1. Hadia mbörö wa tola so wahasara dödö ba nösi nomo Yehowa?

OMUSO dödöda me tola tobali ita ösi nomo Yehowa. Hana wa tola so wahasara dödö ba faʼohahau dödö ba gotaluada? Sambua dane-danenia, börö me taforege ba woloʼö amakhoita Yehowa sanandrösa ba wondröniaʼö. Ba na taforege enaʼö itugu aboto ba dödöda gamakhoita sanandrösa ba wondröniaʼö andre, tola itugu aro wahasara dödöda.

2. Hadia manö wanofu nitutunöda ba artikel daʼa?

² Ba artikel daʼa, tatutunö haniha zondröniaʼö ba mbanua niha Keriso. Taʼalui göi wanema li moroi ba wanofu-nofu andre: Hadia halöwö nibeʼe Yehowa khö ndra talifusöda ira alawe ba mbanua niha Keriso? Hadia no mufataro fefu ndra talifusöda ira matua tobali högö ndra talifusöda ira alawe maʼafefu? Hewaʼae na no tebeʼe noro dödö khö zatua sokubaloi ba wondröniaʼö ira talifusöda ba mbanua niha Keriso, hadia fagölö noro dödö niʼokhögönia andrö ba noro dödö niʼokhögö ndra matua si tobali högö yomo ba nomo ba wondröniaʼö foʼomonia hegöi iraononia? Si oföna, datatutunö hadia halöwö niʼokhögö ndra talifusöda ira alawe, ba hewisa zinangeania gamuatada khöra.

3. Hadia zanolo yaʼita ba wangoromaʼö fangandrö saohagölö ba waʼerege dödö ndra talifusöda ira alawe?

³ Taʼandrö sibai saohagölö ba waʼerege dödö ndra talifusöda ira alawe ba wondrorogö ösi nomora, ba wanuriaigö turia somuso dödö, hegöi ba wanolo niha böʼö ba mbanua niha Keriso. Tola itugu taʼameʼegö tödö ira na taʼangerönusi hewisa wamaigi Yehowa ira talifusöda  andrö. Tola göi tafahaʼö ita moroi ba gamuata zinenge sotöi Faulo khö ndra alawe.

4. Hewisa wangoromaʼö Zura Niʼamoniʼö wa iʼameʼegö tödö ndra matua hegöi ira alawe Yehowa?

⁴ Iforomaʼö Sura Niʼamoniʼö wa iʼameʼegö tödö ndra matua hegöi ira alawe Yehowa. Duma-dumania, me abad siföföna, ibeʼe Yehowa geheha niʼamoniʼö khö ndra matua hegöi ira alawe irege tola lafalua dandra sahöli-höli dödö, simane fahuhuosa ba ngawalö li. (Hal. 2:1-4, 15-18) Ibayoini göi ira faoma ehehania niʼamoniʼö, enaʼö tola mamatörö ira awö Keriso ba zorugo. (Gal. 3:26-29) Ibeʼe göi ginötö khö ndra matua hegöi ira alawe ba wangokhögö faʼauri si lö aetu ba gulidanö. (Fam. 7:9, 10, 13-15) No göi ibeʼe halöwö khö ndra matua hegöi ira alawe ba wanuriaigö turia somuso dödö hegöi ba wamahaʼö niha böʼö. (Mat. 28:19, 20) Duma-dumania, itutunö buku Halöwö Zinenge sanandrösa khö zi samösa talifusöda ira alawe sotöi Firisikila. Yaʼia hegöi foʼomonia sotöi Akila, latutunö zindruhu sabölö tefaudu khö zi samösa ira matua salawa sekola sotöi Afolo.​—Hal. 18:24-26.

5. Simane nitutunö ba Luka 10:38, 39, 42, hewisa gamuata Yesu khö ndra alawe?

⁵ Iʼameʼegö tödö sibai ndra alawe Yesu. Lö iʼoʼö lala wangera-ngera niha Farizaiʼo sangumaʼö wa abölö tohude ndra matua moroi khö ndra alawe. Lö omasi ira fahuhuo khö ndra alawe föna niha sato, mendrua manö ba wanutunö ösi Mbuku Niʼamoniʼö. Hizaʼi, omasi Yesu ba wanutunö ösi Mbuku Niʼamoniʼö khö ndra matua hegöi ira alawe. * (Baso Luka 10:38, 39, 42.) Itehegö göi enaʼö fao khönia ösa ndra alawe ba wamalua fanuriaigö ba mbanua sagaröu. (Luk. 8:1-3) Ibeʼe göi halöwö si tohude khö ndra alawe ba wangombakha khö ndra sinengenia wa no tesusugi ia.​—Yoh. 20:16-18.

