Lafahaʼö ira ba zindruhu ira satuagu me döfi 1920-an fatua lö sangowalu ira. Tumbu ndraʼo me böröta ndröfi 1939. Toröi ndraʼaga ba Inggris. Iʼotarai ba waʼide-ide, lö tebulö fao ndraʼo khö ndra satuagu ba wangondrasi angowuloa, ba ba gafuriata fao ndraʼo ba Sekolah Pelayanan Teokratis. Itörö nasa tödögu me awena sibai mangai halöwö ndraʼo ba Sekolah Pelayanan Teokratis. Me luo daʼö, önö fakhe ndröfigu, ba abölö alawa mimbar moroi khögu. Börö daʼö, mozizio ndraʼo yawa ba kota-kota enaʼö tola uʼila fefu niha sangondrasi. Moʼugu-ugu sibai dödögu börö me fahuhuo ndraʼo föna niha sabölö alawa döfi moroi khögu.

Me föna, iketik ngawua wehede sadogo-dogo bapagu ba zi sagörö karate enaʼö tola uʼogunaʼö daʼö ba wanuriaigö. Walu fakhe ndröfigu me awena sibai möido manuriaigö samösa ba zi sambua omo. Omuso sibai dödögu börö me omasi zokhö omo ba wombaso karate niʼohegu, ba itema mbuku ”Karena Allah Itu Benar Adanya”! Iʼanemaiʼö ulau fagohi ba wanutunö daʼö khö bapagu. Omasido sibai weʼamöi manuriaigö hegöi feʼamöi ba gangowuloa. Daʼö mbörö wa terou dödögu ba wamalua halöwö safönu inötö khö Yehowa.

Ibörögö tofakha ba dödögu zindruhu si so ba Zura Niʼamoniʼö iʼotarai me ibeʼe khögu bapagu majalah Manuriaigö ero waŵa. Ero na tohare majalah andrö, iʼanemaiʼö ubaso daʼö si fao faʼamohiʼa dödö. Itugu ufaduhusi tödö Yehowa ba ululu waʼaurigu khönia ba gafuriata.

Me döfi 1950, fao ndraʼo khö ndra satuagu ba wangondrasi Pertemuan Wilayah Pertambahan Teokratis nifalua ba New York. Tuho ba ngaluo Kamis, 3 mbaŵa si Walu, yaʼia daʼö ”Hari Utusan Injil”. Me luo daʼö, talifusöda Carey Barber, si tobali Boto Solohe ba gafuriata, ifaʼema huhuo famayagö idanö. Ba gafuriata huhuonia, ifaʼema dombua  wanofu ba niha sedöna tebayagö idanö. Aefa daʼö, ulau mosindro ba utema li, ”Ya!” Hewaʼae na awena 11 fakhe ndröfigu, aboto ba dödögu wa no angetula si tohude daʼö. Me arakhagö labayagö ndraʼo idanö, fakhamö so khögu waʼataʼu börö me lö uʼila molangi. Hizaʼi, ifasao ndraʼo talifusö bapagu ba weʼamöi ba naha wamayagö idanö, ba ifaduhuʼö ba dödögu wa lö moguna ataʼu ndraʼo. Ba ha samuza wamayagö yaʼo idanö, lö naʼi fakhamö fatöfa gahegu ba doyo kolam. Me luo daʼö, so samösa dalifusöda ira matua samazawa yaʼo khö dalifusöda samayagö idanö. Aefa daʼö, ibayagö ndraʼo idanö ba mufuli zui mufazawa ndraʼo weʼamöi baero ba kolam. Iʼotarai ngaluo si tohude andrö, lö tebulö ituturu lalagu Yehowa enaʼö lö aetu utörö lala sadölö.

