1, 2. (a) Hana wa tola tefarou dödöda na tafahaʼö ita ba duma-duma Noakhi, Danieli hegöi Yobi? (b) Hadia zalua me isura Hezekieli ngawua wehede si so ba Hezekieli 14:14?

HADIA ötaögö wanandraigö börö wökhö, faʼambö soguna mazui folohi? Hadia itaria lö khöu faʼomuso dödö ba wangai halöwö khö Yehowa? Na örasoi daʼö, tola tefarou dödömö na öʼangeragö duma-duma Noakhi, Danieli hegöi Yobi. Yaʼira andre niha si lö moʼahonoa ba lataögö wanandraigö simane nitaögöda iadaʼa. Hewaʼae tola teʼala waʼaurira, hizaʼi lö faröi ira khö Yehowa. Ba wamaigi Yehowa tobali ira duma-duma ba wamati hegöi foloʼö.—Baso Hezekieli 14:12-14.

² Isura duho wamahaʼö daʼa Hezekieli me so ia ba Mbabilona me döfi 612 SM. * (Faigi nisura ba gahe zura.)  (Hezekieli 1:1; 8:1) Isura daʼö lö ara fatua lö tedudugö Yeruzalema me döfi 607 SM. Lö ato niha Yeruzalema niʼorifi sangokhögö famati ba foloʼö simane Noakhi, Danieli hegöi Yobi. (Hezekieli 9:1-5) Tanö böʼönia, Yeremia, Barukhi, Ebedi-melekhi hegöi Rekhabi.

3. Hadia nitutunöda ba wamahaʼö daʼa?

³ Lö ara tö tehori gulidanö si lö sökhi andre. Simane ba götö föna, niha satulö tödö ba wamaigi Yehowa simane Noakhi, Danieli hegöi Yobi ha daʼö niʼorifi. (Famaʼeleʼö 7:9, 14) Andrö, datafahaʼö ita hana wa iʼogunaʼö niha si datölu andre Yehowa si tobali duma-duma ba niha somasi mamalua satulö fönania. Tatutunö (1) fanandraigö salua khöra ba (2) lalada ba woloʼö famati hegöi foloʼöra.

4, 5. Hadia manö wanandraigö nitaögö Noakhi, ba hadia zadöni dödöda sanandrösa khönia?

⁴ Hadia wanandraigö nitaögö Noakhi? Lö sökhi gamuata niha me götö dua Noakhi sotöi Khenoki. Lawaʼö ”wehede safaito” sanandrösa khö Yehowa. (Yuda 14, 15) Iʼotarai daʼö, itugu monönö waʼalösökhi ba gulidanö. Ba götö Noakhi, ”anönö danö horö”. Möi tou ba gulidanö malaʼika si lö sökhi, labaliʼö ira niha ba mangowalu ira ba ndra alawe. Lua-luania afaito sibai ndraonora. (1 Moze 6:2-4, 11, 12) Hizaʼi, faehu sibai Noakhi moroi khöra. Imane Sura Niʼamoniʼö, ”Noakhi andrö, ba falukha waʼebolo dödö Lowalangi.” Tenga simane niha si so ba zi fasuinia, ifalua hadia zatulö. ”Lö aefa-aefa khönia Lowalangi ba lalania.”—1 Moze 6:8, 9.

⁵ Moroi ba wehede andrö, hadia wamahaʼö nihalöda sanandrösa khö Noakhi? Si oföna, angeragö hauga fakhe no ifosumange Yehowa Noakhi ba gulidanö si lö sökhi fatua lö Anönö Danö Idanö. Tenga ha 70 mazui 80 fakhe, hizaʼi arakhagö 600 fakhe! (1 Moze 7:11) Si dua, törö tödömö wa lö hadöi banua niha Keriso si tola manolo ba samarou tödönia simane niʼokhögöda iadaʼa. Lö göi latuhini ia ira talifusönia. *—Faigi nisura ba gahe zura.

