1. Hadia manö zi tola motatugöi gamuata zi samösa ira matua khö woʼomonia hegöi khö ndraononia?

MOLOʼÖ yaʼugö, hadia geluahania mangokhögö noro dödö ba wondröniaʼö? So ösa ndra matua sondröniaʼö foʼomora hegöi iraonora moloʼö si toʼölö mufalua ba mbanuara mazui ba nösi nomora me föna. Imane talifusöda ira alawe sotöi Yanita si toröi ba Eropa, ”Ba mbanuagu, no mowaʼa ba dödö niha wa abölö tohude ndra matua moroi khö ndra alawe, ba no sinangea na laʼosawuyu ira.” Imane talifusöda ira matua sotöi Luke si toröi ba Amerika Serikat, ”So ösa nama samahaʼö onora matua wa tenga sinangea mufondrondrongo ndra alawe börö me lö moguna mbua gera-era nifaʼemara.” Hizaʼi, lö omasi Yehowa na simane daʼö wangogunaʼö ndra matua noro dödöra ba wondröniaʼö. (Fatimbaisi Mareko 7:13.) Börö daʼö, hewisa lala enaʼö tola tobali högö si sökhi yomo ba nomo zi samösa ira matua?

2. Hadia zinangea aboto ba dödö zi samösa ira matua si tobali högö yomo ba nomo, ba hadia mbörö?

² Enaʼö tola tobali högö si sökhi yomo ba nomo zi samösa ira matua, moguna aboto ba dödönia hadia nitötöna Yehowa khö ndra matua si tobali högö yomo ba nomo. Moguna göi iʼila hadia mbörö wa itatugöi Yehowa noro dödö simane daʼö, ba hewisa woloʼönia duma-duma Yehowa hegöi Yesu. Hana wa moguna aboto ba dödö zi samösa ira matua fefu daʼö? Börö me so ösa kuaso si no ibeʼe Yehowa khö ndra matua si tobali högö yomo ba nomo, ba omasi ia na sökhi wangogunaʼöra kuasora andrö.​—Luk. 12:48b.

3. Moroi ba 1 Korindro 11:3, hadia zaboto ba dödöda sanandrösa ba noro dödö ba wondröniaʼö?

³ Baso 1 Korindro 11:3. Itutunö ayati daʼa gamakhoita sanandrösa ba wondröniaʼö. Iʼogunaʼö gamakhoita andre Yehowa ba wamöföʼö ösi nomonia si so ba zorugo hegöi ba gulidanö. Börö me sondröniaʼö fondrege zalawa Yehowa, iʼokhögö kuaso sabölö ebua. Ibeʼe göi kuaso khö ndraononia, yaʼia daʼö ira malaʼika hegöi niha gulidanö.  Tezofu-zofu dania khöra hewisa wangogunaʼöra kuasora, ba laʼonorogö tödö daʼö föna Yehowa. (Rom. 14:10; Ef. 3:14, 15) No ibeʼe Yehowa kuaso khö Yesu ba wondröniaʼö banua niha Keriso. Hizaʼi, tezofu-zofu dania khö Yesu hewisa lalania ba wondröniaʼö yaʼita. (1 Ko. 15:27) Ibeʼe göi kuaso Yehowa khö ndra foʼomo ira matua ba wondröniaʼö foʼomora hegöi iraonora. Hizaʼi, tezofu-zofu dania khö ndra foʼomo ira matua hewisa lalara ba wondröniaʼö ösi nomora, ba laʼonorogö tödö daʼö föna Yehowa hegöi Yesu.​—1 Fe. 3:7.

4. Hadia kuaso niʼokhögö Yehowa hegöi Yesu?

⁴ Börö me Yehowa zi tobali Högö ba nösi nomonia si so ba zorugo hegöi ba gulidanö, iʼokhögö kuaso ba wamazökhi amakhoita soguna khö ndraononia, ba no sinangea na iʼandrö khöra enaʼö laʼoʼö fefu gamakhoitania andrö. (Yes. 33:22) Börö me Yesu zi tobali högö ba mbanua niha Keriso, no sinangea na ifazökhi gamakhoita ba iʼandrö khöda ba woloʼö daʼö.​—Gal. 6:2; Kol. 1:18-20.

