1-2. Hana wa ibeʼe khöda nasa ginötö Yehowa enaʼö tobali ösi nomonia, ba hewisa wamaluania daʼö?

IKAONI ita Yehowa tobali ösi nomonia, enaʼö teʼosambuaʼö ita ba wamosumange yaʼia. No fogaoni sahöli-höli dödö daʼa! Niha si so ba nösi nomo andrö yaʼia daʼö niha samosumange Yehowa, ba sangokhögö famati ba höli si no ibeʼe Ononia. No ösi nomo somuso tödö ita. Tola tarasoi waʼauri si sökhi iadaʼa, ba omuso dödöda börö me taʼokhögö dötönafö faʼauri si lö aetu, he ba zorugo mazui ba gulidanö Faradaiso.

² Börö me iʼomasiʼö ita Yehowa, ibeʼe khöda ginötö enaʼö tola tobali ita ösi nomonia. Hizaʼi, ba wamalua daʼö, so zabölö ebua si no itehegö Yehowa. (Yoh. 3:16) Fefu ita ’ebua mege mbölida’. (1 Kor. 6:20) Tobali, börö me no ihenaigö höli Yehowa, andrö wa tola fahuwu ita khönia. No göi tebeʼe khöda döi si sökhi ba wogaoni Ama khö Wondrege Zalawa, ba samatörö banua si yawa awö danö. Ba simane nitutunöda ba wamahaʼö silalö, Yehowa no Ama sabölö sökhi.

3. Hadia wanofu si tola tumbu ba dödöda? (Faigi göi kotak ” Hadia Iʼameʼegö Tödö Ndraʼo Yehowa?”)

³ Simane nirasoi zi samösa sanura Zura Niʼamoniʼö, tola manö manofu ita, ”He uwisa wanulöni khö Yehowa si sökhi andrö fefu, nilaunia khögu?” (Zin. 116:12) Sindruhunia, tebai tasulöni waʼomasi Namada si so ba zorugo. Hizaʼi, börö me aboto ba dödöda wa iʼomasiʼö ita Yehowa, andrö göi wa taʼomasiʼö ia. Isura zinenge sotöi Yohane, ”Taʼomasiʼö Lowalangi börö me no oföna iʼomasiʼö ita.” (1 Yoh. 4:19) Hewisa lalada ba wangoromaʼö khö Namada wa taʼomasiʼö ia?

4. Moloʼö Yakobo 4:8, hana wa moguna taforege enaʼö taʼokhögö wahuwusa saro khö Yehowa?

⁴ Omasi Yehowa na ahatö ita khönia, ba lö aetu tatutunö khönia nösi dödöda. (Baso Yakobo 4:8.) Iʼandrö khöda  enaʼö ’böi tafamalö-malö wangandrö’, ba hasambalö ifondrondrongo wangandröda. (Rom. 12:12) Lö irai lö ifondrondrongo wangandröda ba lö göi irai aföli ia. Moguna göi tafondrondrongo ia ba ginötö tabaso Daromalinia, Sura Niʼamoniʼö, hegöi publikasi si tola manolo yaʼita ba wangokhögö faʼaboto ba dödö sanandrösa ba Zura Niʼamoniʼö. No göi tafondrondrongo ia na tahaogö tanehegö hadia nifaʼema ba gangowuloa. Simane iraono khö zatuania, tola göi taʼokhögö wahuwusa saro khö Yehowa na lö taböhöli fahuo-huo khönia ba wangandrö.

5. Hewisa lala enaʼö tola möi fangomusoiʼö dödö Yehowa nösi wangandröda?

⁵ Angeragö hewisa na mangandrö ndraʼugö. Na mangandrö ita, omasi Yehowa na tatutunö khönia hadia nirasoida hegöi niʼangeragöda. (Zin. 62:9) Andrö, moguna taʼangeragö wanofu-nofu daʼa: ’Hadia ha daʼö-daʼö manö nösi wangandrögu, simane garate zura nicetak ba zi hauga kali? Mazui, hadia simane ösi zura nisura faoma tanga ba soroi ba dödö, nösi wangandrögu?’ Tatu öʼomasiʼö sibai Yehowa, ba omasi ndraʼugö na lö tebulö ahatö khönia. Börö daʼö, moguna asese fahuhuo ndraʼugö khö Yehowa. Fatunö khönia hadia manö nösi dödömö hegöi nirasoimö. Fatunö göi hadia manö zameʼe khömö faʼomuso dödö hegöi faʼabu dödö. Yafaduhu dödömö, hasambalö tola öʼandrö wanolo moroi khö Yehowa.

