1-2. (a) Hadia nitutunö Zura Niʼamoniʼö sanandrösa khö Moze, ba hadia nifaluania? (b) Hadia dane-dane saro niʼokhögöda ba wondrouʼö fangide-ngideʼö?

ITUTUNÖ Sura Niʼamoniʼö wa Moze andrö niha ”fondrege zi so fangide-ngideʼö moroi ba niha böʼö fefu ba gulidanö”. (4 Moz. 12:3, Terjemahan Dunia Baru [NW]) Hadia daʼö geluahania wa Moze andrö niha sambö faʼabölö, ataʼu ba wangai angetula, ba alio awuwu na latandraigö ia niha böʼö? Te daʼö zi so ba wangera-ngera niha ösa sanandrösa ba niha sangokhögö fangide-ngideʼö. Hizaʼi lö atulö daʼö. Moze andrö enoni sabölö khö Lowalangi, lö ataʼu ia ba wangai angetula ba so khönia waʼabarani. Börö wanolo Yehowa, tola iʼondrasi niha sebua kuaso ba Miserai, idöniaʼö mato 3.000.000 niha waʼato ba wanöröi tanö si mate, ba itolo ndraono Gizaraʼeli ba wokalaisi udura.

² Lö salua khöda wanandraigö simane nitaögö Moze. Hizaʼi, so manö zanaisi yaʼita ero maʼökhö ba wangoromaʼö fangide-ngideʼö, he moroi ba niha mazui na so zalua khöda. Hewaʼae simanö, so khöda dane-dane saro ba wondrouʼö bua-bua daʼa. Ifabuʼu Yehowa wa niha si so ”fangide-ngideʼö andrö zokhö tanö dania”. (Zin. 37:11, NW) Na dali wamaigimö samösa, hadia so khöu wangide-ngideʼö? Hadia simane daʼö göi moloʼö niha böʼö? Fatua lö taʼalui wanema linia, moguna taʼila hadia geluahania wangide-ngideʼö.

3-4. (a) Hadia zi tola muʼamaedolagö ba gamuata fangide-ngideʼö? (b) Hadia gamuata sinangea taʼokhögö ba wangoromaʼö fangide-ngideʼö, ba hadia mbörö?

³ Fangide-ngideʼö * muʼamaedolagö ia simane gambara si sökhi.  Hadia geluahania? Simane niha sogambaraini, so mato hauga ngawalö laʼa-laʼa sadöni dödö wamaigi si tola iʼogunaʼö ba wamazökhi gambara. Simane daʼö göi ita, so mato hauga ngawalö mbua-bua si sökhi si tola taʼokhögö ba wangoromaʼö fangide-ngideʼö. Bua-bua andrö yaʼia daʼö foloʼö, falöʼalio mofönu, ba faʼabarani. Hana wa moguna taʼokhögö mbua-bua daʼö na omasi ita taʼomusoiʼö dödö Yehowa?

⁴ Niha sangokhögö fangide-ngideʼö, ha daʼö zi tola moloʼö ohitö dödö Lowalangi. Sambua moroi ba gohitö dödö Lowalangi yaʼia daʼö enaʼö lö alio mofönu ita. (Mat. 5:5; Gal. 5:23) Na tafalua gohitö dödö Lowalangi, mofönu sibai Zatana. Andrö wa ato niha ba gulidanö nifatörö Zatana andre zi fatiu tödö khöda, hewaʼae no taforomaʼö wangide-ngideʼö. (Yoh. 15:18, 19) Börö daʼö, moguna khöda waʼabarani ba wolawa Satana.

5-6. (a) Hana wa fatiu dödö Zatana ba niha si so fangide-ngideʼö? (b) Hadia manö wanofu-nofu nitutunöda dania?

⁵ Asiliyawa niha si lö mangokhögö fangide-ngideʼö, tebai itaha wönunia, ba lö iʼoʼö niwaʼö Yehowa. Daʼö zi tefaudu sibai ba woʼamaedolagö Satana. Andrö wa lö ahöli dödöda na fatuwu ia ba niha si so fangide-ngideʼö! Laforomaʼö wa lö sökhi Zatana andrö börö me laʼokhögö gamuata si sökhi si lö iʼokhögö Satana. Hizaʼi, tenga ha daʼö. Laforomaʼö göi wa falimo Zatana. Hadia mbörö? Gofu hadia ia niwaʼö mazui nifaluania, tebai itaha niha si so fangide-ngideʼö ba wamosumange Yehowa!​—Yob. 2:3-5.

