1-3. (a) Hadia zanolo yaʼita enaʼö lö faröi khö Lowalangi ba luo safuria andre? (b) Hadia nitutunöda ba wamahaʼö daʼa?

IADAʼA, no itugu ahatö wangohori ulidanö andre ba tola taʼila wa itugu monönö niha si lö sökhi. Yaʼira andre ”manöi . . .  hulö ndruʼu ba danö”. (Zinunö 92:8) Daʼö mbörö wa lö tokea ita na ato niha sanimbagö hadia zatulö moloʼö Lowalangi. Imane Faulo ba niha Keriso, ”Ba zi lö sökhi mibaliʼö iraono ami” hizaʼi ”ba gera-era andrö, ba enaʼö moʼahonoa ami.” (1 Korindro 14:20) Hewisa wamaluada daʼö?

² Tola taʼila wanema linia ba duho wamahaʼö andre, ”Ba zangalui Yehowa, ba ahori aboto ba dödö fefu hadia ia.” (Gamaedola 28:5) Eluahania, aboto ba dödöra hadia manö zinangea lafalua enaʼö tola laʼomusoiʼö dödö Yehowa. Ba Gamaedola 2:6, 9, iʼombakhaʼö khöda wa ibeʼe Yehowa waʼatua-tua ba niha samalua satulö. Buania ’aboto ba dödöra  hadia zatulö ba hadia lala, awö waʼadölö, awö fefu zinörö si sökhi’.

³ Noakhi, Danieli hegöi Yobi, laʼokhögö waʼatua-tua moroi khö Lowalangi. (Hezekieli 14:14) Simanö göi nono mbanua Lowalangi iadaʼa. Hewisa göi ndraʼugö? Hadia öʼokhögö waʼatua-tua moroi khö Lowalangi? Enaʼö ’aboto ba dödöda fefu hadia ia’ zi möi fangomusoiʼö tödö Yehowa, moguna taʼokhögö waʼaboto ba dödö sanandrösa khönia. Ba wamahaʼö daʼa, tafahaʼö ita (1) hewisa wa tola aboto ba dödö Noakhi, Danieli hegöi Yobi sanandrösa khö Lowalangi, (2) hadia mbuania khöra ba (3) hewisa enaʼö taʼokhögö wamati simane niʼokhögöra.

4. Hewisa wa tola aboto ba dödö Noakhi Yehowa, ba hadia mbua nitemania?

⁴ Hewisa wa tola aboto ba dödö Noakhi Yehowa? Iʼotarai ba wamobörö niha gulidanö, so tölu lala si tola manolo niha ba wangokhögö faʼaboto ba dödö sanandrösa khö Yehowa, yaʼia daʼö moroi ba niwöwöinia, samosumange Lowalangi si lö faröi hegöi howu-howu nitemara me moloʼö ira khönia. (Yesaya 48:18) Moroi ba niwöwöi, aboto ba dödö Noakhi wa so Lowalangi ba ifahaʼö göi ia ba daʼö sanandrösa ba mbua-bua Lowalangi. Buania, aboto ba dödönia wa Yehowa andre no fondrege zabölö ba ha yaʼia Lowalangi sindruhu. (Roma 1:20) Tenga ha asala faduhu dödö Noakhi khö Lowalangi, hizaʼi sindruhu-ndruhu aro wamatinia.

5. Hezo ifahaʼö ia Noakhi sanandrösa ba gohitö dödö Lowalangi ba niha gulidanö?

⁵ Iwaʼö Sura Niʼamoniʼö wa ”moroi ba duria wamati andrö”. Eluahania, hadia nirongoda moroi ba niha böʼö tola möi fanoloda ba wangokhögö famati. (Roma 10:17) Tola manö moroi ba nösi nomonia irongo Noakhi sanandrösa khö Yehowa. Amania sotöi Lameki sauri fatua lö mate Gadamo, iʼokhögö wamati sanandrösa khö Lowalangi. (Faigi gambara ba wamobörö wamahaʼö.) Tuania sotöi Metusala ba ama duania sotöi Yaredi si mate me 366 fakhe ndröfi Noakhi. * (Faigi nisura ba gahe zura.) (Luka 3:36, 37) Tola manö yaʼira hegöi foʼomora zamahaʼö Noakhi sanandrösa khö Yehowa. Lafahaʼö ia wa Yehowa zomböwöi niha gulidanö ba omasi ia na moʼono ira, lafönui danö, ba lafosumange ia. No göi ifahaʼö ia Noakhi sanandrösa ba wamadaö Gadamo hegöi Khawa khö Yehowa ba tola iʼila hadia lua-luania. (1 Moze 1:28; 3:16-19, 24) Omasi sibai Noakhi wamahaʼö si no itema ba daʼö zamarou tödönia ba wamosumange Yehowa.—1 Moze 6:9.

