1-2. (a) Hadia zomasi ita maʼafefu? (b) Hadia zi tola tafaduhusi tödö?

FEFU ita tatu omasi na laʼomasiʼö ba lafalua khöda zatulö. Na asese lö laforomaʼö khöda waʼomasi ba faʼatulö, tola manö so ba dödöda wa lö laʼameʼegö tödö ita ba afatö dödöda.

² Aboto ba dödö Yehowa wa omasi ita na laʼomasiʼö ba lafalua khöda zatulö. (Zin. 33:5) Faduhu dödöda wa iʼomasiʼö ita Lowalangida ba omasi ia na lafalua khöda zatulö. Oroma daʼa ba Goroisa nibeʼe ba ndraono Gizaraʼeli me ifaʼema Yehowa khö Moze. Na abu dödöu börö me lö laʼomasiʼö ba lafalua khöu zi lö atulö, angeragö hewisa Goroisa Moze * ba wangoromaʼö wa iʼameʼegö tödö nono mbanuania andrö Yehowa.

3. (a) Simane nitutunö ba Roma 13:8-10, hadia niʼilada ba ginötö tafahaʼö ita moroi ba Goroisa Moze? (b) Hadia wanofu-nofu nitutunö ba wamahaʼö daʼa?

³ Ba ginötö tafahaʼö ita ba Goroisa Moze, tola taʼila hewisa dödö Lowalangida Yehowa sebua faʼomasi. (Baso Roma 13:8-10.) Ba wamahaʼö daʼa, tatutunö ösa goroisa nibeʼe ba ndraono Gizaraʼeli hegöi fanema li moroi ba wanofu-nofu: Hadia zangoromaʼö wa Oroisa andrö teʼodane-dane ba waʼomasi? Hadia zangoromaʼö wa Oroisa andrö, ifarou niha ba wamalua faʼatulö? Hewisa niha si so dadaoma ba wamaluara Oroisa? Haniha zabölö tohude nilumöʼö Goroisa? Fanema li moroi ba zinofu-nofu si tola mameʼe khöda fondrara dödö, so  wanötönada, ba ahatö ita khö Namada sebua faʼomasi.​—Hal. 17:27; Rom. 15:4.

4. (a) Hana wa tola tawaʼö wa Oroisa Moze teʼodane-dane ba waʼomasi? (b) Simane nisura ba Mataiʼo 22:36-40, hadia goroisa nibeʼe Yesu?

⁴ Tola tawaʼö wa Oroisa Moze teʼodane-dane ba waʼomasi börö me faʼomasi zamarou Yehowa ba wamalua fefu hadia ia. (1 Yoh. 4:8) Fefu goroisa Yehowa teʼodane-dane ia moroi ba zi dombua goroisa yaʼia daʼö ba wangomasiʼö Lowalangi hegöi niha. (3 Moz. 19:18; 5 Moz. 6:5; baso Mataiʼo 22:36-40.) Moroi ba Goroisa si töra 600, tola tafahaʼö ita sanandrösa ba waʼomasi Yehowa. Datafaigi duma-dumania.

5-6. Hadia zomasi Yehowa enaʼö lafalua niha si no mongambatö ba hadia niʼameʼegö tödö Yehowa? Beʼe duma-duma.

⁵ Böi faröi khö woʼomou ba ameʼegö tödö ndraonou. Omasi Yehowa enaʼö tedou waʼomasi ba gotalua zi no mongambatö irege aro sandrohu faʼaurira. (1 Moz. 2:24; Mat. 19:3-6) Fohorö no sambua zala sebua. Börö daʼö, iwaʼö ba goroisa si fitu moroi ba zi Fulu Oroisa yaʼia daʼö tebai mohorö. (5 Moz. 5:18) Daʼa no sambua horö ’khö Lowalangi’ ba si lö sökhi nifaluania khö woʼomonia. (1 Moz. 39:7-9) Foʼomo niha samalua horö tola manö irasoi waʼafökhö ba zi hauga wulu fakhe börö me no faröi ngambatönia.