6. Hadia nifaluada enaʼö itugu ahatö ita khö Namada si so ba zorugo?

⁶ Na omasi ita itugu ahatö khö Namada si so ba zorugo, böi taböhöli wangandrö saohagölö khönia. Fao dödöda khö zanura sinunö sangumaʼö, ”Oya ngawalö zahöli-höli dödöma khöu ba era-erau, nifatöröu khöma, yaʼugö Yehowa, Lowalangigu; lö hadöi ia zi fagölö-gölö khöu! Na lafatunö enaʼö, na itörö li, ba abölö oya, tebai lazara-zara.” (Zin. 40:6) Hizaʼi, tenga ha taʼandrö manö saohagölö bakha ba dödöda. Moguna göi taforomaʼö wangandrö saohagölö khö Yehowa, moroi ba wehede hegöi amuatada. Daʼa zamaehusi yaʼita moroi ba niha sato iadaʼa. Ato niha si lö moʼameʼegö tödö hadia zi no ifalua khöra Lowalangi. Sambua dandra zangoromaʼö wa no auri ita ba ”ngaluo safuria”, yaʼia daʼö amuata niha si lö mangila mangandrö saohagölö. (2 Tim. 3:1, 2) Tatu manö, lö omasi ita simane yaʼira!

7. Hadia niʼandrö Yehowa khöda, ba hadia mbörö?

⁷ Lö omasi zatua na faʼudu-udu manö ndraonora, hizaʼi omasi ira na laʼokhögö wahasara dödö. Simane daʼö göi Yehowa, omasi ia na so wahasara dödö ba ndraononia. Faʼomasida nawöda, no tobali tandra wa yaʼita niha Keriso sindruhu. (Yoh. 13:35) Tarasoi zimane nirasoi zanura sinunö sangumaʼö, ”Hiza waʼasökhi, ba ha lö omasiö, na ha sara dödö moroi yomo zi fatalifusö!” (Zin. 133:1) Na taʼomasiʼö ndra talifusöda, daʼö zangoromaʼö wa taʼomasiʼö Yehowa. (1 Yoh. 4:20) Omuso sibai dödöda me tefarahu ita ba nösi nomo si ’faoma mangokhögö faʼahakhö dödö’.​—Ef. 4:32.

8. Moloʼö 1 Yohane 5:3, hadia dane-dane si oföna wa taʼoʼö li Yehowa?

⁸ Itötöna Yehowa ba ndraono enaʼö lafosumange zatuara, ba omasi göi ia na taʼoʼö niwaʼönia. (Ef. 6:1) Yehowa Zomböi yaʼita, ba no ihenaigö fefu hadia ia enaʼö tola auri ita. Aefa daʼö, yaʼia andrö no Ama fondrege zatua-tua. Andrö wa no sinangea na taʼoʼö li Yehowa. Hizaʼi, dane-dane si oföna wa taʼoʼö li Yehowa, yaʼia daʼö börö me iʼomasiʼö ita. (Baso 1 Yohane 5:3.) Sindruhunia, oya dane-dane wa moguna taʼoʼö li Yehowa. Hizaʼi, lö irai ifaso ita ba woloʼö niwaʼönia. No ibeʼe khöda ginötö ba wangai angetula samösa, andrö wa omuso dödönia na tafili ba woloʼö niwaʼönia börö me taʼomasiʼö ia.

9-10. Hana wa moguna taʼoʼö gamakhoita hegöi fanuturu lala nibeʼe Yehowa?

 ⁹ Omasi zatua na telumöʼö ndraonora. Daʼö mbörö wa lafazökhi gamakhoita hegöi fanuturu lala si tola molumöʼö iraonora. Na laʼoʼö fefu gamakhoita hegöi fanuturu lala daʼö iraono, no laforomaʼö wa lafaduhusi tödö ba lafosumange zatuara. Hizaʼi, so gamakhoita hegöi fanuturu lala sabölö moguna sinangea taʼoʼö, yaʼia daʼö moroi khö Namada si so ba zorugo. Na taʼoʼö linia, no taforomaʼö khö Yehowa wa taʼomasiʼö ba tafosumange ia. Baero daʼö, yaʼita samösa zanema mbuania. (Yes. 48:17, 18) Hizaʼi, niha si lö moloʼö li Yehowa, no samaʼala faʼaurira samösa.​—Gal. 6:7, 8.

¹⁰ Na möi fangomusoiʼö dödö Yehowa lala waʼaurida, no talumöʼö waʼaurida moroi ba ngawalö zi tola mamaʼala botoda, fangera-ngerada, hegöi famatida. Aboto ba dödö Yehowa hadia zi sökhi khöda. Imane Aurora si toröi ba Amerika Serikat, ”Faduhu dödögu wa hasambalö tarasoi waʼomuso dödö na taʼoʼö li Yehowa.” Ba sindruhu-ndruhu atulö daʼö. Hadia mbua nirasoimö börö me öʼoʼö wanuturu lala nibeʼe Yehowa safönu faʼomasi?

11. Hewisa wa tola möi fanoloda wangandrö?

¹¹ Fangandrö zi tola manolo yaʼita enaʼö lö tebulö taʼoʼö linia, hewaʼae na itaria abua wamalua yaʼia. Tola manö abua khöda ba woloʼö niwaʼö Yehowa, börö me fefu ita lö moʼahonoa. Hizaʼi, moguna taforege enaʼö lö tebulö taʼoʼö linia. So zanura sinunö zangandrö khö Lowalangi imane, ”Abeʼeʼö ndraʼo eheha sedöna tödö.” (Zin. 51:14)  Imane samösa perintis biasa sotöi Denise, ”Ba ginötö abua khögu ba woloʼö zi sambua fareta moroi khö Yehowa, uʼandrö waʼabölö enaʼö tola ufalua zatulö.” Faduhu dödöda wa hasambalö ifondrondrongo Yehowa wangandrö simane daʼö.​—Luk. 11:9-13.