6, 7. Hewisa dötönafö möi fangaro wamati Noakhi?

⁶ Tola aro wamati börö me so dötönafö. Itugu aro wamati Noakhi me iʼila geluaha döinia yaʼia daʼö Folombase mazui  ʼSondrara Tödö’ sangoromaʼö wa so dötönafö. (1 Moze 5:29) Börö geheha Yehowa wa tola iwaʼö Lameki sanandrösa khö nononia Noakhi, ”Daʼe dania zondrara tödöda ba waʼerege dödöda ba ba waʼakao dangada andre, ba danö, niʼelifi Yehowa.” Faduhu dödö Noakhi wa tola iʼazökhi fefu hadia ia Lowalangi. Simane Habeli hegöi Khenoki mamati göi Noakhi wa so dania ’maʼuwu’ zomama högö gulö.—1 Moze 3:15.

⁷ Lö ahori aboto ba dödö Noakhi fefu mbuʼusa li Lowalangi si no tesura ba 1 Moze 3:15. Hizaʼi, aboto ba dödönia wa famaʼeleʼö andre iʼasogö dötönafö ba zi so föna. No göi irai ituriaigö zimane daʼö Khenoki. Iwaʼö wa ihori niha si lö sökhi Yehowa. (Yuda 14, 15) Tatu manö, turia nifaʼema Khenoki salua dania ba Hamagedo möi fangaro wamati hegöi fanötöna Noakhi!

8. Hadia mbua nitema Noakhi börö me aboto ba dödönia Lowalangi?

⁸ Hadia mbua nitema Noakhi me no aboto ba dödönia Lowalangi? Börö me no ifahaʼö ia sanandrösa khö Yehowa, itugu mamati ia ba iʼokhögö waʼatua-tua moroi khö Lowalangi. Daʼa zolumöʼö yaʼia enaʼö lö ifalua fefu hadia ia zi tola mangafökhöiʼö tödö Yehowa. Duma-dumania, börö me omasi Noakhi fahuwu khö Lowalangi, andrö wa lö fahuwu ia ba niha si lö mamati ba sanimbagö Yehowa. Niha ba zi fasui Noakhi, lasuno ndra malaʼika si lö sökhi si no tobali niha ba edöna lafosumange ira. Hizaʼi, lö tedönisi dödö Noakhi. (1 Moze 6:1-4, 9) Aboto ba dödö Noakhi wa omasi Yehowa na moʼono niha ba lanönöi gulidanö. (1 Moze 1:27, 28) Andrö, me mangowalu ndra malaʼika ba ndra alawe si so ba gulidanö ba tumbu khöra ndraono, iʼila Noakhi wa fasala daʼö. Ba gafuriata, ifatunö Yehowa khö Noakhi wa alua molö sebua ba wangohori niha si lö sökhi. Börö me faduhu dödö Noakhi wamangelama nibeʼe Yehowa, ifazökhi nowo ba teʼorifi ia hegöi ösi nomonia.—Heberaiʼo 11:7.

9, 10. Hewisa enaʼö taʼokhögö wamati simane Noakhi?