⁶ Ba ginötö hadia abua khöda ba wangoromaʼö fangide-ngideʼö? Ba hana wa moguna tadouʼö mbua-bua daʼa? Enaʼö taʼila wanema linia, datatutunö duma-duma Moze, iraono matua Heberaiʼo si datölu niʼoloiʼö ba Mbabilona hegöi khö Yesu.

7-8. Hadia nifalua Moze me laʼosiwawöi ia niha böʼö?

⁷ Na no tebeʼe khöda kuaso: Abua ba niha si no tebeʼe kuaso ba wangoromaʼö fangide-ngideʼö, mendrua manö na laʼosiwawöi ia niha nifatörönia mazui lö lafaduhusi tödö gangetula nihalönia. Hadia no irai alua khöu zimanö? Hewisa na ösi nomou zamalua daʼö? Hadia nifaluamö? Angeragö atö hadia nifalua Moze me alua khönia daʼö.

 ⁸ Yehowa zamataro Moze ba wondröniaʼö iraono Gizaraʼeli ba ibeʼe khönia halöwö si sökhi ba wanura oroisa ba soi daʼö. Faduhu dödöda wa itolo ia Yehowa. Hewaʼae simanö, latahigö ia ira gaʼania Miriya ba Aʼaroni, ba lawaʼö khönia wa tenga sinangea khönia woʼomonia. Na alua daʼö ba niha böʼö, tola manö mofönu ira ba lasulöni zi no lafalua khöra. Hizaʼi, tenga simane daʼö nifalua Moze. Lö alio abao dödönia. Iʼandrö naʼi khö Yehowa enaʼö lö ihuku Miriya. (4 Moz. 12:1-13) Hana wa ifalua daʼö Moze?

9-10. (a) Hadia waʼaboto ba dödö nibeʼe Yehowa khö Moze? (b) Hewisa ndra sondröniaʼö yomo ba nomo hegöi satua sokubaloi woloʼöra duma-duma Moze?

⁹ Itehegö Moze na ifahaʼö ia Yehowa. Mato 40 fakhe ba zilalö me tobali ia ösi nomo razo ba Miserai, lö khönia fangide-ngideʼö. Alio sibai mofönu ia irege ibunu samösa ndra matua samalua si lö atulö ba wamaiginia. Fayawa ia, iwalinga fao dödö Yehowa ba nifaluania. Sagötö zi 40 fakhe, itolo ia Yehowa enaʼö aboto ba dödönia wa tenga ha faʼabarani zoguna khönia na tobali ia sondröniaʼö iraono Gizaraʼeli. Moguna göi so khönia wangide-ngideʼö. Ba enaʼö so khönia wangide-ngideʼö, moguna so khönia woloʼö ba tebai alio mofönu. Omasi Moze wanemaʼö famahaʼö daʼö irege tobali ia sondröniaʼö fondrege zi sökhi.​—2 Moz. 2:11, 12; Hal. 7:21-30, 36.

¹⁰ Iadaʼa, moguna göi laʼoʼö duma-duma Moze andrö ira sondröniaʼö yomo ba nomo hegöi satua sokubaloi. Böi alio abao dödömö na so zangosiwawöi yaʼugö. Na no öfalua zala, ombakhaʼö zalau si fao fangide-ngideʼö. (Zango. 7:9, 20) Oʼö wanuturu lala moroi khö Yehowa sanandrösa ba wangasiwai abula dödö. Haogö-haogö wameʼe fanema li. (Gamd. 15:1) Omuso dödö Yehowa na simane daʼö nifalua ndra sondröniaʼö yomo ba nomo hegöi ba mbanua niha Keriso, larorogö waʼatulö, ba tobali ira duma-duma ba wangoromaʼö fangide-ngideʼö.

11-13. Hadia wamahaʼö si tola tahalö ba duma-duma ndraono matua Heberaiʼo si datölu?

