1. Hadia zinangea ifalua zi samösa niha, na omasi ifalukhaisi razo Weresia ?

KHALAIGÖ na toröi ndraʼugö ba Weresia mato 2.500 fakhe silalö. So menaʼö zomasi öfatunö khö razo si so ba soi daʼö. Andrö wa möiʼö ba mbanua Zusa, ba nahia waʼatoröi Razo andrö. Hizaʼi, fatua lö öʼondrasi ia moguna ua öfatunö khönia sakali. Na tohare manö ndraʼugö, tola labeʼe khöu hukuma faʼamate!​—Gesi. 4:11.

2. Hewisa zinangeania dödöda na fahuhuo ita khö Yehowa?

² Tatu taʼandrö sibai saohagölö, börö me tenga simane razo Weresia andrö Yehowa! Hewaʼae na Yehowa no fondrege zalawa moroi khö ndra samatörö tanö böʼö, omasi ifondrondrongo gangandröwada gofu hawaʼara manö. Omasi ia na tatutunö khönia nösi dödöda. Duma-dumania, hewaʼae na iʼokhögö Yehowa dadaoma solakhömi, simane Somböi Fondrege Zebua, Fondrege Zabölö, ba Lowalangi Fondrege Zalawa, hizaʼi omasi ia na takaoni ia ”Ama”. (Mat. 6:9) Tatu omuso dödöda börö me taʼila wa omasi Yehowa na tahatöʼö ita khönia!

3. Hana wa no sinangea mukaoni ”Ama” khö Yehowa, ba hadia nitutunöda ba wamahaʼö daʼa?

³ Yehowa andrö no Umbu waʼauri. Andrö wa sinangea na mukaoni khönia ”Ama”. (Zin. 36:10) Börö me Amada ia, moguna taʼoʼö linia. Na tafalua hadia zomasi ia, hasambalö oya howu-howu nitemada. (Heb. 12:9) Sambua howu-howu nibeʼenia yaʼia daʼö faʼauri si lö aetu, he ba gulidanö hegöi ba zorugo. Iadaʼa göi, oya mbua nitemada börö me taʼoʼö linia. Ba wamahaʼö daʼa, tatutunö hewisa wa no tobali Ama sebua faʼomasi Yehowa iadaʼa. Tatutunö göi hana wa faduhu dödöda wa lö irai iröi ita Yehowa. Hizaʼi si oföna, datatutunö hadia mbörö wa faduhu dödöda wa iʼomasiʼö sibai ita Amada si so ba zorugo ba omasi itolo ita.

4. Hana wa so ösa niha, abua khöra ba wokhalaigö wa Yehowa andrö Amara?

⁴ Hadia abua khömö ba wokhalaigö wa Lowalangi andrö no tobali Ama ia khöu? So zorasoi wa lö eluaha waʼaurira me lafagölösi ira khö Yehowa. Lö faduhu dödöra wa iʼameʼegö tödö ira Lowalangi Fondrege Zabölö. Hizaʼi, lö omasi Namada sebua faʼomasi na taʼokhögö wangera-ngera simane daʼö. Ibeʼe khöda waʼauri ba omasi ia na taʼokhögö wahuwusa si sökhi khönia. Daʼö nitutunö zinenge sotöi Faulo khö ndra samondrongo yaʼia ba mbanua Atena. Iwaʼö göi Faulo wa ’sindruhunia lö aröu Yehowa khöda zamösana’. (Hal. 17:24-29) Omasi Yehowa enaʼö lö khöda faʼaombö dödö na fahuhuo ita khönia, simane iraono si lö faʼaombö dödö na fahuhuo ia khö zatuania si so faʼomasi.

5. Hadia wamahaʼö si tola tahalö moroi ba duma-duma salua khö zi samösa dalifusöda ira alawe?

⁵ So dane-dane tanö böʼö wa abua ba niha ba wokhalaigö wa Yehowa andrö Amara. Tola larasoi zimane daʼö, börö me lö asese mazui lö irai iforomaʼö khöra waʼomasi hegöi foʼameʼegö tödö amara si so ba gulidanö. Nehegö hadia niwaʼö dalifusöda ira alawe: ”Asese ilele ndraʼo amagu. Andrö, me ubörögö ufahaʼö ndraʼo ba Zura Niʼamoniʼö, abua khögu fahuwu khö Namada si so ba zorugo. Hizaʼi, tebulö fefu zalua me itugu aboto ba dödögu sanandrösa khö Yehowa.” Hadia örasoi zimane nirasoi dalifusöda ira alawe andrö? Na yaʼia, böi ide-ide dödömö. Ba ginötönia dania, tola örasoi samösa wa Yehowa andrö no Ama sabölö sökhi.

