1-2. Moloʼö Mataiʼo 5:11, hewisa zinangeania wamaigida fanandraigö?

NO IFABUʼU Yesu khö ndra soloʼö khönia wa hasambalö larasoi waʼomuso dödö sindruhu. Hizaʼi, ifangelama göi niha sangomasiʼö yaʼia wa hasambalö göna ira fanandraigö. (Mat. 10:22, 23; Luk. 6:20-23) Omuso dödöda me no tobali ita nifahaʼö Keriso. Hizaʼi, hewisa dödöda na lasaisi ita ira ösi nomoda, lafakao ita ira samatörö, mazui ladönisi dödöda ba wamalua amuata si fasala ira awöda sekola mazui ira awöda wohalöwö? Tola manö tarasoi waʼaombö dödö na taʼangeragö fefu daʼö.

² Si toʼölönia, lö omuso dödö niha na göna ira fanandraigö. Hizaʼi, daʼö nifarou Daromali Lowalangi enaʼö tafalua. Duma-dumania, isura Yakobo wa lö moguna aetu dötönaföda na göna ita fanandraigö, hizaʼi tabaliʼö faʼomuso dödöda daʼö. (Yak. 1:2, 12) Ba iwaʼö khöda Yesu wa moguna taʼomusoiʼö dödöda na göna ita famakao. (Baso Mataiʼo 5:11.) Hewisa enaʼö lö tebulö tarasoi waʼomuso dödö hewaʼae göna ita fanandraigö? Tola tafahaʼö ita moroi ba nösi zura Yakobo nisurania khö ndra niha Keriso me abad siföföna. Si oföna, datatutunö hadia manö wanandraigö nitaögöra.

3. Hadia zalua lö ara me no aefa tobali nifahaʼö Yesu Yakobo?

³ Lö ara me no aefa tobali nifahaʼö nakhi tiri Yesu sotöi Yakobo, göna famakao ndra niha Keriso si so ba Yeruzalema. (Hal. 1:14; 5:17, 18) Ba me labunu nifahaʼö sotöi Sitefano, ato niha Keriso soloi moroi ba mbanua andrö ba ”oi zara muzawili zato ba zi sagörö Yudea hegöi Samaria” irugi Zifirusi hegöi Andriokhia. (Hal. 7:58–8:1; 11:19) Oya wamakao nitaögö ndra nifahaʼö. Hewaʼae simanö, lö tebulö owölö-ölö ira ba wanuriaigö turia somuso dödö gofu  hezo so möi ira. Buania, oya mbanua niha Keriso nifasindro ba zi sagörö Famatörö Romawi. (1 Fe. 1:1) Hizaʼi aefa daʼö, itugu oya manö wamakao salua khöra.

4. Hadia wanandraigö tanö böʼö nitaögö niha Keriso me abad siföföna?

⁴ Oya wanandraigö tanö böʼö nitaögö niha Keriso me abad siföföna. Duma-dumania, te me döfi 50 M, ifaretakö fefu niha Yahudi kaisaro Romawi sotöi Kalaudio ba wondröi banua Roma. Börö daʼö, lafaso niha Yahudi si no tobali niha Keriso ba wondröi omora ba lasawa nahia böʼö. (Hal. 18:1-3) Te me döfi 61 M, isura sinenge sotöi Faulo wa no laʼoʼaya föna niha sato ndra talifusönia niha Keriso, lakuru, ba larabu gokhötara. (Heb. 10:32-34) Ba simane niha tanö böʼö, lataögö waʼanumana hegöi fökhö ira niha Keriso.​—Rom. 15:26; Fil. 2:25-27.