¹¹ Na tefakao ita: Sagötö zalua ba zi hauga fakhe, no lafakao nono mbanua Yehowa ira samatörö. Te lafobahulu ita wamalua ngawalö ”zi lö sökhi”. Sindruhunia sa, mofönu ira khöda börö me ’taʼoʼö khö Lowalangi me yaʼia zamatörö’ moroi na taʼoʼö khöra. (Hal. 5:29) Tola manö laʼoʼaya ita, labeʼe ba gurunga, mazui laböbözi ita. Hizaʼi, börö wanolo moroi khö Yehowa, lö tasulöni khöra. Taforomaʼö wangide-ngideʼö hewaʼae tetandraigö ita.

¹² Angeragö duma-duma ndraono matua Heberaiʼo si datölu niʼoloiʼö ba Mbabilona, yaʼia daʼö Hanania, Mizaeli, ba Asaria. * Ifaretakö  ira razo Mbabilona enaʼö mangalulu ira föna nadu anaʼa sebua. Si fao fangide-ngideʼö, latutunö khö razo hana wa lö omasi ira lafosumange nadu andrö. Laʼoʼö khö Lowalangi hewaʼae ifetaʼu ira razo. Iwaʼö khöra wa hasambalö itiboʼö ira ba mbaho galitö si hola-hola. Hewaʼae simanö, iʼanemaiʼö iʼorifi ira Yehowa. Sindruhunia, lö latötöna ba wamobörö wa ifalua daʼö Yehowa. No lafaʼanö ira gofu hadia zalua nitehegö Yehowa. (Dan. 3:1, 8-28) Laforomaʼö wa sindruhu-ndruhu barani niha si so fangide-ngideʼö andrö. Lö hadöi samatörö, ametaʼuö, mazui hukuma sombatogö yaʼita ba wamosumange Yehowa börö me yaʼia andrö ”Lowalangi solohu”.​—2 Moz. 20:4, 5.

¹³ Ba ginötö tetandraigö waʼalöfaröida khö Lowalangi, hewisa woloʼöda duma-duma ndraono matua Heberaiʼo si datölu? Si fao fangide-ngideʼö, faduhu dödöda wa hasambalö irorogö ita Yehowa. (Zin. 118:6, 7) Na so zamobahulu yaʼita ba wamalua sala, tahaogö-haogö wameʼe khöra fanema li si fao famosumange. (1 Fet. 3:15) Tatu lö omasi ita tafalua gofu hadia ia zi tola mamakiko fahuwusada khö Namada sangomasiʼö yaʼita.

14-15. (a) Hadia zalua na abu dödöda? (b) Moloʼö Yesaya 53:7, 10, hana wa Yesu andrö duma-duma fondrege zebua ba wangoromaʼö fangide-ngideʼö hewaʼae abu dödönia?

¹⁴ Na abu dödöda: Oya mbörö wa abu dödöda, duma-dumania fatua lö mubörögö ujian ba zekola mazui fatua lö tafalua zi sambua halöwö. Tanö böʼönia, te öʼangeragö hadia dalu-dalu sinangea öʼogunaʼö mazui tes medis nifalua khöu. Na abu dödöda, abua khöda wangoromaʼö fangide-ngideʼö. Na ba zilalö, te lö salania na alua khöda hadia ia, iadaʼa tola manö ibörögö abao dödöda. Te lö sökhi wehededa awö nifaluada ba niha böʼö. Na no irai alua khöu zimanö, angeragö duma-duma Yesu.

¹⁵ Ba zi hauga waŵa fatua lö si mate Yesu ba gulidanö, abu sibai dödönia. Iʼila wa hasambalö göna ia hukuma faʼamate ba tefakao sibai dania waʼaurinia. (Yoh. 3:14, 15; Gal. 3:13) Hauga waŵa fatua lö si mate ia, iwaʼö wa lö ahono dödönia. (Luk. 12:50) Imane Yesu hauga hari fatua lö si mate ia, ”Abu dödögu.” Me itutunö nösi dödönia khö Lowalangi ba wangandrö, ba wehedenia andrö oroma wa so khönia wangide-ngideʼö ba moloʼö ia khö Lowalangi. Imane, ”He Ama, efaʼö ndraʼo ba waʼabu dödö andre. Hewaʼae simanö, tohare ndraʼo ba wanaögö faʼabu dödö. He Ama, folakhömi döimö.” (Yoh. 12:27, 28) Me no irugi inötö, lö ataʼu Yesu wolulu faʼaurinia ba danga niha si no tobali udu Lowalangi. Aefa daʼö, labeʼe khönia hukuma faʼamate, laʼoʼaya ia ba lö lahakhösi tödö. Hewaʼae abu dödönia ba tefakao ia, ifalua gohitö dödö Lowalangi si fao fangide-ngideʼö. Börö daʼö tola tamane, Yesu andrö duma-duma fondrege zebua ba wangoromaʼö fangide-ngideʼö hewaʼae abu dödönia!​—Baso Yesaya 53:7, 10.