6. Moloʼö Mataiʼo 11:27, hadia lala niʼogunaʼö Yehowa ba wanolo yaʼita enaʼö aboto ba dödöda wa yaʼia andrö Amada sebua faʼomasi?

⁶ So wanolo si no ihenaigö Yehowa, enaʼö aboto ba dödöda wa yaʼia andrö Ama sebua faʼomasi. Duma-dumania, itatugöi enaʼö musura ngawua wehede hegöi nifalua Yesu bakha ba Zura Niʼamoniʼö. (Baso Mataiʼo 11:27.) Moʼahonoa Yesu ba woloʼö amuata Namania, andrö wa tola imane, ”Dozi si no mangila yaʼo ba no göi iʼila Nama.” (Yoh. 14:9) Me fahuhuo Yesu sanandrösa khö Yehowa, asese iʼamaedolagö Yehowa simane Amania. Ba zi öfa Injil manö, so mato 200 kali itötöi mazui ikaoni ”Ama” khö Yehowa. Hadia mbörö wa asese ifalua daʼö Yesu? Sambua mbörönia yaʼia daʼö enaʼö faduhu dödö niha wa Yehowa andrö Ama sebua faʼomasi.​—Yoh. 17:25, 26.

7. Hadia wamahaʼö si tola tahalö sanandrösa khö Yehowa me iʼameʼegö tödö Nononia?

⁷ Angeragö hadia wamahaʼö si tola tahalö sanandrösa khö Yehowa me iʼameʼegö tödö Nononia, Yesu. Hasambalö ifondrondrongo ba itema gangandröwa Yesu. (Yoh. 11:41, 42) Gofu hadia ia gabula dödö nitaögö Yesu, irasoi wa iʼomasiʼö ba ituhini ia Amania.​—Luk. 22:42, 43.

8. Hewisa Yehowa ba wombönökhi soguna khö Yesu?

⁸ No irai imane Yesu, ”Börö Nama wa auri ndraʼo.” (Yoh. 6:57) Andrö, iforomaʼö Yesu wa Yehowa zameʼe khönia faʼauri ba sanolo yaʼia ba wanaögö abula dödö. Sindruhu-ndruhu faduhu dödö Yesu khö Namania, ba ibönökhi göi Yehowa zoguna khönia sero maʼökhö. Hizaʼi sabölö moguna, lö tebulö ibönökhi Yehowa zoguna khönia ba wamati.​—Mat. 4:4.

9. Hewisa wangoromaʼö Yehowa khö Yesu, wa yaʼia andrö Ama sebua faʼomasi?

⁹ Börö me Yehowa andrö Ama sebua faʼomasi, lö tebulö itatugöi enaʼö aboto ba dödö Yesu wa ituhini ia Amania. (Mat. 26:53; Yoh. 8:16) Sindruhu sa, wa lö ilumöʼö Yesu ba ngawalö hadia ia zi tola mangafökhöiʼö tödönia. Hizaʼi, itolo Yesu enaʼö tola anau gölönia ba wanaögö  abula dödö andrö. Aboto ba dödö Yesu wa famakao nitaögönia andrö ha ba zi sabata. (Heb. 12:2) Iforomaʼö waʼomasinia Yehowa me ifondrondrongo Yesu, ibönökhi zoguna khönia, ifahaʼö, ba ituhini ia. (Yoh. 5:20; 8:28) Iadaʼa, datatutunö hewisa Namada si so ba zorugo ba wanolo yaʼita simane nifaluania khö Yesu.

10. Moloʼö Sinunö 66:19, 20, hewisa Yehowa ba wangoromaʼö faʼomasinia khöda?

¹⁰ Ifondrondrongo wangandröda Yehowa. (Baso Zinunö 66:19, 20.) Lö omasi Yehowa na tataha dödöda ba wangandrö khönia. Hizaʼi, omasi ia na lö taböhöli wangandrö. (1 Tes. 5:17) Tola mangandrö ita khö Yehowa gofu hawaʼara ba gofu hezoso so ita. Lö irai lö ibeʼe ginötönia ba wamondrondrongo yaʼita. Hasambalö inehegö hadia niʼangandröida. Na faduhu dödöda wa hasambalö ifondrondrongo wangandröda Yehowa, itugu taʼomasiʼö ia. Imane sanura zinunö, ”Omasido Yehowa, me no ifondrondrongo ligu.”​—Zin. 116:1.