5. Hadia kuaso niʼokhögö niha Keriso si tobali högö yomo ba nomo, ba hadia nola-ola kuaso niʼokhögöra andrö?

⁵ Simane Yehowa hegöi Yesu, no sinangea na lafazökhi gamakhoita soguna ba nösi nomora ira niha Keriso si tobali högö yomo ba nomo. (Rom. 7:2; Ef. 6:4) Hizaʼi, so nola-ola kuaso niʼokhögöra. Duma-dumania, moguna teʼodane-dane ba goi-goi si so ba Daromali Lowalangi fefu gamakhoita nifazökhira. (Amd. 3:5, 6) Ba lö göi khöra kuaso ba wamazökhi amakhoita soguna ba niha si tenga ösi nomora. (Rom. 14:4) Baero daʼö, na no ebua-bua ndraonora ba lö saʼae toröi ira ba nomo, lö tebulö lafosumange ira iraonora, hizaʼi tenga saʼae yaʼira zi tobali sondröniaʼö ba ndraonora andrö.​—Mat. 19:5.

6. Hana wa ifazökhi Yehowa gamakhoita sanandrösa ba wondröniaʼö?

⁶ Ifazökhi Yehowa gamakhoita sanandrösa ba wondröniaʼö börö me iʼomasiʼö nösi nomonia. No buala moroi khönia gamakhoita andre. Börö me ifazökhi gamakhoita ba wondröniaʼö, so waʼahono dödö ba nösi nomonia ba toföfö fefu nifaluara. (1 Ko. 14:33, 40) Na lö ihaogö itatugöi Yehowa haniha zi tobali sondröniaʼö, tola manö fawuka nösi nomonia ba lö khöra faʼomuso dödö. Duma-dumania, lö taʼila haniha zinangea mangai angetula mazui haniha zameʼe fanuturu lala ba wamalua angetula si no muhalö.

7. Moloʼö Efeso 5:25, 28, hadia omasi Yehowa na so ndra matua samatörö ira alawe?

⁷ Na sökhi atö gamakhoita Lowalangi ba wamataro ira matua tobali högö yomo ba nomo, hana wa ato ndra alawe ba götöda andre nifakao ba nifatörö woʼomora? Börö me ato ndra matua sangosiwawöi goi-goi Yehowa sanandrösa ba nösi nomo, ba abölö omasi ira woloʼö si toʼölö mufalua ba mbanuara. Mazui, tola manö göi lafakao woʼomora ira alawe enaʼö larasoi waʼomuso dödö. Duma-dumania, te ifakao woʼomonia si samösa ira matua ba wangoromaʼö wa abölö tohude ia, mazui enaʼö laʼila niha tanö böʼö wa ”sindruhu-ndruhu ira matua” ia. Tola manö iwaʼö wa lö iʼila ifaso woʼomonia ba wangomasiʼö yaʼia, hizaʼi tola iʼalui lala enaʼö iʼataʼufi ia foʼomonia. Ba na ataʼu khönia woʼomonia, iʼogunaʼö daʼö ba wamatörö yaʼia. * Ira matua sangokhögö lala wangera-ngera hegöi samalua amuata simane daʼö, lö lafosumange ndra alawe hewaʼae na sinangea latema menaʼö daʼö. Sindruhu-ndruhu wa lö tefaudu nifaluara andrö ba zomasi Yehowa.​—Baso Efeso 5:25, 28.

8. Hewisa lala enaʼö tola tobali högö si sökhi yomo ba nomo zi samösa ira matua?

⁸ Tola tobali högö si sökhi yomo ba nomo zi samösa ira matua, na iʼoʼö lala Yehowa hegöi Yesu ba  wangogunaʼö kuasora ba wondröniaʼö. Angeragö dombua gamuata niforomaʼö Yehowa hegöi Yesu, ba nehegö hewisa lala woʼomo ira matua ba woloʼö amuata simane daʼö ba wondröniaʼö ösi nomonia.

9. Hewisa wangoromaʼö Yehowa fangide-ngideʼö?

⁹ Fangide-ngideʼö. No fondrege zatua-tua Yehowa. Hewaʼae simanö, ifondrondrongo na so mbua gera-era nifaʼema nono mbanuania. (1 Mo. 18:23, 24, 32) Ibeʼe ginötö ba gomböila dangania si so barö wamatörönia ba wamaʼema bua gera-erara. (1 Ra. 22:19-22) Hewaʼae na moʼahonoa Yehowa, lö itötöna enaʼö moʼahonoa göi ita. Hizaʼi, itolo niha si lö moʼahonoa enaʼö mofozu ira wamosumange yaʼia. (Si. 113:6, 7) Iwaʼö Sura Niʼamoniʼö wa Yehowa andrö no ’sanolo’. (Si. 27:9; Heb. 13:6) Ifaduhuʼö Razo Dawido wa tola iʼasiwai halöwö sebua nibeʼe khönia, ha börö wangide-ngideʼö niforomaʼö Yehowa.​—2 Sa. 22:36.

