1. Na no iʼera-era wangowalu khö zi samösa talifusöda ira matua, hadia manö wanofu sinangea iʼangeragö si samösa talifusöda ira alawe?

YESU Keriso zi tobali högö niha Keriso maʼafefu, ba no sondröniaʼö soʼahonoa ia. Hizaʼi, na mangowalu zi samösa ira alawe, no so ia barö wondröniaʼö ndra matua si lö moʼahonoa. Tola tobali abula dödö daʼö. Börö daʼö, na no iʼera-era wangowalu khö zi samösa talifusöda ira matua, moguna iʼangeragö wanofu-nofu daʼa: ’Hadia dandra sangoromaʼö wa tola tobali högö si sökhi yomo ba nomo dalifusöda ira matua andrö? Hadia iʼofönaiʼö wamosumange Yehowa ba waʼaurinia? Na löʼö, hewisa wa tola faduhu dödögu wa tola tobali ia högö si sökhi yomo ba nomo na no aefa mangowalu ndraʼaga?’ Tatu manö, moguna göi isofu khönia samösa: ’Hadia mbua-bua si sökhi niʼokhögögu soguna ba wongambatöma? Hadia so khögu waʼebolo dödö hegöi faʼoböwö? Hadia aro wahuwusagu khö Yehowa?’ (Sango. 4:9, 12) Na ihalö gangetula si sökhi si samösa ira alawe fatua lö mangowalu ia, tola möi fanolonia daʼö ba worasoi faʼomuso dödö ba wongambatö.

2. Hadia nitutunöda ba artikel daʼa?

² Zuta waʼato ndra talifusöda ira alawe sameʼe duma-duma ba woloʼö li woʼomora. No sinangea musuno ira! Omuso dödöda falulu fohalöwö khö ndra alawe si lö faröi andre ba wamosumange Yehowa! Ba artikel daʼa, tatutunö wanema li ba zi tölu wanofu andre: (1) Hadia manö daha-taha nitaögö woʼomo ira alawe? (2) Hana wa omasi woʼomo ira alawe ba woloʼö li woʼomonia? (3) Moroi ba duma-duma Yesu, Abigaila, hegöi Maria foʼomo Yosefo, hadia wamahaʼö nihalö woʼomo ira matua ba foʼomo ira alawe sanandrösa ba woloʼö?

3. Hana wa lö hadöi fongambatö soʼahonoa?

³ Fongambatö andrö no buala soʼahonoa moroi khö Lowalangi. Hizaʼi, lö moʼahonoa niha gulidanö. (1 Yo. 1:8) Daʼö mbörö wa ifangelama niha si no mongambatö Taromali Lowalangi wa hasambalö lataögö gabula dödö nifotöi ”famakao mboto”. (1 Ko. 7:28) Nehegö atö hadia manö gabula dödö nitaögö woʼomo ira alawe.

4. Hana wa tola manö iwaʼö foʼomo ira alawe wa no fangailania na iʼoʼö li woʼomonia?

⁴ Te börö lala zatuania ba wangebuaʼö yaʼia, andrö wa iwaʼö tödönia foʼomo ira alawe wa no fangailania na iʼoʼö li woʼomonia. Imane Marisol si toröi ba Amerika Serikat, ”Ba mbanuagu, asese lawaʼö khö ndra alawe wa moguna fagölö wetarora khö ndra matua ba ngawalö hadia ia. Aboto ba dödögu wa Yehowa zamataro foʼomo ira matua tobali högö woʼomonia. Hizaʼi, börö me tenga simane daʼö lala wangera-ngera niha gulidanö, itaria abua khögu woloʼö li woʼomogu.”

5. Hadia lala wangera-ngera si fasala niʼokhögö ndra matua sanandrösa khö ndra alawe?

⁵ Tola manö göi mangowalu zi samösa ira alawe khö ndra matua sangumaʼö tödönia wa lö moguna muʼameʼegö tödö ndra alawe. Imane talifusöda ira alawe sotöi Ivon si toröi ba Amerika Selatan, ”Ba mbanuama, oföna manga ndra matua, awena manga ndra alawe. Laʼandrö ba ndraono alawe enaʼö lalau mondrino ba laʼehao nomo, hizaʼi hulö ’razo yomo ba nomo’ ndraono matua, ba labaliʼö ngoni-ngonira ninara hegöi talifusöra alawe.” Imane talifusöda ira alawe sotöi Yingling si toröi ba Asia, ”Ba li niʼogunaʼöma, so gamaedola sangoromaʼö wa lö moguna atua-tua ndra alawe mazui laʼokhögö nekhe-nekhe danga. Yaʼira zombambaya fefu halöwö yomo ba nomo, ba lö latehegö khöra ba wamaʼema bua gera-erara khö woʼomora.” Na so woʼomo ira matua si lö mangoromaʼö faʼomasi ba si lö mamalua goi-goi Zura Niʼamoniʼö, tola iʼasogö gabula dödö ba waʼauri woʼomonia, lö iʼoʼö duma-duma Yesu, ba lö iʼomusoiʼö dödö Yehowa.​—Ef. 5:28, 29; 1 Fe. 3:7.