5. Hadia wanofu-nofu niʼaluida fanema li?

⁵ Me isura zurania Yakobo fatua lö döfi 62 M, sindruhu-ndruhu iʼila wanandraigö salua khö ndra talifusönia. Ibeʼe gehehania Yehowa khö Yakobo ba wanura mene-mene si tefaudu khö ndra niha Keriso andrö, enaʼö lö tebulö larasoi waʼomuso dödö hewaʼae göna ira fanandraigö. Dataʼosisiʼö nisura Yakobo, ba tabeʼe wanema li ba wanofu-nofu andre: Hadia geluaha waʼomuso dödö nitutunö Yakobo? Hadia mbörö wa tola taya waʼomuso dödö khö zi samösa niha Keriso? Ba hewisa wa tola möi fanoloda waʼatua-tua, famati, hegöi faʼabarani ba faʼabölö enaʼö lö tebulö taʼokhögö waʼomuso dödö gofu hadia wanandraigö nitaögöda?

6. Moloʼö Luka 6:22, 23, hana wa tola irasoi waʼomuso dödö si samösa niha Keriso hewaʼae na göna ia fanandraigö?

⁶ Te lawaʼö tödöra niha wa awena larasoi waʼomuso dödö na lö fökhö-fökhöra, oya gefera,  ba so waʼohahau dödö yomo ba nomora. Hizaʼi, faʼomuso dödö nitutunö Yakobo yaʼia daʼö sambua moroi ba gotalua mbua-bua geheha Lowalangi, ba lö teʼodaligö daʼö moloʼö salua khö zi samösa niha. (Gal. 5:22) Irasoi waʼowua-wua dödö mazui faʼomuso dödö sindruhu si samösa niha Keriso, na aboto ba dödönia wa no iʼomusoiʼö dödö Yehowa ba iʼoʼö duma-duma Yesu. (Baso Luka 6:22, 23; Kol. 1:10, 11) Tola mufagölösi waʼomuso dödöda andrö simane hola-hola galitö si so bakha ba wandru ganefo. Telumöʼö galitö andrö moroi ba nangi mazui teu, irege lö mate hola-holania. Simanö göi, tola tarasoi waʼomuso dödö gofu hadia zalua ba waʼaurida. Lö tebulö tarasoi waʼomuso dödö hewaʼae na mofökhö ita mazui ide-ide gefeda. Ba lö taya daʼö börö wangoʼaya mazui fanaisi moroi ba nösi nomoda hegöi ira niha tanö böʼö. Itugu monönö waʼomuso dödöda ero na so niha sedöna mamakiko faʼomuso dödöda. Na göna ita fanandraigö börö wamatida, daʼö zi tobali tandra wa yaʼita andre sindruhu-ndruhu nifahaʼö Keriso. (Mat. 10:22; 24:9; Yoh. 15:20) Daʼö mbörö wa isura Yakobo, ”Yaʼami ira talifusö, miʼomusoiʼö dödömi na göna ami ngawalö wanandraigö.”​—Yak. 1:2.

7-8. Hana wa itugu aro wamatida na göna ita fanandraigö?

⁷ Itutunö Yakobo hadia dane-dane tanö böʼö wa aoha gölö niha Keriso ba wanaögö fanandraigö, hewaʼae na fanandraigö sebua daʼö. Imane, ”Na no tetandraigö wamatimi, lua-luania so khömi waʼanau gölö.” (Yak. 1:3) Tola muʼamaedolagö wanandraigö andrö simane famöbözi siʼöli. Itugu atarö ziʼöli na mutunu ba musöfu. Simanö göi, itugu aro wamatida na anau gölöda ba wanaögö fanandraigö. Daʼö mbörö wa isura Yakobo, ”Yalötebulö miforomaʼö waʼanau gölö irugi gamozua, enaʼö moʼahonoa ami, lö mosinegu.” (Yak. 1:4) Na taʼila wa tola möi fangaroʼö wamatida wanandraigö salua khöda, tola tataögö daʼö si fao faʼomuso dödö.

⁸ Ba zurania, itutunö göi Yakobo hadia manö zi tola mamakiko faʼomuso dödöda. Hadia manö daʼö, ba hewisa lalada ba wanaögö yaʼia?

