha so’ahonoa tola sindruhu-ndruhu la’o’ö niwa’ö Yehowa.

5. Hewisa wangamoni’öda töi Yehowa?

⁵ Moroi ba mbua-buada tola taforoma’ö wa ta’omasi’ö döi Yehowa. I’andrö Yehowa ena’ö ta’amoni’ö ita. (Baso I Fetero 1:15, 16.) Eluahania, ha Yehowa nifosumangeda ba ta’o’ö niwa’önia soroi ba dödö. Hewa’ae göna ita folohi, moguna taforege ba wamalua hadia zabölö sökhi ena’ö tefaudu lala wa’aurida ba zi no ifaha’ö ita Yehowa. Ba na ta’o’ö goi-goi Yehowa, tola tafolakhömi döinia. (Matai’o 5:14-16) Tola taforoma’ö wa si sökhi goi-goi Yehowa ba si falimo Gafökha. Börö me lö mo’ahonoa ita, andrö wa tola manö tafalua zala. Hiza’i, na no tafalua zala, moguna tafalalini gera-erada ba taböhöli ba wamalua gamuata si möi fango’aya döi Yehowa andrö.—Zinunö 79:9.

6. Hana wa tobali ita niha satulö tödö föna Yehowa hewa’ae na lö mo’ahonoa ita?

⁶ He niha nibayoini ita mazui ”mbiri-biri bö’ö”, tola i’efa’ö zalada Yehowa na mamati ita ba höli. Itema’ö niha si no molulu fa’auri ba wamosumange ya’ia tobali ösi nomonia. Ifatunö wa niha Keriso nibayoini satulö tödö tobali iraononia, ba ”mbiri-biri bö’ö” satulö tödö tobali si fahuwu khönia. (Yohane 10:16; Roma 5:1, 2; Yakobo 2:21-25) Iada’a, börö me so höli andrö wa tola ta’okhögö wariawösa si sökhi khö Namada hegöi ba wangamoni’ö töinia.

7. Hadia manö howu-howu ni’asogö höli?

⁷ Imane Yesu ba duma-duma wangandrönia, ”Yatobali banuau fefu niha.” Hewisa wa tola mo’amakhaita höli andrö ba Mbanua Lowalangi? Banua Lowalangi mazui famatörönia ya’ia da’ö famatörö Yesu hegöi si-144.000 niha si no tefili. Börö höli wa tola tesusugi niha si no tefili andre ba zorugo. (Fama’ele’ö 5:9, 10; 14:1) Tobali ira razo hegöi ere, ba fao ira khö Yesu ba wamatörö ulidanö ma’asögörö ba zi hönö fakhe fa’ara. Ba götö da’ö dania, i’oguna’ö Mbanua andrö  Yehowa ba wombali’ö faradaiso zi sagörö ulidanö hegöi ba wanolo niha gulidanö ena’ö mo’ahonoa ira. Niha samosumange Yehowa si so ba zorugo hegöi ba gulidanö, sindruhu-ndruhu tobali ira sambua omo. (Fama’ele’ö 5:13; 20:6) Ifufu Zatana Yesu ba iheta fefu gabula dödö.—I Moze 3:15.

8. (a) Hewisa wanolo Yesu ndra nifaha’önia ena’ö aboto ba dödöra wa moguna sibai Mbanua Lowalangi? (b) Hadia nifaluada ba wanuhini Mbanua Lowalangi iada’a?

⁸ Itolo ndra nifaha’önia Yesu ena’ö aboto ba dödöra wa moguna sibai Mbanua Lowalangi. Me no aefa tebayagö ia idanö, ibörötaigö wanuriaigö ”duria somuso dödö, turia mbanua Lowalangi” gofu hezoso möi ia. (Luka 4:43) Ifaha’ö göi ndra nifaha’önia ena’ö tobali ira samaduhu’ö ya’ia ”irugi wondrege danö”. (Halöwö Zinenge 1:6-8) Iada’a, börö halöwö wanuriaigö andrö wa so ginötö ba niha bö’ö ba wamaha’ö ya’ira sanandrösa ba höli, ba tola tobali ira ono mbanua Lowalangi. Tola taforoma’ö wa lö faröi ita ba wanuhini Mbanua Lowalangi na tatolo ndra talifusöda nibayoini ba wanuriaigö turia somuso dödö ba zi sagörö ulidanö.—Matai’o 24:14; 25:40.

