Tebayagö idanö bapagu sotöi John Mills me döfi 1913 ba New York City, me luo daʼö 25 fakhe ndröfinia. Talifusöda Russell zamaʼema huhuo fombayagö idanö. Lö ara aefa daʼö, möi bapagu ba Trinidad. Ba daʼö mangowalu ia khö zi samösa nono Zekola Zura Niʼamoniʼö sotöi Constance Farmer. Omasi bapagu ba wanolo nawönia sotöi William R. Brown ba wangoromaʼö ”Drama Foto Penciptaan”. Lö tebulö ira wefao ba wamalua daʼö, irege latema halöwö nösi nomo Brown weʼamöi ba Afrika Barat me döfi 1923. Bapa hegöi mamagu toröi ira ba Trinidad. Yaʼira si darua laʼokhögö wanötöna auri ba zorugo.

Dasiwa ndraʼaga zi fatalifusö, ono siaʼa labeʼe döinia Rutherford simane töi presiden Lembaga Alkitab dan Risalah Menara Pengawal me luo daʼö. Tumbu ndraʼo me 30 mbaŵa si Felendrua 1922 ba labeʼe döigu Clayton J. Woodworth simane töi editor The Golden Age (iadaʼa Sadarlah!). Labeʼe ndraʼaga fefu ba zekola, hizaʼi abölö lafarou ndraʼaga ba wangokhögö ohitö dödö ba wamati. Onekhe mamagu ba wamahaʼö hegöi ba wameʼe faduhu dödö niha ba niwaʼö Zura Niʼamoniʼö. Asese idunö-dunö bapagu sanandrösa ba niha si so ba Zura Niʼamoniʼö ba asese ifadumaisi daʼö, enaʼö itugu tofakha ba dödöma.

Latema mbua ba zi no lafalua. Dalima khöra nono matua, hizaʼi datölu zi fao ba Sekolah Gilead. Datölu nakhima ira alawe si merintis ba zi hauga fakhe ba Trinidad hegöi Tobago. Börö wamahaʼö hegöi duma-duma zatuama, latanögö ba dödöma ”nomo Yehowa”. Lafarou ndraʼaga enaʼö lö tebulö so ndraʼaga ba daʼö hegöi ”mobowo ba golayama Lowalangida andrö”.​—Zin. 92:14.

Ba nomoma lafalua waʼowulo feʼamöi manuriaigö. Asese owulo ndra perintis ba daʼa, ba ladunö-dunö sanandrösa khö dalifusöda George Young samösa utusan injil moroi ba Kanada si no irai möi ba Trinidad. Ladunö-dunö göi khöma ira satuama sanandrösa ba nawöra wanuriaigö  me föna yaʼia daʼö ösi nomo Brown, me luo daʼö no so ira ba Afrika Barat. Fefu daʼö tobali famarou dödögu ba wamörögö weʼamöi manuriaigö me fulu fakhe ndröfigu.

Me luo daʼö majalahda lö ibiniʼö ba wanutunö si lö sökhi si so ba agama sofaya, fogale ba wangalui fakhögusa hegöi politik si lö sökhi. Lua-luania me döfi 1936, ira sondröniaʼö ba gosali lafarou gubernur ba Trinidad enaʼö lö latehegö fefu publikasi Menara Pengawal. Mabiniʼö publikasima, hizaʼi lö tebulö maʼogunaʼö ia irugi ahori zi no so. Maʼogunaʼö plakat ba ginötö manuriaigö ba mafaʼoli ndraʼaga hegöi matörö gureta ba wameʼe ba niha selebaran. Fao ndraʼo göi khö ndra talifusöda si so ba mbanua Tunapuna. Uʼogunaʼö wangebua li weʼamöi manuriaigö irugi ba mbanua side-ide ba Trinidad. Na faʼomuso dödö daʼö! Fefu halöwö ba wamati nifaluagu zamarou yaʼo enaʼö tebayagö idanö me 16 fakhe ndröfigu.