6. Hewisa wangoromaʼö Noakhi wa so khönia waʼabarani?

⁶ Lö imane tödönia Noakhi wa no ibönö na no tobali ia niha si sökhi. Lö khönia faʼataʼu ba wangombakha ba niha sanandrösa ba wamatinia khö Yehowa. Ifotöi ia Sura Niʼamoniʼö ”sanuriaigö faʼatulö dödö”. (2 Fetero 2:5) Imane sinenge sotöi Faulo sanandrösa khö Noakhi, ”[Moroi ba wamatinia] iʼetuʼö huku niha gulidanö.” (Heberaiʼo 11:7) Tatu manö, laʼoʼaya ba laʼalui lala enaʼö lö ifalua halöwö fanuriaigö. Tola manö fahöʼö niha khönia. Hizaʼi, lö khönia faʼataʼu. (Gamaedola 29:25) Mamati ia ba ibeʼe khönia waʼabarani Yehowa. Ba Ibeʼe göi waʼabarani simane daʼö Yehowa ba niha samosumange yaʼia iadaʼa.

7. Hadia wanandraigö nitaögö Noakhi me ifazökhi nowo?

⁷ Lö si faröi Noakhi khö Yehowa ba zi töra 500 fakhe faʼara, iʼotarai me iʼoʼou ia ba wamazökhi owo. Muʼogunaʼö nowo andrö ba wangorifi niha hegöi urifö na  alua Waʼanönö Danö Idanö. (1 Moze 5:32; 6:14) Tatu abua khö Noakhi ba wangaʼazökhi owo andrö. Aefa daʼö, aboto ba dödönia wa so niha sangoʼaya ba sanandrawaisi yaʼia. Hewaʼae simanö, mamati Noakhi ba moloʼö ia khö Yehowa. Iʼoʼö fefu hadia ia niwaʼö Lowalangi.—1 Moze 6:22.

8. Hewisa wangoromaʼö Noakhi wa faduhu dödönia khö Yehowa wa iʼasogö zoguna ba nösi nomonia?

⁸ So wanandraigö tanö böʼö nitaögö Noakhi. Moguna iʼasogö zoguna ba nösi nomonia. Fatua lö Anönö Danö Idanö, fefu niha laforege wananö sinanö si tobali soguna khöra. Ifalua göi daʼö Noakhi. (1 Moze 5:28, 29) Hizaʼi, lö talafo iʼabusi tödö wangalui soguna ba nösi nomonia. Famosumange Yehowa zabölö iʼofönaiʼö ba waʼaurinia. Hewaʼae oya ginötö niʼogunaʼönia ba wamazökhi owo te ba zi 40 mazui 50 fakhe, lö mamalö iʼosambuaʼö dödönia khö Yehowa, ba ifalua daʼö ba zi 350 fakhe me no aefa Anönö Danö Idanö. (1 Moze 9:28) No duma-duma si sökhi khöda Noakhi ba wamati hegöi ba woloʼö!

9, 10. (a) Hewisa woloʼöda famati hegöi foloʼö Noakhi? (b) Na lö mamalö taʼoʼö goroisa Lowalangi, hadia zi tola tafaduhusi tödö?

⁹ Hewisa woloʼöda famati hegöi foloʼö Noakhi? Tola tafalua daʼö na taʼokhögö lala wangera-ngera Yehowa sanandrösa ba zindruhu, lö tobali ita ösi gulidanö Zatana ba taʼofönaiʼö Yehowa ba waʼaurida. (Mataiʼo 6:33; Yohane 15:19) Na tafalua daʼö, tatu fatuwu khöda niha gulidanö. Duma-dumania, börö me taʼoʼö goi-goi Lowalangi sanandrösa ba wohorö hegöi ba wongambatö, tola manö so wehede si lö sökhi niwaʼöra ba media sanandrösa khöda. (Baso Maleakhi 3:17, 18.) Simane Noakhi, böi ataʼu ita ba niha. Taʼataʼufi Yehowa, taʼosinangegö ia ba böi tabeʼe afatö dödönia. Aboto ba dödöda wa ha Yaʼia zi tola mameʼe khöda faʼauri si lö aetu.—Luka 12:4, 5.

¹⁰ Sofu khöu samösa, ’Hadia lö mamalö ufalua zatulö föna Lowalangi, hewaʼae laʼoʼaya mazui lakataʼö ndraʼo niha böʼö? Hadia faduhu dödögu wa iʼasogö zoguna ba nösi nomogu Yehowa hewaʼae abua wangalui soguna?’ Na faduhu dödömö khö Yehowa ba moloʼö ndraʼugö simane Noakhi, hasambalö irorogö ndraʼugö.—Filifi 4:6, 7.

