1. Hewisa zi samösa niha Samaria ba wangoromaʼönia fangandrö saohagölö?

SO DAFULU ndra matua si göna bou auri. Lö sökhi zalua khöra ba lö khöra dötönafö enaʼö tola döhö. Hizaʼi samuza inötö, laʼila moroi ba zaröu Yesu, Samahaʼö Sebua. No irai larongo wa tola ifadöhö Yesu ngawalö wökhö ba faduhu dödöra wa tola göi ifadöhö ira. Andrö muʼao ira, ”He Yesu, he Samahaʼö, hakhösi tödö ndraʼaga!” Ba döhö ndra matua si dafulu andrö. Tatu laʼandrö sibai saohagölö ba dödöra börö waʼasökhi dödö niforomaʼö Yesu. Hizaʼi, samösa moroi ba gotaluara tenga ha iʼandrö manö saohagölö hizaʼi iforomaʼö wangandrönia saohagölö * khö Yesu. Me no döhö ia, terou dödönia ba ”wamolakhömi Lowalangi”.​—Luk. 17:12-19.

2-3. (a) Hana wa itaria lö taforomaʼö wangandrö saohagölö? (b) Hadia nitutunöda ba wamahaʼö daʼa?

² Simane niha Zamaria, omasi göi ita wangoromaʼö fangandrö saohagölö ba niha sangoromaʼö khöda faʼahakhö dödö. Hizaʼi, itaria börö me oya halöwöda olifu ita ba wangoromaʼö fangandrö saohagölö moroi ba wehededa hegöi ba nifaluada.

³ Ba wamahaʼö daʼa, tatutunö hadia mbörö wa moguna sibai taforomaʼö wangandrö saohagölö moroi ba wehededa hegöi ba nifaluada. Tafahaʼö ita dania moroi ba duma-duma niha si so ba Zura Niʼamoniʼö sangoromaʼö fangandrö saohagölö hegöi niha si lö mangandrö saohagölö. Ba tatutunö göi hewisa lalada ba wangoromaʼö fangandrö saohagölö.

4-5. Hana wa moguna taforomaʼö wangandrö saohagölö?

⁴ No ibeʼe khöda Yehowa duma-duma ba wangoromaʼö fangandrö saohagölö. Sambua lalania ba wangoromaʼö yaʼia daʼö ifahowuʼö niha sangomusoiʼö tödönia. (2 Zam. 22:21; Zin. 13:6; Mat. 10:40, 41) Ba ifarou ita Sura Niʼamoniʼö enaʼö ’taʼoʼö khö Lowalangi simane iraono omasiö’. (Ef. 5:1) Daʼö mbörö wa omasi ita wangoromaʼö fangandrö saohagölö börö me omasi taʼoʼö duma-duma Yehowa.

⁵ Nehegö nasa hadia mbörö wa moguna taʼandrö saohagölö ba niha böʼö. Ba ginötö laʼandrö saohagölö khöda niha, tatu tarasoi waʼomuso dödö. Na taforomaʼö göi wangandrö saohagölö khöra, no tabeʼe omuso dödöra. Ba ginötö taʼandrö saohagölö ba niha sanolo yaʼita mazui no ibeʼe hadia zinangea taʼogunaʼö, tola iʼila wa tenga zaya-zaya gölö zi no ifalua khöda. Buania, itugu aro wahuwusada khönia.

6. Hadia waʼafagölö ba wangoromaʼö fangandrö saohagölö faoma apel nifazökhi moroi ba ganaʼa?

⁶ Ebua sibai mbölinia na taforomaʼö wangandrö saohagölö. Imane Sura Niʼamoniʼö, ”Simane bua apel anaʼa ba wiga firö, simanö göi wehede niwaʼö ba ginötö si tefaudu.” (Gamd. 25:11, Terjemahan Dunia Baru [NW]) Khalaigö hewisa waʼabaga-baga bua apel nifazökhi moroi ba ganaʼa nibeʼe ba wiga firö! Ba angeragö wa ebua mbölinia andrö! Hewisa dödöu na ötema mbuala simane daʼö? Simane daʼö göi waʼebua mböli wangandrö saohagölö. Angeragö daʼa: Bua apel nifazökhi moroi ba ganaʼa lö alio tekiko. Simanö göi, na taforomaʼö wangandrö saohagölö ba niha, tola manö lö olifu ia sandrohu faʼaurinia ba ebua sibai mböli daʼö ba dödönia.