⁶ Iʼameʼegö tödö sibai Yehowa hewisa gamuata woʼomo ira matua hegöi foʼomo ira alawe khö ngambatöra zamösana. Ba götö ndraono Gizaraʼeli me föna, omasi Yehowa enaʼö lafalua zi sökhi khö woʼomo ira alawe. Foʼomo ira matua somasi wamalua Oroisa, tatu iʼomasiʼö woʼomonia ba lö fabali auri ia khö woʼomonia ha börö zala side-ide. (5 Moz. 24:1-4; Mat. 19:3, 8) Hizaʼi na börö horö sebua andrö wa omasi woʼomo ira matua fabali khö woʼomonia, moguna ibeʼe zura wabalisa. Na so zura wabalisa, lö laböbögö khö woʼomo ira alawe wa no ifalua horö. Sura andrö enaʼö laʼandrö khö zondröniaʼö ba mbanua. Tobali, tola latolo ira sondröniaʼö ba mbanua enaʼö lafuli lahaogö wongambatöra. Lö ero-ero manö iʼasiwai Yehowa na so woʼomo ira matua zamabalisi foʼomonia ha börö wangalui tana khönia. Hizaʼi, iʼila Yehowa dawa hörö woʼomo ira alawe ba fao ia ba worasoi faʼafökhö andrö.​—Mal. 2:13-16.

7-8. (a) Hadia goroisa nibeʼe Yehowa ba zatua? (Faigi gambara ba guli majalah.) (b) Hadia wamahaʼönia khöda?

⁷ Ba Goroisa göi oroma wa iʼameʼegö tödö Yehowa ndraono. Omasi ia so waʼomuso dödö hegöi faʼahono dödö ba ndraono. Tenga ha ibeʼe goroisa ba zatua enaʼö laʼasogö zoguna ba mboto, hizaʼi moguna göi laʼasogö zoguna ba wamati. Moguna ba zatua enaʼö laʼogunaʼö ginötö si so ba wamahaʼö iraonora ba wamalua Oroisa Yehowa hegöi ba wangomasiʼö yaʼia. (5 Moz. 6:6-9; 7:13) Sambua mbörö wa ihuku ndraono Gizaraʼeli andrö Yehowa börö me lö sökhi gamuatara ba ndraono. (Yer. 7:31, 33) Tebai so ba dödö zatua, ifagölösi ndraonora ba gama-gama si lö laʼameʼegö tödö mazui lafalua zi lö sökhi. Hizaʼi, enaʼö ba wamaigira ndraonora no howu-howu mazui buala sebua böli moroi khö Yehowa.​—Zin. 127:3.

⁸ Famahaʼö: Inehegö Yehowa hewisa gamuata woʼomo ira matua hegöi foʼomo ira alawe khö ngambatöra zamösana. Omasi göi ia enaʼö so waʼomasi khö zatua ba ndraonora. Ihuku dania zatua samalua si lö sökhi khö ndraonora.

9-11. Hana wa ibeʼe Yehowa goroisa ba wanegu niha enaʼö böi laʼisö gokhöta nawöra?

⁹ Böi isö gokhöta nawöu. Oroisa safuria moroi ba zi Fulu Goroisa itegu niha enaʼö böi iʼisö gokhöta nawönia. (5 Moz. 5:21;  Rom. 7:7) Ibeʼe goroisa daʼa Yehowa ba wamahaʼö ono mbanuania ba zabölö moguna enaʼö larorogö dödöra yaʼia daʼö era-era hegöi nirasoira. Aboto ba dödönia wa amuata si fasala tebörögö ia moroi ba gera-era si fasala hegöi ba nirasoi. (Gamd. 4:23) Na so samösa ndraono Gizaraʼeli itehegö tedou ba dödönia wangisö si fasala, tola manö ifalua gamuata si lö baga ba niha. No irai ifalua zimane daʼö Razo Dawido. Si toʼölönia ifalua gamuata si sökhi. Hizaʼi samuza inötö, iʼisö woʼomo niha böʼö irege ifalua horö. (Yak. 1:14, 15) Ifalua horö Dawido, ilimo woʼomo ndra alawe daʼö, ba iʼalui lala ba wamunu ira matua andrö.​—2 Zam. 11:2-4; 12:7-11.

