FEFU niha, omasi ira na omuso dödöra. Hizaʼi, oya gabula dödö nirasoi niha ba luo safuria andre börö me no so ita ba ”mbaŵa si lö sökhi”. (2 Timoteo 3:1) So ösa niha si lö faʼowua-wua dödö börö me alua khöra zi lö atulö, mofökhö, laʼefasi ba halöwö mazui mate niha niʼomasiʼöra. Tanö böʼönia lö larasoi waʼowua-wua dödö börö me so zalua sangaʼasogö khöra faʼaombö dödö mazui faʼabu dödö. Tola manö larasoi waʼide-ide dödö ono mbanua Yehowa ba lö khöra faʼowua-wua dödö. Na alua khöu daʼö, hewisa enaʼö ifuli so khöu waʼowua-wua dödö?

Ba wameʼe fanema li ba zinofu daʼö, si oföna moguna aboto ba dödöda hadia nifotöi faʼowua-wua dödö ba hewisa wa so ösa niha si lö mamalö mangokhögö yaʼia hewaʼae göna ira fangabu dödö. Aefa daʼö, tola taʼila hewisa enaʼö tarorogö waʼowua-wua dödö andrö ba tadouʼö wangokhögö yaʼia.

Faʼowua-wua dödö tenga ha faʼomuso dödö salua ba mbawa. Angeragö daʼa: Niha si mabu tola omuso dödönia ba ilau maʼiki. Hizaʼi, faʼomuso dödönia andrö ha ba zi sabata. Na no alö waʼamabunia, lö saʼae maʼiki ia ba ifuli so gabula dödönia. Tenga faʼowua-wua dödö sindruhu nirasoinia.—Gamaedola 14:13.

Faʼowua-wua dödö yaʼia daʼö faʼomuso dödö nirasoida ba ginötö tatema mazui na tatötöna alua zi sökhi. Na taʼokhögö waʼowua-wua dödö eluahania hasambalö omuso dödöda gofu hadia ia zalua he si sökhi mazui si lö sökhi. (1 Tesalonika 1:6) Sindruhunia, tola taʼokhögö waʼowua-wua dödö hewaʼae itaria afatö dödöda. Duma-dumania, laböbözi ndra sinenge börö me manuriaigö ira sanandrösa khö Yesu. Hizaʼi, me ”laröi saʼae rafe sebua, omuso dödöra, me no tetehe khöra, laʼoʼaya ira, börö döi andrö”. (Halöwö Zinenge 5:41) Tenga börö me no laböbözi ira wa omuso dödöra, hizaʼi börö me lö si faröi ira khö Lowalangi.

Tenga iʼotarai me tumbu taʼokhögö waʼowua-wua dödö mazui so manö ia. Hadia mbörö? Faʼowua-wua dödö sindruhu andre no bua geheha moroi khö Lowalangi. Tola itolo ita eheha niʼamoniʼö enaʼö ’taʼonukha niha si bohou’ simane faʼowua-wua dödö. (Efeso 4:24; Galatia 5:22) Na owua-wua dödöda, aoha khöda ba wangasiwai abula dödö.

Omasi Yehowa na ha si sökhi zalua ba gulidanö, tenga simane si lö sökhi niʼilada iadaʼa. Hewaʼae so niha samalua si lö sökhi, lö taya waʼowua-wua dödö Yehowa. Imane Sura Niʼamoniʼö, ”Faʼabölö ba faʼowua-wua dödö ba nahiania.” (1 Ngaʼötö 16:27) Aefa daʼö, omuso dödö Yehowa na so zi sökhi nifalua zamosumange yaʼia.—Gamaedola 27:11.

Tola taʼoʼö mazui tarasoi simane nirasoi Yehowa na lö tatehegö taya waʼowua-wua dödöda ba ginötö lö alua nidöna-dönada. Moroi na aombö dödöda, tola taʼosambuaʼö gera-erada ba ngawalö zi sökhi niʼokhögöda  iadaʼa ba tabaloi si fao faʼebolo dödö howu-howu nirasoida ba zi so miföna. *—Faigi nisura ba gahe zura.