11. Hewisa lala Yehowa ba wanemaʼö fangandröda?

¹¹ Tenga ha ifondrondrongo wangandröda Amada, hizaʼi itema göi gangandröwada. Ifaduhuʼö khöda sinenge sotöi Yohane, ”Ifondrondrongo gofu hadia ia niʼandröda [Lowalangi] si faudu ba zomasi ia.” (1 Yoh. 5:14, 15) Sindruhu sa, wa lö asese itema gangandröwada ba lala si tefaudu ba zomasi ita. Aboto ba dödö Yehowa hadia zabölö sökhi khöda. Andrö wa itaria lö ibeʼe hadia niʼandröda mazui omasi ia na tabaloi.​—2 Kor. 12:7-9.

12-13. Hadia manö niʼogunaʼö Yehowa ba wombönökhi soguna khöda?

¹² Ibönökhi zoguna khöda Yehowa. Fagölö daʼa simane niʼandrönia ba niha si tobali högö yomo ba nomo. (1 Tim. 5:8) Omasi Yehowa na tebönökhi zoguna khö ndraononia. Lö omasi ia na aombö dödöda sanandrösa ba gö, nukha, mazui nahia waʼatoröi. (Mat. 6:32, 33; 7:11) Börö me Yehowa no Ama sebua faʼomasi, no itatugöi enaʼö tebönökhi zoguna khöda ba zi so miföna.

¹³ Sabölö moguna, ibönökhi Yehowa zoguna khöda ba wamati. Moroi ba Daromalinia, ifatunö khöda haniha ia, hadia gohitö dödönia, hadia mbörö wa iwöwöi ita hegöi salua ba zi so miföna. Iʼotarai me tafahaʼö ita ba Zura Niʼamoniʼö, no iforomaʼö wa iʼameʼegö tödö ita Yehowa. Iʼogunaʼö ndra satuada mazui ira talifusöda tanö böʼö ba wamahaʼö yaʼita sanandrösa khönia. Iʼogunaʼö göi ndra satua sokubaloi si so faʼomasi hegöi ira talifusöda saro ba wamati ba wanolo yaʼita enaʼö itugu ahatö khönia. Aefa daʼö, ifahaʼö ita Yehowa ba gangowuloa. Ba daʼö, fao ita khö ndra talifusöda ba wamati ba faoma tafahaʼö ita. Moroi ba lala simane daʼa hegöi ngawalö lala tanö böʼö, iforomaʼö Yehowa wa iʼosinangegö sibai ita.​—Zin. 32:8.

14. Hana wa ifahaʼö ita Yehowa, ba hewisa wamaluania daʼö?

¹⁴ Ifahaʼö ita Yehowa. Fefu ita lö moʼahonoa, tenga simane Yesu. Andrö me ifahaʼö ita, itaria ibeʼe khöda wotu Amada sebua faʼomasi. Ifasugi ba dödöda Taromalinia, ”Iʼotuʼö niha niʼomasiʼönia Yehowa.” (Heb. 12:6, 7) Oya lala niʼogunaʼö Yehowa ba wameʼe khöda fotu. Duma-dumania, na tabaso Zura Niʼamoniʼö mazui na möi ita ba gangowuloa, tola tabaso mazui tafondrondrongo wamasugi ba dödö, irege aboto ba dödöda wa so zinangea tabulöʼö. Mazui, iʼogunaʼö Yehowa ndra satua sokubaloi ba wanolo yaʼita. Gofu hadia lala niʼogunaʼö Yehowa, ifotu ita börö waʼomasinia khöda.​—Yer. 30:11.

15. Hewisa lala Yehowa ba wotuhini yaʼita?

 ¹⁵ Ituhini ita Yehowa ba wanaögö abula dödö. Samösa ama sebua faʼomasi, lö tebulö itolo nononia ba ginötö itaögö gabula dödö. Simanö göi, iʼabölöʼö ita Amada si so ba zorugo na tataögö gabula dödö. Ibeʼe khöda geheha niʼamoniʼö enaʼö lö faröi ita khönia. (Luk. 11:13) Omasi göi itolo ita Yehowa ba ginötö tarasoi waʼide-ide dödö. Duma-dumania, ibeʼe khöda dötönafö sahöli-höli dödö. Dötönafö daʼö zanolo yaʼita enaʼö anau gölöda. Angeragö atö daʼa: Iheta Yehowa fefu ngawalö zi lö sökhi si göna khöda. Gofu hadia ia gabula dödö salua khöda iadaʼa, ha ba zi sabata daʼö. Hizaʼi, howu-howu moroi khö Yehowa so sagötö faʼara.​—2 Kor. 4:16-18.