6. Hewisa wangoromaʼö Zura Niʼamoniʼö wa iʼameʼegö tödö ndra alawe Faulo?

⁶ Iforomaʼö Sura Niʼamoniʼö wa iʼameʼegö tödö ndra alawe Faulo. Duma-dumania, ifasugi ba dödö Dimoteo Faulo enaʼö ifosumange ’ndra alawe satua hulö simane inania’ ba iʼameʼegö tödö ’ndra alawe sawuyu döfi hulö dalifusönia alawe’. (1 Ti. 5:1, 2) Oya sibai nifalua Waulo ba wanolo Timoteo enaʼö tola tobali ia niha Keriso saro ba wamati. Hewaʼae simanö, ifaduhuʼö göi Faulo wa ina Dimoteo hegöi nenenia zi oföna sibai mamahaʼö Timoteo ba ”Mbuku Niʼamoniʼö”. (2 Ti. 1:5; 3:14, 15) Me ifaʼoheʼö zurania Faulo ba mbanua niha Keriso si so ba Roma, itötöi ösa döi ndra talifusöda ira alawe. Itötöi hadia manö zi no lafalua ira talifusöda andrö, ba ifatunö wa iʼandrö sibai saohagölö ba waʼerege dödöra.​—Rom. 16:1-4, 6, 12; Fil. 4:3.

7. Hadia manö wanofu nitutunöda?

⁷ Simane nitutunö ba ngenoli si no tataluʼi, lö irai iwaʼö Sura Niʼamoniʼö wa abölö tohude ndra matua moroi khö ndra alawe. No sebua böli fefu ndra talifusöda ira alawe sangoromaʼö faʼomasi hegöi faʼoböwö ba mbanua niha Keriso. Aboto ba dödö ndra satua sokubaloi wa amuatara si sökhi andre zondrorogö faʼahono dödö hegöi fahasara dödö ba mbanua niha Keriso. Iadaʼa, datatutunö wanofu-nofu andre: Hana wa iʼandrö Yehowa enaʼö itaria lafake mbalu-balu högö ira alawe? Baero daʼö, börö me ha talifusöda ira matua nifataro tobali satua sokubaloi hegöi enoni, hadia daʼö geluahania wa no mufataro göi ira tobali högö ndra talifusöda ira alawe maʼafefu?

8. Moloʼö Efeso 5:23, hadia no mufataro fefu ndra talifusöda ira matua tobali högö ndra talifusöda ira alawe maʼafefu? Tutunö.

⁸ Hadia no mufataro fefu ndra talifusöda ira matua tobali högö ndra talifusöda ira alawe maʼafefu? Löʼö! Högö ndra talifusöda ira alawe ba mbanua niha Keriso yaʼia daʼö Keriso. (Baso Efeso 5:23.) Yomo ba nomo, foʼomo ira matua zi tobali högö woʼomonia. Hewaʼae na no tebayagö idanö zi samösa ono matua, tenga yaʼia zi tobali högö ninania. (Ef. 6:1, 2) Ba mbanua niha Keriso,  so nola-ola noro dödö nibeʼe khö ndra satua sokubaloi ba wondröniaʼö ira talifusöda. (1 Te. 5:12; Heb. 13:17) Hewisa göi dalifusöda ira alawe si lö sangowalu si lö saʼae toröi ba ngai zatuania? Lö tebulö ifosumange zatuania. Hizaʼi, tenga saʼae barö wondröniaʼö namania so ia. Ifosumange göi ndra satua sokubaloi. Hizaʼi, simane talifusöda ira matua, ha samösa zi tobali högö khönia ba mbanua niha Keriso, yaʼia daʼö Yesu.

