1. Hana wa moguna sibai wamayagö idanö? (Faigi gambara ba wamobörö wamaha’ö.)

ERO röfi, ngahönö niha nifaha’ö ba Zura Ni’amoni’ö nibayagö idanö. Ato ba gotaluara zi bohou ebua mazui iraono side-ide. Tola manö no lafaha’ö ira ba zindruhu i’otarai ba wa’ide-ide. Hadia tefarahu göi ndra’ugö ba gotaluara? Na ya’ia, no öfalua zabölö sökhi. Fefu niha Keriso moguna tebayagö idanö. Da’a no sambua lala ena’ö tola te’orifi ba auri ita sagötö fa’ara.​—Matai’o 28:19, 20; 1 Fetero 3:21.

2. Hana wa lö moguna ata’u’ö ba wolulu fa’aurimö khö Yehowa?

² Na no tebayagö ndra’ugö idanö, oya howu-howu si bohou nibe’e Yehowa khömö. Hiza’i, so göi noro dödö si bohou ni’okhögömö. Hadia da’ö? Me tebayagö ndra’ugö idanö, ibe’e khömö wanofu talifusöda sangolohesi huhuo imane, ”Te’odane-dane ba höli si no ibe’e Yesu Keriso, hadia no öfalalini gera-erau, ba ölulu wa’auriu khö Yehowa ba wamalua ohitö dödönia?” Ötema li, ya. Öfabu’u wa ö’omasi’ö Yehowa ba ö’ofönai’ö wamosumange ya’ia ba wa’aurimö.  Hadia maniasa ndra’ugö börö me no öfabu’u da’ö? Tatu lö’ö! Lö irai maniasa ndra’ugö ba wolulu fa’aurimö khö Yehowa. Niha si lö mangokhögö fa’aboto ba dödö sanandrösa khö Yehowa no tobali ira ösi gulidanö Zatana. Lö irorogö ndra’ugö hegöi ya’ira Afökha. Sindruhunia, omuso dödönia na lö ö’okhögö wa’auri si lö aetu börö me fao ndra’ugö khönia ba ötimbagö Yehowa.

3. Hewisa wamahowu’ö Yehowa ndra’ugö me no ölulu wa’aurimö khönia?

³ Angeraigö hewisa wamahowu’ö Yehowa ya’ugö börö me no ölulu wa’aurimö khönia ba me no tebayagö ndra’ugö idanö. No ölulu wa’aurimö khö Yehowa, andrö wa tola öwa’ö si fao fa’afaduhu dödö, ”Awögu Yehowa, ba lö ata’u ndra’o. Hadia nilau niha khögu ena’ö?” (Zinunö 118:6) No töi sebua na fa’awö ndra’ugö khö Lowalangi ba na ö’ila wa omuso dödönia khömö.

4, 5. (a) Hana wa folulu fa’auri no noro dödöda zamösana? (b) Hadia wanandraigö nitaögö niha Keriso?

⁴ Fahuwusamö khö Yehowa lö te’odaligö khö ndra satuamö. Hewa’ae na khö ndra satuamö toröi nasa ndra’ugö, hiza’i ya’ugö samösa zonorogö tödö wahuwusamö khö Yehowa. Hana wa moguna ötörö tödömö da’ö? Fefu ita, tola manö tetandraigö wamatida ba zi so föna. Duma-dumania, te no tebayagö ndra’ugö idanö fatua lö sibiha mboto nasa ndra’ugö. Hiza’i me itugu ebua-bua ndra’ugö, so gisö-isö dödö hegöi abula dödömö si bohou. Imane samösa ono alawe si bohou ebua, ”Me ide-ide ita, tola manö lö maniasa ita tobali Samaduhu’ö Yehowa ha börö me lö tatema kue ulang tahun ba zekola. Hiza’i, hauga fakhe aefa da’ö, na ibörögö ebua gisö-isö dödö ba wamalua fohorö, moguna sindruhu-ndruhu tafaduhusi tödö wa no angetula si sökhi na ta’o’ö goi-goi Yehowa.”

⁵ Tenga ha si bohou ebua zanaögö abula dödö si bohou. Niha nibayagö idanö me no tobali satua, tola manö tetandraigö wamatira ba zi lö mudöna-döna. Duma-dumania, abula dödö ba wongambatö, fökhö hegöi ba halöwöra. Hiza’i, gofu hauga fakhe ndröfida, moguna böi faröi ita khö Yehowa gofu hadia zalua khöda.​—Yakobo 1:12-14.

6. (a) Hadia geluahania ölulu wa’aurimö khö Yehowa gofu hadia zalua? (b) Hadia wamaha’ö nihalömö ba Filifi 4:11-13?

