1, 2. (a) Hewisa dödö ndra talifusöda me laʼokhögö wangera-ngera ba wamati? (b) Hadia manö wanofu-nofu nitutunöda ba wamahaʼö daʼa?

IMANE samösa talifusöda ira alawe si so ba Kanada, börö me so khönia wangera-ngera ba wamati, irasoi waʼowua-wua dödö ba tola iʼasiwai gabula dödönia. Imane göi talifusöda ira matua si so ba Brasil, börö me so khöra wangera-ngera ba wamati, larasoi waʼowua-wua dödö ba wongambatöra ba zi 23 fakhe faʼara. Imane samösa talifusöda ira matua si so ba Filipina, börö me so khönia wangera-ngera ba wamati, irasoi waʼahono dödö ba itugu fahuwu ia khö ndra talifusöda hewaʼae faböʼö waö-waö waʼaurira.

² Oya mbua nitemada na taʼokhögö wangera-ngera ba wamati. Hadia nifaluada enaʼö taʼokhögö wangera-ngera ba wamati ba tarasoi mbuania? Si oföna, moguna taʼila hadia niwaʼö Zura Niʼamoniʼö sanandrösa ba niha samati, sanema fanuturu lala moroi ba geheha Lowalangi ba sangokhögö lala wangera-ngera Yehowa. Ba wamahaʼö daʼa, tatutunö wanema li moroi ba zi tölu fanofu andre. (1) Hadia geluahania tobali niha samati mazui sangokhögö fangera-ngera  ba wamati? (2) Haniha duma-duma sanolo yaʼita enaʼö itugu tobali ita niha samati? (3) Hewisa wa tobali ita niha samati na taʼokhögö ”wangera-ngera Keriso”?

3. Moloʼö Sura Niʼamoniʼö, hewisa gamaehuta niha sangokhögö fangera-ngera ba waʼaniha ba niha samati?

³ Itolo ita sinenge sotöi Faulo enaʼö taʼila hadia gamaehuta ”niha samati” ba niha sangokhögö ”fangera-ngera ba waʼaniha”. (Baso 1 Korindro 2:14-16.) Sangokhögö fangera-ngera ba waʼaniha ”lö iʼoʼö hadia ia zi otarai geheha Lowalangi, börö me faʼabodo khönia daʼö, ba tebai aboto ba dödönia daʼö”. Hizaʼi, niha samati ”isöndra geluaha hadia ia fefu” ba iʼokhögö ”wangera-ngera Keriso”. Eluahania, iforege woloʼö fangera-ngera Keriso. Ifarou ita Faulo enaʼö tobali ita niha samati. Hadia gamaehuta niha sangokhögö fangera-ngera ba waʼaniha ba niha samati?

4, 5. Hewisa niha sangokhögö fangera-ngera ba waʼaniha?

⁴ Niha sangokhögö fangera-ngera ba waʼaniha, laʼoʼö lala wangera-ngera niha gulidanö sangosambuaʼö tödöra ba gisö-isö dödöra samösa. Itutunö Faulo wa simane daʼö lala wangera-ngera ’ndraono si lö moloʼö andrö’. (Efeso 2:2) Tedönisi dödöra ba gamuata niha si so ba zi fasuira. Lafalua zomasi-masi dödöra ba lö laʼameʼegö tödö goi-goi Lowalangi. Sangokhögö fangera-ngera ba waʼaniha, ha daʼö niʼera-erania kefe, dadaoma mazui gofu hadia ia zi tola ifalua.

⁵ Moloʼö Sura Niʼamoniʼö, sangokhögö fangera-ngera ba waʼaniha lafalua ”mbua-bua nösi”. (Galatia 5:19-21) Ba zura Waulo siföföna ba niha Keriso si so ba Gorindro, itutunö mbua-bua tanö böʼö nifalua niha sangokhögö fangera-ngera ba waʼaniha. Duma-dumania, lö fahasara dödö, samoto fahasara dödö, samarou niha ba zi lö sökhi, somasi farakaro, lö moloʼö, ha femanga ba famadu niʼera-erara. (Gamaedola 7:21, 22) Moloʼö Yuda, niha sangokhögö fangera-ngera ba waʼaniha, lö laʼokhögö geheha Yehowa.—Yuda 18, 19.