Ondröita ba wamati moroi ba nösi nomoma hegöi si no ututunö moroi yawa zi möi famarou dödögu irege omasido tobali utusan injil. Lö si tebulö waʼomasigu daʼö hewaʼae no möido ba Aruba me döfi 1944, ba falulu fohalöwö ndraʼo khö dalifusöda Edmund W. Cummings. Omuso dödöma me tola maʼowuloi dafulu niha fao ba Wanörö Tödö me döfi 1945. Döfi aefa daʼö tefasindro mbanua niha Keriso siföföna ba mbanua andrö.

Lö ara aefa daʼö, ubeʼe kesaksian tidak resmi khö nawögu wohalöwö sotöi Oris Williams. Fatandro sibai Oris ba wangoʼawögö famahaʼö si no itema ba zilalö. Hizaʼi me no ifahaʼö ia ba Zura Niʼamoniʼö aboto ba dödönia hadia zindruhunia niwaʼö Daromali Lowalangi ba tebayagö ia idanö me 5 mbaŵa si Sara 1947. Ba gafuriata, faoma omasi ndraʼaga khö nawöma ba mangowaluga. Ibörögö ilau merintis, me baŵa si Felezara 1950. Sagötö wefaogu khö Oris, oya nirasoigu ba waʼauri.

Me döfi 1955, lakaoni ndraʼaga weʼamöi ba Sekola Gilead ba no töi sebua daʼa khöma. Ba wamaʼanöma ndraʼaga, mahetaga ba halöwöma, mafamawa nomoma hegöi gama-gama niʼokhögöma, ba maröi mbanua Aruba. Me 29 mbaŵa si Fitu 1956, lulus ndraʼaga moroi ba Sekolah Gilead kelas si-27 ba lafataro ndraʼaga ba Nigeria.

Itörö tödö Oris, ”Eheha Yehowa zanolo si samösa niha ba wofaudugö lala waʼaurinia ba zalua sagötö me tobali utusan injil. Tenga simane foʼomogu, lö irai omasido tobali utusan injil. Abölö omasido na so khögu ndraono ba uʼebua-buaʼö ira. Hizaʼi, me aboto ba dödögu wa mangaösö ba wamaʼema turia somuso dödö, ubulöʼö lala wangera-ngeragu. Me lulus ndraʼaga moroi ba kelas Gilead, sindruhu-ndruhu no tefaʼanö ndraʼo ba weʼamöi manuriaigö tobali utusan injil. Me möiga ba göfa nasi Queen Mary, tohare dalifusöda Worth Thornton, si falulu fohalöwö khö dalifusöda Knorr, iwaʼö khöma enaʼö madaʼi-daʼi ba lala. Ifatunö khöma wa lafataro ndraʼaga ba Mbetieli. Me urongo daʼö, aombö sibai dödögu. Hizaʼi, alio ufaudugö lala waʼaurigu ba ibörögö omasido wangiagö Mbetieli. Ba daʼö utema ngawalö halöwö. Sabölö omasido me mohalöwödo tobali resepsionis. Omasido sibai falukha ba niha, ba halöwö daʼa zi tola mamalukhaisi ndraʼo khö ndra talifusöda sato ba Nigeria. Ato zi tohare si no afönu gawu-gawu, erege dödö, owökhi dödö ba olofo. Omuso sibai dödögu me tola uʼasogö göra, irege so khöra waʼowua-wua dödö. Fefu daʼö no halöwö niʼamoniʼö khö Yehowa, ba daʼö göi zanolo yaʼo ba wangokhögö faʼahono dödö ba faʼomuso dödö.” Fefu halöwö nitemama zanolo yaʼaga enaʼö tedou ba wamati.

Me 1961, owulo nösi nomo ba Trinidad. Itutunö talifusöda Brown hadia zi no irai alua khönia safönu faʼomuso dödö ba Afrika. Ba ututunö göi sanandrösa ba waʼatedou ba Nigeria. Italagui ndraʼo dalifusöda Brown ba imane khö bapagu, ”He Johnny, lö irai örugi ba Afrika, hizaʼi na Woodworth noa!” Imane bapagu, ”Böi böhöli Worth! Böi böhöli!” Famarou dödö nibeʼera, si no mangai halöwö khö Yehowa ba zi hauga fakhe si fao faʼaterou dödö, daʼö zanolo yaʼo ba wangaroʼö gangetulagu enaʼö afönu ndraʼo wangai halöwö khö Yehowa.