⁶ Ena’ö lö faröi ndra’ugö, böi aetu törö tödömö wa no fawu’uli ndra’ugö khö Yehowa gofu hadia zalua. Eluahania, fawu’u li ndra’ugö khö Lowalangi Fondrege Zalawa wa öfosumange ia gofu hadia zalua, hewa’ae na laböhöli wamalua da’ö ira awömö hegöi ira satuamö. (Zinunö 27:10) Gofu hadia zalua, andrö wanolo moroi khö Yehowa ena’ö tola öfalua hadia zi no öfabu’u khönia.​—Baso Filifi 4:11-13.

7. Hadia geluahania mangalui fangorifi si fao ’fa’ata’u ba fanizi-nizi’?

⁷ Omasi Yehowa na tobali ndra’ugö si fahuwu khönia. Hiza’i, moguna öforege ena’ö lö mamalö aro wahuwusamö khönia ba ena’ö ösöndra wangorifi. Imane Filifi 2:12, ”Simanö göi mi’alui wangorifimi andrö ba mbanua furi, sata’u ami ba sanizi-nizi.” Eluahania, moguna tahaogö ta’angeraigö hewisa ena’ö lö mamalö ahatö ita khö Yehowa ba lö faröi  ita gofu hadia zalua. Tebai ta’aohasi wanguma’ö wa tola tafalua da’ö. Törö tödömö wa niha si no hauga fakhe mamosumange Lowalangi tola manö faröi. Hadia zi tola manolo ya’ugö ba wanöndra fangorifi?

8. Hadia manö zi tefarahu ba wamaha’ö samösa? Hana wa moguna da’ö?

⁸ Ena’ö tobali ita si fahuwu khö Yehowa, moguna tafondrondrongo ba fahuhuo ita khönia. Lala si oföna ba wamondrondrongo Yehowa ya’ia da’ö tafaha’ö ita ba Zura Ni’amoni’ö. Duma-dumania, tabaso ba ta’angerönusi Daromali Lowalangi hegöi publikasi si te’odane-dane ba Zura Ni’amoni’ö. Hiza’i, famaha’ö ba Zura Ni’amoni’ö tenga ha asala tatanö ba dödöda simane na so ujian ba zekola. Moguna ta’osisi’ö ba ta’alui ngawalö zi bohou sanandrösa khö Yehowa. Buania, tola itugu ahatö ndra’ugö khö Lowalangi ba tola göi ahatö ia khöu.​—Yakobo 4:8.

9. Hadia manö fakake ni’oguna’ömö ba wamalua famaha’ö samösa?

⁹ Oya fakake si no ihenaigö organisasi Yehowa sanolo ya’ugö ba wamalua famaha’ö ba Zura Ni’amoni’ö. Duma-dumania, seri ”Menggali Isi Alkitab” ba faosatö ”Anak Muda” si so ba jw.org, sanolo ya’ugö ba wamalua hadia wamaha’ö nisöndramö ba waö-waö Zura Ni’amoni’ö. Aefa da’ö, ba jw.org so panduan belajar ”Apa yang Sebenarnya Alkitab Ajarkan?”  Tola itolo ndra’ugö da’a ba wangaro’ö famatimö ba ena’ö tola öfatunö ba niha bö’ö hadia nifaduhusimö tödö. Tola ösöndra mene-mene tanö bö’ö ba artikel ”Kaum Muda Bertanya . . . Bagaimana Aku Bisa Menikmati Pembacaan Alkitab?” ba Sedarlah! Baŵa si Öfa 2009. Famaha’ö hegöi fo’angerönusi moguna sibai ba wangalui fangorifimö samösa.​—Baso Zinunö 119:105.

10. Hana wa moguna mangandrö niha Keriso si no tebayagö idanö?

¹⁰ Na tafaha’ö ita ba Zura Ni’amoni’ö, no tafondrondrongo Yehowa. Ba na talau mangandrö, no fahuhuo ita khönia. Böi so ba wangera-ngerada wa no si to’ölö mufalua wangandrö mazui simane ’hazima’ solohe howu-howu. Ba ginötö mangandrö, sindruhu-ndruhu fahuhuo ita khö Zomböi ya’ita. Omasi Yehowa ifondrondrongo hadia wangandrömö. (Baso Filifi 4:6.) Andrö, gofu hadia gabula dödömö, imane Sura Ni’amoni’ö, ”Be’e noro Yehowa norou andrö.” (Zinunö 55:23) Zuta ndra talifusöda si no morasoi wanolo moroi ba mene-mene da’ö. Ba tola göi möi fanolomö da’ö!

