1. Hewisa ndra Samaduhuʼö Yehowa si datölu andrö ba wondrorogö faʼalöfaröira khö Yehowa?

ANGERAGÖ zalua andre khö zi datölu Samaduhuʼö Yehowa. (1) So samösa nono alawe si bohou ebua si so ba zekola. Iʼandrö khöra guru enaʼö fao ba wamalua owasa. Iʼila ono alawe andrö wa lö omasi Lowalangi ba gowasa daʼö. Andrö, ihaogö wangombakha wa lö fao ia ba gowasa daʼö. (2) So samösa zi bohou ebua si möi manuriaigö misa ba nomo-omo. Yaʼia andre niha saila-aila. Iʼila wa so samösa nawöra sekola si toröi ba nomo sedöna iʼondrasi andrö, no irai iʼoʼaya Zamaduhuʼö Yehowa. Hewaʼae simanö, möi ia manuriaigö ba nomo daʼö. (3) So samösa zatua ira matua sangodödögö fohalöwö ba wombönökhi soguna ba nösi nomonia. Samuza inötö, iʼandrö khönia kafalonia enaʼö falimo mazui isawö huku. Sindruhunia, iʼila ira matua daʼö wa tola manö aheta ia ba halöwönia. Hizaʼi, iwaʼö wa lö omasi ia falimo ba iʼoʼö huku börö me simane daʼö niʼandrö Lowalangi ba nono mbanuania.​—Rom. 13:1-4; Heb. 13:18.

2. Hadia wanofu-nofu nitutunöda dania, ba hadia mbörö?

² Hadia mbua-bua niʼilamö ba niha si datölu andrö? Te öʼila wa so khöra waʼabarani ba lö falimo ira. Hizaʼi, so sambua mbua-bua sabölö tohude si no laforomaʼö, yaʼia daʼö faʼalöfaröi. Lö faröi ira khö Yehowa. Lö omasi ira lasawö goi-goi Lowalangi. Wa tola lafalua daʼö börö me so khöra waʼalöfaröi. Tatu omuso dödö Yehowa khöra me no laforomaʼö mbua-bua daʼö. Omasi göi ita na taʼomusoiʼö dödö Namada ba zorugo. Börö daʼö, datatutunö wanofu-nofu andre: Hadia waʼalöfaröi andrö? Hana wa moguna taforomaʼö waʼalöfaröi? Ba hewisa enaʼö tola aro gangetulada ba wondrorogö faʼalöfaröi ba mbaŵa si lö sökhi andre?

3. (a) Hewisa wangoromaʼöda faʼalöfaröi yaʼita ono mbanua Lowalangi? (b) Hadia duma-duma sanolo yaʼita enaʼö taʼila geluaha waʼalöfaröi?

³ Hewisa wangoromaʼöda faʼalöfaröi yaʼita ono mbanua Lowalangi? Yaʼia daʼö na taʼomasiʼö Yehowa soroi ba dödö ba lö taböhöli  wamosumange yaʼia irege tafalua zomasi ia. Angeragö atö hewisa wangogunaʼö ngawua wehede ”faʼalöfaröi” andre ba Zura Niʼamoniʼö. Na ba li Heberaiʼo, ngawua wehede ”faʼalöfaröi” eluahania ahori so, lö mofökhö, ba lö moʼamböta. Duma-dumania, asese labeʼe iraono Gizaraʼeli zumange nitunu khö Yehowa, ba moloʼö Oroisa Moze, tebai labeʼe gurifö sofökhö. * (3 Moz. 22:21, 22) Lö latehegö ba nono mbanua Lowalangi wameʼe urifö na lö ahori so gahe, talinga, mazui hörönia. Fatua lö labeʼe zumange, lafaigi ua sakali na lö hadia ia ba gurifö daʼö. Omasi Yehowa na ahori so ndroto-ndroto gurifö andrö, lö mofökhö mazui moʼamböta. (Mal. 1:6-9) Tola aboto ba dödöda hana wa moguna khö Yehowa na lö mofökhö mazui lö moʼamböta gofu hadia ia. Na taʼöli hadia ia, duma-dumania bua zinanö, buku, mazui gama-gama tanö böʼö, tatu lö omasi ita na so zatöla mazui so zi taya ösa. Omasi ita na ahori so, mazui lö moʼamböta. Simane daʼö göi Yehowa, omasi ia na ahori tabeʼe khönia fefu waʼomasida ba faʼalöfaröida.

