1, 2. Hadia zawena aboto ba dödö zi samösa talifusöda ira matua, ba hadia nifaluania?

TEBAYAGÖ idanö Robert me awuyu-wuyu ia, hizaʼi lö iʼofönaiʼö zindruhu ba waʼaurinia. Imane, ”Lö nifaluagu horö. Ba wamaigigu, hulö zaro sibai wamatigu, asese möido ba gangowuloa ba ulau merintis ekstra mato hauga kali ba zi döfi. Hizaʼi, hulö ha si toʼölö ufalua daʼö ba wamaigigu. Urasoi wa so zambö ba waʼaurigu.”

² Me no mangowalu Robert, awena aboto ba dödönia hadia ia zambö ba waʼaurinia. Yaʼia hegöi foʼomonia ira alawe, asese fadahö-dahö ira sanandrösa ba Zura Niʼamoniʼö. Oya waʼaboto ba dödö niʼila woʼomonia sanandrösa ba Zura Niʼamoniʼö ba tola ibeʼe fefu wanema li. Hizaʼi, asese lö iʼila ibeʼe wanema li Robert irege aila ia. Imane, ”Awena uʼila wa lö khögu faʼatua-tua. Aboto ba dödögu wa ’moguna ufaböʼöni ndraʼo enaʼö tola udöniaʼö woʼomogu ba wamati.’” Imane nasa, ”Ufahaʼödo ba Zura Niʼamoniʼö ba lö aetu ufalua daʼö. Aboto ba dödögu, wa moguna uhatöʼö ndraʼo khö Yehowa.”

3. (a) Hadia wamahaʼö si tola tahalö moroi ba zalua khö Robert? (b) Hadia wanofu-nofu nitutunöda ba wamahaʼö daʼa?

³ Tola tahalö wamahaʼö si sökhi ba zalua khö Robert. Te so khöda waʼaboto ba dödö ba Zura Niʼamoniʼö, asese möi  ita ba gangowuloa ba owölö-ölö ita ba wanuriaigö. Lö ibönö daʼö enaʼö tola taʼokhögö wangera-ngera ba wamati. Mazui, te no tadouʼö ita ba wamati, hizaʼi ba ginötö tafareso ita, tola manö so nasa zinangea tabohouni. (Filifi 3:16) Ba wamahaʼö daʼa, so tölu wanofu nitutunöda: (1) Hadia zanolo yaʼita ba wamareso hadia taʼokhögö wangera-ngera ba wamati? (2) Hadia zinangea tafalua enaʼö aro ita ba wamati? (3) Hadia zanolo yaʼita enaʼö taʼokhögö wamati saro ero maʼökhö?

4. Haʼökhö moguna mene-mene si so ba Efeso 4:23, 24?

⁴ Me tabörögö wamosumange Lowalangi, tafaböʼöni lala waʼaurida. Hizaʼi, me no aefa tebayagö ita idanö, moguna nasa tabulöʼö waʼaurida. Imane Sura Niʼamoniʼö, ”Ba nibohouni ami, ba gera-era dödömi andrö.” (Efeso 4:23, 24.) Börö me lö moʼahonoa ita, böi taböhöli wamulöʼö faʼaurida. Hewaʼae no hauga fakhe tafosumange Yehowa, moguna taʼaroʼö wahuwusada khönia.—Filifi 3:12, 13.

5. Hadia manö wanofu si tola manolo yaʼita enaʼö taʼila wa taʼokhögö wangera-ngera ba wamati?

⁵ Fefu ita, satua hegöi si bohou ebua, moguna tahaogö wamareso yaʼita. Tola tasofu khöda samösa, ’Hadia uʼila wa itugu tedou ndraʼo ba wangokhögö fangera-ngera ba wamati? Hadia itugu fakhili-khili gamuatagu ba gamuata Keriso? Ero na möido ba gangowuloa, hadia oroma wa uʼokhögö wamati? Moroi ba ngawalö nifadunö-dunögu, hadia oroma hadia zabölö uʼofönaiʼö ba waʼaurigu? Hewisa wamahaʼögu samösa, lagu wonukha mazui hadia nifaluagu ba ginötö labeʼe khögu mene-mene? Hadia nifaluagu ba ginötö tedönisi dödögu ba wamalua sala? Hadia tedou ndraʼo tobali niha saro ba wamati?’ (Efeso 4:13) Fanofu-nofu daʼa zanolo yaʼita enaʼö taʼila ha waʼatedou ita ba wamati.