6. Hewisa niha samati andrö?

⁶ Tenga simane niha sangokhögö fangera-ngera ba waʼaniha, niha samati andre laʼameʼegö tödö wahuwusara khö Lowalangi. Latehegö ituturu lalara eheha Lowalangi ba laforege woloʼö Yehowa. (Efeso 5:1) Lafahaʼö ira ba wangokhögö lala wangera-ngera Yehowa ba lafaudugö daʼö ba lala wangera-ngerara. Sindruhu-ndruhu faduhu dödöra wa so Lowalangi ba laʼameʼegö tödö goi-goi Yehowa ba waʼaurira. (Zinunö 119:33; 143:10) Lö lafalua ”mbua-bua nösi” hizaʼi laforege ba wangokhögö ”mbua-bua geheha”. (Galatia 5:22, 23) Enaʼö öʼila hadia geluaha niha sangokhögö fangera-ngera ba wamati, angeragö duma-duma daʼa: Tola lafotöi zi samösa niha tobali sogale na ha fogale manö zi so ba wangera-ngerania. Simanö göi, tola lafotöi zi samösa niha tobali niha samati na lö mamalö iʼangeragö zoʼamakhaita ba wamati.

7. Hadia niwaʼö Zura Niʼamoniʼö sanandrösa ba niha sangokhögö fangera-ngera ba wamati?

⁷ Imane Yesu wa lasöndra waʼowua-wua dödö niha sangokhögö  fangera-ngera ba wamati. Imane ba Luka 11:28, ”Yaʼahowu zamondrongo Taromali Lowalangi ba sameʼe ba dödö.” Ba Roma 8:6 itutunö hadia mbua nitemada na taʼokhögö lala wangera-ngera Yehowa. Imane ayati daʼö, ”Era-era nösi niha sa, ba no faʼamate, ba era-era geheha, ba no faʼauri ba faʼohahau dödö.” Na taʼokhögö wangera-ngera ba wamati, sökhi wahuwusada khö Lowalangi ba tasöndra waʼahono dödö iadaʼa hegöi faʼauri si lö aetu ba zi so miföna.

8. Hadia mbörö wa lö aoha na tobali ita niha samati?

⁸ Hewaʼae simanö, so ita ba gulidanö si lö sökhi. Niha ba zi fasuida lö laʼameʼegö tödö zomasi Lowalangi, daʼö mbörö wa moguna taforege ba wolumöʼö fangera-ngerada. Na lö tafaudugö wangera-ngerada ba lala wangera-ngera Yehowa, tola manö tedönisi dödöda ba mbua-bua nösi hegöi ba lala wangera-ngera gulidanö. Hadia zinangea tafalua ba wanimbagö daʼö? Hewisa enaʼö taʼokhögö wangera-ngera ba wamati?

9. (a) Hewisa enaʼö taʼokhögö wangera-ngera ba wamati? (b) Haniha duma-duma si sökhi nitutunöda?

⁹ Hulö simane iraono samomaha yaʼia khö zatuania ba iʼoʼö duma-dumara, moguna göi tafahaʼö ita ba niha sangokhögö fahuwusa si sökhi khö Yehowa. Daʼa zanolo yaʼita ba wangokhögö fangera-ngera ba wamati. Moguna taʼila hewisa lala wangera-ngera ba waʼaniha enaʼö aboto ba dödöda hadia zi tebai tafalua.(1 Korindro 3:1-4) Ba Zura Niʼamoniʼö so duma-duma si sökhi hegöi si lö sökhi. Datatutunö duma-duma si sökhi si tola tahalö moroi khö: Yakobo, Maria hegöi Yesu.

10. Hewisa wangoromaʼö Yakobo wa yaʼia andre niha samati?

 ¹⁰ Simane yaʼita, oya göi gabula dödö nitaögö Yakobo ba waʼaurinia. Omasi gaʼania Ezau wamunu yaʼia ba lö aetu ilimo ia ama matuania. Hizaʼi, mamati Yakobo ba mbuʼusa li Yehowa khö Gaberahamo. Aboto göi ba dödönia wa moroi ba ngaʼötöra alua sambua mbuʼusa li si sökhi, daʼö mbörö wa irorogö sibai nösi nomonia. (1 Moze 28:10-15) Lö itehegö taya ba dödönia mbuʼusa li Yehowa ha börö gamuata niha si so ba zi fasuinia. Duma-dumania, ba ginötö teʼala ia ibeʼe talifusönia, iʼandrö khö Yehowa enaʼö ilumöʼö ia. Ilau mangandrö, ”No öfabuʼu, wangumaʼö: ’Ufaigi lala, fa lö hadia ia khöu, ba ato sibai maʼuwumö dania ubeʼe, faʼoya ngawua nene ba mbewe nasi.’” (1 Moze 32:7-13) Aro sibai wamati Yakobo ba zi no ifabuʼu Yehowa ba iforomaʼö daʼö ba lala waʼaurinia.