4. (a) Hadia moguna moʼahonoa ita ua sakali awena taʼokhögö waʼalöfaröi? (b) Moloʼö Zinunö 103:12-14, hadia niʼilada sanandrösa khö Yehowa?

⁴ Hadia moguna moʼahonoa ita ua sakali awena taʼokhögö waʼalöfaröi? Tatu löʼö. Fefu ita lö moʼahonoa ba oya tafalua zala. Angeragö dombua dane-dane hana wa lö moguna moʼahonoa ita ua sakali ba wangokhögö faʼalöfaröi. Si oföna, lö iʼosambuaʼö dödönia Yehowa ba zoʼamböta ita. Imane Taromalinia, ”Na ötanö ba dödöu enaʼö horö andrö, yaʼugö Yehowa, ba haniha zi tola, yaʼugö Soʼaya?” (Zin. 130:3) Aboto ba dödönia wa lö moʼahonoa ita, no tafalua horö, ba omasi ia iʼefaʼö zalada. (Zin. 86:5) Si dua, iʼila Yehowa ndrege zi tola tafalua ba lö iʼandrö khöda zi töra moroi ba daʼö. (Baso Zinunö 103:12-14.) Na simanö, hewisa enaʼö lö moʼamböta ita mazui ahori so ba wamaigi Yehowa?

5. Hana wa moguna so waʼomasi ba nono mbanua Yehowa enaʼö laʼokhögö waʼalöfaröi?

⁵ Lala enaʼö laʼokhögö waʼalöfaröi ono mbanua Yehowa yaʼia daʼö faʼomasi. Moguna ahori tabeʼe waʼomasida hegöi famosumangeda soroi ba dödö khö Lowalangi, Amada si so ba zorugo. Na lö tebulö simane daʼö waʼomasida khönia, mendrua manö na göna ita fanandraigö, eluahania no taʼokhögö waʼalöfaröi. (1 Nga. 28:9; Mat. 22:37) Fuli angeragö duma-duma ndra Samaduhuʼö si datölu no mege, si no mututunö ba wamobörö. Hana wa lafalua zimane daʼö? Hadia lö omasi nono alawe si bohou ebua andrö na omuso dödönia ba zekola? Hadia omasi nono matua si bohou ebua andrö na laʼailasi ia föna mbawandruhö? Mazui, hadia omasi zatua ira matua andrö na aheta ia ba halöwönia? Tatu manö löʼö. Aboto ba dödöra wa atulö goi-goi Yehowa, ba laʼosambuaʼö dödöra ba wangomusoiʼö tödö Namara si so ba zorugo. Börö waʼomasira khö Lowalangi, andrö wa yaʼia zi oföna laʼangeragö fatua lö lahalö gangetula. Ba daʼa oroma wa no laʼokhögö waʼalöfaröi.

6. (a) Hana wa moguna öʼokhögö waʼalöfaröi? (b) Hana wa lö laforomaʼö saʼae waʼalöfaröira ira Adamo faoma Khawa?

⁶ Hana wa moguna taʼokhögö waʼalöfaröi? Börö me no molawa Zatana khö Yehowa, ba omasi ia göi na tedönisi dödöda. Ba Kabu Edena mböröta, malaʼika solawa Lowalangi andre ibaliʼö ia Satana mazui ”Samadaö”. Iʼobousi döi si sökhi niʼokhögö Yehowa, iwaʼö wa Lowalangi andrö Samatörö si lö sökhi, sangalui tana khönia ba lö itörö zindruhu.  Alimagö sibai me no fao Gadamo faoma Khawa khö Zatana ba wolawa Yehowa. (1 Moz. 3:1-6) Sindruhunia, me so ira ba Kabu Edena, oya ginötö niʼokhögöra ba wangaroʼö faʼomasira khö Yehowa. Hizaʼi me molawa Zatana, lö afönu waʼomasi niforomaʼöra khö Lowalangi. Fanofu tanö böʼö sinangea tabeʼe wanema li yaʼia daʼö: Hadia tola larorogö waʼalöfaröira niha gulidanö khö Lowalangi Yehowa börö waʼomasira khönia? Mazui, hadia tola laforomaʼö waʼalöfaröira niha gulidanö? Andrö wa tumbu wanofu daʼa börö zalua khö Yobi.