7. Hewisa Dawido hegöi ira sanura zinunö ba wangoromaʼöra fangandrö saohagölö?

⁷ Ato nono mbanua Lowalangi me föna sangoromaʼö fangandrö saohagölö. Samösa moroi ba gotaluara yaʼia daʼö Dawido. (Baso Zinunö 26:6-8.) Iʼandrö sibai saohagölö ba wamosumange sindruhu ba oromaʼö daʼö ba nifaluania. Oya gama-gama sebua böli nibeʼenia ba wamasindro osali. Lasura zinunö mazui fanuno ira ngaʼötö Gasafo ba wangoromaʼö fangandrö saohagölö. Sambua moroi ba gotalua zinunöra, laʼandrö sibai saohagölö khö Yehowa börö me ’ahöli-höli dödöra ba nifaluania’. (Zin. 75:2) Omasi Dawido hegöi ngaʼötö Gasafo ba wangoromaʼö fangandrö saohagölö khö Yehowa börö howu-howu nitemara. Hadia tola öʼangeragö hewisa lalau ba woloʼö sanura zinunö andrö?

8-9. Hewisa zinenge sotöi Faulo wangoromaʼönia fangandrö saohagölö khö ndra talifusönia, ba hadia mbuania?

⁸ Iʼandrö saohagölö sinenge sotöi Faulo khö ndra talifusönia, ba oroma daʼö ba ginötö fahuhuo ia sanandrösa khöra. Ba ginötö mangandrö ba zi ha samösa ia, iʼandrö saohagölö khö Yehowa börö me iʼokhögö ndra talifusö simane daʼö. Ba iʼoromaʼö göi wangandrönia saohagölö ba ginötö ibeʼe zurania khöra. Ba Roma faza 16 ayati 1 irugi 15, itötöi Faulo 27 döi ndra talifusö si sara lala wamati khönia. Itötöi göi Ferekila ba Akila, ”sanehegö nosora” khönia. Itötöi Faulo nasa Foʼibe si ’no manolo ndra talifusö tanö böʼö’ hegöi yaʼia. Iʼomasiʼö ndra talifusönia ba isuno ira börö halöwö nifaluara.​—Rom. 16:1-15.

⁹ Aboto ba dödö Waulo wa lö moʼahonoa ndra talifusönia. Hizaʼi, ba gafuriata nösi zurania khö ndra talifusö ba Roma, iʼosambuaʼö dödönia ba zi sökhi si no lafalua. Khalaigö hewisa waʼaterou dödö ndra talifusö me larongo nösi zura Waulo ba ginötö labaso ba mbanua niha Keriso! Buania, itugu aro wahuwusara khö Waulo. Hadia lö tebulö ndraʼugö ba wangoromaʼö fangandrö saohagölö ba ngawalö zi sökhi nifalua hegöi niwaʼö ndra talifusö ba mbanua niha Keriso ba zi farahu ndraʼugö?