6. Hadia nasa zi tola manolo yaʼita ba wamareso hadia taʼokhögö wangera-ngera ba wamati?

⁶ Itaria, moguna khöda wanolo moroi ba niha böʼö ba wamareso hadia sindruhu-ndruhu taʼokhögö wangera-ngera ba wamati. Itutunö sinenge sotöi Faulo wa niha sangokhögö fangera-ngera ba waʼaniha lö iʼila wa lö omuso dödö Lowalangi ba nifaluania. Hizaʼi, niha sangokhögö fangera-ngera ba wamati aboto ba dödönia lala wangera-ngera Lowalangi ba iʼila wa lö omasi Yehowa lala wangera-ngera ba waʼaniha. (1 Korindro 2:14-16; 3:1-3) Ira satua sokubaloi sangokhögö lala wangera-ngera Keriso laʼila na so ndra talifusöda sangokhögö fangera-ngera ba waʼaniha ba laʼanemaiʼö  labeʼe wanolo. Na latolo ita ira satua sokubaloi, hadia tatemaʼö daʼö ba tabulöʼö waʼaurida? Na yaʼia, no taʼoromaʼö wa omasi ita tedou ba wamati.—Zangombakha 7:5, 9.

7. Hezo taʼila wa lö ibönö na ha asala taʼokhögö waʼaboto ba dödö ba Zura Niʼamoniʼö enaʼö tobali ita niha samati?

⁷ Enaʼö taʼokhögö wangera-ngera ba wamati, lö ibönö na ha asala aboto ba dödöda Zura Niʼamoniʼö. Oya niʼila Razo Selomo sanandrösa khö Yehowa ba no tesura ösa wehedenia ba Zura Niʼamoniʼö. Ba gafuriata, awuwu wahuwusania khö Yehowa ba faröi ia. (1 Razo 4:29, 30; 11:4-6) Hadia nasa zinangea taʼokhögö baero waʼaboto ba dödö sanandrösa ba Zura Niʼamoniʼö? Moguna böi aetu taʼaroʼö wamatida. (Kolose 2:6, 7) Hewisa lalada ba wamalua yaʼia?

8, 9. (a) Hadia zi tola manolo yaʼita ba wangaroʼö famatida? (b) Hadia gohitö dödöda na tafahaʼö ita ba taʼangerönusi? (Faigi gambara ba wamobörö wamahaʼö.)

⁸ Ba götö siföföna, ifarou niha Keriso Faulo enaʼö tedou ira ba wamati. (Heberaiʼo 6:1) Hewisa woloʼöda daʼö? Sambua lala si sökhi si tola tafalua yaʼia daʼö tafahaʼö ita ba mbuku Lala Enaʼö Lö Tebulö Iʼomasiʼö Ita Lowalangi. Daʼa zanolo yaʼugö ba wangogunaʼö goi-goi Zura Niʼamoniʼö ba waʼauri. Na no öfahaʼö ndraʼugö ba mbuku daʼö, tola göi öfahaʼö ndraʼugö ba publikasi tanö böʼö enaʼö aro wamatimö. (Kolose 1:23) Moguna göi taʼangerönusi ba taʼandrö wanolo moroi khö Yehowa ba wamalua daʼö.

⁹ Ba ginötö tafahaʼö ita ba taʼangerönusi, ohitö dödöda enaʼö tahalö gangetula ba woloʼö hegöi ba wangomusoiʼö tödö Yehowa. (Zinunö 40:9; 119:97) Moguna tatimbagö fefu hadia ia zi tola möi fangawuwu wamatida.—Tito 2:11, 12.

10. Hadia zinangea ifalua si bohou ebua enaʼö aro ia ba wamati?

¹⁰ Na yaʼugö si bohou ebua, hadia öʼokhögö gohitö dödö ba wamati? Samösa dalifusöda ira matua sohalöwö ba Mbetieli, asese fahuhuo ia khö ndra si bohou  ebua sedöna mubayagö idanö ba kebaktian wilayah. Isofu-sofu hadia gohitö dödöra. Iʼila wa ato zi no motatugöi ohitö dödöra ba wamosumange Yehowa ba zi so miföna. So zomasi mangai halöwö safönu inötö khö Yehowa mazui findra ira ba mbanua si lö ato sanuriaigö. Hizaʼi, so ösa zi lö mangila hewisa wameʼe fanema li. Hadia daʼö geluahania wa so ba dödöra wa lö moguna laʼokhögö gohitö dödö ba wamati? Na yaʼugö si bohou ebua sofu khöu samösa, ’Hadia möido ba gangowuloa hegöi manuriaigö ha börö me lafarou ndraʼo ira satuagu? Hadia uʼokhögö wahuwusa si sökhi khö Lowalangi?’ Tatu manö, fefu ita moguna taʼokhögö gohitö dödö ba wamati, he si bohou ebua mazui si no alawa döfi. Daʼa zanolo yaʼita enaʼö aro ba wamati.—Zangombakha 12:1, 13.