6. Hadia zinangea lafalua foʼomo ira alawe ba wangaʼaroʼö fahuwusara khö Yehowa?

⁶ Simane si no tatutunö ba artikel silalö, iʼandrö Yehowa khö ndra foʼomo ira matua enaʼö labönökhi zoguna ba wamati ba nösi nomora, laʼasogö waʼahono dödö yomo ba nomo hegöi soguna khöra sero maʼökhö. (1 Ti. 5:8) Hizaʼi, hewaʼae na oya halöwö zi samösa talifusöda ira alawe si no mangowalu, moguna ibeʼe ginötönia ero maʼökhö ba wombaso hegöi ba woʼangerönusi Taromali Lowalangi, ba ilau mangandrö khö Yehowa soroi ba dödö. Tola manö abua wamalua daʼö. Börö me oya halöwö woʼomo ira alawe, te lawaʼö tödöra wa lö inötöra mazui faʼabölöra ba wamalua fefu daʼö. Hewaʼae simanö, moguna sibai labeʼe ginötöra. Hadia mbörö? Börö me omasi Yehowa na tadouʼö ba tarorogö wahuwusada khönia ero zamösana.​—Hal. 17:27.

7. Hewisa enaʼö aoha khö woʼomo ira alawe ba wamosumange hegöi ba woloʼö li woʼomonia?

⁷ Sindruhu sa, tola manö abua khö woʼomo ira alawe ba woloʼö li woʼomonia si lö moʼahonoa. Hizaʼi, hewisa enaʼö tola aoha khönia wamalua noro dödö nibeʼe Yehowa? Moguna aboto ba dödönia hadia mbörö wa ifosumange ba iʼoʼö li woʼomonia ira matua, ba itemaʼö dane-dane si so ba Zura Niʼamoniʼö.

8. Simane nisura ba Efeso 5:22-24, hana wa omasi woʼomo ira alawe ba woloʼö li woʼomonia?

⁸ Omasi woʼomo ira alawe ba woloʼö li woʼomonia börö me daʼö niʼandrö Yehowa khönia. (Baso Efeso 5:22-24.) Ifaduhusi tödö Namania si so ba zorugo börö me iʼila wa iʼomasiʼö ia Yehowa ba no si sökhi khönia fefu goroisa nibeʼe Yehowa.​—5 Mo. 6:24; 1 Yo. 5:3.

9. Hadia mbuania na iʼoʼö li woʼomonia si samösa talifusöda ira alawe?

 ⁹ Ato niha ba gulidanö andre samarou tödö ndra alawe enaʼö lö laʼoʼö goi-goi Yehowa ba lawaʼö tödöra wa no fangaila na laʼoʼö li woʼomora. Niha sangokhögö lala wangera-ngera simane daʼö, lö aboto ba dödöra Lowalangida sebua faʼomasi. Ba wamaigi Yehowa, no ononia alawe fefu dalifusöda ira alawe ba iʼomasiʼö sibai ira. Börö daʼö, tatu lö ibeʼe khöra goroisa si möi fangailara. Na iforege talifusöda ira alawe ba woloʼö li woʼomonia simane si no iʼoroisi Yehowa, tola itugu ohahau dödö nösi nomonia. (Si. 119:165) Tola itugu omuso dödönia, foʼomonia, hegöi iraononia.

10. Hadia wamahaʼö si tola tahalö moroi ba wehede nifaʼema dalifusöda ira alawe sotöi Carol?

¹⁰ Na iʼoʼö li woʼomonia si lö moʼahonoa si samösa foʼomo ira alawe, no iforomaʼö wa iʼomasiʼö ba ifosumange Yehowa, sameʼe noro dödö ba wondröniaʼö. Imane Carol si toröi ba Amerika Selatan, ”Aboto ba dödögu wa tola manö ifalua zala foʼomogu. Aboto göi ba dödögu, na lö uʼailasi woʼomogu ba ginötö ifalua zala, no uforomaʼö wa uʼameʼegö tödö wahuwusagu khö Yehowa. Andrö, lö tebulö uforege ba woloʼö li woʼomogu ira matua börö me omasido uʼomusoiʼö dödö Namagu si so ba zorugo.”