9. Hana wa tola faduhu dödöda wa hasambalö ifalua gohitö dödönia Lowalangi ba niha gulidanö?

⁹ Hadia geluaha wehede Yesu me imane, ”Ya’itörö zomasi ndra’ugö”? Hasambalö alua hadia zi no iwa’ö Yehowa. (Yesaya 55:11) Lö tola itenawa da’ö Afökha. Hadia zomasi ifalua Yehowa ba gulidanö? Omasi ia na afönu gulidanö andre iraono so’ahonoa moroi khö Gadamo ba Khawa. (I Moze 1:28) Na mate Gadamo hegöi Khawa fatua lö hadöi iraonora, lö tola alua gohitö dödö Lowalangi ba gulidanö. Andrö wa itehegö khöra Yehowa ba wangokhögö iraono. Höli andrö zame’e inötö ba niha sangoroma’ö famati ena’ö tola mo’ahonoa ira ba lasöndra wa’auri si lö aetu. I’omasi’ö sibai niha Yehowa, ba omasi ia na fefu niha la’okhögö wa’auri si sökhi simane ohitö dödönia ba mböröta.

10. Hadia gunania höli andrö ba niha si no mate?

¹⁰ So miliaran niha si mate fatua lö aboto ba dödöra haniha Yehowa. Hewisa göi ira? Omasi Yehowa na fefu niha lasöndra wa’auri. Andrö wa hasambalö isusugi ira. Börö höli wa tola tesusugi ira. Na no tesusugi ira, tola lafaha’ö ira sanandrösa khö Yehowa ba lasöndra wa’auri si lö aetu. (Halöwö Zinenge 24:15) No Umbu fangorifi Yehowa. Andrö, ba ginötö ifuli isusugi niha si no mate, ba da’ö tobali ia Amara. (Zinunö 36:10) Ba duma-duma wangandrö nibe’enia, iwa’ö Yesu wa Yehowa andrö ’Amada si so ba zorugo’. (Matai’o 6:9) Ibe’e Yehowa halöwö sabölö moguna khö Yesu ba wanusugi niha si no mate. Imane Yesu, ”Ya’odo wemaoso ba fa’auri.”—Yohane 6:40, 44; 11:25.

11. Hadia gohitö dödö Lowalangi ba ”zato sibai”?

¹¹ Imane Yesu, ”Solo’ö somasi Lowalangi, da’ö dalifusögu matua ba talifusögu alawe ba inagu.” (Mareko 3:35) Omasi Lowalangi ena’ö fefu niha moroi ba ngawalö soi, niwa hegöi ba ngawalö li, tobali ira samosumange ya’ia. Ya’ira andrö hulö ”zato sibai, si tebai i’erai niha”. Mamati ira ba höli ba la’o’ö niwa’ö Lowalangi. Lasuno ia ba lamane, ”Fangorifi khö Lowalangida, sidadao ba dadaoma andrö, ba khö Nono mbiri-biri andrö!”—Fama’ele’ö 7:9, 10.

12. Moroi ba wangandrö Yesu, hadia wamaha’ö si tola tahalö sanandrösa ba gohitö dödö Yehowa ba niha gulidanö?

 ¹² Ba duma-duma wangandrö nibe’e Yesu, oya wamaha’ö si tola tahalö sanandrösa khö Yehowa hegöi ohitö dödönia ba niha gulidanö. Si oföna, lö tola lö’ö tafalua hadia zi tola tafalua ba wangamoni’ö töi Yehowa hegöi ba wamolakhömi ya’ia. (Yesaya 8:13) Höli nibe’e Yesu zi tola mangefa’ö ya’ita hegöi si möi famolakhömi döi Lowalangi. Sindruhunia, eluaha döi Yesu ya’ia da’ö ”Yehowa No Sangorifi”. Si dua, i’oguna’ö Mbanua Lowalangi andrö Yehowa ena’ö fefu niha solo’ö khönia tola latema mbua ba höli andrö. Si tölu, so khöda wa’afaduhu dödö wa lö hadöi zi tola manenawa hadia ia gohitö dödö Yehowa.—Zinunö 135:6; Yesaya 46:9, 10.

13. Hana wa tafabayagö’ö ita idanö?

¹³ Sambua lala si tohude si tola tafalua ba wangoroma’ö wa ta’andrö saohagölö ba höli ya’ia da’ö na talulu wa’aurida khö Yehowa ba tafabayagö’ö ita idanö. Na tafalua da’ö, taforomaö wa mamati ita ba höli, ba tana ”khö Zoaya [Yehowa] ita”. (Roma 14:8) Me tebayagö ita idanö, ba da’ö ta’andrö khö Yehowa ena’ö ibe’e khöda ”tödö si lö sinegu”. (I Fetero 3:21) Tola ifahowu’ö ita Yehowa börö höli. Faduhu dödöda wa hasambalö ibe’e khöda gofu hadia ia zi no ifabu’u.—Roma 8:32.