11. Hana wa moguna asese ö’andrö saohagölö khö Yehowa?

¹¹ Hiza’i, tenga ha na so ni’andröda awena talau mangandrö khö Yehowa. Ifasugi ba dödöda Sura Ni’amoni’ö, ”Ba mi’andrö saohagölö.” (Kolose 3:15) Itaria, abu sibai dödöda ba wanandraigö nitaögöda irege olifu ita hadia zi sökhi si no tatema. Andrö, tandraigö falua da’a: Ero ma’ökhö, angeraigö si lö’ö-lö’önia tölu ngawalö ni’andrömö saohagölö, ba andrö saohagölö khö Yehowa da’ö. Imane Abigail si bohou ebua si no tebayagö idanö me 12 fakhe ndröfinia, ”Ha Yehowa zinangea manema fangandröda saohagölö. Andrö wa no sinangea ta’andrö saohagölö khönia ba mbuala si no ibe’e khöda.” Itaria, isofu khönia samösa Abigail wanofu si no irai irongo, ”Na mahemolu ta’okhögö nasa hadia ni’andröda saohagölö khö Yehowa ba zi ma’ökhö andre, hadia manö nasa ni’okhögöda?” * (Faigi nisura ba gahe zura.)

12, 13. Hadia zi no irai alua khömö sangoroma’ö wa no si sökhi Yehowa, ba hana wa moguna sibai ö’angeraigö hewisa wanolonia ya’ugö?

¹² Itolo Razo Dawido Yehowa ba wanaögö ngawalö gabula dödönia. Ba zi no irai alua khönia samösa, andrö wa tola iwa’ö Dawido, ”Mitandra ba mifaigi, wa no sebua tödö Yehowa, ya’ahowu zanötöna khönia.” (Zinunö 34:9) Ayati da’a zangoroma’ö khöda wa moguna tarasoi samösa wa’asökhi dödö Yehowa. Na öbaso Zura Ni’amoni’ö, publikasida hegöi na möi’ö ba gangowuloa, öfaha’ö ndra’ugö hewisa lala Lowalangi ba wanolo niha bö’ö ena’ö lö faröi ira. Hiza’i, ena’ö itugu aro wahuwusamö khö  Yehowa, moguna örasoi samösa hewisa wanolonia ya’ugö. Hadia zi no irai alua khömö si tola mamaduhu’ö tödömö wa no si sökhi Yehowa?

¹³ Fefu niha Keriso no larasoi samösa hewisa wa’asökhi dödö Yehowa khöra. So sambua lala si tohude. Ikaoni ita zamösana ena’ö tahatö’ö ita khönia hegöi khö Nononia. Imane Yesu, ”Lö sangila möi khögu, na tenga Amagu, samatenge ya’o, zondrönisi ya’ia.” (Yohane 6:44) Hadia örasoi wa no idöni ndra’ugö Yehowa? Mazui, hadia so ba wangera-ngeramö da’a, ’No idöni zatuagu Yehowa ba ha si fao-fao ndra’o’? Törö tödömö wa no ö’okhögö wahuwusa si sökhi khö Yehowa me ölulu wa’aurimö khönia ba tebayagö ndra’ugö idanö. Itutunö khöda Sura Ni’amoni’ö, ”Ba na so zangomasi’ö Lowalangi, da’ö zaboto ba dödö Lowalangi.” (1 Korindro 8:3) Böi mamalö ame’egö tödö ginötö nibe’e Yehowa khömö tobali ösi organisasinia.

14, 15. Hewisa wanuriaigö möi fanolomö ba wangokhögö famati saro?

¹⁴ Örasoi göi wa’asökhi dödö Yehowa ba ginötö ibe’e khöu wa’abarani ba wamatunö hadia nifaduhusimö tödö ba niha bö’ö, he ba wanuriaigö mazui ba zekola. Tola manö abua khömö wanuriaigö khö ndra awöu sekola. Te aombö dödömö hadia dania nifaluara. Mendrua manö na ötutunö hadia nifaduhusimö tödö föna niha sato. Hadia zi tola manolo ya’ugö?

¹⁵ Angeraigö hana wa aro dödömö ba nifaduhusimö tödö. Na so panduan belajar ba jw.org ba li ni’oguna’ömö, oguna’ö da’ö. Da’a zanolo ya’ugö ba wo’angeraigö hadia nifaduhusimö tödö, hana wa faduhu dödömö ba da’ö hegöi lala wanutunö ya’ia ba niha bö’ö. Na sindruhu-ndruhu faduhu dödömö ba na no öhaogö öfa’anö ndra’ugö, hasambalö omasi’ö ötutunö sanandrösa khö Yehowa.​—Yeremia 20:8, 9.