11. Hadia zanolo talifusöda ira alawe sotöi Aneese ba wangefaʼö sala, ba hadia wamahaʼö si tola tahalö moroi ba wehede nifaʼemania?

¹¹ Tola manö irasoi foʼomo ira alawe wa itaria lö ba dödö woʼomonia nirasoinia hegöi bua gera-erania. Tola tobali taha-tahania daʼö ba wamosumange hegöi ba woloʼö li woʼomonia. Nehegö hadia nifalua dalifusöda ira alawe sotöi Aneese ero na irasoi zimane daʼö. Imane, ”Uforege enaʼö lö abao dödögu. Itörö tödögu wa lö hadöi niha si lö irai mamalua sala. Omasido uʼefaʼö zala niha soroi ba dödö simane nifalua Yehowa. Na no uʼefaʼö zalania, tola ifuli urasoi waʼahono dödö.” (Si. 86:5) Na omasi woʼomo ira alawe ba wangefaʼö sala, itugu aoha khönia ba woloʼö li woʼomonia.

12. Hadia manö duma-duma si so ba Zura Niʼamoniʼö?

¹² So ösa zangumaʼö wa ha niha si lö faʼabölö zomasi moloʼö li niha böʼö. Hizaʼi, lö atulö lala wangera-ngera simane daʼö. Ba Zura Niʼamoniʼö, oya duma-duma niha sangokhögö faʼabölö, hizaʼi  omasi ira laʼoʼö li zondröniaʼö yaʼira. Datatutunö hadia wamahaʼö si tola tahalö moroi khö Yesu, Abigaila, hegöi Maria.

13. Hana wa iʼoʼö li Yehowa Yesu? Tutunö.

¹³ Iʼoʼö li Yehowa Yesu. Hizaʼi, tenga daʼö geluahania wa lö khönia faʼatua-tua mazui faʼonekhe. Tola oroma waʼatua-tuania moroi ba lala wamahaʼönia salio muʼila eluaha. (Yoh. 7:45, 46) Aboto ba dödö Yehowa wa oya zi tola ifalua Yesu. Daʼö mbörö wa itehegö khö Yesu falulu fohalöwö khönia ba wamazökhi banua si yawa awö danö. (Amd. 8:30; Heb. 1:2-4) Iʼotarai me tesusugi Yesu, no ifaduhusi tödö khönia Yehowa ”fefu waʼabölö ba zorugo hegöi ba gulidanö”. (Mat. 28:18) Hewaʼae na oya zi tola ifalua Yesu, lö tebulö iʼalui wanuturu lala moroi khö Yehowa. Hadia mbörö? Börö me iʼomasiʼö Namania.​—Yoh. 14:31.

14. Hadia wamahaʼö si tola lahalö foʼomo ira matua moroi ba (a) lala wangera-ngera Yehowa sanandrösa khö ndra alawe? (b) wehede nisura ba Gamaedola 31?

¹⁴ Famahaʼönia khö ndra foʼomo ira matua. Sindruhu sa, no iʼandrö Yehowa khö ndra foʼomo ira alawe enaʼö laʼoʼö li woʼomora. Hizaʼi, tenga daʼö geluahania wa abölö tohude ndra matua moroi khö ndra alawe. Oroma daʼö me ifili Yehowa ndra alawe hegöi ira matua tobali samatörö awö Yesu. (Gal. 3:26-29) No iforomaʼö Yehowa wa ifaduhusi tödö Nononia me ibeʼe khönia noro dödö. Simanö göi, foʼomo ira matua sangokhögö faʼatua-tua, ifaduhusi tödö woʼomonia ba wamalua ngawalö noro dödö. No itutunö Sura Niʼamoniʼö hadia manö zi tola ifalua foʼomo ira alawe. Duma-dumania, ifaigi-faigi wamalua halöwö yomo ba nomo, tola iʼöli ba ifamawa danö, ba mangalui kefe göi ia. (Baso Gamaedola 31:15, 16, 18.) Yaʼia andrö tenga sawuyu si tebai mamaʼema bua gera-erania. Hizaʼi, ifaduhusi tödö ia foʼomonia ira matua ba ifondrondrongo mbua gera-erania. (Baso Gamaedola 31:11, 26, 27.) Na iforomaʼö foʼomo ira matua wa iʼameʼegö tödö woʼomonia, tola iʼoʼö linia foʼomonia si fao faʼomuso dödö.