14. Hana wa i’andrö khöda Yehowa ena’ö ta’omasi’ö niha bö’ö?

¹⁴ Ifalua gofu hadia ia Yehowa si fao fa’omasi. Omasi ia na fefu zamosumange ya’ia la’o’ö nifaluania ba la’omasi’ö nawöra. (I Yohane 4:8-11) Na ta’omasi’ö niha bö’ö, ba da’ö taforoma’ö wa omasi ita tobali ”ono Nama[da] andrö, si so ba zorugo”. (Matai’o 5:43-48) So dombua fareta sabölö ebua. Si oföna, ba wangomasi’ö Yehowa. Si dua, ba wangomasi’ö niha bö’ö. (Matai’o 22:37-40) Sambua lala si tola tafalua ba wangoroma’ö wa ta’omasi’ö niha bö’ö ya’ia da’ö na tafaha’ö ira ba duria somuso dödö sanandrösa ba Mbanua Lowalangi. Na ta’o’ö fareta Yehowa ba wangomasi’ö niha bö’ö, mendrua manö ndra talifusöda si sara lala  wamati, tola itugu ”mo’ahonoa” wa’omasida khönia.—I Yohane 4:12, 20.

15. (a) Hadia howu-howu nitemada iada’a moroi khö Yehowa? (b) Hadia howu-howu nitemada dania ba zi so miföna?

¹⁵ Ifaduhu’ö khöda Yehowa wa börö me mamati ita ba höli, andrö wa tola ’teheta khöda horöda’. Sindruhu-ndruhu i’efa’ö fefu zalada. (Baso Halöwö Zinenge 3:19-21.) Simane si no tatutunö, börö höli andrö wa so ösa niha gulidanö nisou Yehowa tobali ononia ba zorugo. Tefotöi ira niha nibayoini. (Roma 8:15-17) Ikaoni göi ”mbiri-biri bö’ö” ena’ö tobali ira ösi nomonia ba gulidanö. Na no aefa mo’ahonoa ira, göna ira fanandraigö safuria. Na lö faröi ira khö Yehowa, itema ira Yehowa tobali iraononia. (Roma 8:20, 21; Fama’ele’ö 20:7-9) Lö aetu i’omasi’ö fefu ndraononia Yehowa. Börö höli andrö wa lö aetu fahöna howu-howu. (Heberai’o 9:12) No ibe’e khöda mbuala si sökhi sibai Yehowa, ba lö hadöi niha si tola mangeheta da’ö khöda.

16. Hewisa wa tola te’efa’ö ita börö höli andrö?

¹⁶ Na no tafalalini gera-erada ba zala si no irai tafalua, lö hadöi si tola ifalua Afökha ba wanaha ya’ita tobali ösi nomo Yehowa. Mate Yesu ”i’osamuzaigö wolau da’ö”. Ibe’e höli si lö irai tewu’a. (Heberai’o 9:24-26) Fa’amate niröi Gadamo khöda. Hiza’i, tasöndra wa’auri si lö aetu börö wamakao si no itaögö Yesu. Höli nibe’e Yesu zangefa’ö ya’ita moroi ba gulidanö Zatana hegöi fa’ata’u ba wa’amate.—Heberai’o 2:14, 15.

17. Hadia geluaha wa’omasi Yehowa khöu?

¹⁷ Hasambalö alua hadia zi no ifabu’u Lowalangi. Simane goi-goi si no ifakhoi sanandrösa ba dalu mbanua awö danö si lö irai tebulö, simane da’ö göi Yehowa, lö irai tebulö ia. Lö irai ibe’e afatö dödöda. (Maleakhi 3:6) Ibe’e khöda wa’auri sabölö sökhi Yehowa. Iforoma’ö khöda wa’omasinia. ”No aboto ba dödöda wa’omasi Lowalangi ita, ba no faduhu dödöda ba da’ö. Lowalangi ba no fa’omasi.” (I Yohane 4:16) Hasambalö alua zi no ifabu’u. Ba zi lö’aratö, ulidanö andre tobali faradaiso si sökhi. Fefu niha sanema fa’auri, la’o’ö Yehowa ba la’omasi’ö nawöra. Aefa da’ö, fefu nono mbanuania si so ba zorugö hegöi si so ba gulidanö, lamane, ”Howu-howu, ba lakhömi, ba fa’atua-tua, ba fangandrö saoha gölö, ba sumange, ba fa’abölö, ba fa’abe’e, khö Lowalangida, irugi zi lö aetu! Yaduhu.”—Fama’ele’ö 7:12.