Sindruhunia, omasido merintis me no aefa tama ndraʼo sekola. Hizaʼi, möido kuliah börö me lafaso-faso ndraʼo ira gurugu. Lö ara me no ubörögö kuliah, aboto ba dödögu wa tebai ufosumange Yehowa soroi ba dödö na uʼosambuaʼö göi dödögu ba wolohi sekola salawa. Börö daʼö, uhalö gangetula ba wamöhöli kuliahgu. Uʼohe ba wangandrö gabula dödögu andrö khö Yehowa. Aefa daʼö, usura zura khö ndra dosen, ba uhaogö wanutunö khöra wa omasido uböhöli kuliahgu hewaʼae na awena döfi ndraʼo ba daʼö. Ba börö me ufaduhusi tödö Yehowa soroi ba dödö, iʼanemaiʼö ulau merintis.

Ubörögö wangai halöwö safönu inötö me baŵa si Fitu 1957 ba mbanua Wellingborough. Usofu khö ndra talifusöda sohalöwö ba Mbetieli London, hadia tola fao ndraʼo mangai halöwö khö zi samösa talifusöda si no ara tobali perintis. Ba gafuriata, itolo ndraʼo talifusöda Bert Vaisey. Oya wamahaʼö si tola uhalö moroi khönia. Owölö-ölö sibai ia, ba itolo ndraʼo enaʼö sökhi wamaʼanögu inötö weʼamöi manuriaigö. Ha yaʼo, talifusöda Vaisey, ba daönö dalifusöda ira alawe si no alawa döfi zi farahu ba mbanua niha Keriso si so yaʼaga. Börö me no ufalua wamaʼanö ba ufaʼema mbua gera-eragu ba gangowuloa, itugu oya ginötögu ba wondrouʼö faʼafaduhu dödögu khö Yehowa hegöi ba wamaduhuʼö famatigu.

Ba gafuriata, fakhamö labeʼe ndraʼo ba gurunga börö me lö omasido fao ba dinas militer. Aefa daʼö, falukha ndraʼo khö zi samösa perintis istimewa sotöi Barbara. Mangowalu ndraʼaga me döfi 1959, ba no mafaʼanöga gofu hezo lafatengega. Banua si oföna sibai mahalöwögöigö yaʼia daʼö Lancashire si so tanö yöu gaekhula Inggris. Me baŵa si Sara 1961, lakaoni ndraʼo wefao ba Sekolah Pelayanan Kerajaan ba Mbetieli London, sara waŵa waʼara. Me no aefa sekola, tokeado sibai börö me lafataro ndraʼo tobali satua samasui. Ba zi dua migu faʼara, ifomaha ndraʼo samösa satua samasui si no ara mangai halöwö ba mbanua Birmingham, ba latehegö fao khögu Barbara. Aefa daʼö, mangawuli ndraʼaga ba mbanua nifataro yaʼaga, yaʼia daʼö ba Lancashire hegöi Cheshire.

Me cuti ndraʼaga me baŵa si Walu 1962, matema zura moroi ba gödo ndraha. Ösinia yaʼia  daʼö formulir wefao ba Sekolah Gilead! Maʼohe daʼö ba wangandrö, aefa daʼö mafoʼösi formulirnia ba mafuli daʼö ba gödo ndraha simane si no muwaʼö ba zura andrö. Lima waŵa aefa daʼö, möiga ba Brooklyn, New York, ba wefao ba kelas Gilead si 38. Sagötö zi fulu waŵa, itugu oya waʼaboto ba dödö nitemama sanandrösa ba Zura Niʼamoniʼö.