9. Hana wa moguna khöda waʼatua-tua?

⁹ Si tobali taha-taha: Lö taʼila hadia zinangea tafalua. Na göna ita fanandraigö, omasi ita taʼandrö wanolo moroi khö Yehowa ba wangai angetula si tola mangomusoiʼö tödönia, sangaʼasogö bua si sökhi khö ndra talifusöda, ba sanolo yaʼita enaʼö lö faröi khönia. (Yer. 10:23) Moguna khöda waʼatua-tua enaʼö taʼila hadia zinangea tafalua ba hadia zinangea tawaʼö ba niha sanaisi yaʼita. Na lö taʼila hadia zinangea tafalua, tola manö tarasoi waʼide-ide dödö ba alio taya waʼomuso dödöda.

10. Moloʼö Yakobo 1:5, hadia zinangea tafalua enaʼö tasöndra waʼatua-tua?

¹⁰ Lala wangasiwai yaʼia: Andrö waʼatua-tua moroi khö Yehowa. Na omasi ita tataögö wanandraigö si fao faʼomuso dödö, moguna taʼandrö  khö Yehowa enaʼö ibeʼe khöda waʼatua-tua ba wangai angetula si tefaudu. (Baso Yakobo 1:5.) Hadia nifaluada na tarasoi wa lö iʼanemaiʼö ibeʼe wanema li ba wangandröda Yehowa? Imane Yakobo, ”Böi miböhöli wangandrö khö Lowalangi.” Lö aföli mazui mofönu Yehowa hewaʼae na no hauga kali taʼandrö khönia waʼatua-tua. Na taʼandrö waʼatua-tua ba wanaögö fanandraigö salua khöda, hasambalö ”fahöna wameʼe” Namada si so ba zorugo. (Si. 25:12, 13) Iʼila gabula dödö salua khöda, abu dödönia na tefakao waʼaurida, ba omasi sibai ia wanolo yaʼita. Daʼö mbörö wa omuso sibai dödöda! Hizaʼi, hewisa wameʼe Yehowa khöda faʼatua-tua?

11. Hadia nasa zinangea tafalua ba wanöndra faʼatua-tua?

¹¹ Iʼogunaʼö Daromalinia Yehowa ba wameʼe khöda faʼatua-tua. (Amd. 2:6) Enaʼö tasöndra waʼatua-tua andrö, moguna tafahaʼö ita ba Daromali Lowalangi hegöi ba publikasi si teʼodane-dane ba Zura Niʼamoniʼö. Hizaʼi, lö obönö na ha asala tafahaʼö ita. Moguna tafalua niʼandrö Lowalangi khöda. Imane Yakobo, ”Mifalua daromali, tenga ha asala mifondrondrongo manö.” (Yak. 1:22) Na tafalua mene-mene Lowalangi, tola tobali ita niha somasi faʼatulö, lö fatandro, ba safönu faʼahakhö dödö. (Yak. 3:17) Bua-bua andrö zanolo yaʼita enaʼö lö taya waʼomuso dödöda hewaʼae tataögö wanandraigö.

12. Hana wa moguna taʼokhögö waʼaboto ba dödö si tefaudu sanandrösa ba Zura Niʼamoniʼö?

¹² Hulö zörömi Daromali Lowalangi. Daʼö zanolo yaʼita ba wangiʼila hadia zinangea taʼatulöʼö ba hewisa wamaluada daʼö. (Yak. 1:23-25) Duma-dumania, me no aefa tafahaʼö ita ba Daromali Lowalangi, te aboto ba dödöda wa moguna so khöda wanaha tödö. Börö wanolo moroi khö Yehowa, tola tafahaʼö ita hewisa lala enaʼö lö alio mofönu ita na so niha sangandrö fönuda mazui alua khöda gabula dödö tanö böʼö. Na lö alio-lio mofönu ita, itugu aoha khöda ba wanaögö fanandraigö, taʼokhögö lala  wangera-ngera sohau-hau, ba tola tahalö gangetula sabölö sökhi. (Yak. 3:13) Sindruhu-ndruhu wa moguna sibai taʼokhögö waʼaboto ba dödö si tefaudu sanandrösa ba Zura Niʼamoniʼö!