¹⁰ Iʼila Yehowa nösi dödö niha, andrö aboto ba dödönia na so ndraono Gizaraʼeli si no manawö oroisa sanandrösa ba wangisö gokhöta nawönia. (1 Nga. 28:9) Moroi ba goroisa andrö, aboto ba dödö nono mbanuania wa moguna latimbagö wangera-ngera si tola molohe yaʼira ba wamalua amuata si fasala. Sindruhu-ndruhu wa Ama fondrege zatua-tua ba safönu faʼomasi!

¹¹ Famahaʼö: Tenga ha niʼila hörö nifaigi Yehowa. Iʼila hadia nösi dödöda yaʼia daʼö hewisa ita zindruhunia. (1 Zam. 16:7) Lö hadöi zi tola tabiniʼö khönia, he era-erada, nirasoida, mazui nifaluada. Iʼila mbua-bua si sökhi si so ba dödöda ba omasi ia na tadouʼö daʼö. Hizaʼi, omasi göi ia enaʼö taʼila samösa lala wangera-ngerada si fasala ba tatimbagö ia faböi tafalua zala.​—2 Nga. 16:9; Mat. 5:27-30.

12. Hadia nifahaʼö Goroisa Moze?

¹² Ba Goroisa Moze göi ifahaʼö ita wa omasi Yehowa zatulö. (Zin. 37:28; Yes. 61:8) Yaʼia no duma-duma soʼahonoa ba wangoromaʼö faʼatulö ba niha. Na moloʼö ndraono Gizaraʼeli ba goroisa nibeʼe Yehowa hasambalö ifahowuʼö ira. Hizaʼi, na lö laʼoʼö goi-goinia satulö ba sindruhu tola tefakao waʼaurira. Datatutunö dombua goroisa tanö böʼö moroi ba zi Fulu Goroisa.

13-14. Hadia zi dombua goroisa siföföna moroi ba zi Fulu Oroisa, ba hadia mbuania ba ndraono Gizaraʼeli na laʼoʼö daʼö?

¹³ Mangalulu khö Yehowa. Dombua goroisa siföföna moroi ba zi Fulu Goroisa, ibeʼe fareta enaʼö ha khö Yehowa mangalulu ndraono Gizaraʼeli ba tebai lafosumange nadu. (2 Moz. 20:3-6) Mufazökhi goroisa andrö tenga khö Yehowa moguna ia. Hizaʼi khö nono mbanuania. Na lö faröi ira khö Yehowa tola ohahau dödöra ba waʼauri. Hizaʼi na lafosumange lowalangi tanö böʼö tola tefakao ira.

¹⁴ Angeragö sanandrösa ba niha Ganaʼana. Lafosumange nadu si lö noso tenga Lowalangi sindruhu ba sauri. Lua-luania, laʼailasi ira samösa. (Zin. 115:4-8) Ba ginötö lafosumange lowalangira, lalau mohorö ba labeʼe nonora tobali sumange. Na latimbagö Yehowa ndraono Gizaraʼeli ba lafili mangalulu khö nadu, laʼailasi samösa ira ba laʼafökhöiʼö dödö nösi nomora. (2 Nga. 28:1-4) Iraono Gizaraʼeli si so kuaso, lö laʼoʼö goi-goi Yehowa sanandrösa ba waʼatulö. Laʼogunaʼö kuasora ba zi lö tefaudu ba lafakao niha si lö faʼabölö. (Hez. 34:1-4) Ifangelama Yehowa ndraono Gizaraʼeli wa hasambalö ihuku ira na lafalua zi lö sökhi ba ndra alawe hegöi ba ndraono. (5 Moz. 10:17, 18; 27:19) Hizaʼi, ifahowuʼö Yehowa nono mbanuania na lö faröi ira khönia ba na lafalua zatulö ba niha böʼö.​—1 Raz. 10:4-9.