Oya duma-duma ba Zura Niʼamoniʼö sanandrösa ba niha sangokhögö faʼowua-wua dödö hewaʼae oya gabula dödöra. Lö aetu waʼowua-wua dödö Gaberahamo hewaʼae teʼala waʼaurinia hegöi me so niha sangaʼasogö khönia abula dödö. (1 Moze 12:10-20; 14:8-16; 16:4, 5; 20:1-18; 21:8, 9) Hadia mbörö? Iʼangerönusi dötönafö niʼokhögönia ba gulidanö si bohou barö wamatörö Mesia. (1 Moze 22:15-18; Heberaiʼo 11:10) Imane Yesu, ”Owua-wua dödö duami Aberahamo, enaʼö iʼila mbaŵagu andrö.” (Yohane 8:56) Tola taʼoʼö Gaberahamo na lö mamalö taʼangerönusi waʼowua-wua dödö nirasoida ba zi so miföna.—Roma 8:21.

Faulo hegöi Sila laʼokhögö wamati saro ba larasoi waʼowua-wuo dödö hewaʼae oya wanandraigö salua khöra. Duma-dumania, me no aefa laböbözi ba labeʼe ira ba gurunga, ”mangandrö Waulo, awö Zila, lasuno Lowalangi”. (Halöwö Zinenge 16:23-25) Anau gölöra ba wanaögö fanandraigö börö me lö aetu laʼangerönusi mbuʼusa li Lowalangi sanandrösa ba zi so föna. Aefa daʼö, börö me laʼila wa fanandraigö nitaögöra andre alua ia börö me laʼoʼö Keriso daʼö zameʼe khöra faʼowua-wua dödö. Tola taʼoʼö Waulo hegöi Sila na tatörö tödöda howu-howu nitemada na lö faröi ita ba wamosumange Lowalangi.—Filifi 1:12-14.

Iadaʼa, ato ndra talifusöda sorasoi faʼowua-wua dödö hewaʼae so gabula dödöra. Duma-dumania, me baŵa si Felezara 2013, alua Topan Super Haiyan ba Filipina irege töra 1.000 nomo ndra Samaduhuʼö si no adudu. Imane George si no adudu omo si so ba Tacloban, ”Hewaʼae no alua gabula dödö, hizaʼi omuso dödö ndra talifusöda. Abua khögu wanutunö hewisa waʼowua-wua dödöma.” Na taʼangeragö hadia zi no ifalua Yehowa khöda ba lö mamalö taʼandrö saohagölö khönia, lö aetu tarasoi waʼowua-wua dödö hewaʼae göna ita abula dödö sebua. Hadia nasa nibeʼe Yehowa enaʼö tarasoi waʼowua-wua dödö?

Tani sabölö ebua wa tarasoi waʼowua-wua dödö yaʼia daʼö börö wahuwusada khö Yehowa. Aboto ba dödöda wa yaʼia andrö Razo ba mbanua si yawa awö danö. Amada, Lowalangi, ba Awöda!—Zinunö 71:17, 18.

Taʼandrö saohagölö khö Yehowa börö me no ibeʼe khöda waʼauri ba tarasoi waʼowua-wua dödö ba daʼö. (Zangombakha 3:12, 13) Me no tobali ita tana khönia, aboto ba dödöda hadia gohitö dödönia khöda ba taʼila hewisa wangogunaʼöda faʼaurida. (Kolose 1:9, 10) Hizaʼi, ato niha si lö mangila hadia gohitö dödö ba waʼauri. Itutunö gamaehuta daʼa Faulo me isura, ”’Si lö irai iʼila hörö niha, si lö irai irongo tögi dalinga niha, si lö irai möi ba dödö niha, niʼasiwai Lowalangi ba zangomasiʼö yaʼia.’ Ba khöda no ifaʼeleʼö Lowalangi, balazi gehehania.” (1 Korindro 2:9, 10) Tarasoi waʼowua-wua dödö na taʼila hadia zomasi Yehowa hegöi ohitö dödönia.