10. Hewisa wangoromaʼö Yesu fangide-ngideʼö?

¹⁰ Angeragö duma-duma niforomaʼö Yesu. Isasai gahe ndra nifahaʼönia hewaʼae na Soʼaya ba Samahaʼö yaʼira ia. Hadia mbörö wa omasi Yehowa na tesura waö-waö salua andrö bakha ba Zura Niʼamoniʼö? Börö me omasi ia ibeʼe duma-duma ba niha fefu, tefarahu ba daʼö ndra matua si tobali högö yomo ba nomo. Imane Yesu, ”No ubeʼe khömi duma-duma enaʼö mifalua göi zi no ufalua khömi.” (Yoh. 13:12-17) Hewaʼae na ebua kuaso niʼokhögö Yesu, lö itötöna enaʼö so ngoni-ngoninia. Hizaʼi, omasi ia tobali enoni ba niha böʼö.​—Mat. 20:28.

11. Hadia wamahaʼö si tola ihalö si samösa ira matua si tobali högö yomo ba nomo moroi ba wangide-ngideʼö niforomaʼö Yehowa hegöi Yesu?

¹¹ Famahaʼönia khöda. Oya lala si tola ifalua si samösa ira matua si tobali högö yomo ba nomo ba wangoromaʼö fangide-ngideʼö. Duma-dumania, lö itötöna wa moʼahonoa woʼomonia hegöi iraononia. Ifondrondrongo mbua gera-era nösi nomonia hewaʼae lö fao dödöra ba mbua gera-erania. Imane Marley si toröi ba Amerika Serikat, ”Itaria faböʼö mbua gera-erama foʼomogu. Hizaʼi, uʼila wa ifosumange ba iʼameʼegö tödö ndraʼo börö me iʼandrö sakali mbua gera-eragu ba ihaogö woʼangeragö daʼö fatua lö ihalö gangetula.” Baero daʼö, foʼomo ira matua sangokhögö fangide-ngideʼö, omasi ia ifalua halöwö yomo ba nomo hewaʼae na halöwö ndra alawe daʼö moloʼö famaigi niha si so ba mbanua si toröi yaʼia. Hizaʼi, lö aoha wamalua daʼö. Hadia mbörö? Imane talifusöda ira alawe sotöi Rachel, ”Ba mbanuama, na so woʼomo ira matua sanolo foʼomonia ba wanasa figa mazui ba wamöföʼö omo, lawaʼö ira si falazi omo khönia hegöi  si fahatö khönia wa tenga ’sindruhu-ndruhu ira matua’ ia andrö. Lawalinga tebai ifatörö woʼomonia.” Na no toʼölö lala wangera-ngera simane daʼö ba mbanuamö, törö tödöu wa omasi Yesu wanasai ahe ndra nifahaʼönia, hewaʼae na halöwö zawuyu daʼö ba wamaigi niha sato. Ira matua si tobali högö si sökhi yomo ba nomo, lö iʼosambuaʼö dödönia ba lala wangera-ngera niha sanandrösa khönia. Hizaʼi, iʼofönaiʼö wangomusoiʼö tödö woʼomonia hegöi iraononia. Baero wangide-ngideʼö, hadia gamuata tanö böʼö sinangea iʼokhögö si samösa ira matua si tobali högö yomo ba nomo?

12. Hadia nifalua Yehowa hegöi Yesu börö me laʼomasiʼö ita?

¹² Faʼomasi. Fefu nifalua Yehowa, teʼodane-dane ba waʼomasi. (1 Yo. 4:7, 8) Si fao faʼomasi, iʼogunaʼö Daromalinia, Sura Niʼamoniʼö, hegöi organisasinia ba wombönökhi soguna khöda ba wamati. Ifaduhuʼö ba dödöda wa iʼomasiʼö ita enaʼö tarasoi waʼahono dödö. Hewisa göi zoguna khöda sero maʼökhö? Yehowa andrö no ”sangöhöna fefu hadia ia si möi fangohahau dödöda”. (1 Ti. 6:17) Na tafalua zala, ibeʼe khöda degu-tegu. Hizaʼi, lö iböhöli wangomasiʼö yaʼita. Börö waʼomasi, ihenaigö khöda höli. Simanö göi Yesu, börö me iʼomasiʼö ita, itehegö nosonia salahida. (Yoh. 3:16; 15:13) Lö hadöi si tola manaha Yehowa hegöi Yesu ba wangomasiʼö niha si lö faröi khöra.​—Yoh. 13:1; Rom. 8:35, 38, 39.