13. Hana wa moguna tafahaʼö ita moroi ba duma-duma niha si so ba Zura Niʼamoniʼö?

¹³ Itaria, awena taʼila hadia zinangea tatimbagö na no aefa tafalua zala. Hizaʼi, tenga lala si sökhi daʼö ba wamahaʼö yaʼita. Lala sabölö sökhi ba wanöndra faʼatua-tua yaʼia daʼö tafahaʼö ita ba waʼamofozu hegöi ba zala nifalua niha tanö böʼö. Daʼö mbörö wa ifarou ita Yakobo ba wangosisiʼö duma-duma si so ba Zura Niʼamoniʼö, simane Aberahamo, Rakhaba, Yobi, hegöi Elia. (Yak. 2:21-26; 5:10, 11, 17, 18) Mofozu nono mbanua Yehowa si lö faröi andrö ba wanaögö fanandraigö si tola manayaigö faʼomuso dödöra. Duma-duma waʼanau gölöra andrö zangoromaʼö wa tola göi anau gölöda börö wanolo moroi khö Yehowa.

14-15. Hana wa moguna tatayaigö waʼaombö-aombö dödöda?

¹⁴ Si tobali taha-taha: Faʼaombö dödö. Na itugu numalö ginötö, tola manö so niwaʼö Zura Niʼamoniʼö sambö aboto ba dödöda. Mazui, lö tefaudu ba nitötönada wameʼe Yehowa fanema li ba wangandröda. Tola manö daʼö zangaʼasogö khöda faʼaombö dödö. Na lö taforege ba wanayaigö faʼaombö-aombö dödöda andrö, tola manö awuwu wamatida ba ifakiko wahuwusada khö Yehowa. (Yak. 1:7, 8) Baero daʼö, tola itayaigö dötönaföda sanandrösa ba zi so miföna.

¹⁵ Iwaʼö sinenge sotöi Faulo wa tötönaföda sanandrösa ba zi so miföna, tola muʼamaedolagö simane sao. (Heb. 6:19) Na alua mbade, tola muʼogunaʼö zao ba wanaha köfa enaʼö lö iʼoloiʼö ia bade ba lö itandru gara sebua. Hizaʼi, awena tola muʼogunaʼö zao andrö na lö saetu rate samakhai yaʼia ba göfa. Simane howu si tola mamakiko rate zao, tola awuwu wamatida na so khöda waʼaombö dödö. Aefa daʼö, na alua khöda gabula dödö, tola taya wamatida khö Yehowa wa hasambalö ifalua zi no ifabuʼu. Na taya wamatida, taya göi dötönaföda. Iwaʼö Yakobo wa niha saombö-aombö tödö, ”hulö ndrulu nasi nifadaulu-daulu nangi misa”. (Yak. 1:6) Si toʼölönia, lö faʼomuso dödö ba niha simane daʼö!

16. Hadia zinangea tafalua na so khöda waʼaombö dödö?

¹⁶ Lala wangasiwai yaʼia: Lawa waʼaombö-aombö dödö; aroʼö wamatimö. Böi radö-radö. Ba götö zamaʼeleʼö sotöi Elia, so waʼaombö dödö ba nono mbanua Yehowa. Imane khöra Elia, ”Hawaʼara nasa miböhöli wamodombua tödö andrö? Na Lowalangi sindruhu Yehowa, miʼoʼö ia. Hizaʼi, na sindruhu Mbaʼali, miʼoʼö ia!” (1 Ra. 18:21) Simane daʼö göi nifaluada ba götöda andre, böi taradö-radö. Moguna tafalua riset ba wamaduhuʼö samösa wa Yehowa andrö Lowalangi, Sura Niʼamoniʼö andrö Taromalinia, ba ono mbanuania ndra Samaduhuʼö Yehowa. (1 Te. 5:21) Na tafalua fefu daʼö, tola taya waʼaombö-aombö dödöda ba itugu aro wamatida. Na moguna khöda wanolo ba wanayaigö faʼaombö-aombö dödöda, tola tafatunö daʼö khö ndra satua sokubaloi. Böi taradö-radö na lö omasi ita taya waʼomuso dödöda ba wamosumange Yehowa!