11. Hadia wanandraigö nitaögö Danieli hegöi awönia si datölu ba Mbabilona? (Faigi gambara ba wamobörö wamahaʼö.)

¹¹ Hadia wanandraigö nitaögö Danieli? Laʼohe Danieli ba Mbabilona, banua safönu lowalangi faya hegöi fakelemusa. Fatuwu niha si so ba daʼö khö ndra niha Yahudi, laʼoʼaya ira hegöi Lowalangira, Yehowa. (Zinunö 137:1, 3) Tatu afökhö dödö Danieli hegöi niha Yahudi sangomasiʼö Yehowa ba nifaluara! Ato göi niha samaigi-maigi Danieli hegöi awönia si datölu sotöi Hanania, Mizaeli ba Asaria börö me lafahaʼö ira ba wangai halöwö khö razo Mbabilona. Labeʼe öra gö sasese iʼa razo, si lö itehegö Yehowa enaʼö laʼa ono mbanuania. Hizaʼi, ”lö ihalö salakha khönia wemanga gö razo” andrö Danieli.—Danieli 1:5-8, 14-17.

12. (a) Hewisa Danieli andrö? (b) Hewisa dödö Yehowa khönia?

 ¹² So wanandraigö tanö böʼö nitaögö Danieli. Börö me atua-tua ia, ibeʼe khönia razo dadaoma salawa. (Danieli 1:19, 20) Hewaʼae simanö, lö khönia faʼasiliyawa mazui iwaʼö tödönia wa hasambalö atulö mbua gera-erania. Lö mamalö so khönia wangide-ngideʼö. Asese iwaʼö wa börö Yehowa wa tola mofozu ia. (Danieli 2:30) Angeragö daʼa, me itutunö Yehowa duma-duma niha si lö faröi sinangea taʼoʼö simane Noakhi hegöi Yobi, no ifaogö döi Danieli ba daʼö. No oroma wa lö si faröi Noakhi hegöi Yobi ba wamosumange Yehowa irugi waʼamatera. Hizaʼi, me luo daʼö awuyu-wuyu nasa Danieli. Hewaʼae simanö, faduhu dödö Yehowa khö Danieli wa lö faröi ia! Ba atulö göi daʼö, lö faröi ba moloʼö Danieli khö Lowalangi irugi waʼamatenia. Me arakhagö 100 fakhe ndröfi Danieli, imane khönia malaʼika Lowalangi, ”He Danieli omasiö.”—Danieli 10:11.

13. Hadia mbörö wa ibeʼe Yehowa dadaoma salawa khö Danieli?

¹³ Börö wanolo moroi khö Yehowa, tola tobali niha sabölö tohude Danieli ba gödo razo. Si oföna ba Wamatörö Mbabilona aefa daʼö ba Wamatörö Media-Persia. (Danieli 1:21; 6:1, 2) Tola manö ibeʼe dadaoma salawa andre khö Danieli Yehowa enaʼö tola itolo nono mbanuania, simane nifalua Yosefo ba danö Miserai, Gesitera hegöi Morodokhai me so ira ba Persia. * (Faigi nisura ba gahe zura.) (Danieli 2:48) Hadia tola ökhalaigö hewisa dödö Hezekieli hegöi niha Yahudi tanö böʼö, me laʼila wa iʼogunaʼö Danieli Yehowa ba wanolo yaʼira? Sindruhu-ndruhu teʼaroʼö dödöra!

14, 15. (a) Hadia zalua khöda iadaʼa simane salua khö Danieli? (b) Hadia wamahaʼö si tola lahalö ira satua iadaʼa moroi khö zatua Danieli?