15. Hadia wamahaʼö si tola lahalö foʼomo ira alawe moroi ba duma-duma Yesu?

¹⁵ Famahaʼönia khö ndra foʼomo ira alawe. Hewaʼae na oya zahöli-höli dödö si no ifalua Yesu, lö iwaʼö tödönia wa no fangaila na iʼoʼö li Yehowa. (1 Ko. 15:28; Fil. 2:5, 6) Simanö göi, ira alawe satua-tua soloʼö duma-duma Yesu, lö iwaʼö tödönia wa no fangaila na iʼoʼö li woʼomonia. Ituhini woʼomonia tenga ha börö waʼomasinia khö woʼomonia, hizaʼi sabölö tohudenia börö me iʼomasiʼö ba ifosumange Yehowa.

16. Moloʼö 1 Samueli 25:3, 23-28, hadia manö gabula dödö nitaögö Abigaila? (Faigi gambara ba guli majalah.)

¹⁶ Töi woʼomo Abigaila yaʼia daʼö Nabalo. Yaʼia andre ira matua sebua fakhögusa, sasiliyawa, ba si lö mangila mangandrö saohagölö. Hewaʼae simanö, lö iʼalui lala saoha Abigaila enaʼö aetu dalu wongambatöra. Na daʼö zomasi ia, tola manö itehegö khö Dawido hegöi khö ndraono buania ba wamunu foʼomonia Nabalo. Hizaʼi, iʼalui lala ba wolumöʼö foʼomonia hegöi soroi yomonia sato sibai. Khalaigö waʼabarani niforomaʼönia me iʼondrasi ndra matua si 400 niha si no molohe fakake wasuwöta, ba fahuhuo ia khö Dawido si fao sumange. Iʼandrö göi waʼebolo dödö ba zala si no ifalua foʼomonia. (Baso 1 Samueli 25:3, 23-28.) Aboto ba dödö Dawido wa Yehowa zangogunaʼö ira alawe sangokhögö faʼabarani andre ba wameʼe mene-mene soguna khönia enaʼö lö ifalua zala sebua.

17. Hadia wamahaʼö si tola lahalö foʼomo ira matua moroi ba waö-waö Dawido hegöi Abigaila?

¹⁷ Famahaʼönia khö ndra foʼomo ira matua. Ira alawe satua-tua Abigaila. Ba no göi iforomaʼö waʼatua-tua Dawido me ifondrondrongo mene-mene nibeʼenia. Buania, lö ibunu niha si lö sala. Simanö göi woʼomo ira matua satua-tua, ihaogö ifatimbaisi mbua gera-era woʼomonia fatua lö ihalö gangetula sebua. Tola manö möi fanolonia  mbua gera-era woʼomonia andrö irege lö ihalö gangetula si fasala.

18. Hadia wamahaʼö si tola lahalö foʼomo ira alawe moroi ba duma-duma Abigaila?

¹⁸ Famahaʼönia khö ndra foʼomo ira alawe. Foʼomo ira alawe sangomasiʼö ba samosumange Yehowa, tola iʼasogö mbua si sökhi ba nösi nomonia, hewaʼae na tenga samosumange Yehowa woʼomonia mazui tenga niha saro ba wamati. Lö iʼalui lala enaʼö aetu dalu wongambatöra. Hizaʼi, ifosumange ba iʼoʼö li woʼomonia enaʼö terou dödönia ba wamahaʼö yaʼia sanandrösa khö Yehowa. (1 Fe. 3:1, 2) Hewaʼae na lö ihalö gangetula foʼomonia ba wamosumange Yehowa, tola omuso dödö Yehowa ba wamaigi yaʼia börö me iforomaʼö waʼalöfaröi hegöi foloʼö khö woʼomonia ira matua.

19. Hawaʼara lö iʼoʼö li woʼomonia si samösa talifusöda ira alawe?

¹⁹ Sindruhu sa, moguna iʼoʼö li woʼomonia si samösa niha Keriso si no tobali foʼomo ira alawe. Hewaʼae simanö, lö iʼoʼö li woʼomonia na iʼandrö khönia ba wanawö huku mazui goi-goi Zura Niʼamoniʼö. Duma-dumania, khalaigö atö na tenga Samaduhuʼö Yehowa woʼomo zi samösa talifusöda ira alawe. Iʼandrö khönia foʼomonia enaʼö ilau falimo, managö, mazui ifalua gamuata tanö böʼö si lö mangomusoiʼö tödö Yehowa. Fefu niha Keriso, tefarahu ba daʼö ndra talifusöda ira alawe si no mangowalu, moguna laʼofönaiʼö ba woloʼö niwaʼö Lowalangi Yehowa. Na laʼandrö khö zi samösa talifusöda ira alawe ba wanawö goi-goi Zura Niʼamoniʼö, moguna itimbagö daʼö ba ihaogö itutunö hadia mbörö wa lö ifalua daʼö si fao faʼasökhi hegöi faʼafaduhu dödö.​—Hal. 5:29.