17. Hadia zalua na so khöda waʼataʼu ba faʼafatö dödö?

¹⁷ Si tobali taha-taha: Faʼataʼu ba faʼafatö dödö. Imane Taromali Lowalangi, ”Na afatö dödöu ba ginötö waʼatosasa, ba ahori waʼabölöu.” (Amd. 24:10) Ba li Heberaiʼo, ngawua wehede ’faʼafatö dödö’ tola mufoʼeluaha ia tobali ”faʼataʼu”. Na so khöu waʼataʼu ba faʼafatö dödö, iʼanemaiʼö taya waʼomuso dödöu.

18. Hadia geluahania waʼanau gölö?

¹⁸ Lala wangasiwai yaʼia: Odaligö Yehowa sameʼe khöu faʼabölö ba faʼabarani enaʼö anau gölöu. Moguna khöda waʼabölö hegöi faʼabarani ba wanaögö fanandraigö. (Yak. 5:11) Ngawua wehede ’faʼanau gölö’ niʼogunaʼö Yakobo, manandrösa khö zi samösa niha si lö mangiwa ba nahia wetaronia. Te taʼangeragö sanandrösa khö  zi samösa saradadu si zizio ba nahiania si fao faʼabarani, ba lö moloi ia hewaʼae isuwö ia udu.

19. Hadia wamahaʼö si tola tahalö moroi ba duma-duma zinenge sotöi Faulo?

¹⁹ No iröi duma-duma si sökhi sibai sinenge sotöi Faulo sanandrösa ba waʼabarani hegöi faʼanau gölö. Itaria irasoi wa lö khönia faʼabölö. Hizaʼi, tola anau gölönia börö me iʼodaligö Yehowa sameʼe khönia faʼabölö ba faʼabarani. (2 Ko. 12:8-10; Fil. 4:13) Tola taʼokhögö waʼabölö hegöi faʼabarani simane daʼö, na tafaduhuʼö si fao fangide-ngideʼö wa moguna khöda wanolo moroi khö Yehowa.​—Yak. 4:10.

20-21. Hadia zi tola tafaduhusi tödö?

²⁰ Tola faduhu dödöda wa tenga fanguhuku moroi khö Yehowa wanandraigö salua khöda. Iʼaroʼö dödöda Yakobo, ”Na so zi göna fanandraigö, böi yamuwaʼö, ’No itandraigö ndraʼo Lowalangi,’ börö me tebai tetandraigö Lowalangi ba lö göi itandraigö niha ba zi lö sökhi.” (Yak. 1:13) Na faduhu dödöda ba daʼö, itugu ahatö ita khö Namada sebua faʼomasi si so ba zorugo.​—Yak. 4:8.

²¹ Lö irai tebulö Yehowa. (Yak. 1:17) No itolo niha Keriso me abad siföföna ba wanaögö fanandraigö salua khöra, ba hasambalö göi itolo ita ba ginötö andre. Andrö wanolo moroi khö Yehowa soroi ba dödö enaʼö ibeʼe khöu waʼatua-tua, famati, hegöi faʼabarani ba faʼabölö. Hasambalö ifondrondrongo wangandrömö. Börö daʼö, tola faduhu dödöu wa hasambalö itolo ndraʼugö enaʼö lö taya waʼomuso dödöu ba wanaögö fanandraigö!