1. Hewisa waʼafökhö dödö andrö molua-lua ba nösi nomo Yosefo?

IʼOMASIʼÖ fefu nononia matua Yakobo, hizaʼi abölö iʼomasiʼö Yosefo, ononia matua si no 17 fakhe. Hewisa dödö ndra gaʼania khö Yosefo? Afökhö sibai dödöra khö Yosefo, ba ibörögö fatuwu ira khönia. Sindruhunia, lö hadöi zala nifalua Yosefo. Hewaʼae simanö, lafamawa Yosefo tobali sawuyu ba falimo ira khö namara, lawaʼö wa no mate nono niʼomasiʼönia andrö no ibunu ia urifö samuʼi. Börö waʼafökhö dödö, lafakiko waʼohahau dödö ba nösi nomora, irege abu dödö namara.​—1 Moz. 37:3, 4, 27-34.

2. Moloʼö Galatia 5:19-21, hana wa no möi famaʼala waʼafökhö dödö?

² Ba Zura Niʼamoniʼö, faʼafökhö dödö * andrö farahu ia ba ”mbua-bua nösi” si möi famaʼala, irege lö tefaʼamöi zi samösa niha ba Wamatörö Lowalangi. (Baso Galatia 5:19-21.) Si toʼölönia, faʼafökhö dödö andrö tola iʼasogö waʼudusa, fatitisa, mazui fönu.

3. Hadia nitutunöda ba artikel daʼa?

³ Amuata ndra gaʼa Yosefo zangoromaʼö wa faʼafökhö dödö tola ifakiko gamakhaita zi samösa niha ba niha böʼö, hegöi faʼohahau dödö yomo ba nomo. Hewaʼae na lö tafalua zimane nifalua ndra gaʼa Yosefo, fefu ita lö moʼahonoa, ba taʼokhögö dödö si lö sökhi. (Yer. 17:9) Andrö wa itaria afökhö dödöda ba niha böʼö. So ösa duma-duma ba Zura Niʼamoniʼö zangoromaʼö hadia mbörö wa tola so waʼafökhö dödö ba zi samösa niha. Tatutunö duma-duma andrö, ba tatutunö hewisa lalada ba wolawa faʼafökhö dödö ba lö tebulö tarorogö waʼohahau dödö.

4. Hana wa afökhö dödö niha Wilisiti khö Gizaʼaki?

⁴ Na abölö ebua gokhöta niha böʼö. Niha si kayo Gizaʼaki, ba ato niha Wilisiti zafökhö tödö khönia. (1 Moz. 26:12-14) Lahalö  dambu ba laduhö mbaʼa nidanö sasese iʼogunaʼö Izaʼaki na ibeʼe nidanö ö gurifönia. (1 Moz. 26:15, 16, 27) Iadaʼa, ato niha simane niha Wilisiti. Afökhö dödöra ba niha sangokhögö okhöta sebua. Niha simane daʼö, tenga ha omasi iʼokhögö hadia niʼokhögö niha böʼö, hizaʼi itötöna enaʼö taya hadia zi no iʼokhögö niha daʼö.

5. Hana wa afökhö dödö ndra sondröniaʼö ba agama khö Yesu?

⁵ Na so niha sabölö laʼomasiʼö niha böʼö. Afökhö sibai dödö ndra sondröniaʼö agama Yahudi khö Yesu, börö me ato niha sangomasiʼö yaʼia. (Mat. 7:28, 29) Yesu no salahi Lowalangi, ba ifahaʼö zindruhu. Hewaʼae simanö, laböbögö khö Yesu zi lö duhu ira sondröniaʼö ba agama ba wangobousi töinia. (Mrk. 15:10; Yoh. 11:47, 48; 12:12, 13, 19) Hadia wamahaʼö si tola tahalö ba zalua andre? Ba gangowuloa, te so dalifusöda sabölö laʼomasiʼö niha sato, börö me iʼokhögö mbua-bua si sökhi. Moguna taforege enaʼö böi so khöda waʼafökhö dödö. Hizaʼi, dataʼoʼö mbua-bua si sökhi nifaluara.​—1 Kor. 11:1; 3 Yoh. 11.