⁹ Hewisa enaʼö taʼokhögö wamati simane niʼokhögö Noakhi? Moguna tahaogö tafahaʼö ita ba Daromali Lowalangi, tatanö ba dödöda, tafalalini gera-erada ba tahalö gangetula si sökhi moloʼö si no tafahaʼö yaʼita. (1 Fetero 1:13-15) Famati hegöi faʼatua-tua moroi khö Lowalangi, möi fanoloda ba wanimbagö fondrönisi dödö nifalua Zatana hegöi amuata si lö sökhi ba gulidanö daʼa. (2 Korindro 2:11) Ato niha ba gulidanö sangomasiʼö si lö sökhi hegöi amuata fohorö ba laʼoʼö gisö-isö dödöra si fasala. (1 Yohane 2:15, 16) Lö laʼameʼegö tödö wa no ahatö ita ba wangohori ulidanö si lö sökhi andre. Na lö aro  wamatida, tola taʼokhögö wangera-ngera simane daʼö. Törö tödöu wa ifagölösi ginötö si so yaʼita Yesu simane ba götö Noakhi, lö itutunö sanandrösa ba waʼalösökhi mazui ba gamuata fohorö. Hizaʼi, ifangelama ita enaʼö lö mangoloi dödöda ba taböhöli wamosumange Lowalangi.—Baso Mataiʼo 24:36-39.

¹⁰ Sofu khöu samösa, ’Hadia oroma ba lala waʼaurigu wa uʼokhögö waʼaboto ba dödö sanandrösa khö Yehowa? Hadia möi famarou dödögu wamatigu ba wamalua somasi Yehowa ba ufahaʼö göi niha böʼö?’ Fanema li nibeʼemö ba wanofu daʼa, möi fanolomö enaʼö öʼila hadia ötörö lala Lowalangi simane Noakhi mazui löʼö.

11. (a) Börö waʼomasi Danieli khö Lowalangi, hadia wamahaʼö nihalöda sanandrösa khö zatuania? (b) Hadia mbua-bua Danieli somasi öʼoʼö?

¹¹ Hewisa wa tola aboto ba dödö Danieli Yehowa? Tatu no lafahaʼö Danieli ira satuania ba wangomasiʼö Yehowa hegöi Taromalinia. Ba ifalua daʼö Danieli sagötö faʼaurinia. Hewaʼae no atua ia, lö mamalö ihaogö ifahaʼö ia ba Zura Niʼamoniʼö. (Danieli 9:1, 2) Sindruhu-ndruhu aboto ba dödö Danieli Yehowa. Aboto göi ba dödönia fefu zi no ifalua Yehowa ba ndraono Gizaraʼeli. Tola taʼila daʼö ba wangandrönia soroi ba dödö ba si fao fangide-ngideʼö si no tesura ba Danieli 9:3-19. Baso ba haogö angerönusi wangandrö andrö. Sofu khöu samösa, ’Hadia wamahaʼö nihalögu sanandrösa khö Danieli ba wangandrö daʼa?’

12-14. (a) Hewisa wangoromaʼö Danieli wa iʼokhögö waʼatua-tua moroi khö Lowalangi? (b) Hewisa wamahowuʼö Yehowa faʼabarani hegöi faʼalöfaröi Danieli?

¹² Hadia mbua nitema Danieli me no aboto ba dödönia Lowalangi? Lö aoha ba niha Yahudi si lö faröi ba wamosumange Lowalangi me so ira ba Mbabilona. Duma-dumania, imane Yehowa ba niha Yahudi, ”Miʼalui wangorifi mbanua andrö, ba niʼoloiʼögu yaʼami.” (Yeremia 29:7) Hizaʼi, ibeʼe göi khöra goroisa enaʼö ha yaʼia nifosumangera. (2 Moze 34:14) Hewisa woloʼö Danieli si dombua oroisa andrö? Börö waʼatua-tua moroi khö Lowalangi, aboto ba dödö Danieli wa moguna iʼofönaiʼö Yehowa moroi ba wamatörö niha. Ngaotu fakhe aefa daʼö, ibeʼe goi-goi si fagölö Yesu.—Luka 20:25.

¹³ Angeragö hadia nifalua Danieli me so goroisa sangumaʼö wa tebai mangandrö niha khö lowalangi mazui labeʼe gangandröwara ba niha böʼö baero khö razo. Alua daʼö ba zi 30 hari. (Baso Danieli 6:7-10.) Tola manö so ba wangera-ngera Danieli, ’Lö salania, ha 30 hari sa atö.’ Hizaʼi, abölö iʼofönaiʼö wamosumange Lowalangi moroi ba woloʼö huku nifazökhi niha. Tola manö ibiniʼö ia ba ginötö ilau mangandrö khö Yehowa. Iʼila göi wa ato niha sangila wa asese mangandrö ia ero maʼökhö. Na ibiniʼö ia wangandrö, tola manö so ba wangera-ngera niha wa no iböhöli wamosumange Yehowa. Hewaʼae teʼala waʼaurinia, lö iböhöli wangandrö Danieli simane si toʼölö ifalua.