10. Hadia wamahaʼö si tola tahalö moroi khö Yesu ba wangoromaʼö fangandrö saohagölö ba zoloʼö khönia?

¹⁰ Iforomaʼö göi Yesu wangandrö saohagölö ba zi no lafalua ira soloʼö khönia, oroma daʼö me ifaʼema goroisania ba zi hauga mbanua niha Keriso si so ba Asia Kecil. Duma-dumania, ibörögö ifaʼema goroisania ba mbanua niha Keriso Tiatira, ”Uʼila hadia nifaluamö, faʼomasiu, famati, fangai halöwö khö Lowalangi, ba faʼanau gölöu. Uʼila göi nifaluamö ba gafuriata andre töra moroi ba nifaluamö me mböröta.” (Fam. 2:19) Tenga ha faʼatedou halöwöra manö nitötöi Yesu, hizaʼi isuno göi ira börö mbua-bua si sökhi niʼokhögöra samarou yaʼira wamalua si sökhi. Hewaʼae moguna muʼamenesi ösa niha ba Tiatira, ba wamobörö hegöi ba gafuriata goroisania lö tebulö Yesu ba wameʼe fehede si möi famarou dödöra. (Fam. 2:25-28) Angeragö kuaso niʼokhögö Yesu si tobali sondröniaʼö ba mbanua niha Keriso maʼafefu. Sindruhunia lö moguna iʼandrö saohagölö ba zi no tafalua khönia. Hewaʼae simanö, omasi ia ba wangoromaʼö fangandrö saohagölö. Daʼö no sambua duma-duma si sökhi khö ndra satua sokubaloi!

11. Hewisa wamaigi Gezau ngawalö niʼamoniʼö?

¹¹ So göi ösa duma-duma ba Zura Niʼamoniʼö si lö mangoromaʼö fangandrö saohagölö. Duma-dumania, lö hadöi khö Gezau wangandrö saohagölö ba ngawalö niʼamoniʼö,  hewaʼae teʼebuaʼö ia ba iʼokhögö zatua sangomasiʼö ba samosumange Yehowa. (Baso Heberaiʼo 12:16.) Hezo orama wa lö khönia fangandrö saohagölö ba ngawalö niʼamoniʼö? Iʼanemaiʼö ifamawa waʼasiaʼania khö nakhinia Yakobo ha börö bubu harita. (1 Moz. 25:30-34) Ba gafuriata maniasa Gezau ba gangetulania. Hizaʼi, sindruhunia lö moguna mukökö-kökö ia me lö itema howu-howu sinangea itema ba nono siaʼa börö me lö khönia fangandrö saohagölö.

12-13. Hezo oroma wa lö hadöi ba ndraono Gizaraʼeli fangandrö saohagölö, ba hadia lua-luania?

¹² Oya zi tobali dane-dane khö ndraono Gizaraʼeli ba wangoromaʼö fangandrö saohagölö. Teʼefaʼö ira moroi ba wangosawuyu me ibeʼe Yehowa Fulu Wamakao ba Miserai. Aefa daʼö, ilumöʼö ira Lowalangi me ihori fefu zaradadu Miserai ba Nasi Soyo. Börö me laʼandrö sibai saohagölö khö Yehowa, lalau manunö iraono Gizaraʼeli ba wanuno Yehowa. Hizaʼi, hadia lö tebulö ira ba wangandrö saohagölö?

¹³ Me alua wanandraigö tanö böʼö ba ndraono Gizaraʼeli, iʼanemaiʼö olifu ira fefu zi sökhi si no ifalua khöra Yehowa. Lafalua zi lö mangoromaʼö fangandrö saohagölö. (Zin. 106:7) Hadia nifaluara? ”Ba kumökökökö ndraono Gizaraʼeli fefu khö ndra Moze Aʼaroni” ba sindruhunia khö Yehowa molawa ira. (2 Moz. 16:2, 8) Afatö dödö Yehowa börö me lö khöra fangandrö saohagölö. Ba gafuriata, ifaʼeleʼö khöra Yehowa wa fefu ngaʼötö ndraono Gizaraʼeli hasambalö mate ba danö si mate, ha Yosua ba Kalebi zanöndra faʼauri. (4 Moz. 14:22-24; 26:65) Datafaigi hewisa lalania enaʼö lö taʼoʼö duma-duma si lö baga ba taʼoʼö duma-duma si sökhi.