16-17. (a) Hadia nifalua ndra si fahuwu khö Yesu irege tola manö abua khönia wangoromaʼö fangide-ngideʼö? (b) Hewisa woloʼöda duma-duma Yesu?

¹⁶ Ba mbongi fatua lö si mate Yesu ba gulidanö, so nifalua ndra si fahuwu khönia irege tola manö abua khönia wangoromaʼö fangide-ngideʼö. Angeragö hawaʼabu dödö Yesu ba zi bongi daʼö. Hadia lö faröi ia irugi waʼamate? Na faröi ia, lö hadöi dötönafö ba niha ba wanöndra faʼauri. (Rom. 5:18, 19) Sabölö moguna, so mbua moroi ba nifaluania andrö ba döi si sökhi niʼokhögö Namania. (Yob. 2:4) Baero daʼö, ba mbongi safuria me fao Yesu wemanga khö ndra si fahuwu khönia, yaʼia daʼö ira sinengenia, ibörögö ”lafadöni göi haniha zabölö ebua ba gotaluara”. No asese itegu ndra si fahuwu khönia andre sanandrösa ba daʼö, simanö göi ba zi bongi daʼö! Hewaʼae simanö,  lö abao dödö Yesu. Ihaogö wangumaʼö khöra si fao fangide-ngideʼö. Iʼabeʼeʼö wehedenia hizaʼi si fao faʼasökhi dödö, iforomaʼö ba itutunö khöra hadia gamuata sinangea laʼokhögö. Aefa daʼö, isuno ndra si fahuwu khönia andrö börö me lö faröi ira khönia.​—Luk. 22:24-28; Yoh. 13:1-5, 12-15.

¹⁷ Na alua khöu zimanö, hadia nifaluamö? Tola taʼoʼö duma-duma Yesu ba böi tebulö taforomaʼö wangide-ngideʼö hewaʼae abu dödöda. Taʼoʼö fareta Yehowa enaʼö ’böi tebulö khöda waʼebolo dödö zamösana’. (Kol. 3:13) Aoha khöda woloʼö fareta daʼa na itörö tödöda wa fefu ita, no irai tawaʼö ba tafalua hadia ia zi tobali börö waʼabao dödö niha böʼö. (Gamd. 12:18; Yak. 3:2, 5) Baero daʼö, odödögö wosuno niha böʼö ba gamuatara si sökhi.​—Ef. 4:29.

18. Hewisa wanolo Yehowa niha si so fangide-ngideʼö ba wangai angetula si sökhi, ba hadia zinangea lafalua?

¹⁸ Tola tahalö gangetula sabölö sökhi. Na abua khöda wangai angetula, itolo ita Yehowa ba wangai angetula si sökhi. Hizaʼi, awena ifalua daʼö na so khöda wangide-ngideʼö. No ifabuʼu wa ifondrondrongo ”wangandrö niha si so fangide-ngideʼö”. (Zin. 10:17, NW) Ba tenga ha asala ifondrondrongo gangandröwada. Imane Sura Niʼamoniʼö, ”Ba lala satulö iʼohe niha si so fangide-ngideʼö ba ifahaʼö ira ba lalania.” (Zin. 25:9, NW) Ibeʼe khöda wanuturu lala Yehowa ba Zura Niʼamoniʼö, publikasi, * video, hegöi angowuloa nifaʼanö ”zawuyu si lö faröi ba satua-tua”. (Mat. 24:45-47) Hizaʼi, moguna tatemaʼö wanolo nibeʼe Yehowa andrö. Lalania? Tafaduhuʼö si fao fangide-ngideʼö wa moguna khöda wanolo. Moguna göi tafahaʼö ita ba ngawalö wanuturu lala nihenaigö Yehowa khöda. Baero daʼö, dataʼoʼö ba tafalua zi no tafahaʼö yaʼita.