11. Hezo taʼila wa so khö Maria wangera-ngera ba wamati?

¹¹ Duma-duma tanö böʼö yaʼia daʼö Maria. Ifili ia Yehowa tobali ina Yesu börö me iʼokhögö wangera-ngera ba wamati. Baso hadia niwaʼönia me möi ifalukhaisi zahatö khönia sotöi Zakharia ba Elizabe. (Baso Luka 1:46-55.) Moroi ba daʼö tola taʼila wa iʼomasiʼö Daromali Lowalangi Maria ba aboto ba dödönia Mbuku Niʼamoniʼö Heberaiʼo. (1 Moze 30:13; 1 Zamueli 2:1-10; Maleakhi 3:12) Hewaʼae no mangowalu Maria khö Yosefo, hizaʼi lö lafalua waʼorudu fatua lö tumbu Yesu. Laʼila wa abölö tohude halöwö moroi khö Lowalangi moroi ba gisö-isö dödöra. (Mataiʼo 1:25) Aefa daʼö, ihaogö inehegö hadia zalua ba waʼauri Yesu me itugu ebua-bua ia ba ifondrondrongo wamahaʼönia ba ”itanö ba dödönia daʼö fefu”. (Luka 2:51) Ba  daʼa oroma wa adöni sibai dödönia ba mbuʼusa li Lowalangi sanandrösa khö Mesia. Hadia tola taʼoʼö Maria ba lö aetu tafalua zomasi Lowalangi?

12. (a) Hewisa Yesu ba woloʼö Amania? (b) Hewisa wa tola taʼoʼö Yesu? (Faigi gambara ba wamobörö wamahaʼö.)

¹² Ha Yesu duma-duma sabölö sökhi sangokhögö fangera-ngera ba wamati si no irai auri ba gulidanö. Sagötö me so ia ba gulidanö, iforomaʼö wa omasi iʼoʼö Namania. Ifaudugö nifaluania, nirasoi hegöi lala wangera-ngerania khö Yehowa. Ifalua ba iʼameʼegö tödö goi-goi Lowalangi. (Yohane 8:29; 14:9; 15:10) Duma-dumania, baso hadia nitutunö Yesaya sanandrösa ba waʼahakhö dödö Yehowa ba fatimbaisi ia ba nitutunö Mareko sanandrösa ba waʼahakhö dödö Yesu. (Baso Yesaya 63:9; Mareko 6:34.) Hadia taʼoʼö Yesu ba wangoromaʼö faʼahakhö dödö? Simane Yesu, hadia taʼosambuaʼö dödöda ba wanuriaigö hegöi ba wamahaʼö turia somuso dödö? (Luka 4:43) Niha sangokhögö fangera-ngera ba wamati laforomaʼö waʼahakhö dödö ba latolo niha böʼö.

13, 14. (a) Hadia wamahaʼö nihalöda ba niha sangokhögö fangera-ngera ba wamati iadaʼa? (b) Beʼe duma-duma.

¹³ Iadaʼa, ato ndra talifusöda sangokhögö fangera-ngera ba wamati samorege ba woloʼö Keriso. Owölö-ölö ira ba wanuriaigö, oböwö ba laforomaʼö waʼahakhö dödö. Hewaʼae lö moʼahonoa ira, hizaʼi laforege wangokhögö bua-bua si sökhi ba lafalua zomasi Yehowa. Imane talifusöda ira alawe sotöi Rachel si so ba Brasil, ”Ba mböröta omasido uʼoʼö lagu wonukha niha gulidanö irege lö tefaudu lagu wonukhagu. Me no ufahaʼödo ba Zura Niʼamoniʼö, ufaböʼöni gamuatagu ba uforege enaʼö tobali ndraʼo niha samati. Lö aoha wamalua daʼö, hizaʼi urasoi waʼowua-wua dödö ba tola uʼokhögö gohitö dödö si sökhi ba waʼauri.”