6. Hewisa wangoromaʼö Dioterefe wa so khönia waʼafökhö dödö?

⁶ Na so niha sangokhögö halöwö si tohude ba gangowuloa. Me abad siföföna, afökhö dödö Dioterefe khö ndra matua si tobali sondröniaʼö ba mbanua niha Keriso. Omasi ia ’tobali niha siföföna’ ba gotalua niha Keriso. Börö daʼö, iböbögö zi lö duhu khö zinenge sotöi Yohane hegöi khö ndra talifusö tanö böʼö. Ohitö dödönia yaʼia daʼö enaʼö lö saʼae lafosumange ira niha si so ba mbanua niha Keriso. (3 Yoh. 9, 10) Tatu manö lö omasi tafalua zimane nifalua Dioterefe. Hizaʼi, tola ibörögö so khöda waʼafökhö dödö khö ndra talifusöda si sara lala ba wamati, na tebeʼe khöra halöwö somasi taʼokhögö, mendrua manö na tarasoi wa tola tafalua halöwö daʼö.

7. Hadia lua-lua waʼafökhö dödö andrö ba khöda samösa?

⁷ Faʼafökhö dödö andrö hulö zinanö si so langu. Na no mowaʼa ba dödöda waʼafökhö dödö, tola abua khöda ba wanöbi yaʼia. Bua-bua si lö sökhi simane faʼolohu, fayawasa, hegöi fakhögusa, tola tedou-dou manö ia ba dödöda. Tanö böʼönia, bua-bua si sökhi simane faʼomasi, faʼahakhö dödö, hegöi faʼasökhi dödö, lö tola tumbu ia na so khöda waʼafökhö dödö. Tobali, na taʼila ibörögö mowaʼa ba dödöda waʼafökhö dödö, moguna taʼalioʼö ba wanöbi yaʼia. Hewisa lalada ba wolawa faʼafökhö dödö?

8. Hadia manö mbua-bua si sökhi si tola manolo yaʼita ba wolawa faʼafökhö dödö?

⁸ Tola talawa waʼafökhö dödö andrö na taʼokhögö wangide-ngideʼö hegöi faʼahono dödö ba zi no taʼokhögö. Na so ba dödöda mbua-bua si sökhi, lö tola tumbu waʼafökhö dödö. Hadia mbörö? Niha sangokhögö fangide-ngideʼö, lö iwaʼö tödönia wa abölö tohude ia moroi ba niha böʼö, ba lö iwaʼö wa no sinangea itema fefu hadia ia moroi ba niha böʼö. (Gal. 6:3, 4) Niha sahono tödö ba zi no so, hasambalö omuso dödönia ba zi no iʼokhögö, ba lö göi ifaedo-faedogö ia ba niha böʼö. (1 Tim. 6:7, 8) Na so wangide-ngideʼö hegöi faʼahono dödö khö zi samösa niha, hasambalö fao göi ia ba waʼomuso dödö ba ginötö so zi sökhi nitema niha böʼö.

9. Moloʼö Galatia 5:16 hegöi Filifi 2:3, 4, hewisa wa tola möi fanoloda geheha niʼamoniʼö?

⁹ Moguna khöda geheha niʼamoniʼö enaʼö tola talawa waʼafökhö dödö, ba tadouʼö wangide-ngideʼö hegöi faʼahono dödö ba zi no so. (Baso Galatia 5:16; Filifi 2:3, 4.) Eheha niʼamoniʼö moroi khö Yehowa, zi tola manolo yaʼita ba wamareso hadia niʼera-erada hegöi ösi dödöda. Börö wanolo nibeʼe Yehowa, tola tatiboʼö waʼafökhö dödö andrö ba tatukari ia ba ngawalö zi sökhi. (Zin. 26:2; 51:12) Datanehegö duma-duma Moze hegöi Faulo, si lö faʼafökhö dödö ba niha böʼö.

10. Hadia zi tola manandraigö fangide-ngideʼö Moze? (Faigi gambara ba guli majalah.)

 ¹⁰ Oya noro dödö niʼokhögö Moze ba nono mbanua Lowalangi, hizaʼi lö itaha niha böʼö ba wangokhögö noro dödö simane yaʼia. Samuza inötö, ihalö ösa Yehowa geheha niʼamoniʼö si so khö Moze, ba ibeʼe daʼö khö ndra sondröniaʼö iraono Gizaraʼeli sozizio ba zinga nahia niʼamoniʼö. Lö ara aefa daʼö, irongo nasa Moze wa so darua zondröniaʼö sanema eheha niʼamoniʼö, ba ibörögö faböʼö gamuatara simane samaʼeleʼö, hizaʼi yaʼira andre lö si fao weʼamöi ba nose wamaʼeleʼö. Hadia nifalua Moze me iʼandrö khönia Yosua ba wanaha yaʼira? Lö faʼafökhö dödö khö Moze, börö me iʼameʼegö tödö ndra matua si darua andrö Yehowa. Hizaʼi, so khö Moze wangide-ngideʼö. Fao ia ba waʼomuso dödö börö me no latema halöwö si tohude moroi khö Yehowa, ira matua si darua andrö. (4 Moz. 11:24-29) Hadia wamahaʼö si tola tahalö khö Moze?