Me döfi 1962, no töi sebua khögu ba wefao famomaha onönöta ba Gilead kelas si-37, faʼarania fulu waŵa. Me luo daʼö talifusöda Wilfred Gooch, yaʼia zi tobali satua ndraha ba Nigeria. Fao ia ba  kelas si-38 ba lafataro ia ba Inggris. Börö daʼö, yaʼo zosalahini yaʼia tobali satua ndraha ba Nigeria. Simane duma-duma dalifusöda Brown, asese mofanö-fanödo irege oya niʼilagu ndra talifusöda ba Nigeria ba uʼomasiʼö ira. Hewaʼae lö laʼokhögö gama-gama simane niʼokhögö soi sabölö maju, so khöra waʼomuso dödö ba faʼahono dödö. Daʼa zangoromaʼö wa faʼauri lö teʼodaligö ba gefe mazui gama-gama niʼokhögöda. Hewaʼae simane daʼö zalua, hizaʼi lö tebulö ira enaʼö lö taʼunö, mangehao ba molakhömi ero möi ira ba gangowuloa. Ahöli-höli dödögu wamaigi yaʼira. Me fao ira fefu ba wangondrasi kebaktian, ato zanörö moto farakha hegöi bolekajas * (moto sewa si so ba mbanua daʼö ba no teboka ngainia). Asese sibai ba moto daʼö so gamaedola sadöni tödö. Duma-dumania, ”Nidanö sowöi-wöi tola tobali nasi sebolo.”

Atulö sibai gamaedola daʼö! Fangodödögö nifalua zi samösa niha moʼeluaha, hewaʼae no ide-ide wangodödögö nifaluania. Mangodödögö sibai ndra talifusöda ba Nigeria, simanö göi ndraʼo hegöi Oris. Me 1974, tobali soi siföföna Nigeria baero Amerika Serikat zi no mangokhögö 100.000 sanuriaigö. Sindruhu-ndruhu tedou sibai halöwö ba daʼö!

Sagötö waʼatedou daʼö, alua wasuwöta ba gotalua zi fatalifusö ba Nigeria me döfi 1967 irugi 1970. Ba zi hauga waŵa, ira talifusöda si so ba mbanua Biafra ba zi tambai Nungo Nidanö Niger, tebai fahuhuo ira ba gödo ndraha. Moguna maʼohe gö ba wamati khöra. Simane nitutunögu ba wamobörö, mangandrö ndraʼaga ba faduhu dödöma khö Yehowa ba maʼötö nungo nidanö andrö ba zi hauga kali.

Lö olifudo lala nitöröma safönu famaʼala me maʼötö Nungo Nidanö Niger. Tola manö matega na ifana ndraʼaga saradadu si lö fangera-ngera, börö wökhö hegöi deʼala tanö böʼönia. Ba wanörö lala zaradadu manö no abua sibai, mendrua manö ba nahia niha si lö sökhi ba zi tambai nungo nidanö, no si möi fametaʼuma. No irai uʼötö nidanö Niger sabölö-bölö sibai faoma dundraha side-ide moroi ba Asaba ofeta ba Onitsha. Aefa daʼö möido ba Enugu, ba wangabölöʼö ira pengawas ba daʼö. Ba ginötö tanö böʼö, möido göi ba wangabölöʼö ndra satua sokubaloi ba Aba. Me luo daʼö, fefu wandru oi labunu ba zi talu mbongi enaʼö lö oroma khö nudu. Ba Port Harcourt, maʼalio-liokö ba wondruhö fangandrö me so ndraʼaga ba gangowuloa, börö ira saradadu famareta arakhagö ladudugö Biafra si so ba zi tambai kota.