14-15. (a) Hewisa woʼomo ira matua hegöi foʼomo ira alawe wangoromaʼö wa faoma laʼandrö saohagölö khö nawöra? (b) Hewisa zatua wamahaʼö iraonora ba wangoromaʼö fangandrö saohagölö?

¹⁴ Ba nomo. Fefu nösi nomo latema mbua na faoma laforomaʼö wangandrö saohagölö ba zi sambua omo. Na faoma laforomaʼö wangandrö saohagölö ba gotalua woʼomo ira matua hegöi foʼomo ira alawe, tola itugu ahatö ira. Ba itugu aoha khöra ba wangefaʼö zala woʼomora. Na so wangandrö saohagölö khö woʼomo ira matua, tenga ha ifaigi-faigi manö zi sökhi nifalua hegöi niwaʼö woʼomonia, hizaʼi ilau ”mosindro ba isuno”. (Gamd. 31:10, 28, NW) Ba foʼomo ira alawe satua-tua, ifatunö hadia manö niʼandrönia saohagölö moroi khö woʼomonia ira matua.

 ¹⁵ Hewisa zatua wamahaʼö iraonora ba wangoromaʼö fangandrö saohagölö? Böi olifuʼö wa lagoʼö-goʼö iraonou hadia niwaʼöu hegöi nifaluau. Tobali moguna öbeʼe duma-duma si sökhi, simane na öʼandrö saohagölö khöra ba ginötö lafalua zi sökhi. Aefa daʼö, fahaʼö ira ba wangandrö saohagölö ba niha sanolo yaʼira. Tolo ndraonou enaʼö aboto ba dödöra wa moguna soroi ba dödö na lawaʼö saohagölö börö me ebua sibai lua-lua wehedera andrö. Duma-dumania, imane samösa ira alawe sawuyu-wuyu sotöi Clary, ”Me 32 fakhe ndröfi mamagu, ha yaʼia zangebuaʼö iraononia si datölu. Ba ginötö 32 fakhe ndröfigu, uʼangeragö hadia zi no alua khö mamagu. Tatu abua sibai khönia me luo daʼö. Börö daʼö, ufatunö khönia wa uʼandrö sibai saohagölö hadia zi no ifalua khöma sagötö ba wangebuaʼö yaʼaga, yaʼo hegöi talifusögu ira matua si darua. Barö-barö daʼa, ifatunö mamagu khögu wa toröi-röi sibai ba dödönia wehedegu ba asese iʼera-era daʼö.”

16. Beʼe duma-duma zangoromaʼö fangandrö saohagölö irege tola teʼaroʼö zi samösa niha.

¹⁶ Ba mbanua niha Keriso. Ba ginötö taforomaʼö wangandrö saohagölö khö ndra talifusöda, möi famarou dödöra daʼö. Duma-dumania, samösa zatua sokubaloi si 28 fakhe sotöi Jorge, abölö-bölö wökhönia. Ba zi sara waŵa tebai möi ia ba gangowuloa. Ba gafuriata, hewaʼae no tola möi ia hizaʼi tebai ifaʼema halöwönia ba gangowuloa. Imane Jorge, ”So ba dödögu wa lö hadöi saʼae moguna ndraʼodo börö wökhögu ba börö me tebai saʼae ufalua noro dödögu ba gangowuloa. Hizaʼi samuza inötö me no aefa gangowuloa, imane khögu samösa talifusöda ira matua, ’Uʼandrö saohagölö khöu börö me no tobali ndraʼugö duma-duma ba nösi nomoma. Omuso dödöma ba wamondrondrongo huhuo sebua nifaʼemamö ba zi hauga fakhe silalö. Tobali fanolo daʼö khöma enaʼö tedou ba wamati.’ Tofakha sibai ba dödögu irege ibörögö meʼe ndraʼo. Teʼaroʼö ndraʼo ba wehedenia andrö.”