7. Moloʼö Yobi 1:8-11, hewisa dödö Yehowa ba waʼalöfaröi Yobi ba hewisa göi dödö Zatana?

⁷ Auri Yobi me so ndraono Gizaraʼeli ba danö Miserai. Lö hadöi niha böʼö sangokhögö faʼalöfaröi simane niʼokhögönia me luo daʼö. Lö moʼahonoa Yobi simane yaʼita. Ifalua göi zala. Hizaʼi, iʼomasiʼö ia Yehowa börö me iʼokhögö waʼalöfaröi. Te no ibörötaigö Satana wolawa Yehowa sanandrösa ba waʼalöfaröi niha gulidanö. Börö daʼö, iʼandrö Yehowa khö Zatana enaʼö inehegö Yobi. Lala waʼauri Yobi zangoromaʼö wa si falimo Zatana andrö! Iʼandrö Satana ba wanandraigö faʼalöfaröi Yobi. Faduhu dödö Yehowa khö Yobi, ba itehegö khö Zatana ba wanandraigö si fahuwu khönia andrö.​—Baso Yobi 1:8-11.

8. Hadia nifalua Zatana khö Yobi?

⁸ Afaito sibai Zatana, ba yaʼia andrö samunu niha. Ihalö fefu gokhöta Yobi, ibunu ndra sohalöwö khönia ba iʼobousi döi si sökhi niʼokhögönia. Ifalua göi daʼö ba nösi nomo Yobi, ibunu ndraononia si dafulu. Ifakao Yobi faoma fökhö irege afönu faosa mbotonia, iʼotarai ba högö ofeta ba gahe. Afatö dödö woʼomo Yobi ba abu sibai dödönia.  Ifaso Yobi enaʼö awuwu ba wamati, iʼelifi Lowalangi ba mate. Sindruhunia, itötöna Yobi waʼamate, hizaʼi lö mamalö irorogö waʼalöfaröinia. Aefa daʼö, itandraigö nasa lala böʼö Satana. So datölu zi fahuwu khö Yobi niʼogunaʼönia. Laʼondrasi Yobi ba zi hauga hari, hizaʼi tenga ba wondrara tödönia. Latahigö Yobi faoma fehede sabeʼe. Lawaʼö wa Lowalangi mbörö wa tefakao ia ba lö iʼameʼegö tödö waʼalöfaröinia. Lawaʼö göi wa Yobi andrö niha si lö sökhi ba no sinangea alua khönia fefu gabula dödö andrö!​—Yob. 1:13-22; 2:7-11; 15:4, 5; 22:3-6; 25:4-6.

9. Hewaʼae oya gabula dödö salua khö Yobi, hadia zi lö ifalua?

⁹ Hadia nifalua Yobi ba gabula dödö salua khönia andrö? Tenga niha soʼahonoa ia. Mofönu ia khö ndra sondrara tödö sofaya andrö, ba iwaʼö göi wehede si lö baga irege maniasa ia ba gafuriatania. Ihöni waʼatulönia, tenga faʼatulö Lowalangi. (Yob. 6:3; 13:4, 5; 32:2; 34:5) Hewaʼae abua sibai zalua khönia, lö iʼerogö Lowalangi Yehowa. Lö faduhu dödönia ba walimosa nifaʼema zi fahuwu sofaya andrö. Imane, ”Yaʼaröu khögu wanehe niwaʼömi andrö; irege aetu nosogu, ba lö uböhöli wa lö horögu.” (Yob. 27:5) Fehede daʼa zangoromaʼö wa no iʼosambuaʼö dödönia Yobi ba wondrorogö faʼalöfaröinia, gofu hadia zalua. Lö awuwu ia, ba tola göi tafalua zimane daʼö.