Gangowuloa andrö moguna sibai ba wamaduhuʼö khö ndra talifusöda wa iʼameʼegö tödö ira Yehowa. Ba gangowuloa andrö göi, tola lafondrondrongo mene-mene soguna enaʼö lö abua dambai ba tola laʼokhögö wahasara dödö. Ira talifusöda ba Nigeria aʼozu ira ba wanaögö abula dödö salua andrö. Laforomaʼö waʼomasi ba lö khöra waʼafatuwu ba soi ba larorogö sibai waʼafatalifusöta niha Keriso. No sambua töi sebua wefao khöra hewaʼae lataögö gabula dödö simane daʼö!

Me 1969, dalifusöda Milton G. Henschel tobali ketua Kebaktian Internasional ”Faʼatulö ba Gulidanö” ba Yankee Stadium, New York. Börö me yaʼo asistennia, oya wamahaʼö nihalögu moroi khönia. Tefaudu sibai wamahaʼö daʼö börö me döfi 1970 mafalua Kebaktian Internasional ”Niha Sanema Howu-Howu” ba Lagos, Nigeria. Lafalua daʼö me no aefa wasuwöta ba gotalua zi fatalifusö. Tola aʼozu acara daʼa börö wanolo moroi khö Yehowa. No sahöli-höli dödö daʼa börö me lafalua ia ba zi 17 li, ba so 121.128 zangondrasi. Talifusöda Knorr, Henschel hegöi dome tanö böʼö si tohare moroi ba Amerika Serikat hegöi Inggris, latörö göfa si hombo niʼokosi ba wamaigi nahia wombayagö idanö niha Keriso fondrege zebua me Fendrakose. So 3.775 nibayagö idanö! Börö me fao ndraʼo ba wamaʼanö kebaktian, te daʼö ginötö safönu sibai halöwö ba waʼaurigu. Itugu monönö waʼato sanuriaigö!

Ba zi töra 30 fakhe ba Nigeria, itaria tobali ndraʼo satua samasui hegöi pengawas zona ba Afrika Barat. Omuso sibai dödö ndra utusan injil ba ginötö laʼameʼegö tödö ira hegöi ba wangabölöʼö yaʼira zamösana! Omuso sibai dödögu börö me tola ufaduhuʼö ba dödöra wa laʼameʼegö tödö ira! Moroi ba halöwögu daʼa, aboto ba dödögu na taʼameʼegö tödö niha böʼö no tobali daʼö ono kusi ba wanolo niha enaʼö tedou ba wamati hegöi ba wondrorogö organisasi Yehowa enaʼö aro ba so wahasara dödö.

Ha börö wanolo Yehowa wa tola mataögö  gabula dödö börö wasuwöta si fatalifusö hegöi fökhö. Sindruhu-ndruhu oroma howu-howu Yehowa. Imane Oris:

”Ba zi hauga kali göna ndraʼaga wökhö Malaria. Samuza maʼökhö, oleda Worth ba laʼohe ia ba rumah sakit ba Lagos. Lafatunö khögu wa lö saʼae dötönafönia enaʼö tola auri, hizaʼi auri! Me teboka hörönia, itutunö sanandrösa ba wamatörö Lowalangi khö ndra perawat zondrorogö yaʼia. Ba gafuriata, mafalukhaisi perawat daʼö sotöi Nwambiwe enaʼö itugu adöni dödönia ba Zura Niʼamoniʼö. Omasi itemaʼö zindruhu, ba gafuriatania tobali satua sokubaloi ba mbanua Aba. Mofozu göi ndraʼo ba wanolo niha sato enaʼö tobali ira ono mbanua Yehowa si lö faröi, hewaʼae na dawa si lö faröi ira ba wamobörö. Hizaʼi, sambua faʼomuso dödöma fondrege zebua yaʼia daʼö me tola faʼila ndraʼaga ba niha Nigeria ba maʼomasiʼö ira hegöi si toʼölö mufalua ba daʼö hegöi li niʼogunaʼöra.”