13. Hana wa moguna iforomaʼö waʼomasi ba nösi nomonia si samösa ira matua si tobali högö yomo ba nomo? (Faigi göi kotak ” Na Awena Mangowalu zi Samösa Ira Matua, Hewisa Lala Enaʼö Ifosumange Ia Foʼomonia?”)

¹³ Famahaʼönia khöda. Fefu nifalua zi samösa ira matua si tobali högö yomo ba nomo, moguna teʼodane-dane ba waʼomasi. Hana wa moguna sibai daʼö? Imane sinenge sotöi Yohane ba wameʼe fanema li, ”Si lö mangomasiʼö talifusönia [mazui ösi nomonia] niʼila hörönia, tebai iʼomasiʼö Lowalangi si lö iʼila hörönia.” (1 Yo. 4:11, 20) Ira matua sangomasiʼö ösi nomonia ba somasi moloʼö duma-duma Yehowa hegöi Yesu, hasambalö ibönökhi zoguna khöra ba wamati, itolo ira ba worasoi faʼahono dödö, ba iʼasogö zoguna khöra sero maʼökhö. (1 Ti. 5:8) Ifahaʼö ba ibeʼe degu-tegu ba ndraononia. Lö göi tebulö ifahaʼö ia ba wangai angetula samolakhömi töi Yehowa ba sangaʼasogö bua si sökhi ba nösi nomonia. Datatutunö hewisa lala wamalua fefu daʼö, ba tafaigi hewisa woloʼö zi  samösa ira matua si tobali högö yomo ba nomo duma-duma Yehowa hegöi Yesu.

14. Hewisa lala zi samösa ira matua si tobali högö yomo ba nomo ba wombönökhi soguna ba wamati ba nösi nomonia?

¹⁴ Ibönökhi zoguna ba wamati ba nösi nomonia. Simane Amania, itatugöi Yesu enaʼö tebönökhi zoguna ba wamati ba niha soloʼö khönia. (Mat. 5:3, 6; Mrk. 6:34) Simanö göi nifalua zi samösa ira matua si tobali högö yomo ba nomo, iʼofönaiʼö wombönökhi soguna ba wamati ba nösi nomonia. (5 Mo. 6:6-9) Ba wamalua daʼö, itatugöi enaʼö fao ia ba nösi nomonia ba wombaso hegöi ba wamahaʼö yaʼira ba Daromali Lowalangi, möi ira ba gangowuloa, laturiaigö duria somuso dödö, ba laforege ba wangokhögö hegöi ba wondrorogö fahuwusa si sökhi khö Yehowa.

15. Hadia lala si tola ifalua si samösa ira matua si tobali högö yomo ba nomo enaʼö larasoi waʼahono dödö ira ösi nomonia?

¹⁵ Iforege enaʼö larasoi waʼahono dödö ira ösi nomonia. Ifaduhuʼö Yehowa föna niha sato wa iʼomasiʼö Yesu. (Mat. 3:17) Asese göi iforomaʼö waʼomasinia Yesu ba niha soloʼö khönia, moroi ba wehede hegöi nifaluania. Lawaʼö göi ira niha soloʼö khönia wa laʼomasiʼö ia. (Yoh. 15:9, 12, 13; 21:16) Ira matua si tobali högö yomo ba nomo, tola iforomaʼö wa iʼomasiʼö woʼomonia hegöi iraononia moroi ba nifaluania. Duma-dumania, fao ia khöra ba wamalua famahaʼö ba Zura Niʼamoniʼö. Iʼombakhaʼö göi khöra wa iʼomasiʼö ba iʼameʼegö tödö ira, ba na tefaudu, isuno ira föna niha böʼö.​—Amd. 31:28, 29.

16. Hadia nasa zinangea ifalua si samösa ira matua si tobali högö yomo ba nomo, ba hadia zinangea iʼangenanöi?

¹⁶ Iʼasogö zoguna sero maʼökhö ba nösi nomonia. Iʼasogö Yehowa zoguna sero maʼökhö ba ndraono Gizaraʼeli, hewaʼae na ihuku ira börö me lö moloʼö ira khönia. (5 Mo. 2:7; 29:5) Iʼasogö göi zoguna khöda ba ginötö andre. (Mat. 6:31-33; 7:11) Simanö göi Yesu, ibeʼe gö niha soloʼö khönia. (Mat. 14:17-20) Baero daʼö, ifadöhö wökhöra. (Mat. 4:24) Enaʼö tola iʼomusoiʼö dödö Yehowa si samösa ira matua si tobali högö yomo ba nomo, moguna iʼasogö zoguna sero maʼökhö ba nösi nomonia. Hizaʼi, so zinangea iʼangenanöi. Böi talafo oya iʼogunaʼö ginötönia ba wombönökhi soguna khöra sero maʼökhö, irege lö inötönia ba wombönökhi soguna khöra ba wamati ba lö iforege enaʼö larasoi waʼahono dödö.