10. Hana wa molua-lua khöu wamobahulu nifaʼema Zatana andrö khö Yobi?

¹⁰ Hana wa molua-lua khöu wamobahulu nifaʼema Zatana andrö khö Yobi? Sindruhunia, iwaʼö Satana wa tenga soroi ba dödöu wangomasiʼö Lowalangi Yehowa, hasambalö öböhöli wamosumange yaʼia enaʼö teʼorifi ndraʼugö, ba lö örorogö waʼalöfaröimö! (Yob. 2:4, 5; Fam. 12:10) Hewisa dödöu ba daʼö? Tatu afökhö sibai dödömö! Hizaʼi angeragö daʼa: No ifaduhusi tödö ndraʼugö Yehowa irege ibeʼe khöu ginötö si sökhi sibai. Itehegö khö Zatana ba wanandraigö faʼalöfaröimö. Faduhu dödö Yehowa wa tola örorogö waʼalöfaröimö ba tola fao ndraʼugö ba wamaduhuʼö wa si falimo Zatana andrö. Iʼabölöʼö ndraʼugö Yehowa ba ifabuʼu wa hasambalö itoloʼö. (Heb. 13:6) No sambua töi sebua me tola ifaduhusi tödö ndraʼugö Lowalangi Fondrege zabölö ba mbanua si yawa awö danö! Hadia öʼila hana wa moguna sibai waʼalöfaröi? Daʼö zanolo yaʼita ba wamaduhuʼö wa lö atulö niböbögö Zatana andrö. Tola göi taʼoʼawögö döi si sökhi niʼokhögö Namada ba tatuhini lala wamatörönia. Hewisa lala enaʼö tola tarorogö waʼalöfaröida?

11. Hadia wamahaʼö si tola tahalö moroi khö Yobi?

¹¹ Itugu oya lala nifalua Zatana ba wolawa ono mbanua Lowalangi ba ”ngaluo safuria” andre. (2 Tim. 3:1) Ba mbaŵa si lö sökhi andre, hewisa lala wangaroʼö angetulada ba wondrorogö faʼalöfaröi? Sakali tö, tola tafahaʼö ita ba zalua khö Yobi. Ara fatua lö alua khönia wanandraigö, no hauga kali iforomaʼö waʼalöfaröinia khö Yehowa. Datafaigi tölu ngawalö wamahaʼö si tola tahalö khönia sanandrösa ba wangaroʼö angetulada ba wondrorogö faʼalöfaröi.

12. (a) Moloʼö Yobi 26:7, 8, 14, hewisa wa tola ahöli-höli dödö Yobi khö Yehowa ba lö iʼosiwawöi? (b) Hadia zinangea tafalua enaʼö ahöli-höli dödöda khö Yehowa?

¹² Itugu aro waʼomasi Yobi khö Lowalangi börö me ahöli-höli dödönia halöwö danga Yehowa. Ibeʼe ginötönia Yobi ba woʼangerönusi omböila danga Yehowa si sökhi sibai. (Baso Yobi 26:7, 8, 14.) Ahöli-höli dödönia me iʼangeragö wamazökhi ulidanö andre, banua si yawa, lawuo hegöi gari mbanua. Hizaʼi, aboto ba dödönia wa ha maʼifu niʼilania sanandrösa ba gomböila danga Yehowa. Iʼameʼegö tödö göi wehede  Yehowa. Imane, ”Uʼiröʼö daromalinia niwaʼönia.” (Yob. 23:12) Ahöli-höli dödönia khö Yehowa ba lö iʼosiwawöi. Omasi ia na omuso dödö Namania niʼomasiʼönia andrö. Buania, itugu aro gangetula nihalö Yobi ba wondrorogö faʼalöfaröinia. Moguna göi taʼoʼö duma-duma Yobi andrö. Abölö oya niʼilada gomböila danga Yehowa sahöli-höli dödö moroi ba niʼila niha me götö Yobi. No taʼokhögö Zura Niʼamoniʼö sanolo yaʼita ba wangalui faʼaboto ba dödö sanandrösa khö Yehowa. Tola ahöli-höli dödöda ba zi no tafahaʼö ita andrö. Ba na ahöli-höli dödöda khö Yehowa ba lö taʼosiwawöi ia, daʼö zamarou tödöda ba wangomasiʼö yaʼia hegöi ba woloʼö niwaʼönia. Baero daʼö, tola itugu aro gangetula nihalöda ba wondrorogö faʼalöfaröida.​—Yob. 28:28.

13-14. (a) Moloʼö Yobi 31:1, hewisa wangoromaʼö Yobi wa so khönia woloʼö? (b) Hewisa woloʼöda duma-duma Yobi?

