Me föna, tola manö so ba wangera-ngerada wa moguna daʼö börö zi no tesura ba Heberaiʼo 12:16, Terjemahan Dunia Baru (NW). Imane ba daʼö, wa lö itema Ezau ”ngawalö niʼamoniʼö” ba ibeʼe khö Yakobo ”waʼasiaʼania ha börö gö si sambua mako”. Andrö, ba ginötö itema ”waʼasiaʼania” Yakobo, tola manö so ba wangera-ngerada wa daʼö mbörö wa tobali ia furugö Mesia.—Mataiʼo 1:2, 16; Luka 3:23, 34.

Hizaʼi, na tahaogö tafahaʼö ita ba waö-waö tanö böʼö si so ba Zura Niʼamoniʼö, tola taʼila wa tenga ha ono siaʼa zi tobali furugö Mesia. Datatutunö ösa waö-waönia:

Ono siaʼa khö Yakobo ba Lea yaʼia daʼö Rubeno, ba ononia siaʼa khö Rakhela yaʼia daʼö Yosefo. Me no mohorö Rubeno taya waʼasiaʼania ba tebeʼe daʼö khö Yosefo. (1 Moze 29:31-35; 30:22-25; 35:22-26; 49:22-26; 1 Ngaʼötö 5:1, 2) Hewaʼae simanö, tenga moroi ba ngaʼötö Rubeno hegöi Yosefo tohare Mesia, hizaʼi moroi khö Yehuda ono numero öfa khö Yakobo ba Lea.—1 Moze 49:10.

Ba Luka 3:32 itutunö wa so dalima wurugö Mesia ba yaʼira andrö te ono siaʼa. Duma-dumania, Obedi amania Boasi, Gizaʼi amania Obedi.—Ruti 4:17, 20-22; 1 Ngaʼötö 2:10-12.

Dawido, tenga ono siaʼa khö Gizaʼi. Yaʼia andre ono siakhi moroi ba zi dawalu si fatalifusö. Hizaʼi, moroi ba ngaʼötö Dawido tohare Mesia. (1 Zamueli 16:10, 11; 17:12;  Mataiʼo 1:5, 6) Simanö göi wurugö Mesia tanö böʼö sotöi Selomo tenga ono siaʼa moroi khö Dawido.—2 Zamueli 3:2-5.

Tenga daʼö geluahania wa lö tohude nono siaʼa. Sindruhunia, yaʼira andre tohude moroi ba ndraono tanö böʼö. Yaʼira zi tobali fangali mbörö sisi ba dua winaeta latema harato.—1 Moze 43:33; 5 Moze 21:17; Yosua 17:1.

Hewaʼae simanö, faʼasiaʼa andre tola mubeʼe ba ndraono tanö böʼö. Ba ginötö ifofanö Zimaʼeli Aberahamo, tebeʼe khö Gizaʼaki waʼasiaʼa. (1 Moze 21:14-21; 22:2) Simane si no tatutunö, faʼasiaʼa Rubeno tebeʼe khö Yosefo.

Hadia geluaha wehede zinenge sotöi Faulo ba Heberaiʼo 12:16, NW? Imane ba daʼö, ”Mifaigi enaʼö böi so zohorö ba gotaluami mazui si lö ba dödö ngawalö niʼamoniʼö, simane Ezau, iʼamawa waʼasiaʼania ha börö gö si sambua mako.”

Ba daʼö, tenga furugö Mesia nitutunö Waulo, hizaʼi ibeʼe wamangelama ba niha Keriso. Imane khöra, ”Mifaigi zadölö lala gahemi” irege lö hadöi niha si lö manema faʼebua dödö Lowalangi andrö si lö sinangea mutema. Lö latema waʼebua dödö andrö na lafalua gamuata wohorö. (Heberaiʼo 12:12-16) Na lafalua daʼö, hulö Gezau ira ”si lö ba dödö ngawalö niʼamoniʼö” ba samalua gisö-isö dödöra.

Moloʼö si toʼölö mufalua ba götö daʼö, te itaria iʼokhögö halöwö si tohude Ezau ba wameʼe sumange khö Yehowa. (1 Moze 8:20, 21; 12:7, 8; Yobi 1:4, 5) Hizaʼi, iʼosambuaʼö wangera-ngerania Ezau ba gisö-isö dödönia irege ifamawa waʼasiaʼania ha börö gö si sambua mako. Tola manö lö omasi Gezau ba wanaögö fanandraigö si no ifaʼeleʼö Yehowa salua ba ngaʼötö Gaberahamo. (1 Moze 15:13) Oroma daʼö ba ginötö mangowalu ia khö zi darua ira alawe niha baero sangaʼasogö abula dödö sebua khö zatuania. (1 Moze 26:34, 35) No aröu faehu ia khö Yakobo sangowalu ba niha samosumange Lowalangi sindruhu!—1 Moze 28:6, 7; 29:10-12, 18.

Moroi ba waö-waö Zura Niʼamoniʼö andre, hadia wamahaʼö khöda sanandrösa ba wurugö Mesia? So ösa ba gotaluara nono siaʼa ba tanö böʼönia tenga. Aboto ba dödö niha Yahudi ba lafaduhuʼö göi daʼö. Hezo taʼila? Börö me lafaduhuʼö wa Keriso andre ngaʼötö Dawido, ono siakhi khö Gizaʼi.—Mataiʼo 22:42.