15. Hadia wamahaʼö niʼilada sanandrösa khö Yehowa?

¹⁵ Famahaʼö: Na so samösa niha iwaʼö wa yaʼia samosumange Yehowa, hizaʼi lö ifalua goi-goinia ba iʼafökhöiʼö dödö nono mbanuania,  tenga sala Yehowa daʼö. Hewaʼae simanö, iʼomasiʼö ita Yehowa ba aboto ba dödönia na lafalua khöda zi lö atulö. Fao ia ba worasoi faʼabu dödöda, töra moroi ba nirasoi samösa ina na tefakao nononia sawuyu. (Yes. 49:15) Tola manö lö iʼanemaiʼö iʼasiwai gabula dödö andrö. Hizaʼi ba ginötö si tefaudu, hasambalö ihuku fefu niha si lö omasi mamalalini era-era ba zi no ifalua ba niha böʼö.

16-18. Hadia manö zi no itatugöi Oroisa Moze ba hadia wamahaʼönia?

¹⁶ No itatugöi Oroisa Moze hadia manö zi tola lafalua iraono Gizaraʼeli ba waʼaurira. Tobali, ira sondröniaʼö ba ndraono Gizaraʼeli moguna lafalua wanguhuku satulö ba sindruhu. Tenga ha soguna ba wamati zi tobali noro dödöra, hizaʼi na so watitisa hegöi faʼalösökhi. Nehegö duma-duma daʼa.

¹⁷ Na so samösa ndraono Gizaraʼeli samunu niha, lö laʼanemaiʼö labunu göi ia. Fatua lö lahalö gangetula ira sondröniaʼö ba mbanua, moguna lafareso ua sakali hadia zindruhunia zalua, awena laʼetuʼö hadia labunu mazui löʼö niha samalua sala andrö. (5 Moz. 19:2-7, 11-13) Oya göi niʼasiwai ndra sondröniaʼö ba mbanua. Latolo ba wangasiwai abula dödö simane amadöniwa ba harato irugi ba zalua ba zi sambua fongambatö. (2 Moz. 21:35; 5 Moz. 22:13-19) Na lafalua zatulö ira sondröniaʼö ba laʼoʼö göi Goroisa Moze iraono Gizaraʼeli, fefu ira latema mbuania ba tefolakhömi döi Yehowa.​—3 Moz. 20:7, 8; Yes. 48:17, 18.

¹⁸ Famahaʼö: Ba dödö Yehowa moguna fefu nifaluada. Omasi ia na satulö nifaluada ba niha böʼö si fao faʼomasi. Ba inehegö hadia niwaʼöda hegöi nifaluada, he na bakha ba nomo so ita.​—Heb. 4:13.

19-21. (a) Hewisa zinangeania ira sondröniaʼö hegöi ira sanguhuku ba Gizaraʼeli ba wameʼe gangetula khö nono mbanua Lowalangi? (b) Hadia wolumöʼö nibeʼe Yehowa ba hadia wamahaʼönia?

¹⁹ Omasi Yehowa enaʼö lö tedönisi nono mbanuania ba soi si so ba zi fasuira si tola mamakiko yaʼira. Iʼandrö khö ndra sondröniaʼö hegöi ba zanguhuku ndraono Gizaraʼeli, enaʼö lö abua dambai ira ba wamalua Oroisa. Hizaʼi, tebai lafalua zi lö sökhi mazui ebua dödö zambuana ba ginötö lahalö gangetula. Moguna atulö wanguhukura si fao faʼomasi.​—5 Moz. 1:13-17; 16:18-20.

²⁰ Ihakhösi tödö nono mbanuania Yehowa, andrö wa ifazökhi Goroisa enaʼö lö alua zi lö atulö. Duma-dumania, no itatugöi Oroisa Moze wa tebai laböbögö khö zi samösa niha wa no ifalua zi lö sökhi. Duma-dumania, niha niböbögö tola iʼila haniha zamöbögö daʼö khönia. (5 Moz. 19:16-19; 25:1) Fatua lö laʼetuʼö wa fasala ia, si löʼö-löʼönia so darua niha zanutunö hadia zindruhunia zalua. (5 Moz. 17:6; 19:15) Hewisa na so ndraono Gizaraʼeli samalua si lö  sökhi, hizaʼi ha samösa niha sangila? Böi so ba dödönia wangumaʼö wa lö lahuku ia ba zala nifaluania. Iʼila Yehowa hadia zi no ifalua. Ba zi sambua omo, iʼokhögö kuaso si samösa ama, hizaʼi so nola-ola kuasonia andrö. Duma-dumania, so ösa gabula dödö ba zi sambua omo sinangea laʼila ira sondröniaʼö ba mbanua, ba ira sondröniaʼö andrö zangai angetula safuria.​—5 Moz. 21:18-21.