Oya zi no ifalua Yehowa khöda. No ibeʼe lala enaʼö teʼefaʼö horöda. (1 Yohane 2:12) Ibeʼe khöda dötönafö enaʼö auri ita ba gulidanö si bohou si lö ara tö tohare. (Roma 12:12) Iadaʼa, no ibeʼe ndra talifusö si fao khöda ba wamosumange yaʼia. (Zinunö 133:1) Ilumöʼö ita moroi khö Zatana hegöi khö ndra malaʼika si lö sökhi. (Zinunö 91:11) Na lö aetu taʼangerönusi fefu zi sökhi si no ibeʼe Yehowa, itugu owua-wua dödöda.—Filifi 4:4.

Hadia tola monönö waʼowua-wua dödö zi samösa niha Keriso? Imane Yesu, ”Daʼö niwaʼögu khömi, enaʼö so ba dödömi waʼomuso  dödö andrö khögu, ba enaʼö aʼoi so waʼomuso dödömi.” (Yohane 15:11) Daʼa zangoromaʼö wa tola monönö waʼowua-wua dödöda. Faʼowua-wua dödö andre hulö simane alitö. Enaʼö monönö waʼebua galitö moguna tanönö geu. Törö tödöu: Eheha niʼamoniʼö zanolo yaʼita ba wanöndra faʼowua-wua dödö. Enaʼö monönö waʼowua-wua dödöda, böi taböhöli wangandrö eheha niʼamoniʼö moroi khö Lowalangi. Taʼangerönusi göi Zura Niʼamoniʼö si no tesura börö wanuturu lala moroi ba geheha niʼamoniʼö.—Zinunö 1:1, 2; Luka 11:13.

Na oya ginötö niʼogunaʼöda ba wamalua somasi Yehowa, daʼa zonönö faʼowua-wua dödöda. (Zinunö 35:27; 112:1) Hadia mbörö? Imane Sura Niʼamoniʼö, ”Ataʼufi Lowalangi, ba oʼö goroisania! daʼö sa zinangea ba niha fefu.” (Zangombakha 12:13) Tewöwöi ita ba wamalua ohitö dödö Lowalangi. Andrö, lö khöda faʼowua-wua dödö sindruhu baero ba wamosumange Yehowa. *—Faigi nisura ba gahe zura.

Na monönö waʼowua-wua dödöda, monönö göi mbua nitemada. Duma-dumania, ifahowuʼö ita Yehowa na lö aetu tafosumange ia si fao faʼowua-wua dödö hewaʼae oya gabula dödöda. (5 Moze 16:15; 1 Tesalonika 5:16-18) Aefa daʼö, na sindruhu-ndruhu taʼokhögö waʼowua-wua dödö, aboto ba dödöda wa tenga harato zabölö moguna ba waʼauri andre. Andrö, moguna oya nitehegöda ba wangofönaiʼö Banua Lowalangi. (Mataiʼo 13:44) Ba ginötö taʼila wa so mbua si sökhi me no oya ginötö nibeʼeda khö Yehowa, itugu monönö waʼowua-wua dödöda, taʼokhögö waʼahono dödö ba tola taʼomusoiʼö dödö niha böʼö.—Halöwö Zinenge 20:35; Filifi 1:3-5.

Lö göna ita fökhö na taʼokhögö waʼowua-wua dödö. Imane Sura Niʼamoniʼö, ”Faʼomuso dödö, ba tobali fangorifi.” (Gamaedola 17:22) Imane samösa peneliti kesehatan moroi ba University of Nebraska ba Amerika Serikat, ”Na omuso dödömö ba öʼokhögö waʼahono dödö iadaʼa, tola teʼaröuʼö ndraʼugö ba wökhö ba zi so miföna.” Tefaudu niwaʼönia andre ba Zura Niʼamoniʼö.

Hewaʼae auri ita ba ginötö si lö sökhi, tola so khöda waʼowua-wua dödö sindruhu ba ginötö tatema geheha niʼamoniʼö. Enaʼö tatema geheha niʼamoniʼö moguna mangandrö ita, tafahaʼö ita ba taʼangerönusi Daromali Lowalangi. So khöda waʼowua-wua dödö na taʼangeragö ngawalö zi sökhi si no ibeʼe khöda Yehowa iadaʼa, taʼoʼö wamati zamosumange yaʼia ba tafalua zomasi ia. Tarasoi hadia nitutunö ba Zinunö 64:10 sangumaʼö, ”Ba omuso dödö zatulö tödö andrö, ba khö Yehowa, ba abeʼe dödönia khönia.”