11. (a) Hadia nifaluada enaʼö taʼokhögö wangera-ngera ba wamati? (b) Haniha duma-duma si tola taʼoʼö ba Zura Niʼamoniʼö?

¹¹ Na no taʼila hadia zinangea taʼehaogö ba waʼaurida, moguna tafalua ia. Moguna sibai daʼa börö me daʼö zotatugöi faʼauri mazui faʼamateda. (Roma 8:6-8) Lö iʼandrö Yehowa enaʼö moʼahonoa ita, hizaʼi ibeʼe khöda gehehania ba wanolo yaʼita. Moguna taforege ba wangokhögö daʼö. No irai ibeʼe mbua gera-erania talifusöda John Barr si no irai tobali Boto Solohe sanandrösa ba Luka 13:24 ba imane, ”Ato niha si lö mofozu börö me lö laʼodödögö ba wangokhögö famati  saro.” Moguna taʼoʼö Yakobo me fasöndra ia khö malaʼika ba lö ibato wamalua daʼö irege isöndra howu-howu. (1 Moze 32:26-28) Hewaʼae owua-wua dödöda na tafahaʼö ita ba Zura Niʼamoniʼö, hizaʼi tenga simane faʼaoha wombaso mbuku novel daʼö. Moguna taforege ba wanöndra girö-girö ba wamati si tola manolo yaʼita.

12, 13. (a) Hadia zanolo yaʼita ba wamalua mene-mene si so ba Filifi 2:5? (b) Hewisa duma-duma Wetero hegöi mene-menenia möi fanoloda? (c) Hadia nifaluada enaʼö itugu aro wamatida? (Faigi kotak ”Si Tola Öfalua ba Wondrouʼö Famatimö”.)

¹² Na taforege wangokhögö famati, tola itolo ita eheha niʼamoniʼö ba wangehaogö lala wangera-ngerada. Itugu ara itugu taʼokhögö wangera-ngera Keriso. (Filifi 2:5.) Itolo ita eheha niʼamoniʼö ba wanimbagö gisö-isö dödö si fasala ba taʼokhögö mbua-bua sangomusoiʼö tödö Lowalangi. (Galatia 5:16, 22, 23) Na taʼila wa no taʼosambuaʼö dödöda ba wolohi harato mazui faʼasana dödö, böi ide-ide dödöda. Moguna taʼandrö geheha niʼamoniʼö moroi khö Yehowa enaʼö itolo ita ba wangosambuaʼö tödöda ba ngawalö zi sökhi. (Luka 11:13) Törö tödöu zinenge sotöi Fetero. No irai lö iʼokhögö wangera-ngera Keriso. (Mataiʼo 16:22, 23; Luka 22:34, 54-62; Galatia 2:11-14) Hizaʼi, lö awuwu ia ba itolo ia Yehowa. Itugu ara, itugu iʼokhögö wangera-ngera Keriso. Tola göi tafalua daʼö.

¹³ Ba gafuriata, itutunö Fetero hadia manö mbua-bua si tola manolo yaʼita. (Baso 2 Fetero 1:5-8.) Moguna taforege ba wangokhögö fanaha tödö, faʼanau gölö, fangomasiʼö ira talifusöda hegöi bua-bua si sökhi tanö böʼö. Tola tasofu khöda ero maʼökhö, ’Hadia mbua-bua sinangea uʼokhögö maʼökhö andre enaʼö aro ndraʼo ba wamati?’

14. Na taʼokhögö wangera-ngera ba wamati, hadia mbuania ba waʼaurida si ero maʼökhö?

¹⁴ Na taʼokhögö wangera-ngera Keriso, tola oroma daʼö ba nahia wohalöwöda mazui ba zekola, lagu wahuhuosada hegöi ba wangai angetula si ero maʼökhö. Moroi ba gangetula nihalöda, tola oroma wa taforege woloʼö Keriso. Börö me so khöda wangera-ngera ba wamati, lö omasi ita na aetu wahuwusada khö Yehowa. Na tedönisi dödöda ba wamalua sala, famati niʼokhögöda zanolo yaʼita ba wanimbagö yaʼia. Fatua lö tahalö gangetula, moguna taʼangeragö ba tasofu khöda samösa, ’Hadia goi-goi Zura Niʼamoniʼö si tola manolo yaʼo? Hadia nifalua Keriso na alua khönia zimane daʼa? Hadia zi tola mangomusoiʼö tödö Yehowa?’ Moguna asese taʼangeragö zi nofu daʼa. Datatutunö hadia manö zi tola alua khöda. Ero so zalua, tola taʼila hadia goi-goi Zura Niʼamoniʼö si tola manolo yaʼita ba wangai angetula si sökhi.