¹⁴ Ifahowuʼö waʼabarani hegöi faʼalöfaröi Danieli Yehowa. Ifalua dandra sahöli-höli dödö ba wangefaʼö Danieli moroi  ba mbawa zingo. Buania, ahori terongo ba zi sagörö Famatörö Media-Persia, hewisa waʼabölö Yehowa!—Danieli 6:25-27.

15. Hewisa enaʼö taʼokhögö wamati simane niʼokhögö Danieli?

¹⁵ Hewisa enaʼö taʼokhögö wamati simane niʼokhögö Danieli? Enaʼö aro wamatida, tenga ha asala tabaso Zura Niʼamoniʼö, hizaʼi moguna aboto ba dödöda daʼö. (Mataiʼo 13:23) Moguna taʼila hewisa lala wangera-ngera Yehowa. Andrö, tahaogö taʼangerönusi hadia nibasoda. Sabölö tohudenia, moguna asese talau mangandrö, töra-töra na so gabula dödöda. Tola faduhu dödöda wa hasambalö ibeʼe khöda waʼatua-tua Yehowa hegöi faʼabölö.—Yakobo 1:5.

16, 17. Hewisa wa tola aboto ba dödö Yobi Yehowa?

¹⁶ Hewisa wa tola aboto ba dödö Yobi Yehowa? Yobi andre tenga iraono Gizaraʼeli. Hizaʼi, so gamakhaitania ba waʼaniha khö Gaberahamo, Izaʼaki hegöi khö Yakobo. Yaʼira si datölu andre, no  ifahaʼö ira Yehowa sanandrösa khönia hegöi ohitö dödönia ba niha gulidanö. Tatu no irongo wamahaʼö si sökhi andre Yobi hewaʼae lö taʼila hezo irongo wamahaʼö daʼö. (Yobi 23:12) Imane Yobi khö Yehowa, ”Ha turiamö nirongogu mege.” (Yobi 42:5) Ifaduhuʼö göi Yehowa wa no itutunö Yobi sanandrösa Khönia ba niha böʼö.—Yobi 42:7, 8.

¹⁷ Aboto ba dödö Yobi mbua-bua Yehowa me inehegö ngawalö niwöwöi. (Yobi 12:7-9, 13) Ba gafuriata, iʼogunaʼö niwöwöi Elihu hegöi Yehowa ba wamahaʼö Yobi hewisa wa ide-ide niha gulidanö na lafaedogö ira khö Lowalangi. (Yobi 37:14; 38:1-4) Fagöna ba dödö Yobi wehede Yehowa irege so khönia wangide-ngideʼö ba imane khö Lowalangi, ”Uʼila, wa lö hadia ia, si tebai ndraʼugö, awö wa lö tödöu, si tebai öfalua.” Imane nasa, ”Mangesa dödögu, ba gawu-gawu tou ba ba nawu.”—Yobi 42:2, 6.

18, 19. Hadia zangoromaʼö wa sindruhu-ndruhu aboto ba dödö Yobi Yehowa?

¹⁸ Hadia mbua nitema Yobi me no aboto ba dödönia Lowalangi? Aboto ba dödö Yobi goi-goi Lowalangi. Börö me so khönia waʼaboto ba dödö sanandrösa khö Yehowa, daʼö zamarou tödönia ba wamalua satulö. Duma-dumania, aboto ba dödönia wa tebai iwaʼö wa iʼomasiʼö Lowalangi na lö sökhi gamuatania ba niha böʼö. (Yobi 6:14) Lö hadöi ba wangera-ngerania wa abölö sökhi ia moroi ba niha böʼö hizaʼi ibaliʼö ira simane ösi nomonia, he si kayo mazui si numana. Imane Yobi, ”Hadia, tenga Somböi yaʼodo zomböi göi yaʼia, ba dalu ninania?” (Yobi 31:13-22) Hewaʼae kayo Yobi ba iʼokhögö dadaoma salawa, lö khönia faʼasiliyawa ba lö iʼaohasi ba dödö niha böʼö. No aröu faehu ia ba niha si kayo hegöi sangokhögö dadaoma salawa ba ginötö daʼa.