Daʼa no sambua famahaʼö tanö böʼö, yaʼia daʼö: Enaʼö tola tedou ita ba wamalua halöwö ba wamati ba soi böʼö, moguna taʼomasiʼö ndra talifusöda hegöi si toʼölö lafalua hewaʼae no aröu faböʼö daʼö moroi ba zi toʼölö tafalua.

Me no aefa labeʼe halöwö ba Mbetieli ba Nigeria, me döfi 1987 matema halöwö si bohou tobali utusan injil ba wanuriaigö ba hulo St. Lucia, sambua hulo si baga-baga ba Kepulauan Karibia. Daʼö no halöwö si möi faʼomuso dödö, hizaʼi matema göi wanandraigö si bohou. Ba Afrika, no toʼölö na oya ndronga si samösa ira matua. Hizaʼi gabula dödö si so ba hulo St. Lucia, orudu ira ba lö sangowalu. Taromali Lowalangi safönu kuaso, samarou niha nifahaʼö ba Zura Niʼamoniʼö ba wombulöʼö lala waʼaurira.

Me itugu tedou ndröfima, itugu alö waʼabölöma. Andrö me döfi 2005, ira Boto Solohe si fao faʼomasi lafataro ndraʼaga ba gödo sebua Brooklyn, New York, AS. Ero maʼökhö, lö uböhöli ba wangandrö saohagölö khö Yehowa börö me no ibeʼe khögu woʼomo si sökhi simane Oris. Me döfi 2015, kala ia ibeʼe nudu yaʼia daʼö faʼamate. Me iröi ndraʼo tebai uwaʼö faoma wehede hadia nirasoigu. Yaʼia nawögu fondrege zi sökhi hegöi foʼomo safönu faʼomasi ba oya mbua-bua si sökhi niʼokhögönia. Ba zi 68 fakhe wefaoma, sindruhu-ndruhu uʼomasiʼö sibai ia. No mafahaʼö ndraʼaga wa enaʼö tola omuso dödöma ba wongambatöma hegöi ba mbanua niha Keriso, moguna tafosumange si tobali högöda, omasi taʼefaʼö zala nawöda, lö tebulö taʼokhögö wangide-ngideʼö, ba taforomaʼö mbua-bua geheha.

Ba ginötö afatö dödöma hegöi ide-ide dödöma, maʼodaligö Yehowa ba wanolo yaʼaga enaʼö lö maböhöli ba wangai halöwö khönia. Oya wombulöʼö zi no matörö ba maʼila samösa wa fefu no sökhi sibai. Ba zi so föna, so wombulöʼö zabölö sökhi!​—Yes. 60:17; 2 Kor. 13:11.

Ba Trinidad hegöi Tobago, ifahowuʼö Yehowa halöwö ba wamati nifalua zatuagu hegöi ira talifusö tanö böʼö. Buania, moloʼö gangombakhata safuria so 9.892 niha si fao ba wamosumange satulö. Ba Aruba, ato niha sangodödögö enaʼö teʼaroʼö mbanua niha Keriso si farahu ndraʼo ba zilalö. Iadaʼa ba hulo daʼö so 14 banua niha Keriso ba itugu monönö. Ba Nigeria, faʼato ira sanuriaigö itugu monönö manö, yaʼia daʼö 381.398. Ba hulo St. Lucia so 783 so tuhini Wamatörö Yehowa.

Iadaʼa faʼalawa ndröfigu no 90-an. Imane ba Zinunö 92:15 sanandrösa ba niha nitanö ba nomo Yehowa, ”Moliwiö na ba waʼatua, ba fahöna nidanö döla ba mbulu si bohou.” Uʼandrö sibai saohagölö me uʼogunaʼö waʼaurigu ba wangai halöwö khö Yehowa. Ondröita ba wamati sebua böli zanolo yaʼo enaʼö afönu ba wangai halöwö khö Yehowa. Börö waʼomasi Yehowa si lö faröi tola ’mobowo ndraʼo ba golayama Lowalangigu andrö’.​—Zin. 92:14.