15, 16. Na taʼokhögö wangera-ngera Keriso, hewisa wa möi fanoloda daʼö ba wangai angetula si sökhi sanandrösa ba (a) wamili töla nosu? (b) wamili awö ba wariawösa?

¹⁵ Mamili töla nosu. Tola taʼila goi-goi Zura Niʼamoniʼö sanandrösa ba daʼö ba 2 Korindro 6:14, 15. (Baso.) No ihaogö itutunö Faulo wa niha samati lö fagölö lala wangera-ngerara ba niha sangokhögö fangera-ngera ba waʼaniha. Hewisa goi-goi daʼa möi fanolomö ba wamili töla nosu?

 ¹⁶ Mamili awö ba wariawösa. Tola taʼila goi-goi Zura Niʼamoniʼö sanandrösa ba daʼö ba 1 Korindro 15:33. (Baso.) Niha sangokhögö fangera-ngera ba wamati, lö fariawö ia ba niha si tola mameʼe khönia faʼawuwu ba wamati. Angeragö hewisa woloʼöu goi-goi daʼö ba ngawalö zalua. Duma-dumania, hewisa wa möi fanolou goi-goi daʼö ba wangai angetula sanandrösa ba jejaring sosial? Hewisa wa möi fanolou daʼö ba wangai angetula hadia fao ndraʼugö fa-game online ba niha si lö öʼila?

17-19. Hewisa wangera-ngera ba wamati möi fanolomö ba (a) wanimbagö halöwö si lö eluaha? (b) wangokhögö ohitö dödö si sökhi? (c) wangasiwai fatötöisa?

¹⁷ Si tola manaisi faʼatedou wamatida. So wamangelama ba Heberaiʼo 6:1. (Baso.) Hadia manö ’mbua-bua si mate’ sinangea tatimbagö? Yaʼia daʼö ngawalö halöwö si lö eluaha si lö möi fangaro wamatida. Famangelama daʼa tola itolo ita ba wameʼe fanema li ba zi nofu-nofu daʼa, ’Hadia so gunania halöwö daʼa? Hadia faodo ba bisnis daʼa? Hadia mbörö wa lö faodo ba gorahua samorege ba wangehaogö salua ba gulidanö daʼa?

¹⁸ Ohitö dödö ba wamati. Ba Huhuo ba Hili, ibeʼe khöda mene-mene si sökhi Yesu sanandrösa ba gohitö dödö. (Mataiʼo 6:33.) Niha sangokhögö fangera-ngera ba wamati, iʼofönaiʼö Mbanua Lowalangi ba waʼaurinia. Goi-goi daʼa zi tola manolo yaʼita ba wameʼe fanema li ba zinofu-nofu daʼa, ’Hadia möido kulia na no tamado sekola? Hadia utema halöwö daʼa?

¹⁹ Fatötöisa. Mene-mene nibeʼe Waulo ba niha Keriso si so ba Roma möi fanoloda ba ginötö alua khöda watötöisa ba niha böʼö. (Roma 12:18.) Na taʼoʼö Keriso, moguna taʼodödögö waʼatulö ba niha fefu. Hadia nifaluada na so watötöisada ba niha böʼö? Hadia abua khöda wanemaʼö bua gera-era niha böʼö? Mazui hadia laʼila niha wa yaʼita andre niha somasi atulö?—Yakobo 3:18.

20. Hadia mbörö wa omasi ödouʼö ndraʼugö ba wamati?

²⁰ Duma-duma daʼa zangoromaʼö hewisa goi-goi Zura Niʼamoniʼö möi fanoloda ba wangai angetula, daʼa zangoromaʼö wa ituturu lalada eheha Lowalangi. Na taʼokhögö wangera-ngera ba wamati, tola owua-wua dödöda ba waʼauri. Imane Robert si no mutötöi moroi yawa, ”Me no udouʼö wahuwusagu khö Yehowa, tobali ndraʼo foʼomo ba satua si sökhi. Owua-wua sibai dödögu.” Tola göi tasöndra wa owua-wua dödö na taforege ba wangokhögö famati. Taʼokhögö waʼauri si sökhi iadaʼa, ba tarasoi ”zindruhu faʼauri andrö” ba zi so föna.—1 Timoteo 6:19.