¹³ Irorogö waʼalöfaröinia Yobi börö me so khönia woloʼö. Aboto ba dödö Yobi wa moguna iʼoʼö niwaʼö Yehowa enaʼö tola iʼokhögö waʼalöfaröi. Sindruhunia, ero taʼoʼö niwaʼö Yehowa, itugu aro gangetulada ba wondrorogö faʼalöfaröida. No iforege Yobi ba woloʼö niwaʼö Lowalangi ba waʼaurinia sero maʼökhö. Duma-dumania, iʼangenanöi gamuatania ba ndra alawe. (Baso Yobi 31:1.) Börö me no mangowalu ia, aboto ba dödönia wa tebai ihokhaini mazui igadu-gadu ndra alawe böʼö si tenga foʼomonia. Iadaʼa, no so ita ba gulidanö safönu amuata wohorö. Simane Yobi, hadia no tahalö gangetula enaʼö lö tahokhaini mazui tagadu-gadu niha si tenga foʼomoda? Hadia no tahalö göi gangetula enaʼö lö tafaigi gambara soʼamakhaita ba wohorö mazui faʼomasi nösi, gofu hezo so manö? (Mat. 5:28) Na taforomaʼö wanaha tödö ba zimane daʼö ero maʼökhö, tola aro gangetulada ba wondrorogö faʼalöfaröida.

¹⁴ Iʼoʼö göi Yobi hadia niwaʼö Yehowa sanandrösa ba wamaigi harato. Aboto ba dödönia wa no tobali horö sebua na manötöna ia  ba haratonia ba sinangea itema wanguhuku. (Yob. 31:24, 25, 28) Iadaʼa, no so ita ba gulidanö sangomasiʼö harato. Na taʼoʼö goi-goi Zura Niʼamoniʼö ba wangokhögö fangera-ngera satulö sanandrösa ba gefe hegöi harato, tola aro gangetulada ba wondrorogö faʼalöfaröida.​—Gamd. 30:8, 9; Mat. 6:19-21.

15. (a) Hadia howu-howu nidöna-döna Yobi irege tola irorogö waʼalöfaröinia? (b) Hadia mbuania na tatörö tödöda howu-howu nibeʼe Yehowa?

¹⁵ Irorogö waʼalöfaröinia Yobi börö me iʼosambuaʼö dödönia ba howu-howu nibeʼe Lowalangi. Faduhu dödönia wa iʼameʼegö tödö waʼalöfaröinia andrö Lowalangi. (Yob. 31:6) Hewaʼae tefakao ia, faduhu dödönia wa hasambalö ifahowuʼö ia Yehowa ba gafuriata. Börö me faduhu dödönia ba daʼö, andrö wa tola irorogö waʼalöfaröinia. Omuso sibai dödö Yehowa wamaigi faʼalöfaröinia andrö irege oya howu-howu nibeʼenia khö Yobi hewaʼae lö moʼahonoa ia! (Yob. 42:12-17; Yak. 5:11) Ba so dania howu-howu sabölö ebua nitema Yobi. Hadia faduhu göi dödömö wa ifahowuʼö dania waʼalöfaröimö andrö Yehowa? Lö si tebulö Lowalangida. (Mal. 3:6) Na tatörö tödöda wa ibeʼe dania howu-howu Yehowa ba niha sondrorogö faʼalöfaröi, tola terou dödöda ba wondrorogö faʼalöfaröida, ba faduhu dödöda wa sökhi sibai lua-lua waʼaurida ba zi so miföna.​—1 Tes. 5:8, 9.

16. Hadia gangetula sinangea tahalö?

¹⁶ Börö daʼö, halö gangetula ba wondrorogö faʼalöfaröimö! Te itaria ömane tödöu wa lö niha ba zi fasuimö sondrorogö faʼalöfaröira. Sindruhunia, tenga ha yaʼugö zangoromaʼö faʼalöfaröi. No farahu ndraʼugö ba gotalua niha si hauga zuta faʼato ba zi sagörö ulidanö, si no mondrorogö faʼalöfaröi. Fao göi ndraʼugö dania ba gotalua ndra matua hegöi ira alawe saro ba wamati, si no mondrorogö faʼalöfaröira mböröta, hewaʼae labunu ira. (Heb. 11:36-38; 12:1) Datahalö gangetula enaʼö tarorogö waʼalöfaröida simane niwaʼö Yobi, ”Lö uböhöli wa lö horögu!” Ba yatefolakhömi Yehowa sagötö faʼara ba waʼalöfaröida andrö!