12. Simane nisura ba Efeso 5:1, hadia zinangea tafalua?

¹² Baso Efeso 5:1. Börö me yaʼita ’iraono niʼomasiö’ Yehowa, moguna taforege ba woloʼö yaʼia. Tola taʼoʼö gamuatania na taforomaʼö waʼomasi, faʼahakhö dödö, ba taʼefaʼö zala niha böʼö. Na laʼila gamuatada si sökhi ira niha si lö faʼaboto ba dödö sanandrösa khö Yehowa, tola adöni dödöra ba wamahaʼö yaʼira sanandrösa khönia. (1 Fet. 2:12) Satua si no tobali niha Keriso, moguna laʼoʼö duma-duma Yehowa ba wameʼe mene-mene ba ndraonora. Na lafalua daʼö, tola manö adöni dödö ndraonora fahuwu khö Yehowa.

13. Hadia zinangea tafalua enaʼö itugu taʼokhögö waʼabarani?

¹³ Si toʼölönia, omuso dödö ndraono side-ide khö namania, ba omasi ia ba wodunö-dunö sanandrösa khö namania andrö. Simanö göi, omuso dödöda khö Namada si so ba zorugo sotöi Yehowa, ba omasi ita na aboto ba dödö niha böʼö sanandrösa khönia. Fagölö nirasoida ba nirasoi Razo Dawido, me isura, ”Yamusuno ia tödögu, ba khö Yehowa.” (Zin. 34:3) Hizaʼi, na niha saila-aila ita, hewisa enaʼö itugu taʼokhögö waʼabarani? Tola itugu taʼokhögö waʼabarani, na taʼangeragö mbua si sökhi na tadunö-dunö  sanandrösa khö Yehowa. Omasi taʼomusoiʼö dödö Yehowa, ba hasambalö oya mbua nitema niha böʼö börö me lafahaʼö ira khönia. Hasambalö ibeʼe khöda Yehowa waʼabarani. Itolo niha Keriso ba götö siföföna enaʼö itugu barani, ba hasambalö itolo göi ita.​—1 Tes. 2:2.

14. Hadia ösa dane-dane wa tohude sibai halöwö fanuriaigö?

¹⁴ Lö ifaehu-faehusi niha Yehowa, ba omuso dödönia na taforomaʼö waʼomasi ba niha böʼö, he na faböʼö-böʼö soida. (Hal. 10:34, 35) Sambua lala ba wangoromaʼö faʼomasi ba niha böʼö, yaʼia daʼö na tafaʼema khöra duria somuso dödö. (Mat. 28:19, 20) Hadia mbua nitemada ba halöwö nifaluada andre? Niha samondrongo yaʼita, tola laʼokhögö waʼauri si sökhi iadaʼa ba faʼauri sagötö faʼara ba zi so miföna.​—1 Tim. 4:16.

15-16. Hadia manö zi tola mangaʼasogö khöda faʼomuso dödö?

¹⁵ Yehowa no Ama sebua faʼomasi, andrö wa omasi ia na omuso dödö nösi nomonia. (Yes. 65:14) Oya mbörö wa tola tarasoi waʼomuso dödö iadaʼa, hewaʼae na tataögö gabula dödö. Duma-dumania, faduhu dödöda wa iʼomasiʼö sibai ita Amada si so ba zorugo. Ba taʼokhögö göi waʼaboto ba dödö si tefaudu sanandrösa ba Daromali Lowalangi, Sura Niʼamoniʼö. (Yer. 15:16) No tefarahu ita ba nösi nomo si faböʼö-böʼö. Niha si farahu ba nösi nomo andre, no niha sangomasiʼö Yehowa, sangomasiʼö goi-goinia, hegöi sangomasiʼö niha böʼö.​—Zin. 106:4, 5.

¹⁶ Tola itugu tarasoi waʼomuso dödö, na faduhu dödöda wa abölö sökhi waʼaurida ba zi so miföna. Ba zi lö ara tö, ihori fefu waʼalösökhi Yehowa, ba iʼogunaʼö Wamatörönia ba wamohouni gulidanö tobali Faradaiso. Faduhu göi dödöda, wa hasambalö tesusugi niha si no mate ba falukha ira khöda mangawuli. No tötönafö sahöli-höli dödö daʼa! (Yoh. 5:28, 29) Tatu manö, omuso dödöda na tohare ginötö daʼö dania. Sabölö moguna, faduhu dödöda wa ba zi so miföna, fefu zi so ba zorugo hegöi ba gulidanö, hasambalö labeʼe döi si sökhi, lakhömi, ba sumange khö Namada sebua faʼomasi.