²¹ Famahaʼö: No ibeʼe khöda Yehowa duma-duma soʼahonoʼa. Lö tebulö ifalua zatulö. (Zin. 9:8) Ifahowuʼö niha soloʼö goi-goinia ba ihuku niha sangogunaʼö kuasora ba zi lö tefaudu. (2 Zam. 22:21-23; Hez. 9:9, 10) So ösa niha samalua si lö sökhi, na mufaigi ia hulö no aefa moroi ba wanguhuku. Hizaʼi ihuku ira Yehowa ba ginötö si no itatugöi. (Gamd. 28:13) Na lö lafalalini gera-erara, tola laʼila hewisa ’waʼataʼura na aekhu ira ba danga Lowalangi sauri’.​—Heb. 10:30, 31.

22-24. (a) Haniha zabölö tohude nilumöʼö Goroisa, ba hadia wamahaʼö niʼilada sanandrösa khö Yehowa? (b) Hadia wamangelama nitutunö ba 2 Moze 22:22-24?

²² Iraono si lö satua, lakha mbanua, hegöi niha si fatewu daʼö zabölö tohude nilumöʼö Goroisa. Lafatunö ba zanguhuku iraono Gizaraʼeli, ”Böi fuyuʼö huku, na so huhuo niha böʼö ba ma na huhuo zi lö ama, si lö ina; ba böi halö gade mbaru lakha  mbanua.” (5 Moz. 24:17) Iʼomasiʼö Yehowa ba iʼameʼegö tödö fefu niha si lö faʼabölö ba mbanua. Ba ihuku fefu niha samalua khöra si lö sökhi.​—Baso 2 Moze 22:22-24.

²³ Ilumöʼö göi nösi nomo andrö Oroisa moroi ba gamuata fohorö yaʼia daʼö famalua faʼorudu ba nösi nomonia samösa. (3 Moz. 18:6-30) Soi ba zi fasui ndraono Gizaraʼeli lafalua gamuata daʼö mazui latehegö alua zimane daʼö. Hizaʼi ono mbanua Yehowa laʼoʼö lala wangera-ngera Yehowa. Ba wamaigira, daʼö no sambua amuata sogoro.

²⁴ Famahaʼö: Omasi Yehowa enaʼö niha si no ibeʼe kuaso laforomaʼö waʼomasi ba laʼameʼegö tödö fefu niha si so barö wamatöröra. Fatuwu khönia gamuata wohorö. Ba no itatugöi wa fefu niha hasambalö latema wolumöʼö ba faʼatulö, mendrua manö yaʼira si lö faʼabölö.

25-26. (a) Hana wa tola muʼamaedolagö waʼomasi ba faʼatulö simane hanu-hanu hegöi noso? (b) Hadia wamahaʼö nifatunöda ba zi so föna?

²⁵ Faʼomasi ba faʼatulö no amaedola hanu-hanu hegöi noso. Tebai mufabali zi dombua ngawalö andre. Na faduhu dödöda wa ifalua khöda Yehowa zatulö, hasambalö itugu taʼomasiʼö ia. Na taʼomasiʼö Lowalangi hegöi goi-goinia satulö, hasambalö terou dödöda ba wangomasiʼö awöda ba tafalua khöra zatulö.

²⁶ Itolo ndraono Gizaraʼeli Oroisa enaʼö itugu ahatö ira khö Yehowa. Hizaʼi me no tohare Yesu, lö saʼae laʼogunaʼö irege lö lafaso nono mbanua Lowalangi ba wamalua yaʼia. No lagati Goroisa andrö ba zabölö sökhi. (Rom. 10:4) Iwaʼö sinenge sotöi Faulo wa Oroisa andrö, ”ha lumö-lumö si sökhi si lö aratö tohare”. (Heb. 10:1) Ba wamahaʼö fönada, tatutunö ösa hana wa moguna waʼomasi ba faʼatulö ba mbanua niha Keriso.