¹⁴ Hewisa woloʼöda famati hegöi foloʼö Danieli? Iadaʼa, toröi ita ba gulidanö safönu amuata fohorö hegöi agama faya. No tedönisi dödö niha ba Mbabilona Sebua yaʼia daʼö fefu agama faya ba zi sagörö ulidanö, nifotöi Zura Niʼamoniʼö ”naha mbekhu”. (Famaʼeleʼö 18:2) Hulö niha si fatewu ita ba  gulidanö daʼa. Daʼö mbörö wa laʼoʼaya ita börö me no faehu ita moroi khöra. (Mareko 13:13) Hizaʼi, simane Danieli moguna tahatöʼö ita khö Lowalangida Yehowa. Na so khöda wangide-ngideʼö, foloʼö hegöi faʼafaduhu dödö khö Yehowa tola iʼomasiʼö ita simane Danieli.—Hagaʼi 2:7.

¹⁵ Tola lahalö wamahaʼö si sökhi ira satua moroi khö zatua Danieli. Me iraono Danieli toröi ia ba Yehuda, ato niha si lö sökhi ba zi fasuinia. Hizaʼi, iʼomasiʼö sibai Yehowa. Hadia tola manö alua daʼö? Löʼö. No lafahaʼö ia ira satuania sanandrösa khö Yehowa. (Gamaedola 22:6) Eluaha döi Danieli yaʼia daʼö Lowalangi zi Tobali Sanguhuku Khögu. Ba daʼö oroma wa laʼomasiʼö Yehowa ira satuania. (Danieli 1:6) Andrö, yaʼami satua moguna so khömi waʼebolo dödö ba ginötö mifahaʼö ndraonomi sanandrösa khö Yehowa. Böi awuwu. (Efeso 6:4) Mifao khöra wangandrö, ba miʼangandrö salahira. Forege wamahaʼö yaʼira ba wangomasiʼö hadia zatulö moloʼö Yehowa ba hasambalö ifahowuʼö ami.—Zinunö 37:5.

16, 17. Hadia wanandraigö nitaögö Yobi?

¹⁶ Hadia wanandraigö nitaögö Yobi? Faböʼö zalua ba waʼauri Yobi. Ba wamobörö, Yobi andre ”niha si tehöngö moroi ba niha böʼö fefu, tanö ba Gatumbukha”. (Yobi 1:3, Terjemahan Dunia Baru) Kayo sibai ia ba ato niha sangila ba samosumange yaʼia. (Yobi 29:7-16) Hewaʼae simanö, lö irai so ba wangera-ngera Yobi wa abölö tohude ia moroi ba niha böʼö mazui lö moguna khönia Lowalangi. Taʼila daʼö börö me ifotöi Yobi andre Yehowa ’enonigu’ ba imane, ”Löʼö sa famaedonia ba gulidanö, ba waʼatulö ba ba waʼadölö dödö, ba wangataʼufinia Lowalangi ba ba waʼudusa ba zi lö sökhi.”—Yobi 1:8.

¹⁷ Izumaigö faböʼö zalua ba waʼauri Yobi. Taya fefu niʼokhögönia ba abu sibai dödönia irege omasi ia mate. Aboto ba dödöda iadaʼa wa Satana zangaʼasogö fefu abula dödö salua khö Yobi. Iwaʼö wa ifosumange Yehowa Yobi ha börö me so gohitö dödönia. (Baso Yobi 1:9, 10.) Tenga si famai-mai wamobahulu daʼö ba wamaigi Yehowa. Hewisa wangoromaʼönia wa falimo Zatana? Ibeʼe ginötö khö Yobi ba wangoromaʼö faʼalöfaröinia ba ifosumange Lowalangi börö waʼomasi.

18. (a) Hadia zadöni dödömö sanandrösa khö Yobi? (b) Hadia wamahaʼö nihalöda khö Yehowa moroi ba nifaluania khö Yobi?

¹⁸ Lö aetu-aetu itandraigö Yobi Satana ba iʼalui lala enaʼö so ba wangera-ngera Yobi wa moroi khö Lowalangi wanandraigö andrö. (Yobi 1:13-21) Aefa daʼö, so datölu ndra awönia sangumaʼö fehede si lö sökhi khönia. Lawaʼö wa lö sökhi ia ba no sinangea ihuku ia Lowalangi. (Yobi 2:11; 22:1, 5-10) Hewaʼae simanö, lö faröi Yobi khö Yehowa. Sindruhu sa wa itaria iwaʼö wehede si lö fakhamö iʼangeragö. (Yobi 6:1-3) Hizaʼi, aboto ba dödö Yehowa wa ifalua daʼö Yobi ha börö me tefakao ba abu dödönia. Iʼila Yehowa wa lö faröi Yobi hewaʼae lö aetu itandraigö ia Satana. Me no teʼasiwai wanandraigö andrö, ifahowuʼö Yobi Yehowa dua kali winaeta moroi ba niʼokhögönia ba zilalö ba monönö waʼanau nosonia töra 140 fakhe. (Yakobo 5:11) Lö  faröi Yobi ba wamosumange Lowalangi soroi ba dödö. Hana wa tola taʼila? Börö me tuho wamahaʼö andre khöda, Hezekieli 14:14, musura ia ngaotu fakhe me no aefa mate Yobi.