16. Hadia zi tola öfalua ena’ö so khöu wa’abarani ba wanutunö hadia nifaduhusimö tödö?

¹⁶ Hewa’ae no öhaogö öfa’anö ndra’ugö, te so nasa khöu wa’ata’u ba wanutunö hadia nifaduhusimö tödö. Imane samösa talifusöda ira alawe si no 18 fakhe ba si no tebayagö idanö me 13 fakhe ndröfinia, ”U’ila hadia nifaduhusigu tödö, hiza’i itaria abua khögu ba wama’anö fehede ni’oguna’ögu.” Andrö wa i’oguna’ö lala wahuhuosa hegöi ngawua wehede si to’ölö manö ba wanutunö famatinia. Imane nasa, ”Asese latutunö ira awögu sekola hadia manö halöwöra si fao fa’afaduhu dödö. Simane da’ö göi ndra’o mena’ö. Andrö wa ufaogö-faogö wanutunö ya’ia ba wahuhuosagu. Duma-dumania umane, ’Menewi no ufaha’ö niha ba Zura Ni’amoni’ö, ba . . . ’ Aefa da’ö, utohugö manö fahuhuo. Sindruhusa wa tenga sanandrösa ba Zura Ni’amoni’ö duho si oföna nifatunögu. Hiza’i, ato ndra awögu somasi mangila hadia nifaluagu na ufaha’ö niha ba Zura Ni’amoni’ö. Itaria lasofu khögu sanandrösa ba  da’ö. Itugu asese u’oguna’ö lala da’a, ba itugu aoha khögu ba wanutunö hadia nifaduhusigu tödö. Buania, urasoi wa’omuso dödö sebua!”

17. Hadia manö zi tola manolo ya’ugö ba wanutunö hadia nifaduhusimö tödö?

¹⁷ Na larasoi niha bö’ö wa sindruhu-ndruhu ö’ame’egö tödö ba ö’osinangegö ira, aoha khöra ba wo’ame’egö tödö ndra’ugö hegöi hadia nifaduhusimö tödö. Imane Olivia si no 17 fakhe ba si no tebayagö idanö me awuyu-wuyu sibai ndröfinia, ”Ata’udo ma lawa’ö khögu fanatik na ututunö sanandrösa ba Zura Ni’amoni’ö na fahuhuodo.” Hiza’i, ibörötaigö fabö’ö lala wangera-ngerania. Moroi na aombö dödönia ba da’ö, i’angeraigö da’a: ”Ato ndra si bohou ebua si lö mangokhögö fa’aboto ba dödö sanandrösa khö ndra Samaduhu’ö Yehowa. Te awena la’ila ia moroi khöda. Andrö, lalada ba wama’ema ya’ia möi fotatugöi hewisa lagura khö ndra Samaduhu’ö. Na aila ita, ata’u mazui abua khöda ba wanutunö famatida, hulö na tawa’ö wa aila ita tobali Samaduhu’ö Yehowa. Ba tola manö lö omasi ira sa’ae khö ndra Samaduhu’ö börö me lö khöda fa’abarani. Hiza’i, na tatutunö khöra hadia nifaduhusida tödö si fao fa’ahono ba fa’afaduhu dödö, simane si to’ölö na fahuhuo ita, tola itugu la’ame’egö tödö ita.”

18. Hadia zinangea öfalua ba wangalui fangorifimö samösa?

¹⁸ Ö’okhögö noro dödö sebua ba wangalui fangorifimö samösa. Ba wamalua da’ö, moguna öbaso ba ö’angerönusi Daromali Lowalangi, angandrö khö Yehowa ba haogö angeraigö fefu zi no ifalua ba wanolo ya’ugö. Na öfalua da’ö tetolo ndra’ugö ena’ö tola itugu faduhu dödömö wa Yehowa no si Fahuwu khömö. Da’a zamarou tödömö ba wanutunö hadia nifaduhusimö tödö ba niha bö’ö.​—Baso Zinunö 73:28.

19. Hana wa tenga zaya-zaya gölö na öforege wangalui fangorifimö?

¹⁹ Imane Yesu, ’Na so zedöna molo’ö ya’o, ba yamu’ositengagö ia ba yamulu’i döla geu famakao ba yamu’o’ö ndra’o.’ (Matai’o 16:24) Ena’ö tola tobali solo’ö khö Yesu, fefu niha Keriso moguna lalulu wa’aurira khö Yehowa ba tebayagö idanö. Hiza’i, awena famobörö da’ö ba wangokhögö fa’auri si sökhi iada’a. Da’a zanolo ya’ita ba wangokhögö fa’auri si lö aetu ba gulidanö si bohou khö Lowalangi. Börö da’ö, falua fefu zi tola öfalua ba wangalui fangorifimö samösa!