Ba Sekolah Gilead, lafahaʼö ndraʼaga sanandrösa ba Daromali Lowalangi, organisasinia, hegöi salua khö ndra talifusöda ba zi sagörö ulidanö. Me luo daʼö, awena töra 20 fakhe ndröfima. Oya wamahaʼö nitemama moroi khö ndra talifusöda si fao ba kelas daʼö. Omuso sibai dödögu börö me tola falulu fohalöwö ndraʼo ero maʼökhö khö dalifusöda Fred Rusk, samösa moroi ba gotalua instrukturma. Sambua wamahaʼö si sökhi nitandrösaigönia yaʼia daʼö wa moguna sibai wameʼe mene-mene ba lala si tefaudu. Moguna tatatugöi wa teʼodane-dane mene-mene nibeʼeda ba Zura Niʼamoniʼö. Baero ndra instruktur, so göi ösa ndra talifusöda si no ara mangai halöwö si möi mamahaʼö yaʼaga ba kelas, simane Nathan Knorr, Frederick Franz, hegöi Karl Klein. Oya göi wamahaʼö nihalöma moroi khö dalifusöda A. H. Macmillan sangokhögö fangide-ngideʼö. Moroi ba huhuo nifaʼemania, tola aboto ba dödöma hewisa wanolo Yehowa ono mbanuania, me lataögö ginötö si basaki iʼotarai me döfi 1914 irugi mböröta ndröfi 1919!

Fatua lö awai zekola andrö, ifatunö khöma talifusöda Knorr wa mufataro dania ndraʼaga ba Burundi, Afrika. Iʼanemaiʼö möiga ba perpustakaan Mbetieli ba maʼalui Buku Tahunan enaʼö maʼila hawaʼato zanuriaigö si so ba Burundi. Tokea ndraʼaga börö me lö hadöi angombakhata sanandrösa ba waʼato ndra sanuriaigö ba daʼö. Awena maʼila wa mufataro dania ndraʼaga ba nahia si lö irai muturiaigö. Lö göi oya niʼilama sanandrösa ba Afrika. Ataʼu sibai ndraʼaga! Hizaʼi, tola marasoi waʼahono dödö me no aefa mangandröga.

Faböʼö sibai nahiama si bohou moroi ba nahiama si oföna, he moroi ba cuacania, si toʼölö mufalua, hegöi li niʼogunaʼö ba daʼö. Moguna mafahaʼö ndraʼaga ba li Prancis. Baero daʼö, lö göi maʼila hezo so dania toröiga. Dua hari me no ofetaga, itörö khöma Harry Arnott me edöna ifuli ia ba nahia nifataro yaʼia ba Zambia. Börö wanolonia, tola masöndra sambua apartemen si tobali omoma si oföna, sagötö wamaluama halöwö utusan injil. Hizaʼi, lö ara aefa daʼö, lasaisi ndraʼaga ira samatörö. Lö irai larongo sanandrösa khö ndra Samaduhuʼö  Yehowa. Me luo daʼö, awena ibörögö marasoi waʼomuso dödö ba wamalua halöwöma. Hizaʼi, lö latehegö khöma ira samatörö na toröiga ba daʼö börö me lö hadöi khöma sura-sura sanehegö halöwö nifaluama. Lö tola löʼö mofanö ndraʼaga, ba mafaudugö zui waʼaurima ba soi si bohou, yaʼia daʼö Uganda.

Sindruhunia, ataʼuga weʼamöi ba Uganda na lö hadöi khöma visa. Hizaʼi, faduhu dödöma khö Yehowa. Itolo ndraʼaga si samösa talifusöda moroi ba Kanada, sangai halöwö ba Uganda. Itutunö zalua khöma khö zohalöwö ba gödo imigrasi, ba labeʼe khöma ginötö mato hauga waŵa ba wamazökhi sura-sura waʼatoröi. Daʼa zangaʼaroʼö tödöma wa sindruhu-ndruhu itolo ndraʼaga Yehowa.