17. Hadia duma-duma nibeʼe Yehowa hegöi Yesu ba lala wamahaʼöra yaʼita hegöi fameʼera tegu-tegu?

¹⁷ Ifahaʼö nösi nomonia si fao faʼomasi. Ifahaʼö ba ibeʼe khöda degu-tegu Yehowa börö me omasi ia wanolo yaʼita. (Heb. 12:7-9) Simane Amania, ifahaʼö göi niha si so barö wondröniaʼönia Yesu si fao faʼomasi. (Yoh. 15:14, 15) Hewaʼae na abeʼe mene-mene nibeʼenia, ifaʼema daʼö si fao faʼasökhi dödö. (Mat. 20:24-28) Aboto ba dödönia wa niha si lö moʼahonoa ita ba asese tafalua zala.​—Mat. 26:41.

18. Hadia zi tebai iʼolifugö si samösa ira matua si tobali högö yomo ba nomo?

¹⁸ Ira matua si tobali högö yomo ba nomo soloʼö duma-duma Yehowa hegöi Yesu, lö olifu ia wa lö moʼahonoa nösi nomonia. Na lafalua zala, lö mofönu  ia khöra si fao fehede sabeʼe hegöi bözi-bözi. (Kol. 3:19) Hizaʼi, iʼoʼö goi-goi nisura ba Galatia 6:1, ba ’ihaogö’ wameʼe tegu-tegu ba nösi nomonia börö me iʼila wa niha si lö moʼahonoa göi ia. Simane Yesu, aboto ba dödönia wa lala fondrege zi sökhi ba wamahaʼö, yaʼia daʼö moroi ba duma-duma nibeʼenia.​—1 Fe. 2:21.

19-20. Na ihalö gangetula si samösa ira matua si tobali högö yomo ba nomo, hewisa woloʼönia duma-duma Yehowa hegöi Yesu?

¹⁹ Iʼangeragö zoguna ba nösi nomonia na ihalö gangetula. Lö tebulö ihalö Yehowa gangetula si tola mangaʼasogö bua si sökhi ba gomböila dangania. Duma-dumania, ihalö gangetula ba womböwöi faʼauri, tenga börö wangomusoiʼö tödönia samösa, hizaʼi börö me omasi ia na tarasoi göi waʼowua-wua dödö. Baero daʼö, lö samaso yaʼia ba wameʼe Ononia enaʼö teʼefaʼö horöda. Yaʼia samösa zangai angetula ba wamalua daʼö börö me omasi ia itolo ita. Ihalö göi gangetula Yesu si tola möi fanolo niha tanö böʼö. (Rom. 15:3) Duma-dumania, iʼogunaʼö ginötönia wolombase ba wamahaʼö niha böʼö, hewaʼae na marase sibai ia me luo daʼö.​—Mrk. 6:31-34.

²⁰ Aboto ba dödö ndra matua si tobali högö si sökhi yomo ba nomo wa noro dödö sabölö abua niʼokhögönia, yaʼia daʼö ba wangai angetula si sökhi soguna ba nösi nomonia, ba sindruhu-ndruhu iʼameʼegö tödö wamalua daʼö. Itimbagö wangai angetula moloʼö somasi-masi dödönia mazui moloʼö nirasoinia ba ginötö daʼö. Hizaʼi, itehegö khö Yehowa ba wamahaʼö yaʼia wangai angetula si sökhi. * (Amd. 2:6, 7) Na ifalua daʼö, tenga ha soguna khönia samösa niʼangeragönia, hizaʼi iʼangeragö göi zoguna ba niha tanö böʼö.​—Fil. 2:4.

21. Hadia nitutunöda ba artikel aefa daʼa?

²¹ No ibeʼe Yehowa noro dödö sabua khö ndra matua si tobali högö yomo ba nomo, ba omasi ia na laforege zabölö sökhi ba wamalua halöwöra andrö. Na iforege foʼomo ira matua ba woloʼö duma-duma Yehowa hegöi Yesu, tola tobali ia högö si sökhi yomo ba nomo. Ba na ifalua göi noro dödönia foʼomo ira alawe, tola larasoi waʼomuso dödö ba wongambatöra. Hewisa zinangeania lala wangera-ngera zi samösa foʼomo ira alawe ba wamaigi noro dödö niʼokhögö woʼomonia, ba hadia manö daha-taha nitaögönia? Tatutunö wanema linia ba artikel aefa daʼa.