¹⁹ Lö iʼofönaiʼö gama-gama hegöi haratonia Yobi moroi ba wangofönaiʼönia Yehowa. Aboto ba dödönia na ifalua daʼö, tola itimbagö ”Lowalangi yawa”. (Baso Yobi 31:24-28.) Iʼila göi Yobi wa fongambatö andrö no sambua mbuʼusa li niʼamoniʼö ba gotalua woʼomo ira matua ba foʼomo ira alawe. Ifabuʼu göi ba dödönia wa lö ilekeʼö ndra alawe si fao fangisö. (Yobi 31:1) Adöni dödöda daʼö börö me ba götö Yobi, no itehegö Yehowa khö ndra matua na töra samösa woʼomora ira alawe. Sindruhunia, tola manö darua woʼomo Yobi na omasi ia. Hizaʼi, aboto ba dödönia wa fongambatö siföföna nihonogöi Yehowa ha ba gotalua zi samösa ira matua ba samösa ndra alawe. Tatu daʼö göi niʼoʼö Yobi. * (Faigi nisura ba gahe zura.) (1 Moze 2:18, 24) Te mato 1.600 fakhe aefa daʼö, ibeʼe goi-goi si fagölö Yesu, wa faʼorudu hegöi fongambatö ha ba gotalua woʼomo ira matua ba foʼomo ira alawe.—Mataiʼo 5:28; 19:4, 5.

20. Börö me aboto ba dödöda Yehowa hegöi goi-goinia, hana wa möi fanoloda daʼö ba wamili si fahuwu khöda hegöi hiburan?

²⁰ Hewisa enaʼö taʼokhögö wamati simane niʼokhögö Yobi? Moguna aboto ba dödöda Yehowa ba tafalua gofu hadia ia zi tefaudu ba zomasi ia. Duma-dumania, imane Sura Niʼamoniʼö ”iʼogorofi tödönia zebua horö andrö” Yehowa. Moguna  göi lö fariawö ita ba niha si falimo. (Baso Zinunö 11:5; 26:4.) Sofu khöu samösa, ’Ba ayati si dombua andre, hadia wamahaʼö khögu sanandrösa ba lala wangera-ngera Yehowa? Hadia tefaudu ba lala wangera-ngera Yehowa hadia zabölö uʼofönaiʼö ba waʼaurigu? Hewisa wangogunaʼögu Internet, haniha zi fariawö khögu ba hewisa hiburan nifiligu?’ Fanema li nibeʼemö, möi fanolomö enaʼö öʼila hadia sindruhu-ndruhu no aboto ba dödöu Lowalangi mazui löʼö. Lö omasi ita na tedönisi dödöda ba gulidanö si lö sökhi andre. Andrö, moguna tahaogö tafahaʼö ita ba wamaehusi hadia zatulö hegöi si lö atulö, si sökhi ba si lö sökhi.—Heberaiʼo 5:14; Efeso 5:15.

21. Hadia zanolo yaʼita enaʼö ’aboto ba dödöda fefu hadia ia’ zi tola mangomusoiʼö tödö Yehowa?

²¹ Iforege Noakhi, Danieli hegöi Yobi ba wangokhögö faʼaboto ba dödö sanandrösa khö Yehowa. Daʼö mbörö wa itolo ira Yehowa irege ’ahori aboto ba dödöra fefu hadia ia’ ba wamalua somasi ia. Moroi ba duma-dumara andre, tola taʼila wa niha samalua goi-goi Yehowa tola lasöndra waʼomuso dödö. (Zinunö 1:1-3) Sofu khöu samösa, ’Hadia aboto ba dödögu Yehowa simane faʼaboto ba dödö Noakhi, Danieli hegöi Yobi?’ Iadaʼa, tola aboto ba dödöda Yehowa börö me oya zi no iʼombakhaʼö khöda sanandrösa khönia. (Gamaedola 4:18) Fahaʼö ndraʼugö ba Zura Niʼamoniʼö ba angerönusi daʼö. Andrö geheha niʼamoniʼö. Na öfalua daʼö, lö tedönisi dödöu ba gulidanö si lö sökhi andre. Tola öʼokhögö waʼatua-tua moroi khö Lowalangi ba itugu ahatö ndraʼugö khö Namada si so ba zorugo.—Gamaedola 2:4-7.