19-21. Hadia zala nifalua Moze ba Gadesi, ba hadia wamahaʼönia khöda?

¹⁹ Teʼaröuʼö ita ba wamalua sala. Fuli angeragö atö zalua khö Moze. Ba zi hauga wulu fakhe, so khönia wangide-ngideʼö ba iʼomusoiʼö dödö Yehowa. Hizaʼi, me no arakhagö 40 fakhe latöröi danö si mate iraono Gizaraʼeli, olifu Moze wangoromaʼö fangide-ngideʼö. Bohou mate gaʼania ono alawe si no irai mangorifi yaʼia mböröta ba Miserai, ba lakoʼo ia ba Gadesi. Ba ifuli zui mukökö-kökö ndraono Gizaraʼeli börö me hulö lö laʼameʼegö  tödö ira. Ba zi sakali daʼa, ”fasoso zato khö Moze” börö me lö hadöi idanö. Lö tebulö mukökö-kökö ira hewaʼae no oya dandra sahöli-höli dödö nifalua Moze börö wanolo moroi khö Yehowa, ba no ara tobali ia sondröniaʼö ba ndraono Gizaraʼeli si lö mangalui tana khönia. Tenga ha sanandrösa ba nidanö wa mukökö-kökö ira, hizaʼi sanandrösa khö Moze göi. Lamane tödöra, börö-börö Moze wa owökhi dödöra.​—4 Moz. 20:1-5, 9-11.

²⁰ Mofönu sibai Moze ba lö saʼae iforomaʼö wangide-ngideʼö. Hewaʼae iʼoʼou ia Yehowa enaʼö fahuhuo ia ba gara andrö, hizaʼi lö iʼoʼö daʼö Moze. Fahuhuo ia ba soi daʼö si fao fönu ba iwaʼö khöra wa ifalua dandra sahöli-höli dödö. Aefa daʼö, ibözi gara andrö dua kali, ba aduwa nidanö soya. Ifalua zala sebua börö wayawasa hegöi fönunia. (Zin. 106:32, 33) Ba zi lö arara, lö iforomaʼö wangide-ngideʼö. Börö daʼö, lö itehegö khönia Yehowa weʼamöi ba Danö Amabuʼula.​—4 Moz. 20:11, 12.

²¹ Moroi ba zalua andrö, oya wamahaʼö si sökhi si tola tahalö. Si oföna, moguna taʼodödögö wangoromaʼö fangide-ngideʼö. Na taböhöli wamalua daʼö, tola alio tumbu khöda wayawasa. Lua-luania, lö taʼangeragö sakali hadia niwaʼöda hegöi nifaluada. Si dua, na abu dödöda tola manö abua khöda wangoromaʼö fangide-ngideʼö. Andrö wa moguna taforege wamalua yaʼia hewaʼae so gabula dödöda.

22-23. (a) Hana wa böi taböhöli wangoromaʼö fangide-ngideʼö? (b) Hadia geluaha wehede si so ba Zefania 2:3?

²² Telumöʼö ita. Lö ara tö, ihori dania niha si lö sökhi Yehowa ba gulidanö. Hatö niha si so fangide-ngideʼö zi toröi ba gulidanö. Sindruhu-ndruhu teʼasogö waʼohahau dödö dania ba gulidanö. (Zin. 37:10, 11, NW) Hadia farahu ndraʼugö dania ba gotalua niha si so fangide-ngideʼö andrö? Tola manö, asala öfalua niʼandrö Yehowa simane nisura Zefania samaʼeleʼö.​—Baso Zefania 2:3.

²³ Hana wa iwaʼö ba Zefania 2:3, ”Ma atö teʼorifi ami”? Tenga daʼö geluahania wa tebai ilumöʼö Yehowa niha somasi mangomusoiʼö tödönia hegöi niha niʼomasiʼönia. Sindruhunia, so zinangea tafalua enaʼö telumöʼö ita. Na so khöda wangide-ngideʼö iadaʼa ba taʼomusoiʼö dödö Yehowa, tebeʼe khöda ginötö enaʼö teʼefaʼö ita na ”baŵa wönu Yehowa” ba auri sagötö faʼara.