11. Hewisa ndra satua sokubaloi ba woloʼö Moze?

¹¹ Na yaʼugö samösa satua sokubaloi, hadia no irai laʼandrö khömö ba wamahaʼö niha böʼö enaʼö ifalua halöwö somasiʼö sibai? Duma-dumania, tebeʼe khömö noro dödö ba wondröniaʼö Famahaʼö Manuriaigö ero migu, ba öʼomasiʼö sibai halöwö daʼö. Hizaʼi, na öʼokhögö wangide-ngideʼö simane Moze, böi so ba dödömö wa ambö saʼae laʼogunaʼö ndraʼugö na laʼandrö khöu ba wamahaʼö niha böʼö, enaʼö tola ifalua halöwö daʼö dania ba zi so miföna. Hizaʼi, ötolo dalifusöda daʼö si fao faʼomuso dödö.

12. Hewisa niha Keriso iadaʼa ba wangoromaʼö wa so khöra wangide-ngideʼö hegöi faʼahono dödö ba zi no so?

¹² Datatutunö zalua tanö böʼö nirasoi ndra talifusöda si no alawa döfi. Ba zi ngafulu fakhe, tola manö no tebeʼe khöra noro dödö tobali koordinator zatua sokubaloi. Hizaʼi, na no 80 fakhe ndröfira, si fao faʼaoha gölö labeʼe halöwö daʼö ba niha böʼö. Simanö göi ndra satua samasui si no 70 fakhe, si fao fangide-ngideʼö labatogö halöwöra, ba aoha gölöra ba wanemaʼö halöwö tanö böʼö. Barö-barö daʼa, ato zohalöwö ba Mbetieli ba zi sagörö ulidanö, saoha ölö ba wanemaʼö halöwö si bohou ba lapangan. Ira talifusöda si lö faröi andre, lö khöra faʼafökhö dödö ba niha samalua halöwöra ba zilalö.

13. Hana wa tola manö menaʼö afökhö dödö Waulo khö ndra sinenge Yesu si-12?

¹³ Sinenge sotöi Faulo, no duma-duma tanö böʼö ba gotalua niha sondrouʼö fangide-ngideʼö hegöi faʼahono dödö ba zi no so. Hewaʼae na iforege ba wamalua fanuriaigö, si fao fangide-ngideʼö imane, ”Yaʼo zinenge fondrege zide-ide, ba tenga sinangea lafotöi ndraʼo sinenge.” (1 Kor. 15:9, 10) Atulö sa wa no mutuyu Waulo tobali ”sinenge nifatenge ba soi böʼö”, hizaʼi lö irai itema noro dödö si tohude tobali samösa moroi ba gotalua zinenge Yesu si-12. (Rom. 11:13) Lö tebulö fao khö Yesu ndra sinengenia si-12 sagötö wamaluania halöwö fanuriaigö ba gulidanö, hizaʼi awena tobali niha Keriso Waulo me no aefa mate ba tesusugi Yesu. (Hal. 1:21-26) Hewaʼae simanö, lö faʼafökhö dödö khö Waulo börö me tola fariawö ira khö Yesu si fao faʼowua-wua dödö. Ahono dödö Waulo ba zi no iʼokhögö, ba lö itehegö tedou ba dödönia waʼafökhö dödö.

14. Hadia nifaluada na taʼokhögö wangide-ngideʼö hegöi faʼahono dödö ba zi no so?

¹⁴ Na so khöda wangide-ngideʼö hegöi faʼahono dödö ba zi no so, tola tobali ita simane Faulo. Taforomaʼö wa tafosumange niha sangokhögö noro dödö moroi khö Yehowa. (Hal. 21:20-26) No ibeʼe gamakhoitania Yehowa, enaʼö ira satua sokubaloi zi tobali sondröniaʼö ba mbanua niha Keriso. Hewaʼae lö moʼahonoa ira, ba wamaigi Yehowa no si tobali ’buala ira ba niha’. (Ef. 4:8, 11) Na tafosumange ba taʼoʼö wanuturu lala nibeʼera si fao fangide-ngideʼö, lö tebulö ahatö ita khö Yehowa ba taʼokhögö gamakhaita si sökhi khö ndra talifusö si sara lala ba wamati.