¹⁴ Samösa dalifusöda sotöi Reylene ba Filipina, iʼokhögö gabula dödö si faböʼö. Hewaʼae no ifahaʼö ia ba zindruhu, hizaʼi iʼosambuaʼö dödönia ba wolohi sekola salawa hegöi halöwö si sökhi. Lua-luania, lö iʼameʼegö tödö halöwö ba wamati. Imane, ”Urasoi wa so zambö ba waʼaurigu. Aboto ba dödögu wa so zabölö moguna moroi ba halöwögu.” Ba gafuriata, ibulöʼö lala wangera-ngerania ba iʼosambuaʼö dödönia ba wamosumange Yehowa. Iadaʼa, faduhu dödönia ba zi no ifabuʼu Yehowa si so ba Mataiʼo 6:33, 34 ba imane, ”Aboto ba dödögu wa hasambalö iʼasogö zoguna khögu Yehowa!” Te so ndra talifusöda ba mbanua niha Keriso si so yaʼugö sangokhögö bua-bua simane daʼö. Tatu omasi ita taʼoʼö duma-duma waʼalöfaröira.—1 Korindro 11:1; 2 Tesalonika 3:7.

15, 16. (a) Hadia zinangea tafalua enaʼö tola taʼoʼö Keriso? (b) Hewisa wamahaʼöda yaʼita enaʼö taʼokhögö ”wangera-ngera Keriso”?

¹⁵ Hewisa woloʼöda Keriso? Ba 1 Korindro 2:16, itutunö wa moguna taʼokhögö ”wangera-ngera Keriso”. Ba Filifi 2:5, ifasugi ba dödöda enaʼö ’simane tödö Yesu Keriso, yasimanö göi dödöda’. Enaʼö tola taʼoʼö Keriso, moguna tafahaʼö ita ba lala wangera-ngera, nirasoi hegöi nifaluania. Iʼofönaiʼö Yesu wahuwusania khö Lowalangi moroi ba danö böʼö. Na taʼoʼö ia, no göi taʼoʼö Yehowa. Daʼö mbörö wa moguna sibai tafahaʼö ita  ba wangokhögö fangera-ngera si sökhi simane fangera-ngera Yesu.

¹⁶ Hewisa woloʼöda lala wangera-ngera Yesu? No laʼila samösa ira nifahaʼö Yesu hewisa me ifalua dandra sahöli-höli dödö, lafondrondrongo lagu wamahaʼönia, laʼila hewisa lala ba woʼameʼegönia tödö niha böʼö ba laʼila hewisa woloʼönia goi-goi Yehowa. Lamane, ”Ba yaʼaga zi so ba mbörö ba nilaunia fefu.” (Halöwö Zinenge 10:39) Lö niʼilada Yesu iadaʼa. Hizaʼi, tola taʼila waö-waö waʼaurinia ba mbuku Injil si tola manolo yaʼita enaʼö aboto ba dödöda ia. Na tabaso mbuku Mataiʼo, Mareko, Luka hegöi Yohane, oya wamahaʼö nihalöda sanandrösa ba lala wangera-ngera Yesu. Daʼa zanolo yaʼita ba ’wanara lahenia’ irege aro dödöda simane yaʼia.—1 Fetero 2:21; 4:1.

17. Hadia mbua nitemada na taʼokhögö lala wangera-ngera Keriso?

¹⁷ Hadia mbua nitemada na taʼokhögö wangera-ngera Keriso? Simane ö si sökhi, tola abölö ita na taʼa ia. Simanö göi, na taʼokhögö wangera-ngera Keriso tola aro ita ba wamati. Itugu ara, itugu aboto ba dödöda hadia nifalua Yesu ero hadia ia zalua. Tola tahalö gangetula si sökhi sangomusoiʼö tödö Lowalangi ba taʼokhögö dödö side-ide si lö sinegu. Daʼö mbörö wa moguna taʼoʼö Zoʼaya yaʼita Yesu Keriso.—Roma 13:14.

18. Hadia wamahaʼö si no öhalö sanandrösa ba niha sangokhögö fangera-ngera ba wamati?

¹⁸ Ba wamahaʼö daʼa, no aboto ba dödöda hadia geluaha niha sangokhögö fangera-ngera ba wamati. No tafahaʼö ita ba duma-duma si sökhi niha sanema fanuturu lala moroi ba geheha niʼamoniʼö. No göi tafahaʼö ita wa tola taʼokhögö lala wangera-ngera Yehowa ba taʼokhögö wahuwusa si sökhi khönia na so khöda ”wangera-ngera Keriso”. Hizaʼi, so na sa zinangea tafahaʼö ita. Duma-dumania, hezo taʼila wa aro wamatida? Hadia nifaluada enaʼö tola itugu aro wamatida? Hewisa wangoromaʼöda fangera-ngera ba wamati ba lala waʼaurida si ero maʼökhö? Tatutunö ia ba wamahaʼö aefa daʼa.