16. Hadia zalua me lö moloʼö Gadamo khö Namania?

¹⁶ Tola taʼila dandra waʼomasi Yehowa khöda, moroi ba nifaluania me lö moloʼö Gadamo khönia. Me ifalua daʼö Adamo, yaʼia hegöi fefu ngaʼötönia, lö saʼae tobali ösi nomo Yehowa. (Rom. 5:12; 7:14) Hizaʼi, lö ihonogö manö ia Yehowa. So nifaluania ba wanolo yaʼita.

17. Hadia nifalua Yehowa ba ginötö lö moloʼö Gadamo?

¹⁷ Ihuku Gadamo andrö Yehowa, hizaʼi ibeʼe dötönafö ba ngaʼötö Gadamo. No ifabuʼu Yehowa wa hasambalö ifuli tobali ösi nomonia niha soloʼö. (1 Moz. 3:15; Rom. 8:20, 21) Tola ifalua daʼö Yehowa börö me no ibeʼe Yesu tobali höli. Me ibeʼe Nononia niʼomasiʼönia andrö, no iforomaʼö Yehowa wa sindruhu-ndruhu iʼomasiʼö ita.​—Yoh. 3:16.

18. Hewaʼae na no irai fandröndröu ita khö Yehowa, hana wa faduhu dödöda wa hasambalö itemaʼö ita mangawuli?

¹⁸ Hewaʼae na lö moʼahonoa ita, omasi Yehowa na tobali ita ösi nomonia. Lö irai so ba dödönia wa yaʼita andre ha si tobali noro  dödönia. Hewaʼae na itaria taʼafökhöiʼö dödönia mazui no irai fandröndröu ita khönia, itötöna khöda Yehowa enaʼö tafalalini gera-erada ba mangawuli ita khönia. Ibeʼe Yesu gamaedola sanandrösa ba nono si taya, ba wangoromaʼö hawaʼebua waʼomasi Yehowa ba ndraononia. (Luk. 15:11-32) Ba gamaedola daʼö, lö irai aetu wanötöna zi samösa ama enaʼö mangawuli nononia. Andrö, me mangawuli nononia, omuso sibai dödönia ba iʼanemaiʼö iʼondrasi. Na no irai fandröndröu ita moroi khö Yehowa hizaʼi tafalalini gera-erada, tola faduhu dödöda wa hasambalö itemaʼö ita mangawuli Amada sebua faʼomasi.

19. Hewisa Yehowa ba wangehaogö hadia zi no ifakiko Adamo?

¹⁹ Ihaogö Amada fefu hadia ia zi no ifakiko Adamo. Me no aefa mamadaö Gadamo, ihalö gangetula Yehowa ba wamili niha si-144.000 si fao khö Nononia ba zorugo tobali razo hegöi ere. Yesu hegöi si fao khönia hasambalö latolo niha soloʼö enaʼö laʼokhögö waʼauri soʼahonoa ba gulidanö si bohou. Na tola lataögö wanandraigö safuria, hasambalö ibeʼe khöra Lowalangi waʼauri si lö aetu. Ba ginötö daʼö, omuso sibai dödö Yehowa börö me iʼila wa no afönu gulidanö andre iraononia soʼahonoa. No inötö si sökhi daʼö!

20. Hadia manö dandra zangoromaʼö wa iʼomasiʼö sibai ita Yehowa, ba hadia nitutunöda ba wamahaʼö aefa daʼa?

²⁰ No iforomaʼö Yehowa wa iʼomasiʼö sibai ita. Yaʼia andrö Ama si sökhi. Omasi ifondrondrongo wangandröda, ba ibönökhi zoguna khöda he sanandrösa ba mboto hegöi ba wamati. Omasi göi ifahaʼö ba ituhini ita. Aefa daʼö, hasambalö ibeʼe khöda howu-howu sahöli-höli dödö ba zi so miföna. Tatu omuso sibai dödöda börö me taʼila wa iʼomasiʼö ba iʼameʼegö tödö sibai ita Amada! Börö me yaʼita andre iraononia, omasi göi taforomaʼö wa lö taʼosiwawöi waʼomasi niforomaʼönia. Ba wamahaʼö aefa daʼa, tatutunö hewisa wamaluada daʼö.