15. Hadia zinangea tafalua?

¹⁵ Na itugu tedou waʼafökhö dödö, tebai taʼokhögö gamakhaita si sökhi ba niha böʼö. Andrö wa moguna tasöbi fefu waʼafökhö dödö si so bakha ba dödöda, ba lö göi omasi ita na tataru ba dödö niha böʼö waʼafökhö dödö. Na tafalua daʼö, no taʼoʼö fareta Yehowa ba ’wamalua ngawalö zi möi fangatulö ba si möi famarou dödö zamösana’. (Rom. 14:19) Hadia zi tola tafalua ba wanolo niha böʼö ba wolawa faʼafökhö dödö, ba hewisa wondrorogöda faʼohahau dödö?

16. Hewisa wanoloda niha böʼö ba wolawa faʼafökhö dödö?

¹⁶ Amuata hegöi nifaluada tola molua-lua daʼö ba niha böʼö. Omasi sibai gulidanö andre na ’tahöni-höni gokhöta’ niʼokhögöda. (1 Yoh. 2:16) Hizaʼi, na tafalua daʼö, tola ifatumbuʼö waʼafökhö dödö ba niha böʼö. Hadia nifaluamö enaʼö lö tumbu waʼafökhö dödö ba niha böʼö? Si oföna, böi aseseʼö ba wodunö-dunö gama-gama niʼokhögömö mazui niʼölimö. Si dua, na so noro dödö nibeʼe khömö ba mbanua niha Keriso, foromaʼö wangide-ngideʼö. Na asese ödunö-dunö halöwö daʼö, tola manö itugu tedou waʼafökhö dödö ba niha böʼö. Hizaʼi, na soroi ba dödömö öforomaʼö wa öʼameʼegö tödö niha böʼö, ba ösuno ngawalö zi sökhi nifaluara, no ötolo ira enaʼö so khöra waʼahono ba dödö ba zi no so. No göi örorogö waʼatulö hegöi faʼohahau dödö ba mbanua niha Keriso.

17. Hadia zi no mofozu lafalua ira gaʼa Yosefo, ba hadia mbörö?

¹⁷ Tola mofozu ita ba wolawa faʼafökhö dödö! Datatutunö mangawuli zalua khö ndra gaʼa Yosefo. Hauga fakhe me no aefa lafakao  Yosefo, falukha ira mangawuli ba Miserai. Fatua lö ifatunö Yosefo haniha ia zindruhunia khö ndra gaʼania, itandraigö hadia no labulöʼö gamuatara. Ikaoni enaʼö fao ira wemanga, ba ginötö daʼö abölö oya gurakha nibeʼe Yosefo khö Mbeniyami. (1 Moz. 43:33, 34) Hewaʼae simanö, lö afökhö dödö ndra gaʼania khö Mbeniyami. Hizaʼi, laforomaʼö wa sindruhu-ndruhu laʼameʼegö tödö Mbeniyami hegöi amara sotöi Yakobo. (1 Moz. 44:30-34) Börö me lö hadöi faʼafökhö dödö khö ndra gaʼania, tola mofozu ira ba wangaʼasogö faʼohahau dödö ba nösi nomora. (1 Moz. 45:4, 15) Simane daʼö göi ita, na tasöbi fefu waʼafökhö dödö si so bakha ba dödöda, no taʼasogö waʼohahau dödö ba nösi nomoda hegöi ba mbanua niha Keriso.

18. Moloʼö Yakobo 3:17, 18, hadia mbuania na fao ita ba wangaʼasogö faʼohahau dödö?

¹⁸ Omasi Yehowa na talawa waʼafökhö dödö ba lö tebulö tarorogö waʼohahau dödö. Enaʼö tola tafalua zi dombua ngawalö andre, moguna taforege ba wamalua yaʼia. Simane si no tatutunö ba artikel daʼa, tola manö taʼokhögö nifotöi faʼafökhö dödö. (Yak. 4:5) Ba toröi göi ita ba gotalua niha sondrouʼö faʼafökhö dödö. Hizaʼi, na taforege ba wangokhögö fangide-ngideʼö, ahono dödöda ba zi no so, hegöi fangandrö saohagölö, lö tedou ba dödöda waʼafökhö dödö. Hasambalö taʼokhögö gamakhaita si sökhi ba niha böʼö, tobali ita niha sebua faʼomasi, si so faʼahakhö dödö hegöi faʼasökhi dödö.​—Baso Yakobo 3:17, 18.