20. Hezo tola taʼila wa iʼokhögö Maria wahuwusa saro khö Yehowa?

²⁰ Iʼokhögö Maria wahuwusa saro khö Yehowa. Tatu manö, no aboto ba dödönia nösi Zura Niʼamoniʼö. Me fahuhuo ia khö Gelizabe, ina Yohane Samayagö Idanö, töra 20 kali itötöi Maria ngawua wehede si so ba Mbuku Niʼamoniʼö Heberaiʼo. (Luk. 1:46-55) Angeragö atö daʼa: Hewaʼae no famatua Maria khö Yosefo, tenga Yosefo zi oföna iʼondrasi malaʼika Yehowa. Maria zi oföna sibai iʼondrasi malaʼika andrö ba ifatunö wa tumbu dania khönia Nono Lowalangi. (Luk. 1:26-33) Aboto sibai ba dödö Yehowa Maria, ba faduhu dödönia wa hasambalö iʼomasiʼö ba irorogö  Nononia. Lö tebulö iʼokhögö Maria wahuwusa si sökhi khö Yehowa hewaʼae na no mate Yesu ba tesusugi ia ba zorugo.​—Hal. 1:14.

21. Hadia wamahaʼö si tola lahalö foʼomo ira matua moroi ba waö-waö waʼauri Maria si no tesura ba Zura Niʼamoniʼö?

²¹ Famahaʼönia khö ndra foʼomo ira matua. Omuso dödö woʼomo ira matua satua-tua na aboto ba dödö woʼomonia nösi Zura Niʼamoniʼö. Lö abao dödönia khö woʼomonia, ba lö iwaʼö tödönia wa edöna tobali sondröniaʼö yomo ba nomo woʼomonia andrö. Aboto ba dödönia wa tola itolo nösi nomora foʼomonia ira alawe na iʼokhögö waʼaboto ba dödö sanandrösa ba goi-goi Zura Niʼamoniʼö. Tatu manö, hewaʼae na abölö alawa zekola woʼomonia moroi khönia, lö iʼolifugö wa yaʼia zangokhögö noro dödö ba wondröniaʼö famahaʼö zi sambua omo hegöi halöwö ba wamati tanö böʼö.​—Ef. 6:4.

22. Hadia wamahaʼö si tola lahalö foʼomo ira alawe moroi ba duma-duma Maria?

²² Famahaʼönia khö ndra foʼomo ira alawe. Aboto ba dödö zi samösa foʼomo ira alawe wa foʼomonia zondröniaʼö ösi nomora ba wamosumange Yehowa. Hewaʼae simanö, lö tebulö iʼonorogö tödö wondrorogö famatinia samösa. (Gal. 6:5) Börö daʼö, moguna ibeʼe ginötönia ba wamalua famahaʼö samösa hegöi foʼangerönusi. Tola möi fanolonia daʼö enaʼö lö tebulö iʼomasiʼö ba ifosumange Yehowa, ba irasoi waʼomuso dödö ba woloʼö li woʼomonia.

23. Na iʼoʼö li woʼomonia si samösa foʼomo ira alawe, hadia mbua si tola iʼasogö ba waʼaurinia, ba nösi nomonia, hegöi ba mbanua niha Keriso?

²³ Na lö tebulö iʼoʼö li woʼomonia si samösa foʼomo ira alawe börö waʼomasinia khö Yehowa, tola irasoi waʼomuso dödö hegöi faʼahono dödö sabölö ebua moroi ba niha sanimbagö amakhoita Yehowa sanandrösa ba wondröniaʼö. Baero daʼö, no ibeʼe duma-duma si sökhi khö ndraono alawe hegöi iraono matua si bohou ebua. No göi fao ia ba wangaʼasogö faʼomasi hegöi faʼahono dödö, tenga ha yomo ba nomo, hizaʼi ba mbanua niha Keriso. (Tit. 2:3-5) Ba götöda iadaʼa, ira alawe zabölö ato ba gotalua zamosumange Yehowa si lö faröi. (Si. 68:11) Hizaʼi fefu ita, ira alawe hegöi ira matua, no taʼokhögö halöwö si tohude ba mbanua niha Keriso. Ba artikel aefa daʼa, tatutunö hewisa wamaluada halöwö si no tebeʼe khöda ero zamösana.