Faböʼö sibai zalua ba Uganda moroi ba zalua ba Burundi. No mufalua halöwö fanuriaigö ba Uganda, hewaʼae na awena 28 niha waʼato Zamaduhuʼö ba soi daʼö. Ba nahia si toröi yaʼaga, ato niha sangila fahuhuo ba li Inggris. Hizaʼi, aboto ba dödöma wa moguna mafahaʼö ndraʼaga ba li niʼogunaʼö ba mbanua daʼö enaʼö tola ladouʼö ira ba wamati. Ibörögö manuriaigö ndraʼaga ba mbanua Kampala. Li Luganda zi toʼölö muʼogunaʼö ba daʼö. Andrö wa mafahaʼö ndraʼaga ba li daʼö. Moguna khöma ginötö mato hauga fakhe enaʼö tola onekhega fahuhuo ba li Luganda. Hizaʼi, tenga zaya-zaya gölö daʼö börö me itugu mofozu ndraʼaga wamalua fanuriaigö. Ibörögö maʼila hadia zoguna ba wamati khö ndra niha nifahaʼöma ba Zura Niʼamoniʼö. Buania, ibörögö lafaduhusi tödö ndraʼaga, ba omasi ira latutunö khöma nösi dödöra sanandrösa ba zi no lafahaʼö yaʼira.

Omasiga sibai wamahaʼö niha ba zindruhu. Hizaʼi, itugu tedou waʼomuso dödöma me laʼandrö khöma ba wamalua halöwö famasui. Simane fanuturu lala nitemama moroi ba gödo ndraha Kenya, ibörögö matöröi mbanua sinangea latolo ira perintis istimewa. No hauga kali latemaʼö ndraʼaga ira niha si so ba mbanua daʼö si fao faʼomuso dödö, hewaʼae na lö irai falukha ira khö ndra Samaduhuʼö Yehowa. Baero daʼö, itaria göi labeʼe göma.

Lö si tebato woʼanöröima banua. Moroi ba Kampala, utörö kereta api ba zi dua hari faʼara numalö ba labua göfa ba mbanua Mombasa, Kenya. Aefa daʼö, utörö göfa nasi weʼamöi ba Seychelles, sambua hulo si so ba Samudra Hindia. Ba gafuriata, iʼotarai döfi 1965 irugi 1972, asese möiga ba hulo andrö Barbara. Ba wamobörö, ha darua zanuriaigö si so ba daʼö. Hizaʼi aefa daʼö, ibörögö so kelompok irege tola mufasindro mbanua niha Keriso ba gafuriata. Utöröi göi mbanua Eritrea, Etiopia, hegöi Sudan ba wamalukhaisi ira talifusöda si so ba daʼö.

Tebulö sistem politik ba Uganda me ira saradadu zi tobali samatörö. Alua ginötö si basaki andrö ba zi hauga fakhe faʼara. Aboto ba dödögu wa no angetula si tefaudu na taʼoʼö goroisa Zura Niʼamoniʼö ba ’wameʼe khö Kaisaro tana khö Kaisaro’. (Mrk. 12:17) Samuza maʼökhö, laʼandrö khö ndra niha si fatewu ba wamasuraʼö töira ba gödo wolisi. Iʼanemaiʼö maʼoʼö daʼö. Hizaʼi, me mofanö ndraʼo hegöi utusan injil tanö böʼö ba zi hauga hari aefa daʼö, laʼondrasi ndraʼaga ira folisi me mataluʼi mbanua Kampala. Ataʼu sibai ndraʼaga! Lawaʼö wa yaʼaga andre samauze, ba laʼohega ba gödo wolisi. Matutunö ba daʼö wa yaʼaga andre ha utusan injil ba no mafasuraʼö döima. Hizaʼi, lö faduhu dödöra. Laʼohega ba gödo wolisi sahatö ba nomoma ba ato zozago yaʼaga. Harazaki sibai wa lö solifu niha sohalöwö ba daʼö wa no irai mafasuraʼö döima  khönia. Börö daʼö, iwaʼö khöra enaʼö laʼefasi ndraʼaga. Ahono sibai dödöma!

Asese motaro börö mbu ndraʼaga ero na labatogö motoma ba gödo zaradadu, mendrua manö na awena awai mamadu tuo ira. Malau mangandrö ero na alua khöma zimane daʼö. Buania, tola marasoi waʼahono dödö ba latehegö khöma wofanö. Hizaʼi alimagö sibai, me döfi 1973, laʼandrö khö ndra utusan injil si fatewu ba Uganda enaʼö laröi soi daʼö.