9. Hana wa itaria lafake mbalu-balu högö talifusöda ira alawe?

⁹ Hewaʼae na lö mufataro ira tobali högö ndra talifusöda ira alawe maʼafefu, ha ira matua nifataro Yehowa ba wondröniaʼö halöwö famosumange yaʼia ba mbanua niha Keriso. Lö nibeʼe Yehowa noro dödö simane daʼö khö ndra alawe. (1 Ti. 2:12) Hadia mbörö? Enaʼö toföfö mbanua niha Keriso. Daʼö göi mbörö wa itatugöi Yehowa enaʼö Yesu zi tobali högö ndra matua. Na moguna ifalua talifusöda ira alawe halöwö si toʼölö ifalua talifusöda ira matua, no itatugöi Yehowa enaʼö ifake mbalu-balu högö. * (1 Ko. 11:4-7) Tenga ba wangailasi yaʼira wa iʼandrö khöra Yehowa ba wamalua daʼö. Hizaʼi, omasi Yehowa na laforomaʼö wa lafosumange gamakhoitania sanandrösa ba wondröniaʼö. Iadaʼa, datatutunö wanofu andre: Hawaʼebua noro dödö si no tebeʼe khö ndra matua si tobali högö yomo ba nomo hegöi khö ndra satua sokubaloi?

10. Hana wa so ösa zatua sokubaloi sangumaʼö tödöra wa yaʼira zinangea motatugöi amakhoita soguna khö ndra talifusöda ba mbanua niha Keriso?

¹⁰ Laʼomasiʼö Keriso ira satua sokubaloi, ba laʼomasiʼö göi ’mbiri-biri’ si no ifaduhusi tödö khöra Yehowa hegöi Yesu. (Yoh. 21:15-17) Börö me iʼameʼegö tödö sibai ndra talifusöda ba mbanua niha Keriso, tola manö iwaʼö tödönia si samösa satua sokubaloi wa yaʼia andrö ama khö ndra talifusöda. Te iwaʼö tödönia, na högö yomo ba nomo  zinangea motatugöi amakhoita ba wolumöʼö ösi nomonia, satua sokubaloi göi zinangea motatugöi amakhoita ba wolumöʼö biri-biri Lowalangi. Tola manö tumbu ba dödö zi samösa satua sokubaloi ba wamalua daʼö börö me so ösa ndra talifusöda sangandrö khönia ba wangai angetula soguna khöra. Hizaʼi, hadia fagölö noro dödö niʼokhögö zatua sokubaloi ba noro dödö niʼokhögö ndra matua si tobali högö yomo ba nomo?

11. Hadia manö waʼafagölö noro dödö högö yomo ba nomo hegöi noro dödö zatua sokubaloi?

¹¹ Iforomaʼö sinenge sotöi Faulo wa so ösa waʼafagölö noro dödö högö yomo ba nomo ba noro dödö zatua sokubaloi. (1 Ti. 3:4, 5) Duma-dumania, itötöna Yehowa ba nösi nomo maʼafefu enaʼö laʼoʼö li ndra matua si tobali högö yomo ba nomora. (Kol. 3:20) Itötöna göi Yehowa ba nösi mbanua niha Keriso maʼafefu enaʼö laʼoʼö li ndra satua sokubaloi. Baero daʼö, iʼandrö Yehowa khö ndra satua sokubaloi hegöi khö ndra matua si tobali högö yomo ba nomo, enaʼö latatugöi wa tebönökhi zoguna ba wamati ba niha si so barö wondröniaʼöra. Moguna göi laforege enaʼö larasoi waʼomasira ira niha si so barö wondröniaʼöra. Ba simane högö si sökhi yomo ba nomo, moguna latolo nösi mbanua niha Keriso ira satua sokubaloi na alua khöra gabula dödö. (Yak. 2:15-17) No iʼoroisi Yehowa khö ndra satua sokubaloi hegöi khö ndra matua si tobali högö yomo ba nomo, enaʼö latolo fefu niha si so ba mbanua niha Keriso mazui ösi nomora ba woloʼö oroisania. Ifangelama göi ira  enaʼö ’böi lasawö zi no tesura’ ba Zura Niʼamoniʼö.​—1 Ko. 4:6.

12-13. Simane nitutunö ba Roma 7:2, hadia gamaehuta noro dödö högö yomo ba nomo ba noro dödö zatua sokubaloi?

¹² So göi ösa gamaehuta noro dödö zatua sokubaloi ba noro dödö högö yomo ba nomo. Duma-dumania, no ifataro ndra satua sokubaloi Yehowa enaʼö tobali ira sangetuʼö huku. Na so niha samalua horö si lö mamalalini era-era, ira satua sokubaloi zangefasi niha daʼö moroi ba mbanua niha Keriso. Hizaʼi, lö nibeʼe Yehowa noro dödö simane daʼö khö ndra matua si tobali högö yomo ba nomo.​—1 Ko. 5:11-13.