19, 20. (a) Hewisa woloʼöda famati hegöi foloʼö Yobi? (b) Hewisa wangoromaʼöda faʼahakhö dödö simane Yehowa?

¹⁹ Hewisa woloʼöda famati hegöi foloʼö Yobi? Gofu hadia zalua khöda, taʼofönaiʼö Yehowa ba waʼaurida. Tafaduhusi tödö ba moloʼö ita khönia soroi ba dödö. Sindruhunia, oya dani niʼokhögöda moroi ba niʼokhögö Yobi. Oya waʼaboto ba dödö niʼokhögöda iadaʼa sanandrösa khö Zatana hegöi nifaluania. (2 Korindro 2:11) Moroi ba Zura Niʼamoniʼö, töra-töra ba mbuku Yobi tola taʼila hadia mbörö wa itehegö alua wanandraigö Lowalangi. Moroi ba wamaʼeleʼö Danieli, tola taʼila wa Yesu Keriso zamatörö Banua Lowalangi. (Danieli 7:13, 14) Lö ara tö mamatörö ia ba gulidanö ba ihori fefu wanandraigö salua.

²⁰ Moroi ba zalua khö Yobi andre, tafahaʼö ita ba wangoromaʼö faʼahakhö dödö khö ndra talifusöda ba ginötö göna ira fanandraigö. Simane Yobi, tola manö lawaʼö wehede si lö fakhamö laʼangeragö. (Zangombakha 7:7) Böi so ba wangera-ngerada wa alua khöra wanandraigö simane daʼö börö horö nifaluara. Hizaʼi, moguna aboto ba dödöda hadia zalua khöra. Na tafalua daʼö no taʼoʼö Yehowa, Amada sebua faʼomasi ba faʼahakhö dödö.—Zinunö 103:8.

21. Hewisa 1 Fetero 5:10 möi famasugi ba dödöda zalua khö Noakhi, Danieli hegöi Yobi?

²¹ No faböʼö-böʼö ginötö waʼauri Noakhi, Danieli hegöi Yobi ba faböʼö göi wanandraigö salua khöra. Hizaʼi, anau gölöra ba wanaögö fanandraigö andrö. Salua khöra andre zamasugi ba dödöda wehede zinenge sotöi Fetero me iwaʼö, ”Ifalua dania wamoʼahonoa yaʼami Lowalangi waʼebua dödö andrö fefu, . . . ba lakhömi andrö khönia, si lö aetu, . . . iʼabölöʼö ami, iʼabeʼeʼö ami, ba ifodane-dane ami, na no aefa mitaha wamakao maʼifu.”—1 Fetero 5:10.

22. Hadia wamahaʼö nitutunöda aefa daʼa?

²² Ngawua wehede ba 1 Fetero 5:10, alua ia ba nono mbanua Lowalangi iadaʼa. Iʼaroʼö dödöda Yehowa wa hasambalö ibeʼe waʼabölö ba nono mbanuania. Omasi ita na ibeʼe khöda waʼabölö Yehowa ba lö faröi ita khönia. Andrö, moguna taʼoʼö wamati hegöi foloʼö Noakhi, Danieli ba Yobi. Ba wamahaʼö aefa daʼa, tafahaʼö ita wa tola lö faröi ira khö Yehowa börö me sindruhu-ndruhu so khöra waʼaboto ba dödö sanandrösa khönia. ’Ahori aboto ba dödöra fefu hadia ia’ zomasi Yehowa enaʼö lafalua. (Gamaedola 28:5) Tola göi tafalua zimane daʼö.