Börö daʼö, tebulö zui halöwöma. Sakali daʼa, lafataro ndraʼaga ba Pantai Gading, Afrika Barat. Moguna mafahaʼö ndraʼaga ba li si bohou, mafuli maʼogunaʼö li Prancis, ba mafaudugö waʼaurima khö ndra utusan injil tanö böʼö sangokhögö waö-waö waʼauri si faböʼö-böʼö. Sakali tö, ifuli marasoi wanolo moroi khö Yehowa börö me lö ara aefa daʼö, latemaʼö duria somuso dödö ira niha sangokhögö fangide-ngideʼö ba sadölö tödö. Yehowa zangadölöʼö lala nitöröma börö me faduhu dödöma khönia.

Ba zi lö mudöna-döna, lawaʼö ira doto wa no göna Barbara fökhö kanker. No hauga kali möiga ba Eropa enaʼö döhö wökhönia. Hizaʼi me döfi 1983, aboto ba dödöma wa tebai saʼae mangai halöwö ndraʼaga ba Afrika. Abu sibai dödöma!

Me mangai halöwö ndraʼaga ba Mbetieli London, itugu tebai Barbara ba mate ia ba gafuriata. No sahöli dödö wanolo nitemagu moroi ba nösi nomo Mbetieli, mendrua manö moroi khö zi sambua fongambatö sanolo yaʼo ba wamaudugö faʼaurigu hegöi ba wangodaligö Yehowa. Ba gafuriata, falukha ndraʼo khö dalifusöda ira alawe sotöi Ann, sangai halöwö tobali komuter. No irai tobali ia perintis istimewa, ba iʼomasiʼö sibai Yehowa. Mangowalu ndraʼaga me döfi 1989, ba faoga mangai halöwö ba Mbetieli London irugi maʼökhö.

Iʼotarai me döfi 1995 irugi 2018, mangai halöwö ndraʼo tobali sosalahini gödo sebua (lafotöi daʼö ba zilalö pengawas zona). Barö zi hauga fakhe andrö, so arakhagö 60 soi zi no maʼondrasi. Ero na uʼondrasi ira, tola uʼila hewisa wamahowuʼö Yehowa ono mbanuania gofu hadia zalua khöra.

Me döfi 2017, ifuli möido ba Afrika. Omuso sibai dödögu me uʼohe Ann ba Burundi si oföna sibai. Ahöli sibai dödöma me maʼila wa ato sibai niha sanemaʼö sindruhu. Ba lala sasese utörö weʼamöi manuriaigö ba nomo-omo me döfi 1964, no mufasindro ba daʼö nomo si sökhi sibai si tobali nahia ndra sohalöwö ba Mbetieli. Iadaʼa, töra 15.500 waʼato zanuriaigö ba soi daʼö.

Omuso sibai dödögu me lafatunö khögu hadia manö soi niʼondrasigu ba ndröfi 2018. Sambua moroi ba gotaluania yaʼia daʼö Pantai Gading. Me ofetaga ba Abidjan, ibu kota soi daʼö, hulö zangawuli ba mbanuagu ndraʼo. Me ufaigi numero HP ndra talifusöda sohalöwö ba Mbetieli, uʼila wa talifusöda Sossou zi toröi ba zi tambai mbateʼe dome si so ba Mbetieli. Itörö tödögu wa yaʼia zi tobali pengawas kota me mangai halöwö ndraʼo ba Abidjan. Sindruhunia sa, tenga yaʼia daʼö, hizaʼi ononia.

Sindruhu-ndruhu wa ifalua mbuʼusa linia Yehowa. Moroi ba ngawalö gabula dödö salua khögu, tola ufahaʼö ndraʼo wa hasambalö iʼadölöʼö lala nitöröda Yehowa na tafaduhusi tödö ia. Omasido enaʼö lö uböhöli wanörö lala saekhu ba waʼauri si lö aetu ba gulidanö si bohou.​—Amd. 4:18.