¹³ So ösa noro dödö nibeʼe Yehowa khö ndra matua si tobali högö yomo ba nomo, si lö nibeʼenia khö ndra satua sokubaloi. Sambua ba gotaluania, no ibeʼe khöra noro dödö ba wamazökhi amakhoita hegöi ba wotatugöi enaʼö lafalua daʼö ösi nomora. (Baso Roma 7:2.) Duma-dumania, tola itatugöi hawaʼalawa mbongi mangawuli ndraononia ba nomo. Tola göi ihuku ndraononia na lö lafalua zi no ifakhoi andrö. (Ef. 6:1) Tatu manö, fatua lö ifazökhi gamakhoita si samösa ira matua si tobali högö si sökhi yomo ba nomo, moguna ifahuhuosi daʼö khö woʼomonia börö me ”ha sambua boto” ira. *—Mat. 19:6.

14. (a) Simane nitutunö ba Mareko 10:45, hana wa tefaudu sibai na Yesu nifataro Yehowa tobali högö ba mbanua niha Keriso? (b) Hadia noro dödö ndra Boto Solohe? (Faigi kotak ” Noro Dödö Ndra Boto Solohe”.)

¹⁴ No itehegö nosonia Yesu tobali höli, ba iʼogunaʼö daʼö Yehowa ba wangöhöli fefu niha si farahu ba mbanua niha Keriso. (Baso Mareko 10:45; Hal. 20:28; 1 Ko. 15:21, 22) Börö daʼö, tefaudu sibai na Yesu nifataro Yehowa tobali högö mbanua niha Keriso. Daʼö mbörö wa Yesu zinangea mamazökhi  amakhoita soguna ba zi samösa niha, ba zi sambua ösi nomo, hegöi ba mbanua niha Keriso maʼafefu. Yaʼia göi zinangea motatugöi enaʼö tafalua gamakhoitania andrö. (Gal. 6:2) Hizaʼi, tenga ha daʼö nifalua Yesu. Irorogö ba iʼomasiʼö ita zamösana.​—Ef. 5:29.

15-16. Hadia wamahaʼö si tola öhalö moroi ba mbua gera-era nifaʼema dalifusöda Marley hegöi Benjamin?

¹⁵ Sambua lala nifalua ndra talifusöda ira alawe ba wangoromaʼö wa lafosumange Keriso yaʼia daʼö laʼoʼö wanuturu lala nibeʼe ndra matua si no mufataro ba wondrorogö yaʼira. Ato ndra talifusöda ira alawe si fao tödö ba wehede Marley si toröi ba Amerika Serikat. Imane, ”No sebua böli ba wamaigigu noro dödö tobali foʼomo hegöi talifusö ira alawe ba mbanua niha Keriso. Moguna uforege ba woʼameʼegö tödö noro dödö si no ibeʼe Yehowa khö woʼomogu hegöi khö ndra satua sokubaloi. Hizaʼi, itugu aoha khögu ba wamalua daʼö börö me iʼameʼegö tödö ndraʼo foʼomogu hegöi talifusöda ira matua ba mbanua niha Keriso, ba laʼandrö saohagölö ba halöwö si no ufalua.”

¹⁶ Sambua lala nifalua ndra talifusöda ira matua ba wangoromaʼö wa aboto ba dödöra gamakhoita sanandrösa ba wondröniaʼö, yaʼia daʼö laʼameʼegö tödö ba lafosumange ndra talifusöra ira alawe. Imane talifusöda ira matua sotöi Benjamin si toröi ba Inggris, ”Oya wamahaʼö si tola uhalö moroi ba mbua gera-era nifaʼema ndra talifusöda ira alawe ba gangowuloa. Labeʼe göi khögu mene-mene sanandrösa ba wamalua famahaʼö samösa, ba hewisa lala enaʼö itugu onekhe ndraʼo ba wanuriaigö hegöi ba wamahaʼö. Moloʼö yaʼo, no sebua böli fefu halöwö si no lafalua.”

17. Hana wa moguna taʼameʼegö tödö goi-goi sanandrösa ba wondröniaʼö?

¹⁷ Na fefu niha ba mbanua niha Keriso—ira matua, ira alawe, högö yomo ba nomo, hegöi ira satua sokubaloi—aboto ba dödöra ba laʼameʼegö tödö goi-goi sanandrösa ba wondröniaʼö, tola laʼasogö waʼohahau dödö ba mbanua niha Keriso. Ba sabölö tohudenia, tefolakhömi Namada sebua faʼomasi sotöi Yehowa si so ba zorugo.​—Si. 150:6.