17. Moloʼö Kolose 3:15, hewisa wangoromaʼöda wa taʼandrö saohagölö khö Yehowa börö waʼoböwönia?

¹⁷ Khö Lowalangida soböwö. Fahöna gö ba wamati nibeʼe Yehowa khöda. Duma-dumania, tatema wanuturu lala soguna khöda moroi ba gangowuloa, majalah, hegöi ba situs Web khöda. Hadia no irai örongo sambua huhuo sebua, öbaso sambua artikel, mazui öfaigi JW Broadcasting, ba ömane tödöu, ’Tefaudu sibai daʼa ba zalua khögu’? Hewisa wangoromaʼöda wa taʼandrö saohagölö khö Yehowa? (Baso Kolose 3:15.) Sambua  lalania yaʼia daʼö ba ginötö mangandrö ita, taʼandrö saohagölö khönia börö mbuala si sökhi nibeʼenia khöda.​—Yak. 1:17.

18. Hewisa lalada ba wangoromaʼö fangandrö saohagölö me no taʼokhögö Balai Mbanua Lowalangi?

¹⁸ No taʼandrö göi saohagölö khö Yehowa na tarorogö nahia gangowuloada enaʼö lö taʼunö ba toföfö. Lö tebulö ita ba wangehao hegöi ba wondrorogö yaʼia. Aefa daʼö, moguna mangelama niha sangogunaʼö fakake tata suara hegöi video enaʼö böi tekiko. Na tahaogö tarorogö Balai Mbanua Lowalangi, lö alio tekiko ba lö oya nihaogö. Börö daʼö, tola oya gefe niʼokhögöda ba wamasindro hegöi ba wangehaogö Balai Mbanua Lowalangi ba zi sagörö ulidanö.

19. Hadia wamahaʼö si tola öhalö moroi ba zalua khö zi samösa zatua samasui hegöi foʼomonia?

¹⁹ Khö ndra talifusöda si no mangodödögö ba wamalua halöwö soguna khöda. Ba ginötö tawaʼö khö zi samösa niha wa taʼandrö saohagölö khönia, tola manö fehededa möi fombulöʼö lala wangera-ngerania ba ginötö itaögö wanandraigö. Duma-dumania ba zalua khö zi samösa satua samasui hegöi foʼomonia. Me maʼö-maʼökhö manuriaigö ira ba mbaŵa sokafu, marase sibai ira me larugi nahiara. Börö me okafu sibai, ifake jeket saweʼe-weʼe foʼomo zatua samasui andrö me mörö ia. Mahemolunia, iwaʼö khö woʼomonia wa lö sagu khönia wamalua halöwö famasui. Ba gafuriata me sihulö wonginia, latema zura moroi ba gödo ndraha. Ba zura daʼö, lasuno ia börö halöwö nifaluania khö Yehowa hegöi faʼanau gölönia. Itutunö göi ba nösi zura andrö wa tenga saoha na ero migu findra. Imane woʼomo ira matua, ”Tofakha sibai ba dödö woʼomogu nösi zura andrö irege iʼotarai daʼö lö irai iʼandrö wombato halöwö famasui. Ba ginötö so ba dödögu wamöhöli halöwö daʼa, yaʼia zamarou yaʼo enaʼö böi ubato.” Arakhagö 40 fakhe ira ba wangai halöwö famasui.

20. Ero maʼökhö, hadia zinangea taʼodödögö ba hadia mbörö?

²⁰ Ero maʼökhö dataʼodödögö ba wangoromaʼö fangandrö saohagölö moroi ba wehededa hegöi nifaluada. Fehede hegöi nifaluada soroi ba dödö tola manö tobali fanolo ba niha böʼö ba wanaögö ulidanö si lö mangandrö saohagölö, ba tola anau gölö wahuwusada na taforomaʼö wangandrö saohagölö. Sabölö moguna taʼoʼö Yehowa, Amada soböwö ba sangoromaʼö fangandrö saohagölö.